23 Մայիս 2019
ԳՈՀԱԲԱՆԱԿԱՆ ՄԱՂԹԱՆՔ՝
ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ՀԱՄԱՐ ԵՒ ԴՐՕՇԱԿԻ ՕՐՀՆՈՒԹԻՒՆ
Թեմիս բարեջան առաջնորդ՝ Գերշ. Տ. Անուշաւան արք. Դանիէլեանի պատուէրով, այս Կիրակի, 26 Մայիսին, կամ յառաջիկայ Կիրակի, 2 Յունիսին, Արեւելեան թեմի բոլոր եկեղեցիներուն մէջ Հայաստանի Հանրապետութեան գոհաբանական մաղթանք եւ դրօշակի օրհնութիւն տեղի պիտի ունենայ: 

Հարիւր մէկ տարի առաջ, հայ ժողովուրդը հրաշալի յարութիւն առաւ ցեղասպանութենէն ետք` Աստուծոյ սուրբ հովանաւորութեամբ եւ շնորհիւ խիզախ ու նուիրեալ եկեղեցական եւ աշխարհական առաջնորդներուն։ Անոնք յաղթականօրէն ստեղծեցին առաջին ազատ եւ անկախ Հայաստանի Հանրապետութիւնը՝ ապահովելով վերապրումը հայ ազգին։ Հոգեհանգիստ պիտի մատուցուի Սարդարապատի, Բաշ Ապարանի եւ Ղարաքիլիսէի ճակատամարտերուն ինկած հերոսներուն եւ Արցախի պայքարի մերօրեայ նահատակներուն համար։ 

«Օրհնէ՛, Տէ՛ր, այս եռագոյն դրօշը։ Եւ այնպէս ինչպէս ջրհեղեղէն ետք Արարատ լերան վրայ ծիրանի գօտիով քու եւ մարդկութեան միջեւ ուխտ հաստատեցիր, հիմա ալ, սուրբ եւ հերոսական արիւնի հեղումէ ետք այս գեղեցիկ գոյներով դրօշը քեզի հետ կնքուած մեր ուխտին թող նշանը ըլլայ։

Օրհնէ՛, ո՜վ Տէր, մեր երկիրը, մեր Հայրենի երկիրը, ուր երանութեան դրախտը հաստատեցիր աշխարհի ստեղծագործութեան ժամանակ։ Դարերու ընթացքին անողոք թշնամին աւերակի վերածեց զայն, բայց այժմ քու ողորմութեամբդ եւ շնորհքի առատութեամբդ առաւել ծաղկեցուցիր զայն։ Մեր եկեղեցիները, վանքերը, դպրոցները եւ բարեսիրական հաստատութիւնները զարդարէ՛ յառաջդիմութեամբ եւ սրբութեամբ, եւ պահպանէ՛ զանոնք թշնամիներէն։ Օրհնէ՛ ինչ որ բարի է հոն, յատկապէս անուններուն առաջինը՝ ՀԱՅԱՍՏԱՆ անունը» (Գոհաբանական մաղթանք Հայաստանի Հանրապետութեան համար, հատուած)։

ԱԶԳԱՅԻՆ ԵՐԵՍՓՈԽԱՆԱԿԱՆ ԺՈՂՈՎԸ ԱՒԱՐՏԵՑԱՒ՝ ՆԵՐԳՐԱՒՈՒԵԼՈՒ ԵՒ ԵԿԵՂԵՑԻՆ ՎԵՐԱԳՏՆԵԼՈՒ ՀՐԱՄԱՅԱԿԱՆՈՎ
2019ի Ազգային Երեսփոխանական Ժողովի խմբանկարը՝ երեսփոխաններ եւ հիւրեր, 
Ֆրէյմինկհէմ, Մասաչուսեթս 
Արեւելեան թեմի այս տարուան Ազգային Երեսփոխանական Ժողովը իր աւարտին հասաւ անցեալ շաբաթավերջին։ Մեր ծուխերը ներկայացնող եկեղեցական ու աշխարհական երեսփոխանները միասնաբար ժողով գումարեցին Ազգային Վարչութեան Կրօնական ու Քաղաքական Ժողովներուն հետ Ֆրէյմինկհէմի (Մասաչուսեթս) The Sheraton Conference Centerին մէջ։ Ժողովը կը հիւրընկալէր Ուայթընսվիլի Ս. Աստուածածին եկեղեցին։

Ազգային Վարչութեան ատենապետ՝ Ճէք Մարտոյեան, նիստերու բացումը կատարեց Հինգշաբթի, 16 Մայիսի յետմիջօրէին։ Լիազօրագրերու քննութենէն եւ վաւերացումէն ետք, բարի գալուստի խօսք ուղղեց Ուայթընզվիլի եկեղեցւոյ հոգեւոր հովիւ՝ Տ. Միքայէլ քհնյ. Տէր Խոսրովեան։ Ան դիտել տուաւ, որ 2019ի այս ժողովին հիւրընկալումը պատիւ մըն էր իր ծուխին համար։ Հոգաբարձութեան ատենապետ՝ Րաֆֆի Սամքարանեան, իր բարի գալուստի խօսքերուն մէջ ընդգծեց, որ առաջին անգամն էր, որ Ս. Աստուածածին եկեղեցին նման ժողով մը կը հիւրընկալէր։ «Սկիզբը թերահաւատ էի», բացայայտեց ան, «բայց Տէր Հօր եւ Պարպրա Պէրպէրեանի ու Յակոբ Անդրանիկեանի գլխաւորած հոյակապ յանձնախումբի առաջնորդութեամբ ու հսկողութեամբ՝ ամէն ինչ իր տեղը գտաւ հեզասահ կերպով»։

Տ. Աւետ քհնյ. Թէրզեան, որ կը ներկայացնէր Արեւելեան թեմի (էջմիածնական) առաջնորդ՝ Դանիէլ եպս. Ֆընտըգեանը, ջերմ ողջոյններ փոխանցեց՝ Արեւելեան թեմի եւ Դանիէլ Սրբազան Հօր անունով։

Երեսփոխանական Ժողովի համա-ատենապետներ ընտրուեցան՝ Արամ Սարաֆեան (Ս. Խաչ եկեղեցի, Պեթեստա, Մերիլընտ) եւ Սիմոնէ Թոփուզեան (Ս. Սարգիս եկեղեցի, Տիրպորն, Միշիկըն)։ Ատենադպիրի պաշտօնին ընտրուեցան ․-  Էնտրիւ Ասատուրեան՝ անգլերէնի համար (Ս. Գրիգոր եկեղեցի, Կրանիթ Սիթի, Իլինոյ) եւ Տ. Թորգոմ քհնյ. Չորպաճեան՝հայերէնի համար (հոգեւոր հովիւ՝ Ս. Գրիգոր եկեղեցի, Կրանիթ Սիթի, Իլինոյ)։

