24 Սեպտեմբեր, 2020
Սեղմեցէք իւրաքանչիւր ձեռնարկի վրայ՝ համապատասխան կայքէջ երթալու համար
ԱՐԱՄ Ա. ԿԱԹՈՂԻԿՈՍ ՎԱՒԵՐԱՑՈՒՑ ՔԱՂԱՔԱԿԱՆ ԵՒ ԿՐՕՆԱԿԱՆ ԺՈՂՈՎՆԵՐՈՒ ԸՆՏՐՈՒԹԻՒՆՆԵՐԸ
Մեծի Տանն Կիլիկիոյ Կաթողիկոս՝ Ն.Ս.Օ.Տ.Տ. Արամ Ա. Վեհափառ Հայրապետ իր օրհնութիւնն ու վաւերացումը տուաւ Արեւելեան թեմի ընտրութիւններուն, որոնք կայացան Շաբաթ, 12 Սեպտեմբերին՝ Ազգային Երեսփոխանական Ժողովի ընթացքին։ Անդրանիկ Ա. Քհն. Պալճեան եւ Նարեկ Քհն. Թրթռեան վերընտրուեցան իբրեւ Կրօնական Ժողովի անդամներ, իսկ Քաղաքական Ժողովի նորընտիր անդամներն են՝ Ճան Գըլընճեան, Արամ Յովակիմեան, Ռաֆֆի Մանճիկեան եւ Նայտա Ոսկերիչեան։
 
Ինչպէս ծանօթ է, Ազգային Երեսփոխանական Ժողովը սկզբնապէս տեղի պիտի ունենար անցեալ 13-16 Մայիսին, Ս. Գրիգոր Լուսաւորիչ եկեղեցւոյ մէջ (Ֆիլատելֆիա), բայց պսակաձեւ ժահրի համավարակը պարտադրեց անոր յետաձգումը։ Ժողովը գումարուեցաւ 12 Սեպտեմբերին, առաջին անգամ ըլլալով ամբողջովին առցանց հարթակի մը վրայ՝ համավարակի պարտադրած ընկերային հեռակայութեան սահմանափակումներուն հետեւելով։

ԱՐԱՄ Ա. ԿԱԹՈՂԻԿՈՍ ԿՈՉ ՈՒՂՂԵՑ ՀԱՄԱՀԱՅԿԱԿԱՆ ԶՕՐԱԿՑՈՒԹԵԱՆ՝ ԼԻԲԱՆԱՆԱՀԱՅՈՒԹԵԱՆ ՎԵՐԱԿԱՆԳՆՈՒՄԻՆ
Հինգշաբթի, 17 Սեպտեմբերի առաւօտուն, Արամ Ա. Կաթողիկոս հանդիպում մը ունեցաւ Լիբանանահայութեան Վերականգնումի Մարմինին հետ, Ազգային Միացեալ Վարժարանին մէջ։
 
Հանդիպումէն առաջ, Վեհափառ Հայրապետը այցելեց վնասուած տուներու արձանագրութեան եւ օժանդակութեան լծուած երիտասարդ-երիտասարդուհիներու աշխատանքի վայրը, լսեց անոնց բացատրութիւնները եւ զրոյց ունեցաւ օժանդակութեան համար ներկայ անձերու հետ։ Նորին Սրբութիւնը գնահատեց ծրագրուած ու հետեւողական աշխատանքը, ինչպէս նաեւ կամաւորներու նուիրումը: Վեհափառ Հայրապետը նաեւ վստահեցուց ներկայ ընտանիքներուն, որ իր անմիջական հովանաւորութեան տակ օժանդակութիւնը պիտի շարունակուի անխտիր բոլոր կարիքաւորներուն:
 
Այցելութենէն ետք, Արամ Կաթողիկոս յայտնեց, ի միջի այլոց.
 
«Մարմինի անդամները իրենց գործերը, ընտանիքը, հաճոյքը եւ հանգիստը ձգած՝ եկած են այստեղ օգտակար ըլլալու մեր հաւաքական ընտանիքին, որ Լիբանանի հայութիւնն է: Անցնող շաբաթներու ընթացքին այս Մարմինը տիւ ու գիշեր աշխատեցաւ, ծրագրեց եւ ահաւասիկ հանգրուանային կերպով իր աշխատանքին ու ծրագրումին արդիւնքը կեանքի կը վերածէ: Ուրախութեամբ իմացայ, որ շուրջ 1500 տուներու վերաշինութեան օժանդակութիւն կատարած է, ինչ որ մեծապէս գնահատելի երեւոյթ է: (...) Առաջին հանգրուանը՝ ժողովրդային տուներու վերանորոգումն է, երկրորդ հանգրուանը եկեղեցիները պէտք է ըլլան, ապա դպրոցները եւ համայնքային կեդրոնները ու այսպէս պէտք է շարունակուի»:
 
Շնորհակալութիւն յայտնելով ամբողջ աշխարհի հայութեան, որ իր ներդրումը կատարած է ու կը կատարէ վերականգնումի այս աշխատանքին, Վեհափառ Հայրապետը աւելցուց, թէ «Ազգային Առաջնորդարանը եւ բոլոր հայ դպրոցներուն պատասխանատու մարմինները յառաջիկայ կրթական տարեշրջանին համար անվճար ուսման կարելիութիւնը յայտարարած են, այլ խօսքով՝ աշակերտները ոչ մէկ վճարում պիտի կատարեն»: Ասիկա կը պարտադրէ թէ՛ մեր ազգայիններուն ու բարերարներուն զօրակցութիւնը հայ դպրոցին, եւ թէ՛ հայ ծնողներուն, որ իրենց զաւակները ղրկեն հայ դպրոց. «Ինչ-ինչ պատճառներով՝ նիւթականէն սկսեալ, մեր ծնողները հակամէտ են իրենց զաւակները ղրկելու օտար դպրոց: Սպասելի է, որ մեր բոլոր ընտանիքներուն զաւակները ուղղուին դէպի հայ դպրոց»:

Վեհափառը վերահաստատեց, որ «մենք պիտի չուզենք երբեք, որ կարիքաւոր ընտանիք մը ըլլայ անկիւնը մնացած, տուն մը ըլլայ քանդուած եւ հեռու մեր աչքերէն ու մեր մտածումներէն», եւ որ Վերականգնումի Մարմինին նպատակն է՝ օժանդակել լիբանանահայ բոլոր ընտանիքներուն: Իբրեւ եզրափակում, ան շեշտեց.
 
