25 Հոկտեմբեր 2018
ԱՐԱՄ Ա. ՎԵՀԱՓԱՌԻ ՔԱՀԱՆԱՅԱԿԱՆ ՁԵՌՆԱԴՐՈՒԹԵԱՆ 50ԱՄԵԱԿԸ ՆՇՈՒԵՑԱՒ ԼԻԲԱՆԱՆԻ ՄԷՋ 
Անցեալ շաբաթավերջին, Ն.Ս.Օ.Տ.Տ. Արամ Ա. Կաթողիկոսի քահանայական ձեռնադրութեան 50ամեակը նշուեցաւ Անթիլիասի մէջ։ Կիրակի, 21 Հոկտեմբերին, Արամ Վեհափառ Ս. Պատարագ մատուցանեց Անթիլիասի Ս. Գրիգոր Լուսաւորիչ Մայր Տաճարին մէջ։ Պատարագէն ետք տեղի ունեցաւ ընդունելութիւն մը։ Պատարագին ներկայ էին Լիբանանի եւ Հայաստանի պաշտօնատարներ, որոնց շարքին՝ Հայաստանի Հանրապետութեան վարչապետի պաշտօնակատար Նիկոլ Փաշինեան։ Ընդունելութեան ընթացքին, խօսք առին Ամենայն Հայոց Կաթողիկոս Գարեգին Բ.ի, Փրանկիսկոս Պապի եւ Լիբանանի նախագահ Միշէլ Աունի ներկայացուցիչները, ինչպէս եւ վարչապետի պաշտօնակատար Փաշինեան։

Նորին Սրբութիւնը խնդրած էր, որ նշումը տեղական հանգամանք կրէր՝ առանց Կիլիկիոյ Կաթողիկոսութեան պատկանող թեմերու մասնակցութեան։ Անոր քարոզը՝ հայերէն ու ֆրանսերէն լեզուներով, իբրեւ բնաբան ունէր Մատթէոսի Աւետարանի հետեւեալ մէջբերումը (գլ. 20, հմր. 28). «Որովհետեւ Մարդու Որդին, ինքն ալ, չեկաւ ուրիշներու կողմէ սպասաւորութիւն ընդունելու, այլ սպասաւորելու եւ իր կեանքը շատերու համար որպէս փրկագին տալու»:
Կիրակի երեկոյեան Արամ Վեհափառի ի պատիւ յատուկ ճաշկերոյթ մը տրուեցաւ «Լը Ռուայալ» պանդոկին մէջ։

ԿՐՕՆԱԿԱՆ ԵՒ ՔԱՂԱՔԱԿԱՆ ԺՈՂՈՎՆԵՐԸ ՀԱՆԴԻՊԵՑԱՆ ԱՆԹԻԼԻԱՍԻ ՄԷՋ
Մեծի Տանն Կիլիկիոյ Կրօնական եւ Քաղաքական Ժողովները հանդիպումներ ունեցան Հոկտեմբեր 18ին եւ 19ին, անջատաբար եւ միասնաբար, Արամ Ա. Վեհափառի նախագահութեամբ։ Ժողովին ընթացքին, զեկոյցներ ներկայացուեցան շարք մը նիւթերու եւ հարցերու մասին, որոնց հետեւեցան քննարկումներ եւ համապատասխան որոշումներ։ Կրօնական Ժողովին մաս կը կազմեն 17 եկեղեցականներ, Օշական արք. Չոլոյեանի ու Նարեկ արք. Ալեէմեզեանի ատենապետութեամբ եւ Պօղոս ու Պետրոս վարդապետներու ատենադպրութեամբ։ 

Ս. ՅԱԿՈԲ ԵԿԵՂԵՑՒՈՅ 80 ԱՄԵԱԿ
Վերադառնալով Լիբանանէն, թեմիս առաջնորդ Անուշաւան եպս. Դանիէլեան այս շաբաթավերջին պիտի ճամբորդէ Ռէյսին, Ուիսքոնսըն, ուր Ս. Պատարագ պիտի մատուցանէ ու քարոզէ Ս. Յակոբ եկեղեցւոյ մէջ։ Եկեղեցւոյ հոգեւոր հովիւ Տ. Տարօն Ա. քհնյ. Ստեփանեան պիտի մասնակցի արարողութեան։ Յաւարտ Ս. Պատարագի, Անուշաւան Սրբազան պիտի նախագահէ եկեղեցւոյ հիմնադրութեան 80ամեակի հանդիսութեան, որ տեղի պիտի ունենայ Ռէյսինի Meadowbrook Country Club-ի մէջ։