Գերշ. Տ. Անուշաւան արք. Դանիէլեան իր ուղերձին մէջ շնորհակալութիւն յայտնեց հիւրընկալ ծուխին՝ անոր ստանձնած պատասխանատուութեան համար։ Ան նաեւ շնորհակալութիւն յայտնեց արեւմտեան եւ գանատական թեմերու առաջնորդներուն՝ Մուշեղ արք. Մարտիրոսեանին եւ Բաբգէն արք. Չարեանին, միաժամանակ նաեւ յիշելով ու շնորհակալութիւն յայտնելով իր երկու նախորդներուն, որոնց առաջնորդութեան օրերուն ծառայած է նոյն այս թեմին մէջ՝ հոգելոյս Մեսրոպ արք. Աշճեան եւ Օշական արք. Չօլոյեան։

Ան նաեւ իր շնորհակալութեան խօսքը յայտնեց Արեւելեան թեմի (էջմիածնական) առաջնորդ՝ Դանիէլ եպս. Ֆընտըգեանին՝ for «իր անկեղծ ու սրտբաց գործակցութեան համար։ Սրբազան Հայրը անցեալ Կիրակի Մայր Աթոռ Սուրբ Էջմիածնի մէջ ձեռնադրուեցաւ եւ օծուեցաւ Հայ Եկեղեցւոյ իշխան՝ եպիսկոպոսութեան կարգով, եւ կը խնդրեմ Տ. Աւետ քհնյ. Թէրզեանէն որ յանուն պատկառելի Ժողովիս մեր սրտագին բարեմաղթութիւնները փոխանցէ Առաջնորդ՝ Դանիէլ Սրբազան Հօր»։

Անուշաւան արքեպիսկոպոս շարունակեց իր ուղերձը՝ ազգային ինքնութեան ու եկեղեցական առաքելութեան զանազան հարցեր շօշափելով։ «Այս պրիսմակէն դիտուած՝ պէտք է շարունակենք մեր ծառայութիւնը նախնեաց ուղիով, վերաշխուժացնելով այս հոգեւոր հաստատութեան ծրագիրները՝ ի խնդիր մեր ներքին կառոյցներու հզօրացման, եւ արտահաս օժանդակութեան շարունակման»։ Սրբազան Հայրը խօսեցաւ նաեւ Մեծի Տանն Կիլիկիոյ Կաթողիկոսութեան մասին, զայն նկարագրելով որպէս «մեծ Տուն՝ մեծ Ընտանիք մը, որ Աստուծոյ շունչով լեցուած ու ժողովուրդի ծառայութեան առաքելութեամբ զսպանակուած, անդրանցնելով աշխարհագրականօրէն գծուած ամէն սահման կամ տարածքային հասկացողութիւն, կ՛ընդարձակուի ու կը տարածուի նիւթեղէն տունի մը չորս պատերէն, կամ հաստատութեան մը պարիսպներէն դուրս, եւ կը դառնայ համայնական Մեծ Ընտանիք»։

Առաջնորդ Սրբազան Հայրը լայնօրէն անդրադարձաւ համայնքին, ինքնութեան, հաւատքին ու նոր սերունդներուն։ Ան շեշտեց, որ «Եկեղեցւոյ առաջնահերթ առաքելութիւնն է մեր Տիրոջ Յիսուս Քրիստոսի աւետարանով ժառանգուած հաւատքի տարածումը, եւ կեանքի մէջ անոր գործադրումը»։

Անուշաւան արքեպիսկոպոս յորդորեց ժողովին, որ մենք պէտք է ծառայենք «երիտասարդութեան, որ երաշխիքն է ժողովուրդի մը գոյապահպանման, եւ որուն ֆիզիքականի կողքին հոգեմտաւոր զարգացումը ո՛չ միայն կարեւոր, այլ հրամայական է։ Ինծի համար մեծ առաւելութիւն է, որ նախորդ Առաջնորդներէն կը ժառանգեմ հարուստ պաշար մը այս ուղղութեամբ»։Այնուհետեւ, «Տաթեւ» լսարանի աւելի քան 30ամեայ գոյութեան կողքին, ան յիշեց երկու տարի առաջ սկսած նոր առաքելութիւն մը՝ «Աղ եւ լոյս» ծրագիրը, որ արդէն գործօն է հինգ ծուխերու մէջ եւ, ի վերջոյ, պիտի ընդգրկէ բոլոր ծուխերը։

Ուղերձը պատշաճօրէն յիշեց ու արժանին մատուցեց համայնքի բոլոր կազմակերպութիւններուն, ներառեալ՝ անոր ծառայող բարեսիրական, ընկերային, մարզական եւ երիտասարդական խմբաւորումները։ «Սակայն, այս բոլորին կողքին ունինք երիտասարդներու հսկայ զանգուած մը, որ ինչ-ինչ պատճառներով հեռու կը մնայ Հայ շրջանակէն առհասարակ, եւ հետեւաբար Հայ կեանքը կը զրկուի մեծ դրամագլուխէ», ըսաւ Սրբազան Հայրը, որ դիտել տուաւ, թէ «ներգրաւել այդ զանգուածը կը կարօտի լուրջ եւ հետեւողական ծրագրումի, եւ բառին վաւերագոյն իմաստով մաս կը կազմէ համա-ազգային՝ հաւաքական առաքելութեան»։

Եզրափակելով, Անուշաւան արքեպիսկոպոս համայնքը նկարագրեց «որպէս մեծ ընտանիք՝ կրօնական, քաղաքական, մարդասիրական, մշակութային, մարմնակրթական մեր բոլոր հիմնարկներով ... բազմադարեան իր Հայ Քրիստոնեայի դիմագիծը ժամանակակից պայմաններուն ընդմէջէն անցընելով, ինչպէս ոսկին կրակի բովին մէջէն, դուրս գայ աւելի փայլուն եւ արժէքաւոր, տէ՛ր կանգնի իր դարաւոր արժէքներուն ու իրաւունքներուն, եւ ժամանակակից բարիքներով զանոնք առաւել եւս արդիւնաւորէ՝ միշտ իր աչքերը յառելով մեր ժողովուրդի լինելութեան խորհրդանիշ Արարատին, եւ աւելի անդին՝ յաւերժական կեանքին»։
Դիտեցէ՛ք Անուշաւան Սրբազան Հօր ուղերձը՝ վերը