«Հակառակ այս դժուար պայմաններուն, լիբանանահայութիւնը պիտի շարունակէ կառչած մնալ այս երկրին, որովհետեւ լիբանանահայութեան հզօրացումը ո՛չ միայն լիբանանահայութեան համար կենսական է, այլ՝ մեր հայրենիքին, Արցախին, մեր դատին համար»:
 ԼԻԲԱՆԱՆԻ ՕԳՆՈՒԹԵԱՆ ՖՈՆՏ
ՀԱՆԳԱՆԱԿՈՒԹԻՒՆԸ ԱՆՑԱԾ Է 350.000 ՏՈԼԱՐԻ ՍԱՀՄԱՆԸ
Սիրելի եղբայրներ եւ քոյրեր,

Այսօր կ՚ուզեմ ձեր հետ բաժնել իմաստուն խօսքեր` Լիբանան ծնած եւ Ամերիկա ապրած նշանաւոր արուեստագէտ, բանաստեղծ եւ իմաստասէր` Ճպրան Խալիլէն Ճպրանէն։ Կուսակրօն եկեղեցական ձեռնադրութեանս առաջին տարիներէն իսկ առինքնուած էի կեանքը ըմբռնելու եւ մեկնաբանելու անոր եղանակէն։ Ահա թէ ինչու Հայաստանեայց Եկեղեցւոյ Համալսարանական Ուսանողներու Միութեան կարգ մը անդամներուն հետ, ծանօթ՝ ՀԵՀՈՄ անունով, որուն հոգեւոր խորհրդատուն նշանակուած էի, հայերէնի թարգմանեցինք հեղինակին գլուխ գործոց «Մարգարէն» գործը, նաեւ իր ծննդեան հարիւրամեակի առթիւ փառաւոր հանդիսութիւն կազմակերպեցինք։ Կ՚ուզեմ այդ գործէն մէջբերում մը կարդալ Տալու մասին։ 

Կան անոնք, որ իրենց շատ ունեցածէն՝ քիչ կու տան, եւ ասիկա կ՚ընեն փոխան երախտագիտութեան, եւ անոնց թաքուն այս իղձը նուէրները անսուրբ կ՛ընծայէ։
Եւ կան անոնք, որ քիչ ունին եւ ամբողջը կու տան
Ասոնք կեանքին եւ կեանքի պարգեւին հաւատացողներն են եւ անոնց արկղը երբեք պարապ չըլլար։
Եւ կան անոնք, որ ցաւ չեն զգար տալու ատեն, ո՛չ ալ հաճոյք կը փնտռեն, ո՛չ ալ կու տան առաքինութեան մտահոգութեամբ,
Կու տան ինչպէս հեռաւոր հովիտի մրտենին իր բոյրը կ՚արտաշնչէ տարածութեան մէջ
Այսպիսիներուն ձեռքերուն ընդմէջէն է որ Աստուած կը խօսի եւ անոնց աչքերուն ետեւէն է որ կը ժպտի աշխարհին։
Լաւ է տալ, երբ կը խնդրուի, բայց աւելի լաւ է տալ առանց որ խնդրուի, հասկացողութեամբ։
 
Վայելելէ ետք այս մեծ հեղինակի իմաստութեան գաղափարի շիթերը, խորապէս զգացուած եմ յայտարարելու որ մեր հոգեւոր հովիւներու գործակցութեամբ եւ մեր ժողովուրդի սրտաբուխ նուիրատուութեամբ այսօրուան հաշուով 354,681 տոլարի հասաւ մեր հանգանակութիւնը, եւ արդէն իսկ 50,000ի եօթներորդ փոխանցումը կատարեցինք։ Դարձեալ կ՛ուզեմ յայտնել որ այս օժանդակութիւնը կը բաշխուի մեր ժողովուրդին՝ Լիբանանի Վերակառուցման Կեդրոնական Մարմնին հսկողութեամբ, ընդ նախագահութեամբ Լիբանանի Թեմի Բարեջան Առաջնորդ՝ Գերաշնորհ Տէր Շահէ Արքեպիսկոպոս Փանոսեանի։
 
Մայրիներու երկրի զաւակ՝ այս մեծ բանաստեղծին բառերով, թող Ամենաբարին Աստուած միշտ խօսի ձեր ձեռքերուն եւ աշխարհին ժպտայ ձեր աչքերուն ընդմէջէն։

ԱՄՆի Արեւելեան Թեմի Առաջնորդ
Սեղմեցէք այստեղ՝ նուիրատուութիւններու եօթներորդ ցանկը, եւ այստեղ՝ ամբողջական ցանկը կարդալու համար։
ԱՆՈՒՇԱՒԱՆ ԱՐՔԵՊԻՍԿՈՊՈՍԻ ԽՕՍՔԸ՝ «Ի ՊԱՇՏՊԱՆՈՒԹԻՒՆ ՔՐԻՍՏՈՆԵԱՆԵՐՈՒ» ԿԱԶՄԱԿԵՐՊՈՒԹԵԱՆ 7ԱՄԵԱԿԻՆ ԱՌԻԹՈՎ
Թեմիս բարեջան առաջնորդ՝ Անուշաւան Արքեպիսկոպոս, հետեւեալ աղօթքը կատարեց «Ի Պաշտպանութեան Քրիստոնեաներու» (In Defense of Christians) կազմակերպութեան եօթնամեակի համագումարին, որ տեղի ունեցաւ Չորեքշաբթի, 23 Սեպտեմբերին, առցանց կերպով։ Յիշեցնենք, որ Անուշաւան Սրբազան Հայր անդամ է յիշեալ կազմակերպութեան կրօնական խորհրդատու մարմնին։
 
Երկնաւոր Հայր, շնորհակալութիւն կը յայտնենք Քեզի այս առիթին համար որ կը տօնախմբենք եօթներորդ տարեդարձը «Ի Պաշտպանութիւն Քրիստոնեաներու» կազմակերպութեան, որ իր հիմնադրութեան օրէն լծուած է վսեմ նպատակի։
 
Համաշխարհային համավարակի այս աննախընթաց տագնապին, երբ բոլորս ալ տառացի կերպով կ՚ապրինք Սաղմոսերգուին բառերը՝ «մահուան որոգայթները զիս պաշարեցին, մահուան աշխարհին տագնապով բռնուեցայ» (Սղ 116.3), խիստ անհրաժեշտութիւնը ունինք Քու խաղաղութեանդ, որ խոստացար Առաքեալներուն, ըսելով «Խաղաղութիւնս կը թողում ձեզի, իմ խաղաղութիւնս է, որ կու տամ ձեզի, որ այս աշխարհի խաղաղութենէն տարբեր է։ Մի՛ խռովիք ու մի՛ վախնաք» (Յովհ 14.27): Խաղաղութեանդ հետ, ո՛վ Տէր, նաեւ քու իմաստութիւնդ առատապէս հեղու աշխարհի հոգեւոր եւ աշխարհական ղեկավարներուն վրայ, որպէսզի մեզ առաջնորդեն «մահուան ձորին մէջէն» (Սղ 23.4)։ Նաեւ, պարգեւէ մեզի իրարհասկացողութեան եւ իրարօգնութեան ոգին, որպէսզի իրարմով դիմաւորենք բնականոն կեանքը՝ խաղաղութեամբ, երջանկութեամբ եւ բարգաւաճութեամբ։ Օրհնեալ ըլլայ քու Սուրբ Անունդ։ Ամէն։  

ԱՆՈՒՇԱՒԱՆ ԱՐՔԵՊԻՍԿՈՊՈՍ՝ ՆՈՐԹ ԱՆՏՈՎԸՐԻ ՄԷՋ
Կիրակի, 27 Սեպտեմբերին, Անուշաւան Արքեպիսկոպոս պիտի պատարագէ ու քարոզէ Ս. Գրիգոր եկեղեցւոյ մէջ (Նորթ Անտովըր, Մասաչուսեթս), Վարագայ Ս. Խաչի տօնին առթիւ։ Այս առիթով, տեղի պիտի ունենայ եկեղեցւոյ նոր գմբէթի ու խաչի օծումը եւ օրհնութիւնը, մասնակցութեամբ հոգեւոր հովիւ՝ Տ. Ստեփան Քհն. Պալճեանի։ Մեր հաւատացեալները կրնան արարողութեան հետեւիլ ուղիղ սփռումով։ 
ՃՇՄԱՐԻՏ ԳՈՎԱՍԱՆՔ՝ ԱՍՏՈՒԾՈՅ ԿՈՂՄԷ
Առաջնորդ Սրբազան Հօր քարոզը
Կիրակի, 20 Սեպտեմբերին, Անուշաւան Արքեպիսկոպոս նախագահեց Ս. Պատարագին Ս. Գրիգոր եկեղեցւոյ մէջ (Ինտիըն Օրչըրտ, Մասաչուսեթս)։ Պատարագեց եկեղեցւոյ հոգեւոր հովիւ՝ Տ. Պետրոս Քհն. Շիթիլեան։ Ստորեւ կու տանք Առաջնորդ Սրբազան Հօր քարոզը։
 