ՄԱՀԱԶԴ․ ՊՐՆ. ՃԷՔ ՏԷՐ ԱՒԵՏԻՍԵԱՆ
Առաջնորդարանս ցաւով իմացաւ, թէ Երեքշաբթի, 23 Հոկտեմբերին, իր մահկանացուն կնքած է  պրն. Ճէք Տէր Աւետիսեանը։ Հանգուցեալը յաջող գործարար մը եղած է, նախ՝ Նիւ Ինկլընտի Star Market խանութներու շղթային մէջ, եւ ապա իր սեփական նպարատուներու շարքով (Omni Foods)՝ Նիւ Հէմփշիրի եւ Մէսէչուսեթսի մէջ։ Պրն. Տէր Աւետիսեան՝ իր հայութեամբ հպարտ ազգային մը, մաս կազմած է Ուոթըրթաունի Հայ Մշակութային Կեդրոնի շինարարութեան նախաձեռնող խումբին։ Ան արժանացած էր Մեծի Տանն Կիլիկիոյ Կաթողիկոսութեան ամենաբարձր պարգեւին՝ «Կիլիկիոյ իշխան»ի շքանշանին, ամերիկահայ համայնքին իր երկարամեայ ծառայութեան համար։    
 
Պրն. Տէր Աւետիսեան 1950ին ամուսնացած էր Թելմա Մելքոնեանի հետ եւ բախտաւորուած երկու զաւակներով՝ Սուրէն եւ Քրիսթին։ Մեր ցաւակցութիւնները կը յայտնենք հանգուցեալի այրիին՝ տիկ. Թելմա Մելքոնեան-Տէր Աւետիսեանին, զաւակներուն՝ տէր եւ տիկ. Սուրէն եւ Շարոն Տէր Աւետիսեանին, տէր եւ տիկին Ճէք եւ Քրիսթին Մարտոյեանին, թոռներուն եւ ծոռներուն։
 
Տան կարգը տեղի պիտի ունենայ Կիրակի, 28 Հոկտեմբերին, երեկոյեան ժամը 4:00էն 8:00, Ս. Ստեփանոս եկեղեցւոյ մէջ (38 Elton Avenue, Watertown, Massachusetts 02472), եկեղեցական արարողութեամբ՝ ժամը 7:00ին։ Յուղարկաւորութիւնը պիտի կատարուի Երկուշաբթի, 29 Հոկտեմբերին, առաւօտեան ժամը 11:00ին, Ս. Ստեփանոս եկեղեցւոյ մէջ, իսկ թաղումը՝ Ուոթըրթաունի Ridgelawn գերեզմանատան մէջ։

Փոխան ծաղկեպսակի նուիրատուութիւններ կարելի է կատարել Ս. Ստեփանոս եկեղեցւոյ կամ «Քէմփ Հայաստան»ին։


ՆՈՐԸՆՏԻՐ ԱՌԱՋՆՈՐԴԻՆ ԸՆՏՐՈՒԹԵԱՆ ՆՇՈՒՄԸ՝ ԴԵԿՏԵՄԲԵՐ 2ԻՆ
Կիրակի, 2 Դեկտեմբերին, Անուշաւան Սրբազանի ընտրութիւնը պիտի նշուի յատուկ տօնախմբութեամբ։ Թեմիս Կրօնական Ժողովը եւ Ազգային Վարչութիւնը հաւատացեալները կը հրաւիրեն մասնակցելու առաւօտեան Ս. Պատարագին եւ անոր յաջորդող ճաշկերոյթին։