Կարդացէ՛ք ուղերձը ամբողջութեամբ՝
Ծ.Խ. Յառաջիկայ շաբաթ պիտի ամբողջացնենք Ազգային Երեսփոխանական Ժողովին մեր լրատուութիւնը, անդրադառնալով զանազան ներկայացումներու եւ խմբային քննարկումներու, Ուրբաթ օրուան ընթրիքին եւ մրցանակներու տուչութեան՝ Ամերիկայի Հայկական թանգարանին (Ուոթըրթաուն) մէջ, Տիկնանց Միութիւններու Ընկերակցութեան համագումարին եւ Շաբաթ օրուան եզրափակիչ նիստին։
Տ. ՆԵՐՍԷՍ Ա. ՔՀՆՅ. ՄԱՆՈՒԿԵԱՆ ԿԸ ՆԵՐԿԱՅԱՑՆԷ ԱՌԱՋՆՈՐԴ
ՍՐԲԱԶԱՆ ՀԱՅՐԸ՝ ՄԻՋ-ԵԿԵՂԵՑԱԿԱՆ ՕԾՄԱՆ ԸՆԹԱՑՔԻՆ
Տ. Ներսէս Ա. քհնյ. Մանուկեան՝ Մար Եփրեմ Պատրիարքի եւ Ասորի Եկեղեցւոյ Արեւելեան թեմի առաջնորդ՝ Մար Տիոնիսիուս Քաուաքի հետ, Ս. Մարկոս Ասորի Ուղղափառ Մայր Տաճարին մէջ։
Ուրբաթ, 17 Մայիսին, Ֆիլատելֆիայի Ս. Գրիգոր Լուսաւորիչ եկեղեցւոյ հոգեւոր հովիւ՝ Արժ. Տ. Ներսէս Աւ. քհնյ. Մանուկեան, Առաջնորդ Սրբազան Հայրը ներկայացուց Ս. Մարկոս Ասորի Ուղղափառ Մայր Տաճարի շէնքին օծման, Փարամըսի մէջ (Նիւ Ճըրզի)։ Օծման արարողութեան նախագահեց Ասորի Եկեղեցւոյ Պատրիարք՝ Մար Եփրեմ Իգնատիոս Բ., իր կողքին ունենալով Ասորի Եկեղեցւոյ Արեւելեան թեմի առաջնորդ՝ Մար Տիոնիսիուս Քաուաքը։ Արարողութենէն ետք տեղի ունեցաւ յատուկ ճաշկերոյթ մը։ 

ՔՆԱՐ ԷԴԳԱՐԵԱՆ-ԲԱԲԱՅԵԱՆԻ ՅԻՇԱՏԱԿԻՆ
Կորուստի զգացումը եւ Առաջնորդարանիս պատմութեան հին էջերէն բխող յուշերու հեղեղ մը խառնուեցան իրարու, երբ այս շաբաթ իմացանք Քնար Էդգարեան-Բաբայեանի մահուան լուրը՝ 101 տարեկանին։ Քնարն ու իր հանգուցեալ կողակիցը՝ Վիգէն, 1950ական վերջերուն Ազգ. Առաջնորդարանի հաստատման ռահվիրաներէն էին։ Նիւ Ճըրզի ապրելու տարիներուն, Բաբայեան ընտանիքը հաւատարիմ անդամ էր նորօծ Ռիճֆիլտի Ս. Վարդանանց եկեղեցւոյ մէջ, ուր ղեկավար դիրքեր ալ ստանձնած էր։ 1959-1978ին, Վիգէն Բաբայեան ծառայած էր Ազգ. Վարչութեան մէջ՝ փոխ-ատենապետի ու ատենադպիրի պաշտօններով։

Քնար Բաբայեանի յուղարկաւորութիւնն ու թաղումը տեղի ունեցած են ոչ-հրապարակային ձեւով։ 

Ցաւակցութիւն կը յայտնենք հանգուցեալին զաւակներուն՝ տէր եւ տիկ. Պերճ եւ Թամար Հաճեանին, տէր եւ տիկ. Ռիչըրտ Ք. եւ Սոնիա Բաբայեանին, եւ տէր եւ տիկ. Դերենիկ եւ Սոնա Պետրոսեանին, եօթը թոռներուն եւ ծոռներուն։

Յիշատակն արդարոց օրհնեալ եղիցի։
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ
ԿԻՐԱԿԻ, 26 ՄԱՅԻՍ
ԶԱՏԿՈՒԱՆ Զ. ԿԻՐԱԿԻ
 
Ընթերցումներուն մասին. Երկուշաբթի, 29 Ապրիլէն մինչեւ Հոգեգալուստ (9 Յունիս), իւրաքանչիւր օր չորս աւետարանները հետեւեալ կարգով կը կարդացուին.
1) Առաւօտեան՝ Ղուկաս
2) Կէսօրին՝ Յովհաննէս
3) Երեկոյեան՝ Մատթէոս
4) Երեկոյեան աւարտին՝ Մարկոս։
Հոգեգալուստին չորս աւետարանները կը կարդացուին մինչեւ՝ խաչելութեան պատումը։


ԳՈՐԾ. 20:17-38
 
Միլետոսէն Պօղոս լուր ղրկեց Եփեսոս եւ եկեղեցւոյ երէցները իր քով կանչեց: Երբ անոնք եկան, ըսաւ անոնց.
Դուք անձամբ գիտէք, թէ Ասիա գալուս առաջին օրէն ի վեր ի՛նչպէս վարուեցայ ձեզի հետ, ամբողջ այս ժամանակամիջոցին: Ամենայն խոնարհութեամբ եւ յաճախ արցունքով ծառայեցի Տիրոջ, Հրեաներուն նիւթած բոլոր փորձութիւնները կրելով: Գիտէք, թէ բնաւ չքաշուեցայ ձեզմէ, օգտակար բաներու մասին խօսեցայ եւ սորվեցուցի ձեզի, հրապարակաւ ըլլայ թէ տուներու մէջ: Թէ՛ Հրեաներուն եւ թէ՛ հեթանոսներուն տուի նոյն վկայութիւնը եւ պատգամը՝ ապաշխարութեամբ Աստուծոյ դառնալու եւ մեր Տիրոջ Յիսուս Քրիստոսի հաւատալու:
Հիմա, ահաւասիկ, Սուրբ Հոգիին մղումով Երուսաղէմ կ’երթամ: Չեմ գիտեր թէ հոն ի՛նչ պիտի պատահի ինծի: Միայն գիտեմ, թէ ամէն մէկ քաղաքի մէջ Սուրբ Հոգին կ’ազդարարէ ինծի, ըսելով թէ բանտարկութիւն եւ նեղութիւն կը սպասեն ինծի: Բայց հոգս չէ. ինծի համար կարեւորը կեանքս չէ, այլ՝ կ’ուզեմ ուրախութեամբ իր վախճանին հասցնել սկսած գործս, այն պաշտօնը որ Տէր Յիսուս տուաւ ինծի՝ Աստուծոյ շնորհքը աւետարանելու:
Հիմա գիտեմ, թէ այսուհետեւ պիտի չտեսնէք զիս: Եկայ ձեզի բոլորիդ, շրջեցայ եւ Աստուծոյ արքայութիւնը քարոզեցի, եւ ահաւասիկ կը յայտարարեմ այսօր՝ թէ խիղճս հանդարտ է, որովհետեւ առանց քաշուելու յայտնեցի ձեզի Աստուծոյ կամքը: Հսկեցէ՛ք ձեր անձերուն եւ ձեր ամբողջ հօտին, որուն տեսուչ կարգեց ձեզ Սուրբ Հոգին: Հովուեցէ՛ք Տիրոջ եկեղեցին, որ ան իր արիւնով գնեց: Որովհետեւ գիտեմ, թէ իմ մեկնումէս ետք յափշտակիչ գայլեր պիտի մտնեն ձեր մէջ, որոնք պիտի չխնայեն հօտին: Ձեր մէջէն եւս պիտի ելլեն մարդիկ, որոնք սխալ բաներ պիտի ուսուցանեն, հաւատացեալները իրենց ետեւէն տանելու համար: Հետեւաբար արթո՛ւն եղէք, յիշեցէք թէ ի՛նչպէս երեք տարի անդադար, գիշեր ու ցերեկ, արցունքով խրատեցի իւրաքանչիւրդ: Եւ հիմա ձեզ կը յանձնեմ Աստուծոյ եւ իր շնորհքի Աւետարանին, որ կրնայ ձեզ հոգեւորապէս աճեցնել եւ իր բոլոր սուրբերուն ժառանգակից դարձնել: Ոեւէ մէկուն արծաթին, ոսկիին կամ հագուստին չցանկացի: Դուք ինքնին գիտէք, թէ իմ այս ձեռքերովս շահեցայ եւ հոգացի թէ՛ իմ եւ թէ՛ ընկերակիցներուս պէտքերը: Եւ կեանքիս օրինակով ցոյց տուի՝ թէ այսպէս պէտք է աշխատիլ եւ տկարներուն օգնել, յիշելով այն խօսքը որ Տէր Յիսուս ինք ըսաւ, թէ՝ «Աւելի երջանկաբեր է տալը, քան առնելը»:
Իր խօսքը վերջացնելէ ետք, Պօղոս բոլորին հետ ծունկի եկաւ եւ աղօթեց: Բոլորը սկսան լալ եւ Պօղոսի վիզին փաթթուելով կը համբուրէին զինք: Կը մորմոքէին մանաւանդ անոր համար, որ կ’ըսէր՝ թէ այլեւս զինք պիտի չտեսնեն: Ապա անոր ընկերացան մինչեւ նաւ:

 
ՅՈՎՀ. 9:39-10:10
 
Յիսուս ըսաւ.
Դատաստան ընելու եկայ այս աշխարհը, որպէսզի չտեսնողները տեսնեն եւ անոնք որ կը տեսնեն՝ կուրնան:
Փարիսեցիներէն ոմանք, որ շուրջն էին, լսեցին ասիկա եւ հարցուցին.
Արդեօք մե՞նք ալ կոյր ենք:
Յիսուս անոնց պատասխանեց.
Եթէ կոյր ըլլայիք՝ մեղք պիտի չունենայիք. բայց քանի կ’ըսէք թէ կը տեսնէք, կը նշանակէ՝ թէ ձեր մեղաւոր ըլլալը կը հաստատէք:
 
 Հաստատ գիտցէք, ան որ ոչխարներուն փարախը դռնէն չի մտներ, այլ ուրիշ տեղէ կը մագլցի, անիկա գող է եւ աւազակ. իսկ ան որ դռնէն կը մտնէ, անիկա ոչխարներուն հովիւն է: Դռնապանը դուռը կը բանայ անոր, եւ ոչխարները իր ձայնին կը հետեւին: Իրենց անուններով կը կանչէ իր ոչխարները եւ դուրս կը տանի զանոնք: Եւ երբ իր ոչխարները դուրս կը հանէ՝ ի՛նք կ’առաջնորդէ, եւ ոչխարները կը հետեւին իրեն, որովհետեւ իր ձայնը կը ճանչնան: Օտարին չեն հետեւիր. ընդհակառակը, կը փախչին անկէ, որովհետեւ օտարներուն ձայնը չեն ճանչնար:
Յիսուս այս առակը խօսեցաւ անոնց, սակայն անոնք չհասկցան թէ ի՛նչ ըսել կ’ուզէր իրենց: Ուստի Յիսուս կրկին ըսաւ անոնց.
Հաստատ գիտցէք, թէ ե՛ս եմ ոչխարներուն դուռը: Բոլոր անոնք որոնք ինձմէ առաջ եկան, գող էին եւ աւազակ. բայց ոչխարները անոնց չհետեւեցան: Ե՛ս եմ դուռը: Ով որ ինձմէ անցնելով ներս մտնէ՝ պիտի փրկուի. պիտի մտնէ եւ ելլէ եւ ճարակ գտնէ: Գողը կու գայ միայն գողնալու, սպաննելու եւ փճացնելու համար: Ես եկայ՝ որպէսզի կեանք ունենան, եւ լեցուն կեանք ունենան:
 
ՃՇ. ԸՆԹԵՐՑՈՒՄ
(1) Ղուկ. 14:25-15:32, (2) 1 Յովհ.3:2-6, (3) Մատթ. 16:13-17:13, (4) Մարկ. 8:27-9:13։
«ՏԱԹԵՒ» ԱՄԱՌՆԱՅԻՆ ԾՐԱԳՐԻ ԱՐՁԱՆԱԳՐՈՒԹԻՒՆ
Ազգ. Առաջնորդարանի Քրիստոնէական Դաստիարակութեան Բաժանմունքի «Ս. Գրիգոր Տաթեւացի» ամառնային ծրագրի արձանագրութիւնը բացուած է։ Կրօնական բովանդակութեամբ այս եզակի ծրագրին կը մասնակցին 13-18 տարեկան պատանիներ։ Այս տարի տեղի պիտի ունենայ 30 Յունիսէն մինչեւ 7 Յուլիս՝ Էլվըրսընի (Փենսիլվենիա) St. Mary of Providence կեդրոնին մէջ։ Տեղեկութեան եւ արձանագրութեան համար, հաճեցէք սեղմել այստեղ ։  

ՄԵՐ ԾՈՒԽԵՐԷՆ
ՍԱՐԿԱՒԱԳՈՒԹԵԱՆ ԱՍՏԻՃԱՆԻ ՇՆՈՐՀՈՒՄ ՖԻԼԱՏԵԼՖԻԱՅԻ ՄԷՋ
Կիրակի, 19 Մայիսին, Գերշ. Տ. Անուշաւան արք. Դանիէլեան սարկաւագութեան աստիճան շնորհեց Ֆիլատելֆիայի Ս. Գրիգոր Լուսաւորիչ եկեղեցւոյ կիսասարկաւագներ՝ Յովհաննէս Չափանեանին ու Ճան Ալեքսանեանին։ Ձեռնադրութեան խարտաւիլակն էր՝եկեղեցւոյ հոգեւոր հովիւ՝ Տ. Ներսէս Ա. քհնյ. Մանուկեան։

