6 Դեկտեմբեր, 2018
ԵՐԵՍՈՒՆ ՏԱՐԻ ԱՌԱՋ 
Ամենայն Հայոց Կաթողիկոս Վազգէն Ա. եւ Մեծի Տանն Կիլիկիոյ Կաթողիկոս Գարեգին Բ. Նիւ Եորք ժամանած էին 3 Փետրուար, 1989ին՝ երկրաշարժի օժանդակութիւնը համակարգելու համար։ Այս լուսանկարը առնուած է «Հրաշափառ»ի արարողութեան ընթացքին, Ս. Վարդան Մայր Տաճարին մէջ (լուսանկար՝ Հարրի Լ. Գունտագճեան)
Վաղը՝ 7 Դեկտեմբերին, կը նշուի Հայաստանի աղէտալի երկրաշարժին 30ամեակը, որ ամբողջ աշխարհի մարդասիրական զգացումները զօրաշարժի ենթարկած էր։

Փետրուար 1988 Փետրուար 1989ը պատմական ժամանակաշրջան մըն էր ամբողջ հայութեան համար։ Այդ օրերը ապրողներս կրնանք վկայել, թէ այդ օրերուն արձանագրուած դէպքերը կարեւոր նշանակութիւն ունեցան Արեւելք-Արեւմուտք յարաբերութիւններուն մէջ։

Այդ բոլորը սկիզբ առաւ Փետրուար 1988ին, երեւանեան զանգուածային ցոյցերով, որոնք կը պահանջէին Արցախի միացումը Հայաստանի, ապա մթնոլորտի ապականման հարցերու լուծումը եւ ազատ արտայայտութեան իրաւունքը ․․․ այլեւայլ առկախ խնդիրներու շարքին։ Արցախեան շարժումի գագաթնակէտին, 7 Դեկտեմբեր, 1988ին, երկիրը ֆիզիքապէս ալ ցնցուեցաւ Լենինականի երկրաշարժով՝ մահ ու կործանում բերելով հայրենի ժողովուրդին։ Մէկ խօսքով՝ խոր յոյզերու, ուռճացող հպարտութեան, մեծ յուսախաբութեան եւ լուրջ խորհրդածութեան տարի մըն էր։

Բայց սուգի այս շրջանը պսակուեցաւ հաւատքով, յոյսով եւ սիրով, երբ մեր երկու հայրապետները՝ Ամենայն Հայոց Կաթողիկոս Վազգէն Ա. եւ Մեծի Տանն Կիլիկիոյ Կաթողիկոս Գարեգին Բ., միասնաբար ճամբորդեցին Միացեալ Նահանգներ, Փետրուար 1989ին։ Կաթիղիկոսները իրենց ձայնը, իրենց խօսքը եւ իրենց ջանքը միացուցին՝ եկեղեցին ու ժողովուրդը քով-քովի բերելու համար։ Անոնց քաջարի արարքը իսկական առաջնորդութեան արարք մըն էր, որուն հայութիւնը այնքա՛ն պէտք ունէր։ Ամէն բանէ վեր՝ Վազգէն եւ Գարեգին Կաթողիկոսներու անմոռանալի, լուրջ եւ ուժեղ պատգամները եկան հայութենէն պահանջելու, որ անցեալը վերագնահատէր, հոգեբանական պատնէշները քանդէր եւ իբրեւ մէկ եկեղեցի, մէկ ազգ ու մէկ ժողովուրդ գործէր։ 

Հայց. Եկեղեցւոյ պետերը կը հանդիպին համայնքի ղեկավարներու Նիւ Եորքի մէջ, Փետրուար 1989ին, երկրաշարժէն երկու ամիս ետք։ Ձախէն աջ՝ Երուսաղէմի Պատրիարքարանի ներկայացուցիչ Շահէ արք. Աճէմեան, Ամերիկայի Արեւելեան թեմի (էջմիածնական) առաջնորդ Թորգոմ արք. Մանուկեան, Ամենայն Հայոց Կաթողիկոս Վազգէն Ա., Մեծի Տանն Կիլիկիոյ Կաթողիկոս Գարեգին Բ., Միացեալ Նահանգներու եւ Գանատայի Արեւելեան թեմի առաջնորդ Մեսրոպ արք. Աշճեան (լուսանկար՝ Հարրի Լ. Գունտագճեան)։ 
ԱՐԱՄ ՎԵՀԱՓԱՌԻ ՍՐԲԱՏԱՌ ԿՈՆԴԱԿՈՎ,
ԱՆՈՒՇԱՒԱՆ ՍՐԲԱԶԱՆ ՀԱՅՐԸ ԱՐՔՈՒԹԵԱՆ ԱՍՏԻՃԱՆ ԿԸ ՍՏԱՆԱՅ 
Կիրակի, 2 Դեկտեմբերին, Նիւ Եորքի Ս. Լուսաւորիչ Մայր Տաճարին մէջ, յընթացս Ս. Պատարագի, Հ. Սահակ ծայրագոյն վարդապետ Եմիշեան կարդաց Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա.ի սրբատառ կոնդակը, որով արքութեան տիտղոսը կը շնորհուէր թեմիս բարեջան առաջնորդ Անուշաւան եպս. Դանիէլեանին։ 
Այնուհետեւ, Terrace on the Parkի մէջ (Քուինզ, Նիւ Եորք) տեղի ունեցաւ ժողովրդային տօնախմբութիւն մը խանդավառ մթնոլորտի մէջ։ Աւելի քան 360 հոգինոց բազմութիւնը նշեց Անուշաւան Սրբազան Հօր թէ՛ընտրութիւնը եւ թէ՛ արքեպիսկոպոսի աստիճանի շնորհումը։