Այսօր Խաչի վերացման տօնի յաջորդ, միաժամանակ Վարագայ Խաչի տօնի բարեկենդանի Կիրակին ենք, որով կարելի է այս օրը կոչել Խաչի զոյգ տօները իրարու կամրջող Կիրակին: Այսօրուան խորհրդածութեամբս կ՛ուզեմ կամրջել մեր սուրբ գրային զոյգ ընթերցումները՝ Պօղոս Առաքեալէն եւ Եսայի Մարգարէէն, որոնց մէջ այնքան ներդաշնակ կերպով ընդելուզուած է հասարակաց պատգամ մը, որ հոյակապ պատուանդան կը պատրաստէ լաւագոյնս հասկնալու Խաչի խորհուրդն ու զօրութիւնը:
 
Պօղոս Առաքեալ Կորնթացիներուն ուղղած երկրորդ Թուղթին մէջ կ՚ըսէ. «Իսկապէս ընտրուածը ան չէ՛ որ ինքզինք կը գովէ, այլ ան՝ որ Տիրոջ կողմէ կը գովուի» (Բ Կր 10.18): Իւրաքանչիւր անձի Եսը արմատն է պարծենալու, որով կը ձգտի միշտ արդար, ուղիղ, բացառիկ երեւնալ: Նկատի ունենալով որ Աստուած Իր պատկերով եւ նմանութամբ ստեղծած է մեզ, այս եւ նման մտածումներն ու զգացումները կրնան արդարացի ըլլալ օգնելով կատարելութեան մեր ճիգին: Սակայն, պէտք է գիտակցինք, թէ ինչպէս որ իւրաքանչիւր ցանուած սերմի կողքին նաեւ որոմ կ՚աճի, եւ որ իր ազդեցութիւնը կ՚ունենայ նոյնինքն բոյսին վրայ, նմանապէս մեր Եսը, մեր ինքնութեան այս հոյակապ նշանը երբ ինքնակեդրոն դառնայ եւ պարծենալով ինքզինք աստուածացնէ որպէս գերագոյն ոյժ, կը շեղի իր իսկութեան բարի նպատակէն եւ կը ձախողի իր լրումը գտնել Աստուծմով։
 
Այժմ լսենք Եսայի մարգարէն որ կ՚ըսէ. «Ո՛վ առտուն ծագող Արուսեակ, ի՜նչպէս երկինքէն ինկար եւ մինչեւգետինը կործանեցար, դունոր ազգերը նկուն կ՛ընէիր: Դուն սրտիդ մէջ ըսած էիր. ՛«Երկինք պիտի ելլեմ եւ իմ աթոռս Աստուծոյ աստղերէն վեր պիտի բարձրացնեմ, եւ ժողովի լեռը, հիւսիսի քովերը պիտի բնակիմ: Ամպերու բարձրութիւններուն վրայ պիտի ելլեմ, Բարձրեալին պիտի նմանիմ» (Ես 14.12-14): Ոեւէ ընթերցող որ ծանօթ է Սուրբ Գրոց պիտի գիտնայ որ ակնարկութիւնը անկեալ հրեշտակապետին է, որ առաջին ապստամբը հանդիսացաւ Բարձրեալին դէմ։
 
Հիմնական կէտ մը որ մեր նախորդ խորհրդածութեանց մէջ կատարած էի, վերյիշեցնելով ըսեմ, թէ Աստուած ամէն ինչ բարի ստեղծեց եւ հրեշտակներն ու մարդ արարածները բանականութեամբ եւ ազատ կամքով օժտեց: Աստուծոյ անհուն սիրոյն ամենէն ապշեցուցիչ երեւոյթներէն մին այն է, որ Աստուած սիրով յանձն առած էր վճարել անզուգական գինը իր ստեղծագործութեան որոշումի հետեւանքին, քաջ գիտնալով հանդերձ որ ազատ կամքը կրնայ մերժել, ուրանալ եւ ապստամբիլ: Եսայի մարգարէի այսօրուան ընթերցումը կը բացայայտէ գլխաւոր աղբիւրը բոլոր չարիքներուն՝ սատանան, նախահօր անկումէն մինչեւ Քրիստոսի երկրորդ գալուստը: Բարեգութ Տէրը մեզ զարդարեց ամենէն կենսական նուիրական շնորհքով՝ ազատ կամքով, որպէսզի մեր հերթին առաւել եւս գեղեցկացնենք այս ստեղծագործութիւնը որպէս յաւերժական տաճար: Առաքեալին խօսքով, «բարի գործելով, մեր երկնաւոր Հայրը միշտ պիտի գովէր մեզ», միշտ բաժնեկից պիտի ըլլայինք Իր փառքին, ինչպէս Միածին Որդին խոստացաւ, բայց աւա՜ղ, ահաւոր գին կը վճարենք տեղի տալով Իր կամքէն շեղելու փորձութեան: Հին եւ Նոր Կտակարանները, մարդկային ողջ պատմութիւնը, ինչպէս նաեւ ժամանակակից մեր կեանքը քայլ առ քայլ մէկ կողմէն մեզի կը յուշեն աղետալի հետեւանքը անձի, ցեղի, գաղափարախօսութեան, փիլիսոփայութեան, քաղաքականութեան, դրամի աստուածացումի, իսկ միւս կողմէ նաեւ կը վստահեցնեն աներեւակայելի վարձատրութիւնը՝ աստուածակեդրոն անձերու կեանքին ընդմէջէն, ինչպիսիք էին Նոյ, Աբրահամ, Աստուածամայրը, Սուրբ  Գրիգոր Լուսաւորիչ, Մայր Թերեզա եւ ուրիշներ, հաստատելով Առաքեալին խօսքը, որ կ՚ըսէ՝ «Իսկապէս ընտրուածը ան չէ՛ որ ինքզինք կը գովէ, այլ ան՝ որ Տիրոջ կողմէ կը գովուի»:
 
Տիեզերքի բնականոն ընթացքի աստուածադիր օրինագիծը Բարին ըլլալով, անոր իրագործման հիմնական ներուժը Սէրն է, որուն ամբողջական արտայայտութիւնը վկայեցինք Խաչին վրայ: Ինչպէս որ կը գիտակցինք այն ճշմարտութեան, որ անձրեւոտ թէ արեւոտ օրերուն ամէնքս արեւի ջերմուժով կը կենսաւորուինք, նմանապէս բոլորս, երբ մեր սրտի իւրաքանչիւր տրոփիւնին հետ վայելենք յաւերժական կենսատու Երկնաւոր Հայրը, որ իր Միածին Որդւոյն միջոցաւ յայտնուեցաւ եւ կը գործէ Սուրբ Հոգիով, այն ատեն պիտի լսենք իրականացումը եւ անհամար օգուտները կենդանի Խօսքին որ ըսաւ. «Չէ՞ք գիտեր թէ ինչ գրուած է Օրէնքի գրքին մէջ, կ՚ըսեմ դուք աստուածներ էք» (Յհ 10.34/Սղ 82.6): Ահա Աստուած Ի՛նք մեզի ցոյց կու տայ ճշմարիտ ճանապարհը աստուածացման:
 