ԳՌՈՒԶԵԱՆ-ԶԱՔԱՐԵԱՆ-ՎԱՍՊՈՒՐԱԿԱՆ ԴՊՐՈՑԻ ԱՇԱԿԵՐՏՆԵՐԸ
Ս. ԼՈՒՍԱՒՈՐԻՉ ՄԱՅՐ ԵԿԵՂԵՑԻ Կ՚ԱՅՑԵԼԵՆ
Տ. Մեսրոպ քհնյ. Լագիսեան եւ Սան Ֆրանսիսքոյի Գռուզեան-Զաքարեան-Վասպուրական 
վարժարանի աշակերտներ
Կիրակի, 12 Մայիսին, Սան Ֆրանսիսքոյի Գռուցեան-Զաքարեան-Վասպուրական ազգ. վարժարանի 8րդ դասարանի աշակերտները իրենց ուսուցիչներուն ընկերակցութեամբ՝ այցելեցին Ս. Լուսաւորիչ Մայր Եկեղեցին եւ մասնակցեցան պատարագին։ Աշակերտները ճամբորդութիւն մը կը կատարեն դէպի Նիւ Եորք, Ֆիլատելֆիա եւ Ուաշինկթըն։
Ս. Պատարագէն ետք, Տ. Մեսրոպ քհնյ. Լագիսեան ողջունեց աշակերտներն ու իրենց ուղեկիցները, որոնք այնուհետեւ Մայր Եկեղեցիին շրջանը ըրին։ Տէր Հայրը պատասխանեց աշակերտներուն բազմաթիւ հարցումներուն։ Այցելութեան աւարտին, աշակերտները արտասանութիւններով կարճ յայտագիր մը ներկայացուցին ու միասին ճաշեցին «Բաշալեան» սրահին մէջ։ Տէր Հայրը աղօթագիրքեր նուիրեց աշակերտներուն եւ յուշանուէրներ՝ ուսուցիչներուն։ 

ՄԵՐ ԴՊՐՈՑԵՐԷՆ
ՆԻՒ ՃԸՐԶԻԻ Ս. ՎԱՐԴԱՆԱՆՑ ԵԿԵՂԵՑՒՈՅ 
ԿԻՐԱԿՆՕՐԵԱՅ ՎԱՐԺԱՐԱՆԻ ԱՄԱՎԵՐՋԻ ՀԱՆԴԷՍԸ 
Կիրակի, 26 Մայիսին, Ս. Վարդանանց եկեղեցւոյ կիրակնօրեայ դպրոցը իր ամավերջի հանդէսը պիտի կատարէ՝ եկեղեցւոյ մէջ, յաւարտ Ս. Պատարագի։ Այնուհետեւ, տեղի պիտի ունենայ հիւրասիրութիւն մը եկեղեցւոյ սրահին մէջ։ Բոլորը հրաւիրուած են։

ՓՐԱՒԻՏԸՆՍԻ «ՄՈՒՐԱՏ» ԱԶԳԱՅԻՆ ՎԱՐԺԱՐԱՆԻ ՀԻՄՆԱԴՐՈՒԹԵԱՆ 85ԱՄԵԱԿԻՆ ՆՈՒԻՐՈՒԱԾ ԱՄԱՎԵՐՋԻ ՀԱՆԴԷՍ 
Փրաւիտընսի «Մուրատ» ազգ. վարժարանի ամավերջի հանդէսը, որ նուիրուած էր դպրոցի 85ամեակին, տեղի ունեցաւ Շաբաթ, 18 Մայիսին, Ս. Վարդանանց եկեղեցւոյ «Արամեան» սրահին մէջ։ Գործադրուեցաւ օրուան պատշաճ գեղարուեստական յայտագիր մը։

Խնամակալ Մարմնի ատենապետ` Յակոբ Խաչատուրեան, շնորհակալութիւն յայտնելով տնօրէնուհի տիկ. Անահիտ Քիպարեանին, ուսուցչակազմին եւ ծնողներուն, անդրադարձաւ Գերշ. Տ. Անուշաւան արք. Դանիէլեանի պատգամին, զոր տուած էր այս տարուան Երեսփոխանական Ժողովի բացումին։ Ան մէջբերեց հետեւեալ տողերը, որոնք այնքան կը պատշաճէին հանդէսի տարեկան թեմային. « Նորահաս սերունդին պէտք է ջամբել այնպէս, որ ան նորահաս ոստեր արձակէ՝ հպարտ իր անցեալով եւ ներկայ աշխարհին մէջ իր դերակատարութեամբ, իր առատ բերքը ի սպաս դնէ տեղական կառոյցներու ուժեղացման...» , « Երիտասարդութիւնը երաշխիքն է ժողովուրդի մը գոյապահպանման»։  Ան յայտնեց, թէ Սրբազան Հայրը որպէս օրինակ յիշած է Փրաւիտընսի գաղութի երիտասարդութիւնը, որուն դաստիարակութիւնը ուղղուած է այնպիսի ձեւով, որ գործօն տարր դառնայ եկեղեցւոյ, գաղութին եւ թեմին զանազան կազմակերպութիւններուն մէջ։

Տիկ. Քիպարեան յայտնեց, թէ յաջող կրթական տարի մը բոլորուած էր շնորհիւ ուսուցչուհիներու անխոնջ աշխատանքին ու տուաւ վարժարանի հիմնադրութեան պատմութիւնը, վեր առնելով 85 տարիներ առաջ պատուական ազգայիններու զոհողութիւններն ու ջանքերը։ Շնորհակալութիւն յայտնեց բոլոր ծնողներուն, Հ.Օ.Մ.ի ու եկեղեցւոյ քոյր կազմակերպութիւններուն, որոնք յատկապէս օգտակար կ’ըլլան դպրոցին՝ իրենց զանազան ծառայութիւններով:

Ապա, Խնամակալ Մարմնի անդամ եւ ուսուցչուհի՝ Տիկ. Մակի Նալպանտեան յանձնեց տոքթ. եւ տիկ. Արա Սատանեանցի կողմէ հաստատուած «Մակի Նալպանտեան» կրթանպաստի հիմնադրամի մրցանակը, մեր անցեալի շրջանաւարտներէն՝ օր. Անահիտ Տօնոյեանին, որ դպրոցին ու եկեղեցւոյ կազմակերպութիւններուն իր գործօն մասնակցութիւնը բերած է եւ այժմ պիտի հետեւի դեղագործութեան ճիւղին։ 

Հանդէսի աւարտին, եկեղեցւոյ հովիւ՝ Տ. Գաբրիէլ քհնյ. Նազարեան, շնորհաւորեց վարժարանի տնօրէնուհին, ուսուցչակազմը եւ աշակերտները։ Ապա, տեղի ունեցաւ վկայականներու բաշխումը։ 
 
ՆԱՄԱԿՆԵՐ ՀԱՅԱՍՏԱՆԷՆ
Ազգ. Առաջնորդարանի որբերու հովանաւորութեան ծրագիրը հաստատուած է 1993ին եւ կը շարունակէ հանդիսանալ Առաջնորդարանիս Հայաստանի ու Արցախի ծրագիրներուն առանցքը։ Ծրագրին մաս կը կազմէ հովանաւորուած երեխաներուն թղթակցութիւնը իրենց հովանաւորին հետ։

