23 Յունուար, 2020
ՍԿՍԻՆՔ ԱՂՕԹՔՈՎ
«Հաւատով Խոստովանիմ» ԺԹ․ աղօթք

Կը կարդայ՝ Յովսէփ Թրթռեան
(Ս. Սարգիս եկեղեցի, Տակլըսթըն, Նիւ Եորք)

«ՀԱՅԿԱԿԱՆ ԺԱՌԱՆԳ» ՆԱՒԱՊՏՈՅՏԸ ՆՈՐ ՀՈՐԻԶՈՆՆԵՐՈՒ ՍԵՄԻՆ
«Հայկական Ժառանգ» Նաւապտոյտը անցնող քսաներկու տարիներուն արդար կերպով դարձաւ հոմանիշ՝ աշխարհացրիւ հայութեան ժամադրավայրի, ուր իրարու հանդիպեցան հինգ ցամաքամասերու վրայ ապրող հայորդիներ, լրիւ մէկ շաբաթ միասնաբար ապրելով հայ ոգին՝ հաւատքի, մշակոյթի, արուեստի եւ ընկերային կեանքի անմոռանալի փորձառութեամբ:

Արդարեւ, Հայրենիքէն, բայց մանաւանդ Միջին Արեւելքէն զանազան պատճառներով իրարմէ բաժնուած եւ Աւստրալիայէն մինչեւ Գալիֆորնիա կայք հաստատած դրացիներ, դասընկերներ եւ բարեկամներ յուզումնախառն գոչիւններով եւ գիրկընդխառնումներով զիրար ողջունած են «Հայկական Ժառանգ» Նաւապտոյտին վրայ: Դարձեալ նոյն ցամաքամասին վրայ, ինչ ինչ պատճառներով իրարմէ հեռու ապրող ընտանիքներ, զայն ընտրած են որպէս վերամիանալու ու մէկտեղուելու իտէալ վայր՝ վերապրելով անցեալի քաղցր ու ջերմ հարազատութիւնը: Եւ վերջապէս, այս նաւապտոյտը նաեւ եղած է հոյակապ առիթ, որ իրարու անծանօթ հայորդիք՝ իրարու ծանօթանան։

Հետեւողական կերպով անցնող բոլոր տարիներուն Նաւապտոյտը հազիւ աւարտած, կազմակերպիչ յանձնախումբին աշխատանքը սկսած է յաջորդ տարուան հանդիպման ծրագրումին: Նուիրեալ անդամ-անդամուհիներու փաղանգը՝ լրջօրէն քննելով, վերարժեւորելով այս վիթխարի ծրագիրը իր բոլոր երեսներով, եւ միշտ ականջ տալով մասնակցողներու թելադրութեանց՝ թերութիւնները սրբագրած են, իսկ յաջող յայտագիրրները առաւել եւս ճոխացուցած:

Ահա քսաներկու տարիներու փորձառութեամբ մասնագիտացած «Հայկական Ժառանգ Նաւապտոյտ 23»ը, Կիրակի, 12 Յունուարին ճամբայ ելաւ Մայամիէն` Royal Caribbean փառահեղ նաւուն վրայ, շուրջ 6000 բազմազգեան եւ 800 հայազգի զբօսաշրջիկներով: Նաւապտոյտը, ինչպէս ամէն տարի, այս տարի եւս հրապուրած էր հայու արիւն կրող ամէն տարիքի ներկայացուցիչներ՝ Հայաստանէն, Աւստրալիայէն, Թուրքիայէն, Իտալիայէն, Զուիցերիայէն, Հոլանտայէն, Ֆրանսայէն, Անգլիայէն, Գանատայէն եւ Ամերիկայի տարբեր նահանգներէն:

Եւ նաւը սուլեց... ճեղքելով Ատլանտեան ովկիանոսի նախ խաղաղ, եւ հետզհետէ լեռնացող ալիքները, սուրալով դէպի Հայիթիի Լապատի կղզին, Ճամէյքայի Ֆալմութ ծովեզերեայ քաղաքը, ապա Մեքսիքոյի Քոզումէլ կղզին, ուր զբօսաշրջիկները առհասարակ ըմբոշխնեցին ձմրան եղանակի արեւադարձային գօտիի ջերմութեան բարիքները՝ կիզիչ աւազներուն եւ զմրուխտեայ գոյնով խաղաղ ջուրերուն մէջ։ Իսկ հայ նաւագնացները առաւել եւս վայելեցին «Հայկական Ժառանգ» Նաւապտոյտի յանձնախումբի կարգադրութեամբ ծովափնեայ յատուկ խրախճանքներ տոհմիկ երաժշտութեամբ ու ճաշերով ճոխացած:

Վեց օրերու վրայ տարածուած առաւօտեան ժամերգութեամբ ու խորհրդածութեամբ սկսող օրերը հարուստ էին ամենէն խստապահանջ ճաշակները գոհացնող յայտագիրներով: Առողջապահական կարեւոր նիւթերու մասին խօսեցան դասախօս բժիշկներ՝ Սամուէլ Պատալեան, Ճան Պիլէզիկճեան, Պերճ Քիլաճեան եւ Հրայր Կարապետեան: Հայ Դատի մասին սպառիչ զեկոյց տուաւ՝ Յակոբ Տէր Խաչատուրեան, քրիստոնեայ հայ ինքնութեան մասին խօսեցաւ՝ Անուշաւան Արքեպիսկոպոս, Ամերիկայի հայկական թանգարանի 50ամեակի առթիւ զեկուցեց՝ Պերճ Չէքիճեան, արցախեան «Առան» գինիի ներկայացում ու մատուցում կատարեց՝ Ալեքս Սարաֆեան,”Armenia Uncovered” վաւերագրական հետաքրքրաշարժ ժապաւէնը ներկայացուց՝ արուեստագէտ Գեւ Օրգեան, իսկ Վարդանանց Դուստրերու մասին խօսեցաւ՝ Սոնա Մանուէլեան: Նաեւ ՀՕՄի տարբեր մասնաճիւղերէ եկած անդամուհիներ ունեցան իրենց առանձնայատուկ հաւաքները:

Շահեկան այս յայտագիրները առաւել եւս հարստացած էին արուեստի ձեռնարկներով՝ «Սայաթ Նովա» պարախումբի ելոյթներով, Գեւ Օրգեանի թատերական ներկայացումով, եւ մանաւանդ՝ մինչեւ առաւօտեան ժամերը բացառիկ խանդավառութիւն ստեղծող Ներսիկ ու Արաբօ Իսպիրեանի եւ Սարինա Քրոսի երգահանդէսներով, ընկերակցութեամբ DJ M-Kay նուագախումբին:
Մշակոյթի այս հաճելի եւ օգտաշատ ներկայացումները նաեւ համեմուած էին պարի դասընթացքներով, նարտիի ու թղթախաղի ամէնօրեայ մրցումներով, երեւան հանելով տարբեր ձիրքեր:

Նաւապտոյտի ամբողջ ընթացքին գրախանութը հանրութեան ուշադրութիւնը գրաւեց որակաւոր հրատարակութիւններով ու յուշանուէրներով:

Խանդավառութեան կիզակէտը հանդիսացաւ բացառիկ անակնկալ մը, երբ պաշտօնաապէս յայտարարուեցաւ որ յառաջիկայ տարի «Հայկական Ժառանգ» Նաւապտոյտը, առանց փոխելու իր առաքելութիւնը, պիտի որդեգրէ նոր ընթացք մը՝ փոխան ծովապտոյտի պիտի ունենայ հնգօրեայ հաւաք՝ Տոմինիքեան Հանրապետութեան մէջ: Այս յայտարարութիւնը դիմաւորուեցաւ մեծ ուրախութամբ, ի պատասխան այն իրողութեան՝ որ Յանձնախումբի անդամները իրօք միշտ հետամուտ են լսել ժողովուրդի ձայնը եւ ըստ այնմ ծրագրել, միշտ նշանաբան ունենալով հաճելին, օգտակարը եւ լաւագոյնը մատուցանել իրենց վստահողներուն եւ հետեւորդներուն:

Սրտանց կը շնորհաւորենք 23ամեայ «Հայկական Ժառանգ» Նաւապտյոտի ծրագիրը յղացողները, կազմակերպիչները, կամաւորները՝ իրենց անգնահատելի զոհաբերութեան համար, անխտրական կերպով Հայ ոգին բորբոքելով բազմահազար հայորդիներու կեանքին մէջ:

Եւ յաջողութիւն կը մաղթենք «Հայկական Ժառանգ Նաւապտոյտ 24»ին, շարունակելու այս անզուգական աւանդութիւնը:

Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԱՅՑԵԼԵՑ ԶՈՒԱՐԹՆՈՑ ԿԵԴՐՈՆ
Երեքշաբթի, 14 Յունուարին, Ն.Ս.Օ.Տ.Տ. Արամ Ա. Վեհափառ Հայրապետը այցելեց յատուկ խնամքի կարօտ մանուկներու եւ պատանիներու «Զուարթնոց» կեդրոնը, Պուրճ Համուտի մէջ:

33 տարիներ առաջ, Վեհափառ Հայրապետի Լիբանանի Հայոց Թեմի առաջնորդութեան օրերէն սկիզբ առած յիշեալ կեդրոնը, վերջին տարիներուն օժտուած է ներկայ ժամանակներու մասնագիտական բոլոր կարելիութիւններով: Կեդրոնին տնօրէնուհին է՝ տիկին Վարդի Գէորգեանը: Կեդրոնը ունի իր խնամակալութիւնը եւ մասնագէտներէ բաղկացած ուսուցչական կազմը: Այս տարի կեդրոնէն ներս յատուկ դասընթացքի ու հոգածութեան կը հետեւին 38 հոգի:
Վեհափառ Հայրապետը շուրջ երկու ժամ մնաց «Զուարթնոց» կեդրոնին մէջ, շրջեցաւ զանազան բաժանմունքները, աշակերտներուն հետ զրուցեց, մօտէն տեղեակ դարձաւ հոն կատարուող աշխատանքին եւ իր բարձր գնահատանքը յայտնեց: Նորին Սրբութիւնը նաեւ կոչ ուղղեց, որ մեր կառոյցները ու ազգայինները նիւթապէս սատար հանդիսանան յատուկ խնամքի կարօտ մեր զաւակներուն հոգածութիւն ու դաստիարակութիւն ջամբող այս կեդրոնին:

Նորին Սրբութեան այցելութեան ներկայ էին Պուրճ Համուտի քաղաքապետ՝ Մարտիկ Պօղոսեանը եւ կեդրոնին խնամակալութիւնը:

Վեհափառ Հայրապետը 2020 թուականը հռչակած է «Յատուկ խնամքի կարօտ հայորդիներու տարի», թելադրելով մեր ժողովուրդին, որ զանազան ծրագիրներու եւ աշխատանքներու իրագործումով, իր մտածումներուն ու հոգածութեան լուսարձակին տակ բերեն յատուկ խնամքի կարօտ հայորդիները:  
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ
ԿԻՐԱԿԻ, 26 ՅՈՒՆՈՒԱՐ
Բ. ԿԻՐԱԿԻ ԾՆՈՒՆԴԷՆ ԵՏՔ

ԱՒԵՏԱՐԱՆ ԸՍՏ ՅՈՎՀԱՆՆԷՍԻ 3:13-21
Ո՛չ ոք երկինք ելաւ՝ բացի Մարդու Որդիէն, որ երկինքէն իջաւ, եւ որ երկինքի մէջ է: Եւ ինչպէս Մովսէս պղինձէ օձը բարձրացուց անապատին մէջ, նոյնպէս ալ Մարդու Որդին պէտք է բարձրանայ, որպէսզի անոր հաւատացողը յաւիտենական կեանք ունենայ: Որովհետեւ Աստուած ա՛յնքան սիրեց աշխարհը, որ մինչեւ իսկ իր միածին Որդին տուաւ, որպէսզի անոր հաւատացողը չկորսուի, այլ յաւիտենական կեանք ունենայ: Որովհետեւ Աստուած իր Որդին աշխարհ ղրկեց՝ ո՛չ թէ որպէսզի աշխարհը դատապարտէ, այլ որպէսզի աշխարհը փրկէ: Ով որ կը հաւատայ անոր, չի դատապարտուիր. իսկ ով որ չի հաւատար անոր, արդէն իսկ դատապարտուած է, Աստուծոյ միածին Որդիին չհաւատալուն համար:
 
Եւ դատապարտութիւնը այս է.- Լոյսը աշխարհ եկաւ, բայց մարդիկ խաւարը լոյսէն աւելի սիրեցին, որովհետեւ չարութիւն կը գործէին: Ով որ չար գործ կը կատարէ՝ կ’ատէ լոյսը եւ լոյսին չի գար, որպէսզի իր գործերը չյայտնուին: Սակայն ով որ կը կատարէ ինչ որ ճշմարիտ է՝ լոյսին կու գայ, որպէսզի յայտնի ըլլայ թէ իր գործերը Աստուծոյ կամքին համաձայն գործուած են:

Ա. ԹՈՒՂԹ ՏԻՄՈԹԷՈՍԻ 4:12-5:10

Եւ որպէսզի ոեւէ մէկը քեզ չարհամարհէ՝ երիտասարդ ըլլալուդ համար, հաւատացեալներուդ օրինակ եղիր՝ խօսքովդ, վարմունքովդ, սիրովդ, հաւատքովդ եւ մաքուր կենցաղովդ: Մինչեւ գալս հոգ տար իրենց՝ Աստուծոյ խօսքէն կարդալով, յորդորելով զիրենք եւ սորվեցնելով: Անփոյթ մի՛ գտնուիր այն շնորհքին նկատմամբ, որ մարգարէական հոգիով քե-զի տրուեցաւ, երբ երէցները ձեռք դրին քու վրադ: Այս ըսածներուս մասին խորհէ եւ զանոնք գործի վերածելու աշխատէ, որպէսզի ամէն մարդ յայտնապէս տեսնէ քու յառաջդիմութիւնդ: Ուշադիր եղիր՝ թէ՛ դուն քեզի եւ թէ՛ սորվեցուցածիդ, եւ միշտ ալ այդպէ՛ս մնա, գիտնալով որ այդ ձեւով ո՛չ միայն ինքզինքդ կը փրկես, այլ նաեւ բոլոր քեզ լսողները:
 
Երբեք խստութեամբ մի՛ յանդիմաներ ծեր մէկը, այլ՝ մեղմութեամբ յորդորէ զայն, ինչպէս հօրդ պիտի ընէիր: Երիտասարդները եղբօրդ տեղը սեպէ, պառաւները՝ մօրդ, իսկ երիտասարդուհիները քրոջդ տեղը դիր եւ ամենայն մաքրութեամբ մօտեցիր անոնց: Պատուէ եւ խնամէ ա՛յն այրիները՝ որոնք իսկապէս որբեւայրի են: Իսկ երբ այրի մը զաւակներ ու թոռներ ունի, պէտք է անո՛նք նային իրեն, որպէսզի սորվին բարեպաշտութիւնը նախ տան մէջ կիրարկել՝ ծնողներէն իրենց տրուած խնամքին փոխարէն հոգ տանելով անոնց, որովհետեւ Աստուծոյ համար ա՛յդ է իրաւ եւ ընդունելի բարեպաշտութիւնը: Իսկական այրին ան է՝ որ մէկը չունի, յոյսը միայն Աստուծոյ վրայ դրած է եւ գիշեր-ցերեկ աղօթքով ու խնդրանքով կ’անցընէ իր ժամանակը: Իսկ հանգստութիւն ու վայելք փնտռող այրին կենդանի մեռած մըն է արդէն: Այնպիսիներուն այս պատուէրները տուր, որպէսզի անարատ ըլլան: Իսկ մէկը՝ որ իրեններուն եւ մանաւանդ իր ընտանիքի անդամներուն հոգ չի տանիր, այնպիսին իր հաւատքը ուրացած մըն է, շատ աւելի գէշ՝ քան անհաւատ մը:
 