Մեր այսօրուան ընթերցումին ընդմէջէն, երբ Եսայի Մարգարէ եւ Պօղոս Առաքեալ զիրար կ՚ողջունեն եւ միաժամանակ մեզ կը զգուշացնեն մահացու մեղք՝ Հպարտութենէն, սին պարծանքէ ու անձնակեդրոնացումէ, եւ փոխարէնը կը հրաւիրեն որ բարեաց աղբիւր Աստուծոյ ապաւինինք, հետեւաբար ապրինք մեր օրը՝ արշալոյսէն մայրամուտ Կեանքի պարգեւիչին հետ, փառաւորենք Զինք եւ արժանի ըլլանք Տիրոջ կողմէ գովուելու: Ամէն:

ԱԶԳԱՅԻՆ ՏՈՒՐՔ - 2020
ԱՐՏԱԿԱՐԳ ՄԱՐԴԻԿ՝ ԱՐՏԱԿԱՐԳ ԺԱՄԱՆԱԿՆԵՐՈՒ ՄԷՋ
Ազգային Առաջնորդարանի ազգային տուրքի արշաւի երկրորդ փուլը սկսած է։ Երախտապարտ ենք այն բազմաթիւ անդամներուն եւ բարեկամներուն, որոնք մինչեւ հիմա չեն զլացած իրենց առատաձեռն օժանդակութիւնը։ 

 Ձեր աջակցութիւնը հարկաւոր է՝ աւելի քան երբեք։
 
Մեր ծրագիրները զարգացնելու եւ նորերը գործադրութեան մէջ դնելու համար, պէտք ունինք ձեր նիւթական քաջալերութեան, որ մեզ կը խթանէ յարատեւելու մեր յանձնառութեան մէջ։ Իւրաքանչիւրը թող տայ՝ նայած իր սրտի յօժարութեան եւ ո՛չ թէ չկամութեամբ կամ պարտաւորուած զգալով. որովհետեւ Աստուած զուարթառատ կերպով նուիրողը կը սիրէ» (Բ. Կր 9.7): 

ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ
ԿԻՐԱԿԻ, 27 ՍԵՊՏԵՄԲԵՐ
Գ. ԿԻՐԱԿԻ ԽԱՉՎԵՐԱՑԻ
ՎԱՐԱԳԱՅ Ս. ԽԱՉԻ ՏՕՆ
 
ՄԱՏԹԷՈՍ 24: 30-36
Ապա Մարդու Որդիին նշանը պիտի երեւի երկինքի մէջ, եւ աշխարհի բոլոր ժողովուրդները պիտի ողբան, երբ տեսնեն Մարդու Որդին, որ կու գայ ամպերուն վրայ բազմած՝ զօրութեամբ եւ մեծ փառքով: Երբ մեծաձայն փողը հնչէ, ան իր հրեշտակները պիտի ղրկէ, որպէսզի հաւաքեն իր ընտրեալները աշխարհի չորս կողմերէն, երկինքի մէկ ծայրէն մինչեւ միւսը:
Թզենին ձեզի թող օրինակ ըլլայ: Երբ տեսնէք որ անոր ճիւղերը կը կակուղնան եւ տերեւ կ’արձակեն, գիտէք թէ ամառը մօտ է: Նոյնպէս ալ, երբ բոլոր ըսածներս կատարուին, գիտցէք թէ Մարդու Որդիին գալուստը մօտ է եւ արդէն հասնելու վրայ է: Վստահ եղէք, որ այս սերունդը չանցած՝ ասոնք բոլորը պիտի պատահին: Նոյնիսկ եթէ երկինքն ու երկիրը անհետանան, խօսքերս պիտի չանհետանան:
 
    Սակայն ո՛չ ոք գիտէ թէ ե՛րբ պիտի գայ այդ օրը կամ ժամը. ո՛չ երկինքի հրեշտակները, ո՛չ ալ Որդին, բայց միայն՝ Հայրը:
 
* * *
 
ԹՈՒՂԹ ԳԱՂԱՏԱՑԻՆԵՐՈՒՆ 6: 14-18
Գալով ինծի, քա՛ւ լիցի որ մեր Տիրոջ Յիսուս Քրիստոսի խաչէն զատ ուրիշ բանով պարծենամ: Այդ խաչին միջոցաւ աշխարհը մեռած է այլեւս ինծի համար, ինչպէս ես մեռած եմ աշխարհին համար: Կարեւորը մարդուս թլփատուած կամ անթլփատ ըլլալը չէ, այլ՝ նոր արարած ըլլալը: Թող Աստուծոյ խաղաղութիւնն ու ողորմութիւնը ըլլան բոլոր անոնց հետ, որոնք այս սկզբունքին համաձայն կ’ապրին. բոլոր անոնց՝ որոնք իր ընտրեալ ժողովուրդը կը կազմեն:
 
Այսուհետեւ, խնդրեմ, ոեւէ մէկը աշխարհիկ հոգերով թող զիս չնեղէ, որովհետեւ ես Յիսուսի կը պատկանիմ, ինչպէս մարմնիս վրայ վէրքերուն սպիները կը վկայեն:
 
Եղբայրնե՛ր, մեր Տէր Յիսուս Քրիստոսի շնորհքը ձեր բոլորին հետ ըլլայ: Ամէն:
ՎԱՐԱԳԱՅ Ս. ԽԱՉԻ ՏՕՆ
Այս Կիրակի, 27 Սեպտեմբերին, մեր Եկեղեցին կը նշէ իրեն յատուկ՝ Վարագայ Ս. Խաչի տօնը, որ կու գայ Խաչվերաց տօնէն երկու շաբաթ ետք։ Հռիփսիմեանց կոյսերը Հայաստան գալով բնակութիւն հաստատած էին Վարագայ լերան մօտերը։ Հռիփսիմէ կոյսը իր հետ բերած էր իրական խաչափայտէն մասունք մը, զոր ի պահ դրած էր լերան ժայռերուն մէջ՝ Վաղարշապատ մեկնելէ առաջ իր ընկերուհիներուն հետ։ 653 թուականին, Թոդիկ անունով ճգնաւոր մը թաքնուած խաչը գտած էր՝ հետեւելով փայլուն լոյսի մը, որ Վարագայ լերան կատարը կը լուսաւորէր, եւ որ զինքը առաջնորդեց դէպի վանքի եկեղեցին, որուն խորանին տակ խաչը գտաւ։ Լոյսը փայլած էր 12 օր շարունակ։ Այս դէպքին ի յիշատակ, Ներսէս Շինող Կաթողիկոս հաստատեց Վարագայ Ս. Խաչի տօնը, ու այս առթիւ գրեց «Նշանաւ ամենայաղթ խաչիւդ» իմաստալից ու գեղեցիկ շարականը։
Ս. Նշանի վանքը (Վարագավանք) շինուած էր Վարագայ լերան վրայ՝ Վանի հարաւ-արեւելեան կողմը, ու շրջանի ամենամեծ գրադարաններէն ու թանգարաններէն մէկը ունէր։ Հոն բազմաթիւ հին ու ժամանակակից գիրքեր ու գեղարուեստի գործեր կային։ Վանքին նշանականութիւնը բարձրացաւ, երբ Խրիմեան Հայրիկ տպարան մը եւ դպրոց մը հաստատեց՝ յուսալով, որ վանքը կը դառնար կրթական կեդրոն մը, եւ հիմնեց պատմական Հայաստանի մէջ տպուած առաջին թերթը՝ «Արծուի Վասպուրական»։ 1915ի Մեծ Եղեռնը ո՛չ միայն Հայրիկի յոյսերն ու ծրագիրները ի դերեւ հանեց, այլեւ շա՛տ աւելին ըրաւ։ 30 Ապրիլ 1915ին, Վանի ինքնապաշտպանութեան ընթացքին, թրքական բանակին թնդանօթները քանդեցին Վարագավանքը։ 