Անուշաւան Սրբազան պիտի պատարագէ ու քարոզէ Ս. Լուսաւորիչ Մայր Եկեղեցւոյ մէջ (221 East 27 th Street, Նիւ Եորք)։ Ժամերգութիւնը պիտի սկսի առաւօտեան ժամը 10ին։ Այնուհետեւ, ճաշկերոյթ մը տեղի պիտի ունենայ Terrace on the Parkի մէջ (Ֆլաշինկ Մէտոզ, Նիւ Եորք)։ Ընդունելութիւնը պիտի սկսի կէսօրէ ետք ժամը 2:30-ին, իսկ ճաշի սպասարկութիւնն ու յայտագիրը՝ ժամը 3:30ին։

Տոմսեր ապահովելու կամ տեղեկութիւններ ստանալու համար, հաճեցէք ելեկտրոնային նամակով ( email@armenianprelacy.org ) կամ հեռաձայնով (212-689-7810) կապուիլ Առաջնորդարանին հետ։

ՅԱՅՏՆՈՒԹԵԱՆ ԳԻՐՔԻ ՍԵՐՏՈՂՈՒԹԻՒՆ
Ս. ԼՈՒՍԱՒՈՐԻՉ ՄԱՅՐ ԵԿԵՂԵՑՒՈՅ ՄԷՋ
Այս գիշեր Յայտնութեան գիրքի սերտողութիւն մը կը սկսի Նիւ Եորքի Ս. Լուսաւորիչ Մայր Եկեղեցւոյ մէջ, ղեկավարութեամբ Ազգ. Առաջնորդարանի Քրիստոնէական Դաստիարակութեան բաժանմունքի վարիչ Շանթ սրկ. Գազանճեանի։ Սերտողութիւնը իրերայաջորդ Հինգշաբթի օրերուն պիտի շարունակուի մինչեւ 13 Դեկտեմբեր (բացառելով Գոհաբանութեան օրը)։ Տեղեկութիւններու համար, հաճեցէք կապուիլ Մայր Եկեղեցւոյ գրասենեակին ելեկտրոնային նամակով ( office@stilluminators.org ) կամ հեռաձայնով (212-689-5880)։

ԱՒԵՏԻՍ ՀԱՃԵԱՆԻ «ԳԱՂՏՆԻ ԱԶԳ» ՀԱՏՈՐԸ ՊԻՏԻ ՆԵՐԿԱՅԱՑՈՒԻ 
Չորեքշաբթի, 31 Հոկտեմբեր, երեկոյեան ժամը 7:00-ին, Աւետիս Հաճեան պիտի ներկայացնէ իր «Secret Nation: The Hidden Armenians of Turkey» (Գաղտնի ազգ. Թուրքիոյ թաքուն հայերը) գիրքը Ազգ. Առաջնորդարանին մէջ։ Այս ծաւալուն հատորը լոյս ընծայուած է I. B. Tauris հրատարակչատան կողմէ։ Հեղինակը իսլամաց(ու)ած հայերու հետքերը հետապնդած է Անատոլիոյ եւ Արեւմտեան Հայաստանի քաղաքներու եւ գիւղերու մէջ, արձանագրած է վերապրումի ու բացայայտումի պատմութիւններ, եւ խտացուցած է իր գիւտերը ընթերցողը կլանող պատումով մը։ Գիրքը բնորոշուած է իբրեւ «քաջարի, արտակարգ եւ մռայլօրէն գրաւիչ» Լոնտոնի «Թայմզ»ի հեղինակաւոր գրական յաւելուածին մէջ։

Յաւելեալ տեղեկութիւններու համար, հաճեցէք հեռաձայնել 212-689-7810 թիւին կամ գրել email@armenianprelacy.org հասցէին։ Տեղերը սահմանափակ են։ Գիրքէն օրինակներ կարելի է ապահովել Առաջնորդարանի գրախանութէն։

ԱՅՍ ԱՄՍՈՒԱՆ PODCAST-Ը
Տէր Նարեկի Podcast-ը նորէն ձեզի հետ է։ Այս ամիս, կը ներկայացնենք յատուկ հարցազրոյց մը Գերշ. Տ. Անուշաւան եպս. Դանիէլեանի հետ։