Վերոյիշեալ զոյգ ձեռնարկներու ամբողջական նկարագրութիւնն ու լուսանկարները “Crossroads”ի յառաջիկայ շաբթուան թիւով պիտի ներկայացնենք։
Terrace on the Parkի տօնախմբութենէն տեսարան մը
Անուշաւան արքեպիսկոպոս ջանք թափեց՝ ծայրէ ծայր լեցուն սրահի իւրաքանչիւր սեղան անձամբ ողջունելու
ԱՆՈՒՇԱՒԱՆ ԱՐՔԵՊԻՍԿՈՊՈՍ ԿԸ ՄԱՍՆԱԿՑԻ ՔՐԻՍՏՈՆԵԱՆԵՐՈՒ ՊԱՇՏՊԱՆՈՒԹԵԱՆ ԿԱԶՄԱԿԵՐՊՈՒԹԵԱՆ ՏԱՐԵԿԱՆ ԸՆԹՐԻՔԻՆ
Անուշաւան արքեպիսկոպոս Չորեքշաբթի, 5 Դեկտեմբերին ճամբորդեց Ուաշինկթըն, ուր մասնակցեցաւ Ի Խնդիր Քրիստոնեաներու Պաշտպանութեան (In Defense of Christians, IDC) կազմակերպութեան հինգերորդ տարեկան ընթրիքին։ Իր հիմնադրութենէն ի վեր, IDC նեցուկ կանգնած է քրիստոնեաներու եւ քրիստոնէութեան պաշտպանութեան Միջին Արեւելքի մէջ։ 

Գերշ. Տ. Անուշաւան արք. Դանիէլեան կը քննարկէ Հայոց Ցեղասպանութիւնը Գոնկրէսի մէջ վերահաստատելու եւ ԱՄՆ-Հայաստան տնտեսական կապերը ուժեղացնելու ջանքերը Ներկայացուցիչներու Տան արտաքին գործերու յանձնախումբի աւագ դեմոկրատի՝ Գալիֆորնիոյ ներկայացուցիչ Պրատ Շերմընի հետ
Անուշաւան արքեպիսկոպոս կը շնորհաւորէ պրն. Ռոպըրթ Տեսթրոն, որ վերջերս ԱՄՆի Արտաքին Գործոց նախարարի օգնական նշանակուած է՝ ժողովրդավարութեան, մարդկային իրաւանց եւ աշխատանքի վարչութեան համար։ Պրն. Տեսթրօ քաղաքացիական իրաւունքներու ծանօթ փաստաբան մըն է եւ իրաւագիտութեան դասախօս Կաթողիկէ համալսարանին մէջ, որ նաեւ անկեղծ պաշտպան եղած է քրիստոնեաներու եւ այլ փոքրամասնութիւններու իրաւունքներուն Միջին Արեւելքի մէջ։ 
Անուշաւան արքեպիսկոպոս եւ Տ. Սարգիս քհնյ. Ագթաւուքեան՝ Լոս Անճելըսի Լիբանանի Տիրամօր մարոնի ծուխի եպիսկոպոս Էլիաս Զայտանի, IDCի ատենապետ Թուֆիք Պաաքլինիի, Հայ Դատի Յանձնախումբի անդամներ Ռաֆֆի Գարագաշեանի, Արամ Համբարեանի, Թերեզա Երիմեանի եւ Հայ Դատի Յանձնախումբի ու IDCի աջակից, իրաւաբան Տին Շահինեանի հետ
ԱՍՏՈՒԱԾԱՇՈՒՆՉԻ ԸՆԹԵՐՑՈՒՄՆԵՐ
Գ. ԿԻՐԱԿԻ ՅԻՍՆԱԿԻ
ԱՒԵՏԱՐԱՆ ԸՍՏ ՂՈՒԿԱՍՈՒ (1:39-56)

Նոյն օրերուն, Մարիամ ճամբայ ելլելով՝ աճապարանքով գնաց Յուդայի լեռնային շրջանի քաղաքներէն մէկը: Հոն Զաքարիայի տունը մտնելով՝ Եղիսաբէթի ողջոյն տուաւ: Երբ Եղիսաբէթ Մարիամի ողջոյնը լսեց, իր որովայնին մէջ երեխան շարժեցաւ, եւ Եղիսաբէթ Սուրբ Հոգիով ներշնչուած՝ բարձրաձայն ըսաւ.
Կիներուն մէջ օրհնեա՜լ ես դուն եւ օրհնեա՜լ է զաւակը որ կը կրես որովայնիդ մէջ: Ի՜նչ երջանկութիւն, որ Տիրոջս մայրը ինծի կ’այցելէ. որովհետեւ երբ ողջոյնդ լսեցի, երեխաս ուրախութեամբ շարժեցաւ որովայնիս մէջ: Երանի՜ քեզի որ հաւատացիր, որովհետեւ Աստուծոյ կողմէ քեզի ըսուածները պիտի կատարուին:
 
Մարիամ ըսաւ.
    «Տէրը պիտի գովաբանեմ.
    Ահա հոգիս կ’ուրախանայ
Աստուծմով, իմ Փրկիչովս,
    որովհետեւ ան տեսաւ
իր աղախինին հեզութիւնը:
Ասկէ ետք բոլոր սերունդները
երանի պիտի տան ինծի,
    քանի հզօրն Աստուած ինծի համար
մեծամեծ գործեր կատարեց.
սուրբ է անունը անոր:
    Բոլոր ժամանակներուն մէջ
ողորմութեամբ ան կը նայի
աստուածավախ մարդոց վրայ:
    Իր բազուկով ան զօրութիւն ցոյց տուաւ,
ոչնչացուց հպարտները՝
իրենց բոլոր խորհուրդներով:
    Գահազրկեց արքաները
եւ բարձրացուց խոնարհները:
    Անօթիները բարիքներով լիացուց,
մինչ հարուստները դատարկաձեռն արձակեց:
    Պաշտպան եղաւ իր ծառային՝ Իսրայէլի,
հաւատարիմ մնալով իր ողորմութեան,
    ինչպէս որ խոստացած էր մեր հայրերուն՝
Աբրահամի եւ անոր զաւակներուն»:
Մարիամ Եղիսաբէթի մօտ շուրջ երեք ամիս մնալէ ետք վերադարձաւ իր տունը:


ԳԱՂԱՏԱՑԻՆԵՐՈՒՆ 3: 24-29  

Ուրեմն Օրէնքը մեր խնամակալ դաստիարակը եղաւ, մեզ Քրիստոսի առաջնորդելով, որպէսզի հաւատքով արդարանանք: Բայց հիմա որ հաւատքը եկաւ, այլեւս դաստիարակի պէտք չունինք, որովհետեւ Յիսուս Քրիստոսի հաւատալով, բոլորդ ալ Աստուծոյ որդիներ եղաք: Անգամ մը որ Քրիստոսի միանալով մկրտուեցաք, այլեւս Քրիստոս է որ կ’ապրի ձեր մէջ: Ալ ո՛չ Հրեայի եւ հեթանոսի խտրութիւն կայ, ո՛չ ստրուկի եւ ազատ մարդու, ո՛չ ալ արուի եւ էգի, որովհետեւ Քրիստոսի միանալով՝ բոլորդ ալ մէկ եղաք: Արդ ուրեմն, եթէ Քրիստոսի կը պատկանիք, կը նշանակէ թէ դուք Աբրահամի զաւակներ էք եւ պիտի ժառանգէք ինչ որ Աստուած անոր խոստացաւ:


ՃՇ. ԸՆԹԵՐՑՈՒՄ
Ես. 37:14-38

ԵԿԵՂԵՑԱԿԱՆ ՕՐԱՑՈՅՑ
Ս. ԱՍՏՈՒԱԾԱԾՆԻ ՅՂՈՒԹԵԱՆ ՏՕՆ
Կիրակի, 9 Դեկտեմբեր, Ս. Աստուածածնի Յղութեան տօնն է, որ Աստուածամօր նուիրուած ութը տօնական օրերէն մէկն է Հայց. Եկեղեցւոյ օրացոյցին մէջ։ Այս տօնը միշտ կը նշուի 9 Դեկտեմբերին ու մաս կը կազմէ Եկեղեցւոյ նախապատրաստութեան Ս. Ծննդեան տօներուն։ Հաւատացեալները կը ցնծան այս տօնին առթիւ, երբ կը յիշուի Մարիամ Աստուածածնի յղութիւնը՝ ի լրումն անոր ծնողներու աղօթքներուն, որ հետագային Աստուծոյ Որդիի ծնունդը պիտի դառնար։ Այս տօնին աստուածաշնչական ընթերցումներն են՝ Երգ Երգոց 6:3-8, Մաղաքիա 3:1-2, Գաղատացիներ 3:24-29, Ղուկաս 1:39-56։ 
Ս. ՅԱԿՈԲԻ ՊԱՀՈՑ ԲԱՐԵԿԵՆԴԱՆ
Կիրակի, 9 Դեկտեմբեր, նաեւ Ս. Յակոբ Մծբնացիի պահոց բարեկենդանն է։ Այս հնգօրեայ պահքը՝ Երկուշաբթիէն մինչեւ Ուրբաթ, մեզ կ՚առաջնորդէ Ս. Յակոբի տօնին, որ յաջորդ Կիրակին է։ Աւանդաբար, Յիսնակի ամբողջ յիսնամեայ ժամանակաշրջանը, մինչեւ Ծնունդն ու Աստուածայայտնութիւն Յունուար 6ին, պահքի շրջան մըն էր՝ Մեծ Պահքի նման։ Արդի ժամանակներուն, երեք շաբաթական (Երկուշաբթիէն մինչեւ Ուրբաթ) պահք կը նշուի Յիսնակի ընթացքին. Յիսնակաց Պահք, Սուրբ Յակոբի Պահք եւ Ծննդեան Պահք։ 
ՅԻՍՆԱԿԻ Գ. ԿԻՐԱԿԻ
Կիրակի, 9 Դեկտեմբեր, Յիսնակի երրորդ Կիրակին է, ի նախատեսում Քրիստոսի գալուստին, որ մեզի ապրելու նպատակ կը պարգեւէ, հակառակ մեր դէմ ծառացող բոլոր մարտահրաւէրներուն եւ դժուարութիւններուն։ Յիսնակի մեծագոյն դէմքը Ս. Յովհաննէս Մկրտիչն է (կարդացէք Մատթէոսի եւ Ղուկասի աւետարաններու 3րդ գլուխները)։ 
Ս. ՆԻԿՈՂԱՅՈՍ ՍՔԱՆՉԵԼԱԳՈՐԾ
Շաբաթ, 8 Դեկտեմբերին, Հայց. Եկեղեցին կը յիշէ Ս. Նիկողայոս Սքանչելագործը, որ 4րդ դարուն Լիկիոյ (Փոքր Ասիա) Զմիւռին քաղաքի եպիսկոպոս էր։ Ան ուղղափառութեան ջերմ պաշտպան էր եւ իր միջամտութեան վերագրուած շատ մը հրաշքներու պատճառով Սքանչելագործ մականունը ստացած է։ Առատօրէն նուէրներ բաշխած է՝ գաղտնի կերպով, եւ այս պատճառով ոմանք զինք կը համարեն Կաղանդ Պապայի նախատիպարը։
Այս շաբաթ նաեւ կը յիշուին՝
Ս. Մինաս (Երկուշաբթի, 10 Դեկտեմբեր)
Ս. Կուռնելիոս հարիւրապետ եւ Ս. Պօղիկարպոս Զմիւռնիացի (Երեքշաբթի, 11 Դեկտեմբեր)
Ս. Եւստրատիոս (Հինգշաբթի, 13 Դեկտեմբեր)
Ս. ԾՆՆԴԵԱՆ ՆՇՈՒՄԸ՝ ԲԱՐԵԳՈՐԾՈՒԹԵԱՄԲ
Մեծի Տանն Կիլիկիոյ Կաթողիկոսութեան Քրիստոնէական Դաստիարակութեան բաժանմունքը կը շարունակէ Ս. Ծննդեան բարեսիրութեան ծրագիր մը լիբանահայ աւելի քան 100 կարիքաւոր ընտանիքներու համար, զոր սկսած էր տարիներ առաջ։ Վերջերս, Քրիստոնէական Դաստիարակութեան վարիչ Հ. Զարեհ վրդ. Սարգիսեան յատուկ նամակով խնդրած է մեր թեմի հաւատացեալներէն, որ իրենց նուիրատուութիւններով սատարեն այս նախաձեռնութեան։ Անուշաւան Սրբազան Հայրը Ազգ. Առաջնորդարանի ամբողջական աջակցութիւնը խոստացած է Հայր Սուրբին։ Նկատի ունեցէք, որ 100 տոլարի նուիրատուութիւն մը պիտի ծառայէ ուտելիքներ հայթայթելու ընտանիքի մը համար, այլապէս՝ կրնաք ձեր ուզած գումարը նուիրել։ Մեր ընթերցողներէն շատերը պիտի յիշեն, որ վերջին տարիներուն Հ. Զարեհը ծառայած է մեր թեմին իր ուսումնառութեան շրջանին։ Ստորեւ կու տանք Հայր Սուրբի նամակէն կարգ մը հատուածներ.