Պարբերաբար այդ նամակներէն նմոյշներ կը ներկայացնենք “Crossroads”ի մէջ։ Այս շաբթուան նամակը գրած է Մարիամը՝ անցեալ Ապրիլ 10ին։ 
«Բարեւ, իմ շատ սիրելի բարերար,
Գարունը բացուել է, ձիւնը հալուել է, օրերը տաքացել են։ Այս Ապրիլի 1-ին լրացաւ հայրիկիս մահուան 3-րդ տարին։ Գնացել ենք հայրիկիս շիրիմին խունկ ծխել։ Այդ օրերին մայրիկս փոքրիկ քոյրիկիս հետ հիւանդանոցում պառկած են եղել։ Քոյրիկս թոքաբորբով հիւանդ է եղել։ Հիմա լաւ է արդէն, գնում է դպրոց։ Աւագ եղբօրս՝ Գէորգին, կանչել են զինկոմիսարիատ բանակի հարցը լուծելու համար, քանի որ լրացել է 3 տարուայ տարկէտման ժամանակը։ Փոքր եղբայրս՝ Լեւոնը, բանակում լաւ է ծառայում, իսկ միջնեկ եղբայրս՝ Գարեգինը, օգնում է տան բոլոր աշխատանքներին։ Պապիկ-տատիկս լաւ են։ Ես մայրիկիս օգնում եմ քոյրիկիս խնամելու եւ տնային աշխատանքների հարցում։

Դպրոցում 1 շաբաթ գարնանային արձակուրդներ էին յայտարարել։ Դպրցում օրս նորմալ է անցնում, ամառային արձակուրդներին մնացել է 1,5 ամիս։ Ես գնում եմ պարի եւ Մայիսի 11-ին գնալու ենք համերգի, որպէսզի ցուցադրենք մեր պարը։ Այսպէս էլ անցնում է իմ առօրեան։

Իմ շատ սիրելի բարերար

Շնորհակալ եմ Ձեզ ինձ աջակցելու եւ հարիւր ԱՄՆ դոլար ուղարկելու համար»։
Որբերու հովանաւորութեան ցուցակին մէջ սպասող մանուկներ կան։ Եթէ կը փափաքիք հովանաւորել անոնցմէ մէկը, հաճեցէք կապուիլ Ազգ. Առաջնորդարանին հետ ելեկտրոնային նամակով ( sophie@armenianprelacy.org ) կամ հեռաձայնով (212-689-7810)՝ դիմելով Սոֆիին։ 
ԴԱՇՆԱԿԱՀԱՐՈՒՀԻ ԿԱՐԻՆԷ ՊՕՂՈՍԵԱՆ ԿԸ ՎԵՐԱԴԱՌՆԱՅ CARNEGIE HALL
Ազգ. Առաջնորդարանի Musical Armenia ծրագրի 2004ի համերգին մասնակիցներէն մէկն էր Կարինէ Պօղոսեան, որ Հինգշաբթի, 30 Մայիսին, երեկոյեան ժամը 7:30ին ելոյթ պիտի ունենայ Carnegie Hallի «Զանգել» սրահին մէջ, ներկայացնելով «Հոգիիս երաժշտութիւնը» յայտագիրը, զոր շատեր կը նկատեն անոր ամենէն հարազատ արտայայտութիւնը։ Դաշնակահարուհին պիտի մեկնաբանէ իր ամենէն սիրած ու յատկանշական գործերէն մէկ քանին, ինչպէս՝ Մանուէլ տէ Ֆալլայի Fantasia Betica եւ Արամ Խաչատուրեանի «Սպարտակ» պալէի «Ատաճիո»ն, ինչպէս եւ Ֆրանց Լիսթէն քանի մը յօրինումներ։ Պօղոսեան գնահատուած է «մեկնաբանած գործերուն սրտին հասնելու կարողութեամբ»։

Musical Armeniaի համերգէն ասդին, որ զգայացունց յաջողութիւն ունեցած էր, դաշնակահարուհին ելոյթ ունեցած է բազմաթիւ սրահներու մէջ՝ քննադատներու դրուատիքին արժանանալով։ 30 Մայիսի համերգը «Զանգել» սրահին մէջ (ուր ան նախապէս համերգ տուած է) կը հովանաւորուի` ՄԱԿի մօտ Հայաստանի Հանրապետութեան մշտական ներկայացուցչութեան կողմէ։

Տոմսակները $20էն $40 կ՚արժեն։ Զանոնք կարելի է ապահովել Carnegie Hallի տոմսարկղէն (57 th Street and Seventh Avenue), CarnegieChargeէն (212-247-7800) կամ www.carnegiehall.org կայքէջէն։ 
ՍԱՐԴԱՐԱՊԱՏԻ ՅՈՒՇԱՀԱՄԱԼԻՐԻ ԲԱՑՈՒՄԸ (25 Մայիս, 1968)
Ամէն տարի, տասնեակ հազարաւոր մարդիկ, թէ՛ Հայաստան բնակող եւ թէ՛ զբօսաշրջիկներ, կ՚այցելեն Սարդարապատի ճակատամարտի յուշահամալիրը։

Եթէ բոլորին յայտնի է, որ այս ճակատամարտը մայիսեան երեք հերոսամարտերուն ամենէն վճռականն էր՝ Հայաստանի Հանրապետութեան ծնունդի հիմնաքարը հանդիսանալով, պէտք է յիշել, որ խորհրդային ժամանակաշրջանին ճակատամարտին պատմութիւնը, ինչպէս եւ յուշահամալիրը, հանրապետութեան պատմութենէն անջատուած էր։ Յուշահամալիրին շինութիւնը, այն բարձունքին վրայ, ուր թաղուած էին ճակատամարտին հերոսները, ինքնին իրադարձութիւն մըն էր՝ իր քաղաքական ենթախորքին պատճառով։

Յուշահամալիրը կը գտնուի Երեւանէն 55 քիլոմեթր եւ Հոկտեմբերեան քաղաքէն 10 քիլոմեթր անդին։ Վերջինս, որ Սարդարապատ կը կոչուէր մինչեւ 1932, հինաւուրց Արմաւիր քաղաքն է՝ Հայաստանի պատմական մայրաքաղաքներէն մէկը, որ հիմնուած էր Ուրար
տուի Արգիշտի Ա. թագաւորին կողմէ Արգիշտիխինիլի անունով։
1960ական թուականներուն, ազգային զարթօնքի հոլովոյթը խրախուսած էր Հայաստանի Համայնավար կուսակցութեան Կեդր. Կոմիտէի Ա. քարտուղար Եակով Զարոբեան (1908-1980), որ 1962ին նախաձեռնած էր փաստաթուղթերն ու հիմնաւորումները կազմելու՝ Մեծ Եղեռնի 50ամեակը նշելու եւ համապատասխան յուշարձան մը կառուցելու մտքով։

