Niqiliqivik 2019                               
Debbie Molloy tikkuaqtauyuq nutaangupluni Havaktut Qayagitjutighainnik Ikayuqhakuttighainit Katimayinut (WSCC) ANGAYUQQAAQ AULAPKAIYIRYUALLUAQLU TITIRAQTI

WSCC-kut Ataniqtuqtuiyut Katimayiit uqaqhimayut tatqiqhiunmi atuqtumi taimaa tikkuaqhiyut Debbie Molloy-mik nutaangupluni Angayuqqaaq Aulapkaiyiryualluaqlu Titiraqti.

"Debbie Molloy avugiittiaqtunik ilihimayaqaqtuq ikayuutighat WSCC-kut hivumuuqpalliaplutik. Ilitturinnaqtumik hivulliqtiuvaktuq naunaittuqlu taimaa ayuitait, ikpigiyait, ihumagiyaillu nakurutauniaqtut havakviptingnut," Dave Tucker uqaqtuq, Ighivautalik WSCC-kut Ataniqtuqtuiyut Katimayiinut. 

Molloy 25 ukiut avatquttugit aulahimmaaqtumik aulapkaiyiuvaktuq hivuliqtiupluni. Ilihimayaqaqtuq aanniaqtuliqiyit ikayuutainit qulliliqiyinilu, hakugingniqaqhuni ihuaqnighakkut upalungaiyainiqmik, havakvingnit aanniaqtailiniqmik aanniqtailiniqmiklu, havakvingnilu parnaihimattiarniq. Molloy qangahaaq Angayuqqaam-Tukligivagaat talvani Kuapuriissat Ikayuqtiinit Kivalliqhiqmi Aanniaqtuliqiyinit, St. John's-mi, talvani angayughiqtut hivuliqtiuhimayuq taapkualu 13,000-nguyut havaktiit, 750-nguplutik taaktit, 2,200-nguyut ikayuqtiit, 900-nguyut ilihaqtut imaalu ikayuqhugit 300,000-nguyut inuit.

"Quviahuttiaqtunga hapkua ahuurnaqtut havaaghanit hivuliqtuiyaami WSCC-kunnik ikayuqhimmaaqhugit havakviit havaktiillu Nunattiami Nunavunmilu, aulapkaihimmaaqhutik manighiurniqmut havauhirnik." uqaqtuq Molloy.

Malighugit taapkua Havaktit Ikayuutinut Maligait, Molloy tikkuaqtauhimayuq taapkuninnga Ataniqtuqtuiyut Katimayiit, qiniqhiaghaaqtaaqhutik nunaptingnit. Upluq havaliqvighaat tallimanik ukiunik Hivulliunmi, Niqiliqivik 12-mi, 2019-mi.
Nutaaq Pivighanut Takupkaqtitaghaq: ilitturvighat Makpiraat inulramminut nutaanullu havaktinut
makitapkaiyut hakugiktumik aanniqtailiniqmut ilitquhirnik


Havagialihaariamik quviattangnaqtuq, kihimi nutaat havaktit amihumik ayuiqtaghalgit. Havakviit qauhittiarnaqtumik ilittuqhitigumik hakugiktumik tunngavighaliurnaqtuq hakugiktumik ilitquhiqariamik. Ikayuqtuiyaamik havakvingnik hapkunani ayurnavyaktunit havauhirnit, WSCC-kut aniguqtittihimayut taapkuninnga Inulrammiq taamnalu Nutaaq Havaktit llitturvighaat: Pivighauyuq NT-mi NU-milu Havakvingnut. Hapkua makpiraat ihumagilluaqtait ilihainiq havaktinik nutaanguqpiaqtut havakvingnut Nunattiami Nunavunmilu.

Makpiraat hapkua titiraqaqtut ikayuutauyut ilittuqhititut, taiguaqtaghaniklu qauyihaqtaghaniklu. Ilittuqhitivaktuqlu Nunattiami Nunavunmilu Aanniqtailiniqmut Maligaqnik taaffuminngalu Havakvingnit Aanniqtailiniqmut Aanniqtailiniqmullu (OHS) Maliktagaht ihuaqutauyut ilihainiqmut, ilihaqtaghanut, ilittuqhitiyunullu. Makpiraat hapkua atuqtaulaaqtut aullaqtirutitut hanavalliaguvit havaktinut ilitturvighanik, imaaluuniit ilittuqhititut qanuq tajja ilittugharviit naammagiyaaghait ihariagiyainut NT-mi NU-milu maligainit.