« Ձեզ կ՚ողջունեմ քրիստոնէական սիրով, ինչպէս սուրբ առաքեալը կը ցանկայ, որ մենք ընենք։ Աւանդաբար, Ս. Ծննդեան շրջանը ծառայած է, որպէսզի մեր ուրախութիւնը նուէրներով բաժնեկցինք ուրիշներու հետ։ Այդ մտքով, Մեծի Տանն Կիլիկիոյ Կաթողիկոսութեան Քրիստոնէական Դաստիարակութեան բաժանմունքը անցեալ տարիներուն տքնաջանօրէն աշխատած է կարօտեալներուն հասնելու։
Այս առիթով, կ՚ուզեմ Արեւելեան Միացեալ Նահանգներու թեմին մաղթել օրհնաբեր նոր տարի մը, որ լեցուն ըլլայ մեծ իրագործումներով, ծառայութեամբ, երջանկութեամբ ու Տիրոջ բոլոր օրհնութիւններով։ Խորին երախտագիտութեան զգացումներով ընդունեցի ձեր խոստումը՝ այս տարուան Ս. Ծննդեան ծրագրին սատարելու, որ օգնութեան կը հասնի Լիբանանի աւելի քան 100 հայ ընտանիքներու։ Ձեզի կը գրեմ խորին երախտապարտութիւնս յայտնելու համար ձեր առատաձեռնութեան, որ պիտի նպաստէ մեր բաժանմունքի կատարած նշանակալից աշխատանքին։ ... Կ՚աղօթեմ որ մեր Տիրոջ դէմքի օրհնեալ լոյսը եւ Սուրբ Հոգիի պարգեւը միշտ լեցնեն ձեր սրտերն ու հոգիները, կանխայայտ շնորհակալութեամբ ձեր տօնական առատաձեռնութեան համար, եւ լաւագոյն մաղթանքներով այս սրբազան ժամանակներուն»։    


Այս նուիրատուութիւնները տօնական օրերու առթիւ շատ տեղին են եւ մեծապէս պիտի գնահատուին։ Հաճեցէք ուղարկել ձեր վճարագրերը հետեւեալ հասցէին՝ Armenian Prelacy, 138 East 39 th Street, New York, NY 10016։ Չէքերը պէտք է գրուին Armenian Apostolic Church of Americaի անունին, իսկ memoի բաժինին մէջ պէտք է արձանագրուի՝ Gift for the Needy։ Ձեր նուիրատուութիւնները տուրքերէ զերծ է՝ ըստ օրէնքի արտօնած չափին։ 
Կամաւորները ուտելիքի ծրարներ կը պատրաստեն կարիքաւոր ընտանիքներու համար։ Այս ծրագիրը կը ղեկավարուի կամաւորներու կողմէ, ուստի բոլոր նուիրատուութիւնները ուտելիքներու եւ ապրանքներու բաշխումին կը յատկացուին։ 

ՄԵՐ ԾՈՒԽԵՐԷՆ
ՌԷՅՍԻՆԻ Ս. ՅԱԿՈԲ ԵԿԵՂԵՑՒՈՅ 80ԱՄԵԱԿԸ ՏԵՂԱԿԱՆ ՄԱՄՈՒԼԻ ՈՒՇԱԴՐՈՒԹԵԱՆ Կ՚ԱՐԺԱՆԱՆԱՅ 
Ծուխի հայկական դպրոցի աշակերտները ելոյթ ունեցան 80ամեակի տօնակատարութեան ընթացքին
“The Belle City Magazine”ը՝ Ռէյսինի (Ուիսքոնսըն) տեղական ամսաթերթը, նկարազարդ գեղեցիկ յօդուած մը հրատարակած է Ս. Յակոբ եկեղեցւոյ 80ամեակին առիթով՝ Քէյթի Մաթիսոնի ստորագրութեամբ։ Յօդուածը պատմականը կ՚ընէ քաղաքի հայ համայնքին եւ եկեղեցւոյ յոբելեանին։
Վերջերս, Անուշաւան Սրբազան Հայրը այդ առիթով այցելած էր Ռէյսին, Ս. Պատարագ մատուցած եւ նախագահած 80ամեակի տօնակատարութեան։
Հոգաբարձութեան փոխատենապետ դոկտ. Լեւոն Սարեան անդրադարձած էր եկեղեցւոյ պատմութեան՝ տօնակատարութեան ընթացին այս եւս մէջբերուած է վերի յօդուածին մէջ։ Դոկտ. Սարեան յայտնած է.
«1934ին, Ռէյսինի խումբ մը հայեր քով-քովի եկած էին հիմքը դնելու Հայց. Առաքելական ապագայ Ս. Յակոբ եկեղեցւոյ։ 1937ի ամրան, պրն. Ճ. Ճ. Պիկըրթ՝ J. I. Case ընկերութեան նախագահ, հայերուն նուիրած է «Վերկելանտ» սրահը՝ Ռէյսինի Լասալ փողոցին վրայ, ու այնուհետեւ համայնքի եկեղեցին տեղափոխուած է նոր վայրը։ Ս. Յակոբ եկեղեցին օծուած է 16 Հոկտեմբեր, 1938ին, համայնքի ամէն տարիքի անդամներու տքնաջան աշխատանքով։ Ս. Յակոբի համայնքը շարունակած է բարգաւաճիլ ու ծաղկիլ, իսկ 1976ին, նոր եկեղեցի ու համայնքային սրահ կառուցած ենք մեր ներկայ վայրին մէջ»։