Այրի սեպէ միայն այն կիները՝ որոնք վաթսունը անց են, մէկ անգամ ամուսնացած, եւ բարի գործերով վկայուած են, այսինքն՝ զաւակներ մեծցուցած, հիւրասէր եղած, ճամբորդ հաւատացեալներուն խոնարհաբար ծառայած, նեղութեան մէջ եղողներուն օգնած, եւ իրենք զիրենք ամբողջութեամբ բարեգործութեան տուած են:

ՃՇ. ԸՆԹԵՐՑՈՒՄ
Ես. 58:13-59:7
Ս . ՎԱՀԱՆ ԳՈՂԹՆԱՑԻ
Հինգշաբթի, 23 Յունուարին, Հայց. Եկեղեցին կ՚ոգեկոչէ Ս. Վահան Գողթնացին։ Վահան հայ իշխանի մը որդին էր, որ չորս տարեկանին առեւանգուած էր արաբներուն կողմէ։ Մեծցած էր Դամասկոսի արքունիքին մէջ եւ իսլամական կրթութիւն ստացած։ Յովհաննէս Օձնեցի կաթողիկոսը համաձայնութիւն մը կնքեց արաբ էմիրին հետ՝ գերի պահուող շատ մը հայեր հայրենիք վերադարձնելու համար։ Վահան, որ գիտակից էր իր քրիստոնէական ժառանութեան, փափաքեցաւ Հայաստան վերադառնալ։ Տասը տարի հայրենիքի մէջ խաղաղօրէն ապրելէ ետք, արաբական արքայական ընտանիքը փորձեց զինք ետ բերել, բայց Վահան մերժեց։ Ուխտագնացութեան շրջանէ մը ետք, ան ձերբակալուեցաւ, բանտարկուեցաւ, չարչարուեցաւ ու նահատակուեցաւ 737 թուականին։

ԱԹԱՆԱՍ ԵՒ ԿԻՒՐԵՂ ԱՂԵՔՍԱՆԴՐԻԱՑԻ ՍՈՒՐԲ ՀԱՅՐԵՐԸ
Շաբաթ, 26 Յունուարին, Հայ Առաքելական Եկեղեցին կը նշէ Աթանաս եւ Կիւրեղ հայրերու տօնը։ Աթանասը ծանօթ է իբրեւ «ուղղափառութեան ախոյեան» եւ «ուղղափառութեան հայր»։ Ան 45 տարի Աղեքսանդրիոյ եպիսկոպոս եղած է, ներառեալ՝ աքսորի 17 տարիները։ Մասնակցած է Նիկիոյ ժողովին, ուր հռչակուած է իբրեւ աստուածաբանութեան մասնագէտ։ Կիւրեղ Աղեքսանդրիացի իր մօրեղբայր Թէոփիլոսին յաջորդած է իբրեւ Աղեքսանդրիոյ պատրիարք՝ 412ին։ Փայլուն աստուածաբան մը եղած է, հետեւելով Աղեքսանդրիոյ աւանդութեան, ու Աթանասի նման մեծապէս գնահատուած է Հայ Եկեղեցւոյ կողմէ։ Նախագահած է Եփեսոսի երրորդ տիեզերական ժողովին։ Գրած է աշխատութիւններ Ս. Երրորդութեան եւ Մարդեղութեան վարդապետութիւններուն մասին, Յովհաննէսի եւ Ղուկասի աւետարաններու մեկնութիւններ, եւ բազմաթիւ նամակներ ու քարոզներ։  

Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Անոնց նամակներէն նմոյշներ կը ներկայացնենք՝ միայն անունները յիշելով, ինքնութիւնը գաղտնի պահելու համար։

Այս շաբթուան նամակը գրած է Մերին, որուն հովանաւորն է Աննա Էլազարեանը։ 
«Բարեւ, սիրելի բարերար,

Ուրախ եմ, որ նամակի միջոցով հնարաւորութիւն ունեմ շնորհակալութիւնս յայտնել Ձեր անձնուէր աջակցման համար։

Ես Մերի ….. եմ, 15 տարեկան։ Աւարտել եմ հիմնական դպրոցը, հիմա սովորում եմ ՀՀ ԿԳՆ Գյումրու թիւ 4 արհեստագործական պետական ուսումնարանում համակարգչային ծրագրաւորում եւ օպերատոր ութիւն։ Բաւականին բարձր առաջադիմութիւն ունեմ։ Ինձ համար նոր միջավայրում ամէն բան հետաքրքիր էր, տեղեկատուական աշխարհը բացայայտելու իմ ձգտումներն ու աշխատասիրութիւնը արդարացուած են։ Այն շատ հետաքրքիր ոլորտ է, լի գաղտնիքներով եւ նորարարութիւններով։ Յոյս ունեմ, որ իմ գիտելիքներով պահանջուած մասնագէտ կը լինեմ։