Այս նիւթերը հիմք դարձած են Սարդարապատի հերոսամարտի յուշահամալիրի շինութեան, որուն նախաձեռնարկ եղած է Վլադիմիր Դարբինեան (1931-2015)՝ կուսակցութեան շրջանային կոմիտէի քարտուղար, Հոկտեմբերեանի մէջ։ Նախագիծը սկսած է գործադրուիլ 1965ին, եւ հակառակ Զարոբեանի պաշտօնանկ ըլլալուն (1966), անոր յաջորդը՝ Անտոն Քոչինեան, շարունակած է հովանաւորել Դարբինեանի գործունէութիւնը։
Քանդակագործներ՝ Սամուէլ Մանասեան եւ Արշամ Շահինեան, որոնց կոթողական բնոյթի ստեղծագործութիւններ ծանօթ էին մինչ այդ, կանչուած են մաս կազմելու այս ծրագրին, իսկ հռչակաւոր ճարտարապետ՝ Ռաֆայէլ Իսրայէլեանը, որ ծրագրի վարիչն էր, հրաւիրած էր ուրիշ քանդակագործ մը՝ Արա Յարութիւնեանը։ Յուշահամալիրին վայրը ընտրուած է Իսրայէլեանի կողմէ։ Ճարտարապետն ու քանդակագործները խոր հետազօտութեան ենթարկած են նախաքրիստոնէական եւ քրիստոնէական Հայաստանի ճարտարապետութիւնն ու արուեստը, առաջարկելով գեղարուեստական այնպիսի լուծումներ, որոնք ներշնչող անդրադարձ մը հանդիսացած են ժողովուրդի պատմական ճակատագրին։

Յաղթանակին եւ անոր ետին գտնուող պատմական դրուագներուն խորհուրդը ցոլացած են յուշահամալիրին տարբեր բաղադրիչներուն մէջ՝
  • Դէպի մուտք առաջնորդող աստիճանները, որոնց կողմերուն կանգնած են հզօր, 8 մեթր բարձրութեամբ թեւաւոր ցուլերը,
  • 35 մեթր բարձրութեամբ զանգակատունը՝ 12 զանգակներով, եւ Սարդարապատի ու արցախեան մերօրեայ պատերազմի հերոսներուն գերեզմանները,
  • հերոսներու ծառուղին՝ 6 մեթր բարձրութեամբ արծիւներու հսկողութեան տակ,
  • Յաղթանակի յուշապատը՝ համալիրին կեդրոնը՝ յաղթանակն ու Հայաստանի վերածնունդը խորհրդանշող քանդակներու շարքով,
  • Թանգարանը։

Այս համալիրը, որ շինուած է Արմաւիրի կարմիր տուֆ քարով, ամբողջացած է լճակներով, պարտէզներով եւ վարչական շէնքերով։
Պաշտօնական բացումը տեղի ունեցած է 25 Մայիս, 1968ին՝ ճակատամարտի յիսնամեակին, եւ համալիրը ներկայացուած է Խորհրդային Միութեան պետական մրցանակին՝ 1969ին։

Հայաստանի ազգագրական թանգարանը հիմնուած է Խորհրդային Հայաստանի Նախարարարներու Խորհուրդի որոշումով՝ Փետրուար 1978ին, եւ բացուած՝ նոյն տարուան 13 Սեպտեմբերին։ Ռ. Իսրայէլեանի կողմէ նախագծուած ու շինուած, այս համալիրի ճարտարապետական ամբողջութիւնը լրացուած է՝ հայ աւանդական ճարտարապետութեան գլխաւոր տարրերու օգտագործումով։ Թանգարանը աւելի քան 70.000 իրերէ բաղկացած հաւաքածոյ մը ունի։ Խորհրդային ժամանակաշրջանին, հասկնալի պատճառներով, միայն ցուցադրած է հնագիտական ու ազգագրական նիւթեր, հին լուսանկարներ եւ զարդարուեստ։ Հայաստանի երկրորդ անկախութենէն ետք՝ Մայիս 1918ին ու Հայաստանի առաջին անկախութեան նուիրուած մնայուն ցուցադրութիւն մը աւելցած է։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org

ԵՐԿՈՒՇԱԲԹԻ ՕՐ՝ ՅԻՇԱՏԱԿԻ ՕՐ
Երկուշաբթի, Մայիս 27, Յիշատակի Օր է ամերիկեան օրացոյցին մէջ։ Տօնը սկզբնապէս կոչուած է «Ծաղկայարդարման Օր» (Decoration Day), քանի որ մարդիկ կ՚երթային գերեզմանները՝ ծաղկեպսակներ դնելու ամերիկեան քաղաքացիական պատերազմին (1861-1865) զոհուած զինուորներուն յիշատակին։ Ա. Աշխարհամարտէն ետք, մարտի մէջ ինկած բոլոր ամերիկացի զինուորներուն մեծարանքի օր դարձած է Մայիսի վերջին Երկուշաբթին։ 
“CROSSROADS”Ի ԹՂԹԱԿԻՑՆԵՐՈՒՆ
Նկատի ունեցէք, որ Հինգշաբթի օրուան “Crossroads” ելեկտրոնային լրատուին նիւթեր եւ լուսանկարներ հասցնելու պայնամաժամը Չորեքշաբթի կէսօր է։ Ձեր գործակցութիւնը կարելի կը դարձնէ, որ “Crossroads”ի հրատարակութիւնը տեղի ունենայ ճիշդ ժամանակին։ 
ԱՌԱՋՆՈՐԴԱՐԱՆԻ ԳՐԱԽԱՆՈՒԹԷՆ
Western Armenian in the 21 st Century:
Challenges and New Approaches
Edited by Bedross Der Matossian & Barlow Der Mugrdechian

2010ին ԻՒՆԵՍՔՕ արեւմտահայերէնը զետեղեց վտանգուած լեզուներու շարքին մէջ՝ բազմաթիւ սփիւռքահայերու մտքին ու սրտին մէջ արդէն գոյութիւն ունեցող մտահոգութեան մը պաշտօնական ձեւաւորում մը տալով։ Այս հատորը քով-քովի կը բերէ արեւմտահայերէնի կալուածին մէջ մասնագէտներ, որոնք տեսական հարցերու, ինչպէս եւ գործնական առաջարկներու վրայ կը կեդրոնանան՝ արդէն ժամանակավրէպ մանկավարժական մօտեցումներով զբաղելու համար։ Գիրքը լեզուի իւրացման բնագաւառի նորագոյն հետազօտութիւնները կը ներկայացնէ։ Յօդուածները ներկայացուած են 2017ին՝ Հայագիտական Ուսմանց Ընկերութեան (Society for Armenian Studies, SAS) եւ «Գալուստ Կիւլպէնկեան» հիմնարկութեան Հայկական Համայնքներու Բաժանմունքին կողմէ կազմակերպուած գիտաժողովի մը ընթացքին։

152 pages, թղթակազմ, $15.00 առաւել առաքման ծախս
British Justice and Turkish Leaders Accused of War Crimes
Against Armenians in World War I
Revised Second Edition
By Walter C. Bandazian