ՄԵՐ ԴՊՐՈՑՆԵՐԷՆ
ԿԱԶՄ ՈՒ ՊԱՏՐԱՍՏ ԿԱՂԱՆԴԻ ՆՈՒԻՐԱՏՈՒՈՒԹԵԱՆ
Կրէնիթ Սիթիի Ս. Գրիգոր Լուսաւորիչ եկեղեցւոյ կիրակնօրեայ դպրոցի աշակերտները ակնդէտ կը սպասեն մօտալուտ Կաղանդի օրերուն։ Դպրոցին տօնածառը կանգուն ու զարդարուած է, եւ, ինչպէս նախորդ տարիներուն, պատրաստ լեցուելու գլխարկներով, ձեռնոցներով ու գուլպաներով, որոնք Վանաձորի որբանոցի անչափահաս բնակիչներուն պիտի ղրկուին։

ՆԻՒ ՃԸՐԶԻԻ ԿԻՐԱԿՆՕՐԵԱՅԻ ՆՈՒԻՐՄԱՆ ԱՐԱՐՈՂՈՒԹԻՒՆ 
4 Նոյեմբերին, Ռիճֆիլտի (Նիւ Ճըրզի) Սրբոց Վարդանանց եկեղեցւոյ կիրակնօրեայ դպրոցի ուսուցիչներն ու օգնականները, գլխաւորութեամբ տնօրէնուհի՝ Այտա Ղարիպեանի, եկեղեցւոյ խորանին վրայ իրենց տարեկան ուխտը ըրին։ Հոգեւոր հովիւ Տ. Յովնան քհնյ. Պօզոյեան կատարեց նուիրումի արարողութիւնը։ 

ԿԻՐԱԿՆՕՐԵԱՅԻ 3ՐԴ ԴԱՍԱՐԱՆԸ Ս. ԳԻՐՔ ԿԸ ՍՏԱՆԱՅ
ՍԲ. ՎԱՐԴԱՆԱՆՑԻ ՄԷՋ
Աշակերտները եւ ուսուցչակազմը կ՚երեւին այս նկարին մէջ։ Առջեւի շարքին, ձախէն աջ՝ Թոմըս Թորոսեան, Արա Ինճէօղլու, Մայքըլ Պէտէրճիքեան, Մելինէ Թագւորեան, Լիօ Գույումճեան, Էնն Թրոզօ, Լիզա Թագւորեան։ Ետեւի շարքին՝ Սելինա Պօզոյեան, երէցկին Անի Պօզոյեան, Յովնան քհնյ. Պօզոյեան եւ Այտա Ղարիպեան։ 
Նիւ Ճըրզիի Ս. Վարդանանց եկեղեցւոյ կիրակնօրեայ դպրոցին մէջ սովորութիւն է, որ 3րդ դասարանի աշակերտները Ս. Գիրք ստանան՝ իրենց ուսման ընթացքին դպրոցին մէջ կը գործածուի New Revised Standard Version անգլերէն Աստուածաշունչը, ինչպէս թելադրուած է Ազգ. Առաջնորդարանի Քրիստոնէական Դաստիարակութեան բաժանմունքին կողմէ։ 

Ս. ՍՏԵՓԱՆՈՍ ԿԻՐԱԿՆՕՐԵԱՅՎԱՐԺԱՐԱՆԻ ԱՇԱԿԵՐՏՆԵՐԸ՝
Ս. ԾՆՆԴԵԱՆ ՈԳԻՈՎ
Աշակերտները տուփերը կը լեցնեն
Ուոթըրթաունի (Մէսէչուսեթս) Ս. Ստեփանոս եկեղեցւոյ կիրակնօրեայ վարժարանի 10րդ դասարանի աշակերտներ, Ս. Ծննդեան ոգիով տոգորուած, հաւաքեցին նոր խաղալիքներ, հագուստներ ու պիտոյքներ՝ լեցնելով 32 տուփեր «Ծննդեան երեխայ» (Christmas Child) գործողութեան համար, որ այս Ս. Ծննդեան տուփերը կ՚ուղարկէ կարիքաւոր երեխաներու ամբողջ աշխարհի մէջ։ 