Յաճախում եմ նաեւ շոտոկան կարատէի։ Մասնակցում եմ մրցումների, ունեմ կապոյտ գօտի։

Չնայած ժամանակի սղութեանը, ընկերներով շատ ենք յաճախում գրադարան։ Ընթերցանութիւնը իմ սիրած զբաղմունքներից է, ինքնակրթուելը կարեւոր ձգտում է մարդու մօտ։

Մասնագիտական գրականութիւնը օգնում է դասապատրաստմանը։ Հիմա քաղաքում բացուած բազմաթիւ կենտրոններից եւ խմբակներից մարդ կարող է վերացնել իրեն անհրաժեշտ գիտելիքը եւ օգտագործել այն աշխատանքի մէջ։ Նմանատիպ խմբակներից եւս օգտւում եմ, յետագայում դրանցից որ մէկը ինձ օգտակար կը լինի՝ կեանքը ցոյց կը տայ։

Այս ամբողջ վազքի մէջ ես չեմ մոռանում իմ ընտանիքի խնդիրները։ Եղբայրս շուտով կը մեկնի ծառայութեան, ամբողջ հոգսը մայրիկիս ուսերին է։ Նա ժամանակաւոր աշխատանքների միջոցով փորձում է հոգալ տան կարիքները, բայց մեր մեծանալու հետ կարիքները շատանում են։

Ձեր աջակցման շնորհիւ թեթեւանում են իմ ընտանիքի խնդիրները։ Հոգաչափ շնորհակալ եմ մեր ամենադժուարին պահին Ձեր մեկնած ձեռքի համար։ Ցանկանում եմ Ձեզ երկար տարիների կեանք, առողջութիւն եւ յաջողութիւն։

Աստուած Ձեզ պահապան։

Սիրով՝ Մերի»

ՀՈՎԱՆԱՒՈՐ Կ՚ՈՒԶՈՒԻ
Եթէ կ՚ուզէք Ազգ. Առաջնորդարանի ցուցակին մէջ սպասող որբ երեխայ մը հովանաւորել,   սեղմեցէք այստեղ  արագ ու դիւրին առցանց հովանաւորութեան համար։ Այլապէս, կրնաք Առաջնորդարանիս հետ կապուիլ ելեկտրոնային նամակով ( sophie@armenianprelacy.org)    կամ հեռաձայնով (212-689-7810)։ 
ՀԱՅԱՍՏԱՆԻ ՀԱՄԱԼՍԱՐԱՆԱԿԱՆՆԵՐՈՒ ՀՈՎԱՆԱՒՈՐՈՒԹԻՒՆ
«Մեծն Ներսէս» բարեսիրական եւ հասարակական կազմակերպութիւնը այժմ ընդլայնած է իր ծրագիրը, ընդգրկելով բոլոր այն որբերը, որոնք 18 տարեկանը բոլորելէ ետք իրենց կրթութիւնը կը շարունակեն բարձրագոյն ուսման հաստատութեան մը մէջ։ Տարեկան գումարը՝ 250 տոլար, պիտի ծառայէ թեթեւցնելու կրթութեան հետ կապուած ծախսերը։

Ինչպէս հայրենիք այցելուները կրնան վկայել, Հայաստանի յուսահատութեան մութ օրերը անցեալի մէջ մնացած են։ Երեւանը ներկայիս ծաղկուն քաղաքն է, ուր ամբողջ աշխարհէն այցելուներ կը ժամանեն։ Բայց բոլորս ալ գիտակից ենք, որ երկրի ու Արցախի երկայնքին բազում մարտահրաւէրներ կան։ Յաճախ՝ կրթութիւնը բանալի է զանոնք յաղթահարելու համար։

Հայաստան այժմ ծանօթ է շրջանին մէջ իբրեւ տեղեկատուական արհեստագիտութեան կեդրոն մը, ինչ որ բազմաթիւ աշխատատեղիներ պիտի ստեղծէ, որոնց համար կարող ու անհրաժեշտ դաստիարակութեամբ մասնագէտներու պէտքը կայ։ «Մեծն Ներսէս»ի կողմէ հովանաւորուած որբերը այժմ տնտեսութեան պէտք ունեցած աշխատուժը դառնալու ճամբուն են։

Բազմաթիւ նուիրատուներու յանձնառութեան շնորհիւ, որբերու հովանաւորութեան ծրագիրը «Մեծն Ներսէս»ի գործունէութեան գլխաւոր կէտերէն մէկը եղած։ Նուիրատուները երեխաներու աճին վկայ եղած են եւ յաճախ ուժեղ կապեր հաստատած՝ անոնց հետ։ Հովանաւորները այժմ կրնան շարունակել երէկուան մանուկներուն օգնել, որ հասուննան իբրեւ երիտասարդ մասնագէտներ։

«Մեծն Ներսէս» կազմակերպութիւնը պիտի շարունակէ թեկնածուներ գտնել եւ ձեր ուշադրութեան ներկայացնել։