Ուոլթըր Պանտազեան կը պատմէ եւ կը փաստագրէ, թէ ինչպէ՞ս Երիտասարդ Թուրքերուն ոճիրները Օսմանեան կայսրութեան հայ բնակչութեան դէմ անտեսուած ու մոռցուած են Մեծն Բրիտանիոյ կողմէ՝ Ա. Աշխարհամարտէն ետք։ Անոր կիզակէտը Մերձաւոր Արեւելքի բրիտանական իշխանութիւններուն խաղացած դերն է՝ Հայոց Ցեղասպանութեան նկատմամբ, ինչպէս եւ պատերազմական ոճրագործներ դատելու առաջին միջազգային ճիգի սկզբնաւորման մէջ։ Հատորը կը ներառէ փաստաթուղթեր, որոնք թուրք պաշտօնատարներու, խորհրդարանականներու եւ զինուորականներու յանցանքը վկայած են բրիտանացի իշխանութիւններուն։

382 pages, թղթակազմ, $30.00 առաւել առաքման ծախս
Cilicia 1909: The Massacre of Armenians
By Hagop H. Terzian
Translated by Ara Stepan Melkonian & edited by Ara Sarafian

Այս գիրքը Յակոբ Յ. Թէրզեանի «Կիլիկիոյ աղէտը» նշանաւոր գործին ամփոփ թարգմանութիւնն է։ Թէրզեան դեղագործ էր (դեղարաններ ունէր Հաճընի եւ Ատանայի մէջ) ու նաեւ՝ մամուլի աշխատակից։ Վերապրած է 1909ին Կիլիկիոյ ջարդերէն, բայց ձերբակալուած է վեց տարի ետք՝ Ապրիլ 24ին, աքսորուած ու սպաննուած։ Հատորը կը ներառէ հեղինակին պատումը՝ 1909ի Ատանայի ջարդերուն, ինչպէս եւ ուրիշներու վկայութիւնները Կիլիկիոյ այլ վայրերու մասին։

146 էջ, թղթակազմ, $18.00 առաւել առաքման ծախս
Choose to Rise: The Victory Within
By M. N. Mekaelian

Այս պատմավէպը կը սկսի, երբ ընտանիքի մը մէկ երէց անդամը կաթուածահար կ՚ըլլայ եւ ընտանիքը կը հաւաքուի անոր շուրջ՝ հիւանդանոցին մէջ։ Բուժման շատ յոռետես պայմաններու դէմ յանդիման, անոր աւելի երիտասարդ եղբայրը կը սկսի պատմել իր եւ իր աւագ եղբօր ապրած պատմութիւնը՝ տարիներ առաջ, որ ցարդ երբեք չէ պատմած ընտանիքին կամ բարեկամներուն։ Այդ պատմութիւնը կը սկսի 1913ին Խարբերդի մէջ, անցնելով հայոց աքսորէն ու ցեղասպանութենէն, հասնելու համար Շիքակոյի այն հիւանդասենեակը, ուր վերջապէս կը պատմուի։

433 էջ, թղթակազմ, $17.99 առաւել առաքման ծախս


Տեղեկութիւններու եւ ապսպրանքի համար, հաճեցէք գրել Առաջնորդարանի գրախանութին ( books@armenianprelacy.org ) կամ հեռաձայնել 212-689-7810 թիւին։
 
ԺԱՄԱՆԱԿԱՑՈՅՑ
«Սիամանթօ» լսարանի  դասերը տեղի կ՚ունենան իւրաքանչիւր ամսուան երկրորդ Շաբաթ օրը, «Յովնանեան» վարժարանին մէջ, Նիւ Ճըրզի։ Տեղեկութիւններու համար՝  anec@armenianprelacy.org  կամ՝ 212-689-7810։ Յաջորդ ու վերջին դասը՝  Շաբաթ, 8 Յունիսին։

30 Մայիս —«Հոգիիս երաժշտութիւնը» (Music of my soul), Կարինէ Պօղոսեան (դաշնակ), Zankel Hall, Carnegie Hallի մէջ, երեկոյեան ժամը 7:30ին։

1 Յունիս —Համբարձումի տօնակատարութիւն ՀՕՄի «Շաքէ» մասնաճիւղին կողմէ (Նիւ Ճըրզի)՝ Cornetta's ճաշարանին մէջ։ Տեղեկութիւններու համար՝arsnjshakeh@gmail.com.

15 Յունիս —Գառնիկ Սարգիսեանի ազգային-յեղափոխական երգերու համերգ՝ ի պատիւ Հայաստանի առաջին Հանրապետութեան։ Ելոյթ կ՚ունենան նաեւ Համազգայինի «Նայիրի» պարախումբը եւ «Արեգակ» երգչախումբը։ Ս. Աստուածածնի Ասորի Ուղղափառ եկեղեցի, Փարամըս, Նիւ Ճըրզի, երեկոյեան ժամը 7:30ին։ Տեղեկութիւններու համար՝  ARFDRO@gmail.com կամ ARSAGNOUNI@gmail.com։

16 Յունիս —Հայրերու օրուան դաշտահանդէս։ Ս. Գրիգոր եկեղեցի, Ինտիըն Օրչըրտ (Մասաչուսեթս)։

30 Յունիս-7 Յուլիս —33րդ տարեկան «Ս. Գրիգոր Տաթեւացի» ամառնային ծրագիրը՝ 13-18 տարեկան պատանիներու համար, տեղի պիտի ունենայ St. Mary of Providence կեդրոնին մէջ (Էլվըրսըն, Փենսիլվենիա), կազմակերպութեամբ՝ Ազգ. Առաջնորդարանի Քրիստոնէական Դաստիարակութեան Բաժանմունքին։ Տեղեկութիւններու համար՝ arec@armenianprelacy.org կամ 212-689-7810։

13 Յուլիս —“Hye Summer Night Dinner-Dance”՝ Ս. Վարդանանց Տիկնանց Միութեան կողմէ (Փրաւիտընս, Ռոտ Այլընտ), Crowne Plaza Hotel (Ուորուիք)։ Տեղեկութիւններու համար՝ Ճոյս Պաղտասարեան, 401-434-4467։

9-12 Հոկտեմբեր —Սրբոց Թարգմանչաց տօնին առիթով, Արեւելեան, Արեւմտեան եւ Գանատական թեմերու եկեղեցականաց համաժողով, տեղի պիտի ունենայ՝ Մոնթեպելլոյի մէջ (Գալիֆորնիա)։ Մանրամասնութիւնները՝ յետագային։

12 Հոկտեմբեր —Ս. Վարդանանց եկեղեցւոյ 60ամեակի շարունակութիւն՝ Էլի Պէրպէրեանի եւ իր նուագախումբին մասնակցութեամբ։ Տեղեկութիւններու համար՝ 201-943-2950։

19 Հոկտեմբեր —«Ամերիկայի հայ բարեկամներ» կազմակերպութիւնը կը հովանաւորէ տարեկան «Հայ Քէֆ 5» պարահանդէսը, Double Tree by Hilton պանդոկ, Անտովըր (Մեսեչուսեթս)։ 

17 Նոյեմբեր —Կոմիտաս Վարդապետի 150ամեակի ծննդեան տօնակատարութիւն, կազմակերպութեամբ՝ Ազգ. Առաջնորդարանի։ Մանրամասնութիւնները՝ յետագային։

Follow us on Social Media
The Armenian Prelacy 
Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at  http://www.armenianorthodoxchurch.org/en/