«Նշանաւ ամենայաղթ խաչիւդ քո Քրիստոս պահպանեա զմեզ մարդասէր յաներեւոյթ թշնամւոյն. զի դու միայն ես թագաւոր փառաց օրհնեալ յաւիտեան։
Որ ի վերայ սորա տարածեցեր զանարատ բազուկս քո, եւ յեղեր զարիւնդ ի փրկութիւն տիեզերաց. զի դու միայն ես թագաւոր փառաց օրհնեալ յաւիտեան։
Ի միւսանգամ քո գալստեանն յերեւիլ սուրբ նշանիս, արժանի արա զծառայս քո վերստին նորոգման. զի դու միայն ես թագաւոր փառաց օրհնեալ յաւիտեան»
 
(Մարդասէր Քրիստոս, քու անարատ խաչիդ նշանով մեզ աներեւոյթ թշնամիէն պահպանէ, որովհետեւ միայն դուն յաւէտ օրհնեալ փառաց Թագաւոր ես։
Դուն ասոր վրայ քու անարատ բազուկներդ տարածեցիր եւ ամբողջ աշխարհի փրկութեան համար արիւնդ թափեցիր, որովհետեւ միայն դուն յաւէտ օրհնեալ փառաց Թագաւոր ես։
Քու երկրորդ գալուստիդ երբ այս սուրբ նշանը երեւի, քու ծառաներդ վերստին նորոգման արժանի ըրէ, որովհետեւ միայն դուն յաւէտ օրհնեալ փառաց Թագաւոր ես)։

Ս. ԳԷՈՐԳ ԶՕՐԱՎԱՐ
Շաբաթ, 26 Սեպտեմբերին, Հայաստանեայց Եկեղեցին կ՚ոգեկոչէ Ս. Գէորգ Զօրավարը։ Ս. Գէորգ 3րդ դարու հռոմէացի զօրավար մըն էր, որ մարտահրաւէր կարդացած էր կայսեր՝ քրիստոնեաներու հալածանքը հրամայող անոր հրովարտակը պատռելով եւ կոչ ուղղելով, որ ուրիշներ հետեւին իր օրինակին։ Մինչեւ օրս, ան կը մնայ մեր Եկեղեցւոյ ժողովրդական սուրբ մը, որ զինուորներու եւ սկաուտներու հովանաւոր սուրբն է։ Ինչպէս շատ մը այլ պարագաներու, հայերը ազգային նկարագիր տուած են Ս. Գէորգին։ Անոր տօնը միշտ կը նշուի Վարագայ Ս. Խաչի տօնին նախորդող Շաբաթ օրը։

Այս շաբաթ կ՚ոգեկոչուին նաեւ՝
Հինգշաբթի, 24 Սեպտեմբեր՝ Բարաղամ, Անթիմոս եւ Երանոս հայրապետներ
Երկուշաբթի, 28 Սեպտեմբեր՝ Ս. Դաւիթ Դունեցի։
Երեքշաբթի, 29 Սեպտեմբեր՝ Ս. Եւստաքէոս։ 
ՄԵՐ ԴՊՐՈՑԵՐէՆ
«ՍԻԱՄԱՆԹՕ» ԼՍԱՐԱՆԸ ԿԸ ՍԿՍԻ ԻՐ ԴԱՍԸՆԹԱՑՔԸ ԱՅՍ ՇԱԲԱԹ ՕՐ
«Սիամանթօ» լսարանը այս տարի վերադարձաւ իր աւանդութեան՝ դասընթացքը վերածելով ամէն Շաբաթ օրուան հանդիպման։ Դասընթացքները տեղի պիտի ունենան Zoomի միջոցաւ, Շաբաթ, 26 Սեպտեմբերէն սկսեալ, եւ պիտի բաղկանան երկու բաժինէ՝ հայոց լեզու եւ մշակոյթ ու պատմութիւն։

Արձանագրուած են Ազգային Առաջնորդարանի տարբեր համայնքներէ պատանիներ։ Խանդավառ են ոչ միայն մասնակցողները, այլ նաեւ պատասխանատուներն ու դասատուները։
Բարի վերամուտ բոլորին։

Արձանագրութեան համար հետեւեցէք կապին՝

ՍՐԲՈՑ ՎԱՐԴԱՆԱՆՑ ԵԿԵՂԵՑՒՈՅ ԿԻՐԱԿՆՕՐԵԱՅ ԴՊՐՈՑԻ ՎԵՐԱՄՈՒՏԸ 
Կիրակի, 13 Սեպտեմբերին, խանդավառ մթնոլորտի մէջ տեղի ունեցաւ Ս. Վարդանանց եկեղեցւոյ (Փրաւիտընս, Ռոտ Այլընտ) Կիրակնօրեայ դպրոցի 2020-2021 տարեշրջանին բացումը։
 
Առողջապահական ու ապահովական նկատառումներով, դասերը տեղի պիտի ունենան առցանց մինչեւ Դեկտեմբեր, իւրաքանչիւր ամսուան երկրորդ եւ չորրորդ Կիրակիները։ Նկատի ունենալով, որ աշակերտները ամէն օր երկար ժամանակ կ՚անցընեն պաստառի առջեւ, դասերը պիտի սահմանափակուին 45 վայրկեանի մէջ։ Կիրակնօրեայ վարժարանի ընտանիքներէն կ՚ակնկալուի, որ ամսուան առաջին ու երրորդ Կիրակիները եկեղեցին յաճախեն, որպէսզի առիթը ունենան միասին ըլլալու՝ ընկերային հեռակայութիւն պահպանելով հանդերձ, եւ իբրեւ միասնական ու մեծ ընտանիք իրենց հոգեւոր կեանքը վարեն։  
 
Այս տարուան բացումը քիչ մը տարբեր էր, քանի որ Տ. Գաբրիէլ, երէցկին Տեպի եւ բոլոր ուսուցիչները դիմաւորեցին ընտանիքները առաւօտ կանուխ տեղի ունեցած «զում»ի հաւաքոյթով։ Աւելի ուշ, ընտանիքները միացան կառավայրին մէջ՝ յաւարտ Ս. Պատարագի, Տէր Հօր յատուկ աղօթքի ու օրհնութեան համար։ Իւրաքանչիւր երեխայ ստացաւ գիրքերով, դասարանային ծրագիրներով եւ ուսուցիչներէն փոքրիկ նուէրներով լեցուն պարկ մը։ 
«ՄՈՒՐԱՏ» ԱԶԳԱՅԻՆ ՎԱՐԺԱՐԱՆԻ ԵՐԿԱՐ ՍՊԱՍՈՒԱԾ ՎԵՐԱՄՈՒՏԸ
Փրաւիտընսի Սրբոց Վարդանանց եկեղեցւոյ «Մուրատ» շաբաթօրեայ վարժարանի վերամուտը տեղի ունեցաւ Շաբաթ, Սեպտեմբեր 12ին։ Առաւօտեան, եկեղեցւոյ կառավայրը լեցուած էր փոքրիկներու խանդավառ ձայներով եւ ժպիտներով։ Վերջապէս, երկար բաժանումէ ետք, անոնք միացան իրենց ընկերներուն։