Եթէ կ՚ուզէք Ազգ. Առաջնորդարանի ցուցակին մէջ Համալսարանականներու Հովանաւորութեան ծրագրով աշակերտ մը հովանաւորել, կրնաք Առաջնորդարանիս հետ կապուիլ ելեկտրոնային նամակով (sophie@armenianprelacy.org) կամ հեռաձայնով (212-689-7810)։ 
«ՄԱՐՏ»
Գրիգոր Պըլտեան

Ֆրանսահայ գրագէտ ու քննադատ Գրիգոր Պըլտեան փորձագրութիւններու այս հատորը գրեթէ ամբողջութեամբ նուիրուած է արեւմտահայ արձակին (նորավէպ, վիպակ, վէպ, քննադատութիւն), որուն կու գայ աւելնալու թատրոնը։ Հոս նկատի առնուած են գլխաւորաբար՝ Եղիա Տէմիրճիպաշեան, Լեւոն Շանթ, Զապէլ Եսայեան եւ Յակոբ Օշական, ինչպէս նաեւ սփիւռքահայ գրականութենէն՝ Զարեհ Որբունի։
Հեղինակը կը գրէ իր «Երկու կեդրոն» խորագրուած նախաբանին մէջ. «Անցեալի երկերուն մէջ ներկայի դասեր չեմ որոներ։ Ինչ որ կը մնայ ինծի այնքան աղէտներէ ետք՝ գրականութիւնն է, պարզ է, եւ տաղտուկ, տարասփռումի, գուցէ, ո՞վ գիտէ, անկումի այս օրերուն՝ կ՚ուզեմ հասկնալ ո՛չ թէ գրականութեան նշանակութիւնը (ունի՞, չունի՞) այլ անոր կարելիութիւնը, երբ բոլոր աստուածները չքացած են ու չեմ հաւատար վարդապետութիւններու փայլքին»։
Այս գիրքը տրամադրելի է Ազգային Առաջնորդարանի գրախանութէն։
Ստանալու համար դիմեցէք books@armenianprelacy.org հասցէին կամ հեռաձայնեցէք 212-689-7810 թիւին։
ԱԲԲԱՀԱՅՐ ՍՈՒՔԻԱՍ ՍՈՄԱԼԵԱՆ (ծնունդ՝ 24 Յունուար, 1776)
Հ. Սուքիաս Սոմալեան՝ Մխիթարեան միաբանութեան աւելի քիչ ծանօթ անուններէն մէկը, կարեւոր դեր մը խաղացած է իբրեւ կազմակերպիչ ու հովանաւոր անոր մշակութային ու կրթական բազմաթիւ գործունէութիւններէն մէկ քանիին։

Ծնած է Պոլիս, 24 Յունուար, 1776ին։ Իր ուսումը աւարտելէ ետք Ս. Ղազարի մէջ, միաբանութեան անդամ դարձած ու կուսակրօն քահանայ ձեռնադրուած է 1804ին։

1817ի սկիզբներուն, Հնդկաստան մեկնած է իր միաբանակից Հ. Սարգիս Թէոդորեանի հետ, երկու հարուստ հնդկահայերու՝ Եդուարդ Ղառամեանի եւ Սամուէլ Մուրատեանի կողմէ Ս. Ղազարին կտակուած գումար մը ստանալու համար։ Լորտ Պայրըն, որ այդ օրերուն հայերէն կը սորվէր վանքին մէջ, իր բարեկամ Ճոն Մըրէյին գրած է. «Սոյն նամակը քեզի պիտի յանձնուի երկու հայ կրօնաւորներու կողմէ, որոնք Մատրաս կ՚երթան Անգլիոյ ճամբով։ (…) եթէ կրնաս անոնց օգտակար ըլլալ, քու նաւային կամ Արեւելեան Հնդկաստանի ծանօթներուդ միջոցով, կը յուսամ որ զիս երախտապարտ կը ձգես, քանի որ անոնք եւ անոնց միաբանութիւնը չափազանց ուշադիր եւ բարեկամական եղած են ինծի հանդէպ՝ Վենետիկ ժամանումէս ի վեր։ Անոնք կը կոչուին Հայր Սուքիաս Սոմալեան եւ Սարգիս Թէոդորոսեան [sic]։ Կը խօսին իտալերէն, եւ հաւանաբար ֆրանսերէն, քիչ մըն ալ անգլերէն։ (…) Թերեւս կրնաս օգնել անոնց ճամբորդութեան, կամ տալ անոնց նամակներ՝ Հնդկաստանի համար»։ Ի վերջոյ, երկու բարերարներուն նուիրատուութիւնները պիտի յանգէին Մխիթարեան երկու դպրոցներու հիմնադրութեան. Փատովայի «Մուրատեան» դպրոցը (1834) եւ Վենետիկի «Ռաֆայէլեան» վարժարանը (1836)։

1824ին, Սոմալեան ընտրուած է Վենետիկի Մխիթարեան միաբանութեան չորրորդ աբբահայրը եւ երկու տարի ետք իրեն տրուած է արքեպիսկոպոսի տիտղոսը։ Ան յատկապէս շահագրգռուած էր հայկական ձեռագիրներու հաւաքումով ու հրատարակութեամբ, եւ զարկ տուած է այս գործին իր միաբանակիցներուն մէջ, քաջալերելով շուրջ յիսուն ձեռագիր գործերու հրատարակութիւնը։ Հ. Ներսէս Սարգիսեանի հետ, 1838ին հրատարակած է Եղիշէի գործերը՝ յառաջաբանով, ծանօթագրութիւններով եւ բնագրագիտական ուսումնասիրութեամբ։ 1839ին, Լոնտոնի Ասիական Ընկերութեան անդամ ընտրուած է՝ այս կալուածին մէջ տարած գործին համար։