Ihariagiyauyut atuqtaghat taapkuanguyut:
  • Ahivaqtaqtuq aanniqtailiniqmut ilittuqharviit titiqtaghat naunaitkutauyuq ilihaqtaghainik havaktit (piinnarialiktauq ilikkuuqtuq PDF titiraqtut);
  • Titiraqhimayut uqauhiit nailihimayullu ihuaqtukkut aanniqtailiniqmut hannavingnit uqauhighat;
  • Titiraqhimayunik havakviit, atannguyam, havaktiillu havaaghainik;
  • Hitamanik-havauhilik maliktaghat ilittugharvingnut; taamnalu,
  • Pivighat hivuani ilihaqtaghanut ilihaqpaalliqtaghanullu.
Qaritauyanit piinnarialgit hapkua titiqqat qaritauyakkuurutinit, imaaluuniit hivayaqluta titiraqhimayumik tuyuqtauyaamik. Titiqqanik takuinnarialiklu Inulrammiq Havaktit Ilihaiyinik Ilihaqtullu Ingilrutighanut Uqaqtut qaritauyakkuurutiptingnit, aanniqtailiniqmik unipkaalik qaffinit hannavingnit.
Hitamauyut Ihuaqutauyut havauhiit OHS-nit aulapkaqtitainut
Mikiyunut, angiyaaqtunut, angiyunullu nanminiqnut


Qanuq aktigiyaarumi nanminiit, Havakvingnit Aanniaqtailiniqmut Aanniqtailiniqmullu (OHS) Aulapkaqtait ihuaqutauyuq ihariagiyaupluni aulapkaqtitarnit nakuuniqhaupluni aanniqtailiniqmut havaktinut. 

OHS-nut Maliktagaht maligakkut havakvingnik havaktiqaqtunik 20-nik avatquaniklu OHS-nut Aulapkaqtitaghalgit. WSCC-kut ingilrutighaqaqtut ikayuutighat nanminirnik aulapkaqtittiyut ahiqquiyaiyullu hakugiktumik OHS-nut maliktaghanik. Hamma hitamauyut ihariagiyauyut havauhighat kitunikiaq OHS-nut aulapkaqtitaghanut pivighallu ikayuutighat nanminiqnut hanaplugik aulapkaiplugillu: 
  1. Havauhighat ilittuqhiniqmik qauhitittiniqmiklu amirnaqtunik 
  2. Ilihaqtaghat aulahimmaaqhutiklu ilihaqpaalliqtut
  3. Havauhiit naunaiqhitiniqmik
  4. Ilauyut talvani Havakvium Iluani Munaqtit Havauhiit (IRS)
    • Havakvingnit aanniqtailiniq ikayuqtigiighutik havaaghauyuq. Havakviktut atannguyatulluuniit, havaaghariyat ilvit hakugiktumik OHS-nut Aulapkaitjutiqariami, kihimi amirnainniq ilingnit aullaqtiyuittuq nutqaqtiyuittuqlu ilingnit. Puiguqtaililuhi taimaa havaktitit havaklutik aulahimmaaqtumik qauyihaqhimaaqtaghait nutaannguqtiqlugillu aanniqtailiniqmut havauhirnik. Ilauquvaklugit tamangnik havaktit talvunga IRS-nut, iittuqhaqlugit ihuaqharialgit, ihuaqhaitjutighaniklu uuktuqulugit. Aanniqtailiniq inuit tamaita havaaghariyaat.
Hananiqmik qauhitighanik aanniqtailiniqmut atuqtaghaliuriamik havakvingnut, takulugu  Aanniqtailiniqmut Ingilrutighat taamnalu  Hanalutik OHS-nut Aulapkaitjutighanik qaritauyakkuurutiptingnit. Pittailiniqmut havaqativut havaqatigiyumainnaqtaahi nanminiillu hanayaamik hakugiktumik atuqtaghanik quyaginnanut havakvingnut.  Hivayaqluta uplumi.