ՆԻՒ ՃԸՐԶԻԻ «ՆԱՐԵԿ» ՎԱՐԺԱՐԱՆԸ
«ՄԵԹՐՈՓՈԼԻԹԸՆ» ԹԱՆԳԱՐԱՆԸ Կ՚ԱՅՑԵԼԷ 
Ռիճֆիլտի (Նիւ Ճըրզի) Սրբոց Վարդանանց եկեղեցւոյ «Նարեկ» շաբաթօրեայ վարժարանի աշակերտներ այցելեցին «Մեթրոփոլիթըն» թանգարանը, յատկապէս՝ «Հայաստա՛ն» ցուցահանդէսը, Շաբաթ, 24 Նոյեմբերին.
Ամիրտովլաթ Ամասիացի
(մահ՝ 8 Դեկտեմբեր, 1496)
Հայ բժշկութեան նախահայր` Մխիթար Հերացիի արժանաւոր յաջորդը եղած է Ամիրտովլաթ Ամասիացին, ուշ միջնադարուն։ Այս երկու յայտնի հեղինակներուն գործը յատկանշուած է միջին հայերէնով ( ռամկօրէն ) գրուած ըլլալը։ Այսպիսով, անոնք որդեգրած էին օրուան խօսակցական լեզուն, փոխանակ դիմելու գրաբարի գործածութեան, որ անմատչելի էր պարզ ժողովուրդին։

Ամիրտովլաթ ծնած է Ամասիա (Սեւ ծովու շրջան) 1420ի շուրջ։ Դպրոց յաճախած է Ամասիոյ եւ Սեբաստիոյ մէջ, իսկ այնուհետեւ տարիներով թափառած է իբրեւ ճամբորդ-բժիշկ Միջին Արեւելքի եւ Իրանի մէջ, բոյսերու նմոյշներ հաւաքելով։ Կը կարծուի, որ իր բժշկական գիտելիքները ձեռք բերած է Միջագետքի մէջ։ Ծանօթ էր հայերէնի, յունարէնի, լատիներէնի, պարսկերէնի, թրքերէնի եւ շրջանի բժշկական գրականութեան լեզուին՝ արաբերէնի։ 1450ական թուականներու վերջերուն տեղափոխուած է Կոստանդնուպոլիս, ուր շարունակած է ուսումնասիրել բժշկութիւն, բնական գիտութիւններ եւ փիլիսոփայութիւն։ 1459ին գրած է իր առաջին գործը՝ «Ուսմունք բժշկութեան», որ նուիրուած է մարդակազմութեան, առողջապահութեան, ախտաբանութեան եւ դեղաբանութեան։ Նոյն տարին գրած է իր առաջին «Ախրապատին» վերնագրով գործը, որ դեղաբանութեան նուիրուած ընդարձակ երկ մըն է ( աքրապատին կը նշանակէ «դեղաբանութիւն» արաբերէնով)։

Կ. Պոլիսը 1453ին գրաւուած էր օսմանեան թուրքերուն կողմէ, որոնք վերջ տուած էին Բիւզանդական կայսրութեան։ 1460ական թուականներուն Ամիրտովլաթ ընտրուեցաւ սուլթան Մեհմէտ Բ.ի (1451-1481) բժշկապետ եւ բժշկապետ-ակնաբոյժի պատուոյ տիտղոսը ստացաւ։ Այնուհետեւ, անծանօթ պատճառներով, տասնամեակ մը պանդխտութեան մէջ անցուց՝ թափառելով Պալքաններու մէջ։ Այդ տարիներուն, 1466-1469ին գրած է բժշկական իր մեծագոյն գործը՝ «Օգուտ բժշկութեան», Պուլկարիոյ Ֆիլիփոպոլիս (այժմ՝ Փլովտիւ)։

1470ական թուականներուն, Ամիրտովլաթ վերադարձած է Պոլիս եւ վերստին ձեռք բերած է իր պաշտօնը արքունիքին մէջ, մինչեւ Մեհմէտ Բ.ի մահը՝ 1481ին։ Այս շրջանին, ան արտադրած է ժողովրդական բժշկութեան գործ մը (1474), ուր նաեւ աստղաբաշխութեան եւ կախարդական բժշկութեան նիւթեր ընդգրկուած են, եւ իր երկրորդ «Ախրապատին»ը (1481)։

1478-1492 ժամանակաշրջանին, Ամիրտովլաթ արտադրած է «Անգիտաց անպէտ» մեծ գործը, ուր աւելի քան 3.000 բոյսեր եւ բուսանուններ ընդգրկուած են՝ իրենց բժշկական գործածութեամբ։

Մեհմետ Բ.ի որդին՝ Ահմետ, Ամասիոյ տիրակալ դառնալով, հրաւիրած է Ամիրտովլաթը իր ծննդավայրը վերադառնալու։ 1490ական թուականներուն հայ բժշկապետը ճամբորդած է Պրուսա՝ հանքային ջուրերով բժշկուելու համար, եւ մահացած է Ամասիոյ (կամ ըստ այլ կարգ մը աղբիւրներու՝ Պրուսա) մէջ, 8 Դեկտեմբեր, 1496ին։
Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org
ԴՈՒՔ ԺԱՄԱՆԱԿԻՆ ՏԷՐԸ ՉԷՔ
Յաճախ գրած ենք այն մասին, թէ կարեւոր է հայերէն մտածել երբ հայերէն կը խօսիք (կամ կը գրէք)։ Վերջին հաշուով, որեւէ օտար լեզուով խօսելու պարագային, այդ լեզուով պէտք է մտածէք։ Ինչո՞ւ։ Առաջին հերթին, որովհետեւ կ՚ուզէք ցոյց տալ, թէ դուք կը տիրէք այդ լեզուին, եւ ո՛չ թէ այդ լեզուն ձեզի կը տիրէ։ Երկրորդ՝ եթէ կը սկսիք ընդօրինակել, օրինակ, անգլերէն կառոյցներ երբ սպաներէն կը խօսիք, վստահ եղէք, որ այդ լեզուն խօսողներու կատակներուն թիրախը պիտի դառնաք։ (Եթէ յանկարծ հեռաձայնով հաղորդագրութիւն ղրկէք՝ “Mi casa es no su casa” նախադասութեամբ, հետեւելով անգլերէն “My house is not your house” նախադասութեան, վստահ եղէք, որ ձեր խօսակիցը ձեզ պիտի ողողէ գետինները խնդալէն տապլտկող emojiներով։ Ինչո՞ւ։ Պարզապէս որովհետեւ սպաներէն կ՚ըսեն “Mi casa no es su casa”)։

Քանի մը օրինակներ կրնան օգտակար ըլլալ ո՛չ միայն հայերէն սորվողներու կամ Ամերիկա ծնած հայախօսներուն, այլեւ նոյնիսկ բնիկ հայախօսներուն, որոնք երկար ժամանակ անգլիախօս միջավայրի մէջ ապրած են։ Չէ՞ք կարծեր։ Վստահաբար կրնաք ձեզ ճանչնալ հետեւեալ երեք սովորական օրինակներուն մէջ.