Ան նաեւ մուծած է օտար լեզուներու դասաւանդումը Ս. Ղազարի ժառանգաւորաց վարժարանին մէջ։ 1827ին, ընտրուած է Վենետիկի Աթենական ճեմարանի պատուոյ անդամ։ Կազմած է անգլերէն-հայերէն եւ հայերէն-անգլերէն բառարաններ (1835), ինչպէս եւ եռալեզու անգլերէն-հայերէն-թրքերէն բառարան մը (1843)։

Սակայն, Սոմալեան իր օրերուն յատուկ հռչակի տիրացած է՝ առաջինը ըլլալով, որ հին հայոց գրականութեան պատմութիւն մը պատրաստած է եւրոպական լեզուով՝ Quadro della storia letteraria di Armenia («Պատկեր Հայաստանի գրական պատմութեան»,1829), որուն նախորդած էր նոյնպէս աննախընթաց հին հայկական թարգմանութիւններու մատենագիտութիւն մը ( Quadro delle opere tradotte anticamente in armeno , 1825)։ Այս գործերը բոլորովին նոր աշխարհ մը բացած են եւրոպական գիտութեան համար եւ մեծ գովասանքի արժանացած։ Գրիգոր ԺԶ. Պապէն մինչեւ բազմաթիւ աշխարհական ու հոգեւորական գիտնականներ, Սոմալեանն ու միաբանութիւնը գնահատած են այս իրագործումներուն համար, քանի որ մինչ այդ հայ գրականութիւնը բաւական մասնակի ու անկատար կերպով ճանչցուած էր միայն՝ քանի մը եւրոպացի գիտուններու աշխատանքին շնորհիւ։

Սոմալեան նաեւ գրած է «Ներածութիւն աշխարհագրութեան» եւ Մխիթար Սեբաստացիի իտալերէն կենսագրութիւն մը։ Հայերէնի թարգմանած է զուիցերիացի փիլիսոփայ Ֆրանչեսկօ Սոավէի մէկ գործը՝ «Կենդանագիր զգաստ եւ զգօն անձին» (1836)։

Քսաներկու տարուան բեղուն պաշտօնավարութենէ ետք, Հ. Սուքիաս Սոմալեան վախճանած է Ս. Ղազարի մէջ, 11 Փետրուար, 1846ին։
Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ    ( www.armenianprelacy.org ). 
ՄԵՐ ԱՐԽԻՒՆԵՐԷՆ
Մայիս 29, 1977ին, Հոգեգալստեան տօնին, Գարեգին արք. Սարգիսեան օծուեցաւ Մեծի Տանն Կիլիկիոյ Աթոռակից Կաթողիկոս։ Ան ընտրուած էր շաբաթ մը առաջ՝ 22 Մայիսին, Կաթողիկոսութեան թեմերու հոգեւորականներու եւ աշխարհական երեսփոխաններու Ազգային Ընդհանուր Ժողովին կողմէ։ Ժողովուրդը սկսած էր Անթիլիասի մայրավանքի շրջափակը լեցնել արեւածագէն առաջ՝ այս պատմական օրուան վկայ ըլլալու համար։ Մօտակայ տանիքները լեցուն էին ուխտաւորներով եւ հանդիսատեսներով։ Աթոռակից Կաթողիկոսը կը գտնուի կաթողիկոսական ամպհովանիին տակ, զոր կը կրեն չորս կնքահայրերը (Յակոբ Յակոբեան՝ Բերիոյ թեմ, Յովհաննէս Աբգարեան՝ Սպահանի թեմ, Վահագն Յովնանեան՝ Արեւելեան Միացեալ Նահանգներու եւ Գանատայի թեմ, եւ Արա Երեւանեան՝ Լիբանանի թեմ), ներկայացնելով այն չորս թեմերը, որոնք հիմնական նշանակութիւն ունեցած էին Վեհափառ Հայրապետի կեանքին վրայ։ Արդարեւ, ան ծնած էր Քեսապ (Սուրիա), շրջանաւարտ եղած Անթիլիասի դպրեվանքէն (Լիբանան) եւ ծառայած էր Սպահանի (Իրան) եւ Արեւելեան Միացեալ Նահանգներու եւ Գանատայի թեմերուն մէջ նախքան իր ընտրութիւնը՝ որպէս աթոռակից։ Անոր քարոզը՝ «Սիրոյ հրամայականը», հիմնուած էր Յովհաննէսի Աւետարանին վրայ (21:15-19)։ Նիւ Եորքի CBS հեռատեսիլի կայանէն անձնակազմը նկարահանած էր ընտրութիւնն ու օծումը եւ ընդարձակ հարցազրոյց մը կատարած Վեհափառին հետ՝ օծումէն օր մը առաջ։ CBS հեռասփռեց յայտագիրը Կիրակի, 24 Յուլիս, 1977ին։ 