Ինչպէս բոլոր դպրոցներուն պարագային, մեր դպրոցի վերամուտը եւս նախկին տարիներէն տարբեր էր, սակայն նոյնքան ուրախ մթնոլորտի մէջ։ Վարժարանի ուսուցչական կազմը եւ խնամակալ մարմինը, Տ. Գաբրիէլ Քհն. Նազարեանի ներկայութեամբ, անհամբեր դիմաւորեցին ծնողներն ու աշակերտները՝ եռագոյն դրօշակներով, փուչիկներով եւ զանազան լոզունգներով զարդարուած կառավայրին մէջ։ Տ. Գաբրիէլ իր բարի գալուստի խօսքը հաղորդեց եւ ապա իր օրհնութիւնը պարգեւեց բոլոր աշակերտներուն՝ յաջող եւ առողջ տարեշրջանի մը յոյսով։ Հայաստանի Հանրապետութեան եւ Մուրատ ազգ. վարժարանի զոյգ քայլերգներէն ետք, վարժարանի համա-տնօրէնուհիներ՝ Ճուն Մանկասարեան եւ Լալա Տ. Աթթարեան, իրենց պատգամը տուին, որմէ ետք ուսուցչուհիները աշակերտներուն համար յատուկ պատրաստուած ծրարները բաժնեցին եւ ծանօթացան անոնց։

«Մուրատ» ազգ. վարժարանի դասընթացքները ներկայիս տեղի կ՚ունենան առցանց, այն յոյսով, որ մօտիկ ապագային պիտի կարենան վերադառնալ իրենց դասարանները եւ մօտէն հետեւիլ իրենց աշակերտներունկրթական զարգացման։

Յաջողութիւն կը մաղթենք մեր բոլոր աշակերտներուն եւ բարձր կը գնահատենք բոլոր ծնողները, որոնք կը շարունակեն քաջալերել իրենց զաւակներուն հայեցի դաստիարակութիւնը։
«Մուրատ» ազգ. վարժարանը կ՚ընդունի մանկապարտէզէն մինչեւ միջնակարգ դպրոց յաճախող աշակերտներ եւ կը տրամադրէ հայերէնի յատուկ դասընթացքներ՝ անգլիախօս աշակերտներու համար։ Հետաքրքրուողները կրնան դիմել mouradschool1934@gmail.com հասցէին։
ՄԵՐ ԾՈՒԽԵՐէՆ
ԳՈՀԱԲԱՆԱԿԱՆ ՄԱՂԹԱՆՔ ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ՀԱՄԱՐ
Կիրակի, 20 Սեպտեմբերին, թեմիս բարեջան առաջնորդ՝ Անուշաւան Արքեպիսկոպոս, Հայաստանի անկախութեան գոհաբանական մաղթանք կատարեց եւ հայոց դրօշակը օրհնեց Ս. Գրիգոր եկեղեցւոյ մէջ (Ինտիըն Օրչըրտ, Մասաչուսեթս), ընկերակցութեամբ եկեղեցւոյ հոգեւոր հովիւ՝ Տ. Պետրոս Քհն. Շիթիլեանի։  

Հայաստանի Հանրապետութեան գոհաբանական մաղթանք եւ դրօշակի օրհնութիւն տեղի ունեցաւ Ս. Լուսաւորիչ Մայր Եկեղեցւոյ մէջ, երկրորդ անկախութեան 29ամեակին առիթով։  Պատարագին ներկայ էին Հայաստանի Հանրապետութեան ՄԱԿի ներկայացուցչութեան խորհրդական՝ պրն. Ալբերտ Գէորգեան, եւ խորհրդական ու ռազմական կցորդ՝ գնդ. Տիգրան Յովհաննիսեան: 

Կիրակի օր նաեւ Հայաստանի անկախութիւնը տօնուեցաւ Ս. Երրորդութիւն եկեղեցւոյ մէջ (Ուստըր, Մասաչուսեթս)։ Յաւարտ Ս. Պատարագի, հաւատացեալները ուղղուեցան դէպի խաչքարը եւ գոհաբանական մաղթանք տեղի ունեցաւ։ Կարճ արարողութեան ընթացքին, Վազգէն Ա. Քհն. Պեքիարեան եւ հոգեւոր հովիւ՝ Տ. Թորգոմ Քհն. Չորպաճեան, օրհնեցին հայկական եւ ամերիկեան դրօշակները, ինչպէս եւ Պապիկեան ընտանիքի նուիրած նարահաստատ դրօշաձողը։ 
Տ. Նարեկ Քհն. Թրթռեան կատարեց դրօշակի օըհնութիւնը Ս. Սարգիս եկեղեցւոյ մէջ (Տակլըսթըն, Նիւ Եորք)։

Գաբրիէլ Քհն. Նազարեան կատարեց դրօշակի օրհնութիւնը Ս. Վարդանանց եկեղեցւոյ մէջ (Փրաւիտընս, Ռոտ Այլընտ)։ ՀՄԸՄի սկաուտ Արփի Տօնոյեան հայկական դրօշակը ներկայացուց Տէր Գաբրիէլին։  

Եռագոյն դրօշակի օրհնութեամբ, Ս. Յակոբ եկեղեցին (Ռէյսին, Ուիսքանսըն) նոյնպէս տօնեց Հայաստանի անկախութիւնը։ 

Ս. Ստեփանոս եկեղեցւոյ (Ուոթըրթաուն, Մասաչուսեթս) հոգեւոր հովիւ՝ Անդրանիկ Ա. Քհն. Պալճեան, Դանիէլ Քհն. Մանճիկեան եւ եկեղեցւոյ սարկաւագները օրհնեցին Հայաստանի դրօշակը։ 

Ս. Ստեփանոս եկեղեցւոյ (Նիւ Պրիթըն, Քընեթիքըթ) դրօշակի օրհնութեան արարողութիւնը վարեց եկեղեցւոյ հոգեւոր հովիւ՝ Վահան Քհն. Գույումճեան։
Ս. Աստուածածին եկեղեցւոյ (Նիւ Պրիթըն, Քընեթիքըթ) դրօշակի օրհնութիւնը կատարեց եկեղեցւոյ հոգեւոր հովիւ՝ Միքայէլ Քհն. Տէր Խոսրովեան։

Ս. Վարդանանց եկեղեցւոյ (Ռիճֆիլտ, Նիւ Ճըրզի) հոգեւոր հովիւ Գերպ. Տ. Սահակ Ծ. Վրդ. Եմիշեան կատարեց դրօշակի օրհնութիւնը։

Դրօշակի օրհնութիւն Ս. Սարգիս եկեղեցւոյ մէջ (Տիրպորն, Միշիկըն)