ԲԵՄԱԴՐԻՉ ՊԱՐԷՏ ՄԱՐՈՆԵԱՆ՝ Ս. ԼՈՒՍԱՒՈՐԻՉ ԵԿԵՂԵՑՒՈՅ ՄԷՋ
Տէր Մեսրոպ քնհյ. Լագիսեան, պրն. Էտ Կիւլպէնկեան, պրն. Պարէտ Մարոնեան, տիկ. Տիանա Մխիթարեան, պրն. Չարլի Մխիթարեան եւ Յուշեր
Կիրակի, 21 Հոկտեմբերին, բեմադրիչ Պարէտ Մարոնեանի երկրորդ՝ «Lights, Camera, Stories» ձեռնարկը տեղի ունեցաւ Ս. Լուսաւորիչ Մայր Եկեղեցւոյ «Բաշալեան» սրահին մէջ, Մայր Եկեղեցւոյ մշակութային յանձնախումբի կազմակերպութեամբ։

Եկեղեցւոյ հոգեւոր հովիւ Տ. Մեսրոպ քհնյ. Լագիսեանը բարի գալուստ մաղթեց ներկաներուն եւ շնորհակալութիւն յայտնեց յանձնախումբի անդամներուն՝ տիկ. Տիանա Մխիթարեան, տիկ. Գարմէն Կիւլպէնկեան, օր. Թամար Լագիսեան եւ պրն. Մովսէս Մուսայէլեան։

Երգիչ-յօրինող Յուշեր կոմիտասեան երկու երգեր մեկնաբանեց՝ երգահան Սերուժ Պաղտասարեանի մշակումով։ Այդ երգերը ներկայացուած են Պ. Մարոնեանի «1915ի կիներ» փաստանկարին մէջ, որ այնուհետեւ ցուցադրուեցաւ։ Ցուցադրութեան հետեւեցաւ զրոյց մը լսարանին ու բեմադրիչին միջեւ։

Յաջորդաբար, Պ. Մարոնեան ներկայացուց Cultural Impact Foundation ոչ-շահաբեր կազմակերպութեան եւ հայկակաթ թեմաներով ժապաւէններ արտադրող Armenoid Productionsի նորակազմ գործընկերութիւնը։ Ան նաեւ ունկնդիրներուն տեղեկութիւններ տուաւ իր յառաջիկայ ծրագիրներուն մասին. “Titanic Love” (Տիտանական սէր)՝ փաստանկար մը «Թիթանիք» նաւը գտնուած վեց հայերու մասին, եւ “Bloodless” («Անարիւն»), ուրիշ փաստանկար մը որ Հայաստանի «Թաւշեայ յեղափոխութեան» նուիրուած պիտի ըլլայ։

Cultural Impact Foundationի հիմնադիր ու հոգաբարձութեան պատուոյ անդամ պրն. Էտ Կիւլպէնկեան նկարագրեց հիմնարկութեան առաքելութիւնը եւ յորդորեց ներկաները զօրավիգ կանգնելու անոր։ Լսարանին հակազդեցութիւնը ձեռնարկը վերածեց ինքնաբուխ հանգանակութեան։ Մեծաքանակ նուիրատուութիւններ ու խոստումներ իրարու յաջորդեցին, եւ ձեռնարկի աւարտին բարձր տրամադրութիւն մը կը տիրէր բոլոր ներկաներուն մէջ։

ՇԻՔԱԿՈՅԻ «ԴԱՆԻԷԼ ՎԱՐՈՒԺԱՆ» ԴՊՐՈՑԻ ՆՈՐ ՏԱՐԵՇՐՋԱՆԸ
Հ. Ղեւոնդ Բէնթէզեան «Դանիէլ Վարուժան» դպրոցի ուսուցչական կազմի, անձնակազմի եւ աշակերտութեան հետ
18 Օգոստոսին, Կլենվիւի (Իլլինոյ) Ամենասրբոց եկեղեցւոյ «Դանիէլ Վարուժան» շաբաթօրեայ դպրոցը սկսաւ ուսումնական նոր տարեշրջանը։ Տնօրէնուհի տիկ. Թալին Արթինեան ողջունեց հին թէ նոր ընտանիքները, իսկ եկեղեցւոյ հոգեւոր հովիւ Ղեւոնդ Ծ. Վրդ. Բէնթէզեան առաւօտեան աղօթքը կատարեց։ «Դանիէլ Վարուժան» դպրոցը ներկայիս 104 աշակերտ, 15 ուսուցիչ, 7 հոգաբարձու եւ 30 օգնական շրջանաւարտներ ունի, հանդիսանալով Շիքակոյի հայ համայնքի կենսական մէկ մասնիկը։