* WSCC-kut aanniqtailiniqmik qarritjiyumayut tunmiqqanut. Tughiinnarialiuyutit taapkuninnga Ingilrutighanut Uqaqtut unipkaaqtaghanik titiraqhimayut qaritauyakkuurutiptingnit, imaalu aanniqtailiniqmut havaktimik havakvingnut pulaaqtittilutit unipkaaqtittilugu aanniqtailiniqmut takupkaqtitaghanik.   Tughiqlutit pigharnik uplumi!
aanniqtailiniqmut Ihivriuqhiyit Ihariagiyait

Ihuaqtukkut aanniqtailiniqmut aanniaqtailiniqmullu ihivriuqhiyut aghuurnatqiyauyuq ingilrutik pittailiniqmut. Ihivriuqhiyut ikayuutauyut aulapkaiyaamik nanminiit piqutainik, munariyaamik havaktiit aanniqtailiniit aanniaqtailiniillu, maligakkullu pitquyauhimaplutik. Nakuuniqhakkut, havauhittiagut havaktviit ilittuqhitigiyait naunaiqhitigiplugillu amirnaqtunik taimaa ahivaqtauyaamik munaqtauyaamikluuniit aanniqtuqaqtinnagu huliyuqaqtinnagulu.

HUUQ IHIVRIUQHIVAKPAT?

Ihuaqtukkut ihivriuqhiyut ikayuutauyut pittailiniqmut, aanniqtailiniqmut aanniaqtailiniqmullu ilittuqhaiplugit amirnaqniit havakviit ahivaiquyunit munaqhiquyuniklu. Ikayuutauyut munaqhiyaamik ahiqquiyaqvighat ihariagiyaugumik, taapkualu qakugunnguraangat ahiqquiyaqtaghat. Ihuaqtukkut ihivriuqhiyut ikayuutauyut ilittuqhittiariami havaaghaita havaktit. Ikayuutauplutiklu qauyihaiyaamik amirnaqniit aulaviinik, pitquiyaamiklu ihuaqhaitjutinik, amirnaittumiklu havauhiliuqtunut.

QANUQ AULLAQTIRIAMIK

Havakviit inmikkut havauhighaliuqtughat maliktaghanik ihivriuqhigaangamik, ikayuutauniat WSCC-kut OHS-nut Ihivriuqhiyiit havauhighaliuqhutik nanminiit ihivriuqhivianik. Titiqtaghat nakuuqpiaqtuq aullaqtittiyaamik taimaa ihivriuqhiyut nutqaqtailiyaamik ilitturinaqlutiklu. Titiqtaghat ilitturinnaqtughat havakvingnut hunanulluuniit ihivriuqtauyumut. Aajjikkutaat havauhighat aullaqtirutighat takuinnarialik  WSCC-kut qaritauyakkuurutaanit . Ilauqatigilugit taapkua Katimayut Havakvingnit Aanniaqtailiniqmut Aanniqtailiniqmullu Katimayiralaangit (JOHSC) katimayiit taapkualuuniit OHS-nut Kivgaqtia ihivriuqhiniaqtuq. Havaktiit atannguyallu ihivriuqhilaaqtullu, kihimi ihivriuqtauhimayughat atannguyanit taapkuninngalu/uniit tikkuaqtauhimayuq aanniqtailiniqmut havaktiit.

HUMIK QINIQHIMALUTIT

HAVAKVIIT UMIGHIMAVIIT

WSCC-kut havakviat umighimaniaqtut Havaktit Upluutaanit Hivulliut, Apitilirvik 2-mi. Havakviat angmatqingniaqtuq Aippiunmi, Apitilirvik 3-mi 8:30-mi uplaami.

Naunaiqhitiyaami aanniqtuqarluaqtumik havakvingnit huliyuqaqqalluuniit, hivayaqlugu 1-800-661-0792.

Naunaiqhitiyaami hivuuranaqtumik havaktunut, aturlugu Uqaqhimalugit Hivuuranaqtumik Havaktunut ikayuutit uvani WSCC Connect .
wscc.nt.ca   /  1.800.661.0792   *   wscc.nu.ca  /  1.877.404.4407