ՌԵՀԱՆԻ ՕՐՀՆՈՒԹԻՒՆԸ ՓՐԱՒԻՏԸՆՍԻ ՄԷՋ
Գաբրիէլ Քհն. Նազարեան ռեհանի օրհնութիւնը կատարեց Խաչվերացի տօնին, Կիրակի, 13 Սեպտեմբերին, Սրբոց Վարդանանց եկեղեցւոյ մէջ (Փրաւիտընս, Ռոտ Այլընտ)։
«Մեծն Ներսէս» բարեսիրական հասարակական կազմակերպութեան կողմէ կատարուող որբերու հովանաւորութիւնը կը շարունակէ մնալ Ազգ. Առաջնորդարանի Հայաստանի ու Արցախի ծրագիրներուն առանցքը՝ 1993էն ի վեր։ Հովանաւորուած երեխաները կանոնաւորապէս կը թղթակցին իրենց հովանաւորին հետ։ Այդ նամակներէն նմոյշներ կը ներկայացնենք ամէն շաբաթ, յիշելով միայն գրողներուն անունները՝ անոնց ինքնութիւնը գաղտնի պահելու համար։ 
 
Այս շաբթուան նամակի հեղինակը Վիլենն է, որ կը հովանաւորուի տէր եւ տիկ. Արթըր Պետրոսեաններուն կողմէ։
«Ես Վիլեն …. եմ։ Ապրում եմ գիւղ Ոստանում։ Սովորում եմ 1 հիմնական դպրոցի 8րդ դասարանում։ Սովորում եմ լաւ։ Բնակւում եմ մայրիկիս, քրոջս, եղբօրս եւ տատիկիս հետ նոյն յարկի տակ։ Եղբայրս եւ քոյրս ինձնից փոքր են։
 
Հայրիկիցս յետոյ ես աշխատում եմ աւելի շատ օգնել մայրիկիս տան գործերում։ Երազել եմ դառնամ ծրագրաւորող։ Չեմ սիրում անլուրջ, կռուարար մարդկանց։
 
Շնորհակալ եմ ձեր նման մարդկանց, որ օգնում են մեր նման ընտանիքներին»։
Այստեղ սեղմեցէք մինչեւ 18 տարեկան որբերու առցանց հովանաւորութեան համար։

Այստեղ սեղմեցէք համալսարանական ուսում ստացող որբերու առցանց հովանաւորութեան համար
 
Դուք միշտ կրնաք դիմել Ազգային Առաջնորդարանին՝ ելեկտրոնային նամակով (sophie@armenianprelacy.org) կամ հեռաձայնով (212-689-7810), «Մեծն Ներսէս» կազմակերպութեան որբերու հովանաւորութեան ծրագրին մասնակցելու համար
«ՄԵՐ ԴԺՈՒԱՐ ԺԱՄԱՆԱԿՆԵՐԻ ՄԵԾ ՀԱՅԸ.
ՄԵՍՐՈՊ ԱՐՔԵՊԻՍԿՈՊՈՍ ԱՇՃԵԱՆ»
Թեմիս նախկին առաջնորդ՝ լուսահոգի Մեսրոպ Արք. Աշճեանի յիշատակին կազմուած այս հատորը (կազմողներ՝ Աշոտ Մելքոնեան, Յովիկ Մկրտիչեան եւ Հռիփսիմէ Աշճեան) բաղկացած է երեք մասերէ։ Առաջին բաժինը կ՚ընդգրկէ մամուլի մէջ լոյս տեսած կամ յատկապէս գրուած՝ զանազան եկեղեցականներու, մտաւորականներու եւ Մեսրոպ Սրբազանի մտերիմներու սրտի խօսքը։ Երկրորդ բաժնին մէջ ընդգրկուած են Սրբազանի անունը կրող գրադարանի (Հայաստանի Գիտութիւններու Ազգային Ակադեմիայի պատմութեան հիմնարկին մէջ) յուշամատեանէն, զանազան գիտնականներու հարցազրոյցներէն քաղուածքներ, ինչպէս եւ Սրբազանէն խոհեր։ Վերջին բաժինը կը ներկայացնէ Մեսրոպ Արքեպիսկոպոսի նամականին։
Այս գիրքը տրամադրելի է Ազգային Առաջնորդարանի գրախանութէն։ Ստանալու համար, դիմեցէք books@armenianprelacy.org հասցէին կամ հեռաձայնեցէք 212-689-7810 թիւին։














 
































ԵՂԻՇԷ ԹԱԴԷՈՍԵԱՆ (ծնունդ՝ 24 Սեպտեմբեր, 1870)
Կոմիտասի այս յայտնի նկարին հեղինակը՝ Եղիշէ Թադէոսեան, անցեալ դարասկիզբի ծանօթ նկարիչներէն եղած է եւ Վրաստանի Գեղարուեստական Ակադեմիայի հիմնադիրներէն մէկը։

Ծնած է Վաղարշապատ, 24 Սեպտեմբեր, 1870ին։ 1879-1894 թուականներուն ուսումը ստացած է Թիֆլիսի «Տէր Յակոբեան» գիշերօթիկ դպրոցին մէջ, ապա՝ Մոսկուայի «Լազարեան» ճեմարանը եւ գեղանկարչութեան, քանդակագործութեան եւ ճարտարապետութեան ուսումնարանին մէջ։ 1894-1895ին դասաւանդելէ ետք Ս. Էջմիածնի «Գէորգեան» ճեմարանին մէջ, վերադարձած է Մոսկուա։

1896ին մասնակցած է «Շրջիկներ»ու (Գեղարուեստական շրջիկ ցուցահանդէսներու ընկերութիւն) 24րդ ցուցահանդէսին, իսկ 1898ին՝ Մոսկուայի արուեստագէտներու ընկերութեան մրցոյթին, ուր անոր 1896ին ստեղծած նկարները՝ «Կէսօրեայ ճաշ» եւ «Քարոզ ուղղադաւաններին», մրցանակներու արժանացած են։ 1898ին Պաղեստին մեկնած է իր ուսուցիչին՝ ռուս նկարիչ Վասիլի Պոլենովի հետ։ Այնուհետեւ, գրեթէ ամէն տարի ճամբորդած է Մերձաւոր Արեւելք ու Եւրոպայի երկիրներ (մինչեւ 1914), Ռուսաստանի եւ Հայաստանի մէջ, ստեղծելով շարք մը գործեր։

1901ին Թադէոսեան բնակութիւն հաստատած է Թիֆլիսի մէջ, մասնակցելով տեղական եւ ռուսական ցուցահանդէսներուն։ 1916ին մասնակցած է Թիֆլիսի Հայ Արուեստագէտներու Միութեան ստեղծումին, որուն նախագահը ընտրուած է, եւ 1921ին կազմակերպած է միութեան ցուցահանդէսը Երեւանի մէջ, մասնակցելով նաեւ Թիֆլիսի «Հայարտուն» մշակութային կեդրոնի աշխատանքներուն։ 1923ին Վրաստանի Գեղարուեստական Ակադեմիայի հիմնադիրներէն ու առաջին դասախօսներէն մէկը եղած է։