1) Take your time

Դուք ժամանակ կ՚առնէք որեւէ գործ ընելու համար, ըլլայ նախաճաշել, դաս ընել, նամակ գրել կամ խոտը կտրել։ Այսինքն՝ գործը կ՚ընէք ձեր կշռոյթով։
Անշուշտ, շատ լաւ հասկցաք, թէ մէկը ի՞նչ կ՚ուզէր ըսել (ծնած՝ Պոստոն, Պոլիս, Փարիզ կամ Պէյրութ), երբ քաղաքավարօրէն ձեզի ըսաւ «Ժամանակդ առ»։ Այսինքն՝ “Take your time”։ Ճիշդ հասկցաք, բայց ըսողը սխալ ըսած էր։ Եթէ իսկապէս հայերէն խօսէր, պիտի յանձնարարէր՝

«Մի՛ աճապարեր» ։

Երկու իրարմէ անկախ լեզուներ երբեմն կրնան նոյն գաղափարը միեւնոյն կառոյցով արտայայտել, բայց յաճախ իրարմէ լրիւ ձեւով։ Հայերէնը աւելի աղքատ չէ, որովհետեւ «Մի՛ աճապարեր» կ՚ըսէ՝ «Ժամանակդ առ»ի փոխարէն։ Փաստօրէն, ան երկրորդ արտայայտութիւն մը չէ ստեղծած միեւնոյն բանը ըսելու համար։ Ինչո՞ւ։ Որովհետեւ դուք ժամանակին տէրը չէք, որպէսզի զայն առնէք...։

2) I had a good time

Այլ առիթով խօսած ենք այն մասին, թէ «to have» անգլերէն բայը բազում իմաստներ ունի, մինչ հայերէն «ունենալ»ը մէ՛կ իմաստ ունի՝ «իւրացնել, տէր դառնալ, ստանալ»։ Նորէն, դժուար է մտածել, որ դուք կը հաւատաք, որ ժամանակի տէրն էք։ Սակայն, ճիշդ ա՛յս է տպաւորութիւնը, զոր կը ձգէք, երբ կը քալէք դէպի ձեր ինքնաշարժը խնճոյքէ մը ետք ու կ՚ըսէք. «Լաւ ժամանակ ունեցայ»։ Եթէ ձեր խօսակիցը ճիշդ հայերէն գիտէ, կրնայ պատասխանել. «Չէ, չունեցար»։ Պատճառը այն է, որ դուք լաւ ժամանակ «չունիք» երբ խնճոյքի մը կ՚երթաք կամ երբ որեւէ այլ բան կ՚ընէք, որ կապուած է “to have a good time” արտայայտութեան։ Հետեւաբար, հայերէն մտածող հայախօսը կ՚ըսէ. «Ես լաւ ժամանակ անցուցի» ։ Եթէ կը կարծէք, թէ ճիշդ չի հնչեր, միայն մէկ պատճառ կայ. կը փորձէք հայերէն խօսիլ... անգլերէնի հմայքին տակ։

3) Have a nice day

Օրական քանի՞ անգամ կ՚ըսէք ասիկա։ Կը կրկնենք. խնդիրը այն է, որ ժամանակի տէրը չէք, հետեւաբար՝ օրուան տէրն ալ չէք կրնար ըլլալ։ Հետեւաբար՝ «Լաւ օր ունեցէք» ըսելը անիմաստ է, որովհետեւ գաղափարը գոյութիւն չունի հայերէն մտածողութեան մէջ։ Դուք պարզապէս լաւ օրուան մը մաղթանքը կ՚ընէք, եւ կ՚ըսէք «Լաւ օր ձեզի»։ Անշուշտ, այս տողերուն ընթերցողը շատ լաւ գիտէ, որ եթէ կը խօսի ընկերոջը կամ ընտանիքի անդամին, «Լաւ օր ձեզի» պիտի ըսէ...։
«ՀԱՅԱՍՏԱ՛Ն» ՑՈՒՑԱՀԱՆԴԷՍԸ
«ՄԵԹՐՈՓՈԼԻԹԸՆ» ԹԱՆԳԱՐԱՆԻՆ ՄԷՋ
«Հայաստա՛ն» ցուցահանդէսը կը շարունակուի Նիւ Եորքի «Մեթրոփոլիթըն» թանգարանին մէջ մինչեւ 13 Յունուար, 2019։ Եթէ տակաւին չէք տեսած, կը խրախուսենք, որ այցելութիւն մը կատարէք այս բացառիկ ցուցադրութեան։

Ցուցահանդէսին հետ կապուած շարք մը յատուկ ձեռնարկներ տեղի ունեցած են։ Ուրբաթ, 7 Դեկտեմբերին, եւ Շաբաթ, 8 Դեկտեմբերին, երեկոյեան ժամը 5:00էն 8:00, Արա Տինքճեան (ուտ), Իսմայիլ Լումանովսկի (նրբասրինգ) եւ Թամէր Փինարպաշը (քանոն) հայկական եւ համաշխարհային սենեկային երաժշտութիւն պիտի մեկնաբանեն թանգարանի մեծ սրահի Balcony Bar-ին մէջ։  