Ուսումնական ծրագիրը կ՚ընդգրկէ ընթերցանութիւն, գրելավարժութիւն, գրականութիւն, կրօնք, արուեստ, պատմութիւն, երաժշտութիւն եւ հայկական խոհանոց։ Դպրոցին մէջ տիրող աշխուժութիւնը քաջալերանքի արժանի է։ 
ՖԻԼԱՏԵԼՖԻԱՅԻ «ՀԱՅԿԱԶԵԱՆ» ՎԱՐԺԱՐԱՆԻ ԴԱՇՏԱԳՆԱՑՈՒԹԻՒՆԸ
«Հայկազեան» դպրոցի աշակերտները կը վայելեն դաշտագնացութիւնը 
Ֆիլատելֆիայի Ս. Գրիգոր Լուսաւորիչ եկեղեցւոյ «Հայկազեան» շաբաթօրեայ վարժարանի աշակերտները վերջերս ագարակ մը այցելեցին՝ աշնան գալուստը եւ յառաջիկայ Հալովինը նշելու համար։ Աշակերտները շրջեցան հարիւրաւոր դդումներուն ընդմէջէն եւ վայելեցին կառքով պտոյտ մը հոյակապ վերջալոյսի մը ընթացքին։ Օրը վերջացաւ խարոյկի մը շուրջ։
ԱՍՏՈՒԱԾԱՇՆՉԱԿԱՆ ԸՆԹԵՐՑՈՒՄՆԵՐ
Այս Կիրակի, 28 Հոկտեմբեր, Խաչվերացի Է. Կիրակին է՝ Ս. Խաչի Գիւտ։ Սուրբ Գիրքի ընթերցումներն են՝ Իմաստութիւն Սողոմոնի 14:1-8, Եսայի 33:22-34, Ա. Կորնթացիներուն 1:18-24, Մատթէոս 24:27-36։ 


Որովհետեւ Մարդու Որդին պիտի գայ կայծակի նման, որ երբ փայլատակէ՝ կը լուսաւորէ ամբողջ երկնակամարը, արեւելքէն արեւմուտք: Անգղները կը հաւաքուին հոն՝ ուր դիակ կայ:

Նեղութեան այդ օրերէն անմիջապէս ետք արեւը պիտի խաւարի եւ լուսինը այլեւս պիտի չփայլի. երկինքէն աստղերը պիտի իյնան եւ երկնային մարմինները պիտի սասանին: Ապա Մարդու Որդիին նշանը պիտի երեւի երկինքի մէջ, եւ աշխարհի բոլոր ժողովուրդները պիտի ողբան, երբ տեսնեն Մարդու Որդին, որ կու գայ ամպերուն վրայ բազմած՝ զօրութեամբ եւ մեծ փառքով: Երբ մեծաձայն փողը հնչէ, ան իր հրեշտակները պիտի ղրկէ, որպէսզի հաւաքեն իր ընտրեալները աշխարհի չորս կողմերէն, երկինքի մէկ ծայրէն մինչեւ միւսը:

Թզենին ձեզի թող օրինակ ըլլայ: Երբ տեսնէք որ անոր ճիւղերը կը կակուղնան եւ տերեւ կ’արձակեն, գիտէք թէ ամառը մօտ է: Նոյնպէս ալ, երբ բոլոր ըսածներս կատարուին, գիտցէք թէ Մարդու Որդիին գալուստը մօտ է եւ արդէն հասնելու վրայ է: Վստահ եղէք, որ այս սերունդը չանցած՝ ասոնք բոլորը պիտի պատահին: Նոյնիսկ եթէ երկինքն ու երկիրը անհետանան, խօսքերս պիտի չանհետանան:

Սակայն ո՛չ ոք գիտէ թէ ե՛րբ պիտի գայ այդ օրը կամ ժամը. ո՛չ երկինքի հրեշտակները, ո՛չ ալ Որդին, բայց միայն՝ Հայրը (Մատթէոս 24: 27-36): 