«“ՈՐՈ՞ՒՆ ԵՒ ԻՆՉՊԷ՞Ս ՆԵՐԵԼ” (ՆԵՐՈՂՈՒԹԵԱՆ ՄԱՍԻՆ)»
Ինտիըն Օրչըրտի (Մասաչուսեթս) Ս. Գրիգոր եկեղեցւոյ հոգեւոր հովիւ՝ Արժ. Տ. Պետրոս քհն. Շիթիլեան, այս վերնագրով իր անգլերէն նորագոյն յօդուածը հրատարակած է Orthodoxy Cognate Page Media Network կայքէջին մէջ։ «Ինչ ժողովրդական նիւթ։ Մարդիկ շատ կը խօսին այդ մասին, մարդիկ բան մը կ՚ըսեն, բայց անշուշտ հակառակը կ՚ընեն շատ անգամ», կ՚ըսէ առաջին պարբերութիւնը։ Սեղմեցէք այստեղ շարունակութիւնը կարդալու համար։ 

ՆԱՄԱԿՆԵՐ ՈՒ ԹՂԹԱԿՑՈՒԹԻՒՆՆԵՐ
Հաճոյքով կ՚ընդունինք ու կը հրատարակենք խմբագրութեան ուղղուած ձեր անգլերէն կամ հայերէն նամակները, որոնք   crossroads@armenianprelacy.org հասցէին պէտք է յղուին։

“Crossroads”ին թղթակցութիւններ, լուսանկարներ եւ ժամանակացոյցի նիւթեր առաքելու պայմանաժամը՝ Չորեքշաբթի կէսօր է։

ԺԱՄԱՆԱԿԱՑՈՅՑ
8 Փետրուար — «Սիամանթօ» լսարանի յաջորդ հանդիպումը Ազգ. Առաջնորդարանին մէջ, ժամը 10:00էն 12:30։ Տեղեկութիւններու համար, կապուեցէք Ուս. Խորհուրդի վարիչ տնօրէն տիկ. Մարի Կիւլիւմեանին հետ ( anec@armenianprelacy.org կամ 212-689-7231)։

9 Փետրուար —Ս. Սարգիսի տօնակատարութիւն Ս. Սարգիս եկեղեցւոյ մէջ (Տակլըսթըն, Նիւ Եորք)։ Պիտի պատարագէ ու քարոզէ թեմիս բարեջան առաջնորդ՝ Գերշ. Տ. Անուշաւան արք. Դանիէլեան։ Ս. Պատարագի ընթացքին, տեղի պիտի ունենայ Ս. Վարդանանցի սրբապատկերի մը օծումը։

18 Փետրուար —Ս. Ղեւոնդեանցի տօնակատարութիւն Ս. Ստեփանոս եկեղեցւոյ մէջ (Ուոթըրթաուն, Մասաչուսեթս), նախագահութեամբ Անուշաւան Արքեպիսկոպոսի, որ պիտի կատարէ Ս. Վարդանանց սրբապատկերի մը օծումը։

 4 Մարտ —ԱՄՆի Հայաստանի դեսպանատունը եւ PostClassical համոյթը կը ներկայացնեն «Հայկական ոդիսական մը. նուռերու գոյնը»՝ հայ երաժշտութեան, մշակոյթի եւ պատմութեան բազմամիջոցային կատարում մը, մասնակցութեամբ՝ Ջիւան Գասպարեանի եւ ուրիշներու, երեկոյեան ժամը 7:30ին, Washington National Cathedral, 3101 Wisconsin Avenue, NW, Washington, DC։

15 Մարտ — Ազգ. Առաջնորդարանի 37րդ տարեկան «Միւզիքըլ Արմինիա» համերգ, կէսօրէ ետք ժամը 2:00ին, Carnegie Hallի Weill համերգասրահին մէջ (West 57th Street at Seventh Avenue, New York City)։ 

 28 Մարտ —“Faith Building Women 2020 Symposium”։ Աստուածաշունչի մէջ կիներու ներկայութիւնը ընդգծելու կոչուած համագումար մը՝ Ս. Պետրոս եկեղեցւոյ չափահասներու քրիստոնէական դաստիարակութեան բաժանմունքի կազմակերպութեամբ։ Համագումարը տեղի պիտի ունենայ Ս. Երրորդութիւն եկեղեցւոյ մէջ (Գեմպրիճ, Մասաչուսեթս)։ Գլխաւոր բանախօսներ՝ դոկտ. Ռոպերթա Ըրվայն եւ Արփի Նագաշեան։

 13-16 Մայիս —Արեւելեան թեմի Ազգային Երեսփոխանական Ժողով, հիւրընկալութեամբ՝ Ֆիլատելֆիայի Ս. Գրիգոր Լուսաւորիչ եկեղեցւոյ։ Հոգեւորականաց համագումարը պիտի սկսի Չորեքշաբթի, 13 Մայիսին, իսկ Երեսփոխանական Ժողովը՝ Հինգշաբթի, 14 Մայիսին։ Ժողովը իր աւարտին կը հասնի Շաբաթ, 16 Մայիսին։ 

31 Մայիս —Տակլըսթընի (Նիւ Եորք) Ս. Սարգիս եկեղեցւոյ 30ամեակի ճաշկերոյթ։
Follow us on Social Media
The Armenian Prelacy 
Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at  http://www.armenianorthodoxchurch.org/en/