ԵԹԷ ԸՍԵԼԻՔ ՈՒՆԻՔ...
. . . գրեցէք մեզի crossroads@armenianprelacy.org հասցէին։  

Մեր ելեկտրոնային շաբաթական լրատուի՝ “CROSSROADS”-ի մասին ձեր կարծիքն ու ձեր առաջարկները մեզ շատ կը հետաքրքրեն։ Ա՛յս նպատակով հաստատեցինք նամակագրութեան վերի յատուկ հասցէն։ 
ՍՈՒՐԻԱՀԱՅ ՀԱՄԱՅՆՔԸ ՍԿՍԱԾ Է ՎԵՐԱՇԻՆՈՒԹԵԱՆ

Կռիւն ու ռումբերը վերջ գտած են։ Հիմա վերաշինութեան դժուարին գործընթացը սկսած է։ Շարունակեցէք սուրիահայութիւնը ներկայ պահել
ձեր աղօթքներուն մէջ ու քսակներէն բաժին յատկացնել։ 



Սուրիահայութեան Օգնութեան Ֆոնտին նուիրատուութիւնները կարելի է առցանց կատարել։ 

Անմիջապէս նուէր մը կատարելու համար,
սեղմեցէ՛ք այստեղ եւ ընտրեցէ՛ք
SYRIAN ARMENIAN RELIEF։

Այլապէս, ձեր նուիրատուութիւնը ղրկեցէք հետեւեալ հասցէին՝

Armenian Prelacy
138 E. 39 th Street
New York, NY 10016
Չէքերը գրեցէք Armenian Apostolic Church of America անունին
(Memo: Syrian Armenian Relief)

Շնորհակալութիւն ձեր օժանդակութեան համար։

ԺԱՄԱՆԱԿԱՑՈՅՑ
«Սիամանթօ» լսարանի դասերը տեղի կ՚ունենան իւրաքանչիւր ամսուան երկրորդ Շաբաթ օրը «Յովնանեան» վարժարանին մէջ, Նիւ Ճըրզի։ Յաջորդ դասը՝ Շաբաթ, 8 Դեկտեմբերին։ Տեղեկութիւններու համար՝ anec@armenianprelacy.org կամ 212-689-7810։

Մինչեւ 13 Դեկտեմբեր (Հինգշաբթի օրերը) —Յայտնութեան գիրքի սերտողութիւն, եօթը մասով, Ս. Լուսաւորիչ մայր եկեղեցւոյ մէջ, Նիւ Եորք։ Բանախօս՝ Շանթ սրկ. Գազանճեան, Ազգային Առաջնորդարանի Քրիստոնէական Դաստիարակութեան վարիչ։

Մինչեւ 13 Յունուար, 2019 —Հայոց պատմութեան ու մշակոյթին նուիրուած «Հայաստա՛ն» ցուցահանդէսը կը շարունակուի Նիւ Եորքի «Մեթրոփոլիթըն» թանգարանին մէջ։ Ամբողջութեամբ Հայաստանի նուիրուած առաջին ցուցահանդէսն է այս նշանաւոր թանգարանին մէջ, պատրաստութեամբ՝ դոկտ. Հելըն Էվընզի։

9 Դեկտեմբեր —“What’s in a Name? The Etymology of Armenian Surnames”։ Դասախօսութիւն՝ գրող եւ խմբագիր C. K. Garabed-ի կողմէ։ Կէսօրէ ետք ժամը 1։00ին, «Բաշալեան» սրահ, Ս. Լուսաւորիչ Մայր Եկեղեցի, Համազգային Հայ Մշակութային Միութեան Շրջանային Վարչութեան եւ Ս. Լուսաւորիչ Մայր Տաճարի հովանաւորութեամբ։

9 Դեկտեմբեր —Կրէնիթ Սիթիի (Իլինոյ) Ս. Գրիգոր Լուսաւորիչ եկեղեցւոյ 64ամեակ։ Ս. Պատարագ պիտի մատուցանէ Գերպ. Տ. Սահակ Ծ. վրդ. Եմիշեան։ Յաւարտ Ս. Պատարագի տեղի պիտի ունենայ ճաշկերոյթ եւ մշակութային ձեռնարկ։

16 Դեկտեմբեր —Ս. Սարգիս եկեղեցւոյ (Տիրպորն, Միշիկըն) կիրակնօրեայ դպրոցի Կաղանդի հանդէս «Առաքելեան» սրահին մէջ, յաւարտ Ս. Պատարագի։

23 Դեկտեմբեր —Կրէնիթ Սիթիի (Իլինոյ) Ս. Գրիգոր Լուսաւորիչ եկեղեցւոյ Տիկնանց Միութեան Կաղանդի տարեկան անուշավաճառք։

31 Դեկտեմբեր Նոր Տարուան ճաշկերոյթ ու պարահանդէս Սրբոց Վարդանանց եկեղեցւոյ մէջ (Ռիճֆիլտ, Նիւ Ճըրզի), երեկոյեան ժամը 8։00էն սկսեալ։

5 Յունուար Ս. Սարգիս եկեղեցի (Տիրպորն, Միշիկըն), Ճրագալոյցի նշում։

 26 Յունուար —«Կեանք ու կռիւ»՝ Արցախի հերոսամարտին նուիրուած ֆիլմի ցուցադրութիւն, Կրէնիթ Սիթիի Ս. Գրիգոր Լուսաւորիչ եկեղեցւոյ սրահին մէջ:

17 Մարտ “Musical Armenia” համերգ, ժամը 2:00ին, Carnegie Hallի Weill Recital Hallի մէջ։ Հետեւեցէ՛ք մանրամասնութիւններուն։  

5 Մայիս —Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակ։ Թուականը նկատի ունեցէք։

Follow us on Social Media
The Armenian Prelacy 
Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at  http://www.armenianorthodoxchurch.org/en/