Թադէոսեան աշխատած է կերպարուեստի գրեթէ բոլոր բնագաւառներուն մէջ։ Առաջին իսկ գործերուն մէջ արտայայտուած է գոյներու խոր զգացողութիւնը, ամուր գծանկարը եւ աշխատանքի բարձր մակարդակը։ Անոր բնանկարները՝ «Կոմիտասը Էջմիածնի լճի մօտ» (1893), «Մեր փողոցը Վաղարշապատում» (1921), եւ այլն, երբեմն կը ներառնեն մեծ կամ փոքր նիւթեր։ Մեծ վարպետութեամբ պատկերած է Ալեքսանդր Շիրվանզադէի (1929), Յովհաննէս Թումանեանի (1933), Կոմիտասի (1935) եւ այլ դիմանկարներ։ Հայ գիւղը, կենցաղը եւ գեղջկական կերպարները կարեւոր տեղ ունին անոր արուեստին մէջ։ Նկարիչը իր շարք մը գործերուն մէջ անդրադարձած է հայկական կոտորածներուն, պանդխտութեան նիւթերուն, հայ ժողովուրդի անցեալին եւ աւանդութիւններուն, հին հայկական յուշարձաններուն։  Ան նաեւ արտադրած է կրօնական նիւթերով գործեր, ինչպէս «Սիսարայի մահը» (1893), «Հանճարը եւ ամբոխը» (1909), «Տիրամայր» (1917) եւ «Քրիստոսը եւ փարիսեցիները» (1919)։

Թադէոսեան 1935ին արժանացած է Խորհրդային Հայաստանի արուեստի վաստակաւոր գործիչի տիտղոսին։ Ան իր մահկանացուն կնքած է Թիֆլիսի մէջ, 22 Յունուար, 1936ին։ Թաղուած է Կոմիտասի անուան պանթէոնը, Երեւանի մէջ։ Անոր գործերը պահպանուած են Հայաստանի ազգային պատկերասրահին, Եղիշէ Չարենցի անուան գրականութեան եւ արուեստի, Մոսկուայի Արեւելքի ժողովուրդներու արուեստի պետական եւ այլ թանգարաններու մէջ։  

Թադէոսեանի անունը կը կրեն Երեւանի մէկ փողոցը եւ Էջմիածնի Գեղարուեստի դպրոցը
Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ (www.armenianprelacy.org)
ՀԵՌԱՁԱՅՆՈՎ ՄԻ՛ ԶԱՐՆԷՔ 
Կրնա՞ք հեռաձայնով զարնել մէկը եւ ձեր ուզած տեղեկութիւնը ստանալ։ Ասիկա ոստիկանութեան գործ կը թուի ըլլալ։ Բայց եթէ անգլերէն կամ հայերէն չէք խօսիր, կրնայ հասկնալի ըլլալ։
 
Արդարեւ, ֆրանսերէն խօսք մը կայ՝ coup de telephone, որուն սպաներէն համարժէքը golpe de teléfono է։ Երկուքն ալ պարզապէս կը նշանակեն «հեռաձայնի կանչ», սակայն, բառացիօրէն կը թարգմանուին «հեռաձայնի հարուած»։ Եթէ սպաներէն ըսէք՝ le voy a dar un golpe de teléfono Golpe de teléfono մը պիտի տամ»), ո՛չ մէկ սպանախօս շփոթի պիտի մատնուի, թէ ի՞նչ ըսել կ՚ուզէք, ոչ ալ պիտի կարծէ, թէ իրօք հարուած մը պիտի ստանայ։
 
Սակայն, արդեօք ի՞նչ իմաստ ունեցած է այդ խօսքը հայ ընթերոցողի մը համար՝ 105 տարի առաջ։ Յունիս 18, 1915ին, Ֆրէզնոյի (այմժ՝ Լոս Անճելըսի) «Ասպարէզ» շաբաթաթերթին (այժմ՝ օրաթերթ) մէջ լոյս տեսած վիճաբանական յօդուած մը՝ «Տալ ու ետ առնե՜լ. դիտումնաւոր ամբաստանութիւն մը» վերջացած է խմբագրական հետեւեալ ծանօթութեամբ.
 
«Իսկ գալով տունէ տուն պտտիլը ապացուցանելու խնդրին՝ կրնայ թէլէֆօնի հարուածով մը ուղղակի Տք. Թֆէնքճեանէ եւ կամ խմբագրութենէս իմանալ անունը կամ անունները»
 
Պէտք է ենթադրենք, որ «Ասպարէզ»ի ընթերցողները բաւարար ֆրանսերէն գիտէին, որ հասկնային թէլէֆօնի հարուածի իմաստը եւ վստահ ըլլային, որ թերթի խմբագրութիւնը բռնարար գործելու մղում չէր տար։ Ահա թէ որո՞նք են վտանգները, երբ բառացիօրէն կը թարգմանէք ուրիշ լեզուէ, եւ ձեր բառերը անիմաստ են հայերէնով։ (Նոյնը կը պատահի հակառակ ուղղութեամբ)։
 
Թէեւ հեռաձայն բառը արդէն գոյութիւն ունէր, ըստ երեւոյթին «Ասպարէզ»ի խմբագրութիւնը անծանօթ էր անոր։ Թերթի հասցէն կողքին, գրուած է՝ Թէլէֆօն 2761, ինչ որ կը բացատրէ, թէ ինչո՞ւ վերի նախադասութեան մէջ գործածուած չէ «հեռաձայնի հարուած» արտայայտութիւնը։ Դժբախտաբար, մինչեւ այսօր մարդիկ խօսակցական լեզուով կը շարունակեն թէլէֆօն եւ թէլէֆօնի նման պէսպիսուն ոչ-հայերէն բառեր գործածել…։ 
Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ (www.armenianprelacy.org)
ՄԻ՛ ՄՈՌՆԱՔ

Լիբանանահայութիւնը ձեր օգնութեան պէտք ունի աւելի քան երբեք
 
Սեղմեցէք այստեղ՝ նուիրատուութիւն մը ընելու համար,
կամ
ձեր նուիրատուութիւնը ղրկեցէք հետեւեալ հասցէին՝


Armenian Prelacy
138 E. 39th Street
New York, NY 10016
Ձեր չէքերը գրեցէք՝ Armenian Apostolic Church of Americaին
(Memo: Lebanon Relief Fund)

ԿԸ ՍՊԱՍԵՆՔ ՁԵՐ ՆԻՒԹԵՐՈՒՆ
Սիրով կ՚ընդունինք ձեր հայերէն կամ անգլերէն նամակները, ինչպէս եւ թղթակցութիւններ, լուսանկարներ եւ ժամանակացոյցի համար նիւթեր։ Պայմանաժամը՝ Երեքշաբթի երեկոյ։ Մեր հասցէն՝ crossroads@armenianprelacy.org։

ՁԵՌՆԱՐԿՆԵՐՈՒ ԺԱՄԱՆԱԿԱՑՈՅՑ
26 Սեպտեմբեր — «Սիամանթօ» լսարանի 2020-2021 տարեշրջանի վերամուտ, առաւօտեան ժամը 10:30ին, առցանց։ Մեր բոլոր ծուխերէն աշակերտները կրնան մասնակցիլ։ 

26 Սեպտեմբեր — Ուսումնական Խորհուրդի Ուսուցչաց Վերաորակաւորման Ծրագրի երրորդ հանդիպումը, առցանց։ Կէսօրէ ետք ժամը 3:30-5:30 (արեւելեան ժամով)։

17 Հոկտեմբեր —Հայկական ուտելիքներու փառատօն, Ս. Գրիգոր եկեղեցի (Ինտիըն Օրչըրտ, Մասաչուսեթս), կէսօրուան ժամը 12:00էն մինչեւ կէսօրէ ետք ժամը 5:00։ Տեղեկութիւններու համար, հեռաձայնեցէք (413) 262-7251 թիւին կամ գրեցէք spariseau@charter.net հասցէին։


Follow us on Social Media
The Armenian Prelacy 
Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at http://www.armenianorthodoxchurch.org/en/