***

Խաչին մասին քարոզութիւնը յիմարութիւն կը թուի կորուստի ճամբուն մէջ գտնուողներուն համար, մինչ մեզի՝ փրկութեան ճամբուն մէջ գտնուողներուս համար Աստուծոյ զօրութիւնն է անիկա: Արդարեւ մարգարէութեան մէջ գրուած է.-
«Իմաստուններուն իմաստութիւնը պիտի խափանեմ,
խելացիներուն խելքը պիտի կորսնցնեմ»:

Այն ատեն ո՞ւր պիտի մնան իմաստունները կամ ուսեալները եւ կամ այս աշխարհի հարցերը քննողները: Չէ՞ որ Աստուած ցոյց տուաւ՝ թէ այս աշխարհի իմաստութիւնը յիմարութիւն է: Որովհետեւ աշխարհը իր ունեցած իմաստութեամբ չկրցաւ ճանչնալ զԱստուած եւ անոր իմաստութիւնը, ուստի Աստուած ուզեց յիմարութիւն համարուած խաչին քարոզութեամբ փրկել անոնք՝ որ կը հաւատան: Եւ թէպէտ Հրեաներ հրաշք կ’ուզեն, իսկ Յոյներ իմաստութիւն կը փնտռեն, մենք խաչուած Քրիստոսը կը քարոզենք, որ գայթակղութիւն է Հրեաներուն համար եւ յիմարութիւն՝ հեթանոսներուն համար, թէպէտ նոյն այդ Հրեաներէն ու Յոյներէն կանչուածներուն եւ դարձի եկածներուն համար՝ անիկա Քրիստոսն է, Աստուծոյ զօրութիւնը եւ Աստուծոյ իմաստութիւնը (Ա. Կորնթ. 1:18-24): 

ԵԿԵՂԵՑՒՈՅ 12 ՍՈՒՐԲ ՎԱՐԴԱՊԵՏՆԵՐԸ
Շաբաթ, 27 Հոկտեմբերին, Հայց. Եկեղեցին կ՚ոգեկոչէ Ընդհանրական Եկեղեցւոյ տասներկու սուրբ վարդապետները՝ Ռէթէոս, Դիոնեսիոս, Սեղբեստրոս, Աթանաս, Կիւրեղ Երուսաղէմացի, Եփրեմի Խուրի Ասորի, Բարսեղ Կեսարացի, Գրիգոր Նիւսացի, Գրիգոր Աստուածաբան, Եպիփան Կիպրացի, Յովհան Ոսկեբերան եւ Կիւրեղ Աղեքսանդրիացի։ 

ԳԻՒՏ ԽԱՉԻ ՏՕՆԸ
Կիրակի , 28 Հոկտեմբերին , Հայց . Եկեղեցին խաչի Գիւտին տօնը կը նշէ։ Կոստանդին կայսեր մայրը՝ Հեղինէ կայսրուհին , որ բարեպաշտ քրիւստոնեայ մըն էր , փափաքեցաւ Սուրբ Տեղեաց այցելութիւն մը կատարել եւ Յիսուսի ոտք դրած վայրերուն ծանօթանալ։ Ըստ որոշ պատումներու , Յուդա անունով իրազեկ հրեայ մը ցոյց տուաւ Գողգոթան , որ բոլորովին աննշան ու անտեսուած վայր մը դարձած էր։ Կայսրուհիի ցուցմունքով , խումբ մը գործաւորներ պեղումներ կատարեցին եւ երեք փայտեայ խաչեր գտան։ Իսկական խաչին ո՞ր մէկը ըլլալը ճշդելու համար , երեք խաչերը իրերայաջորդ կերպով զետեղուեցան նոր մահացած երիտասարդի մը մարմնին վրայ։ Անոնցմէ մէկուն շնորհիւ , երիտասարդը վերակենդանացաւ։ Այդպէս ճշդուեցաւ , որ ա՛յդ էր բուն Խաչը։ Այս դէպքը կը յիշուի 26 Հոկտեմբերին ամենամօտ Կիրակի օրը , որ կրնայ տարուբերիլ 23 ու 29 Հոկտեմբերի միջեւ ։

Խաչը լայնօրէն տարածուած է մեր արուեստին մէջ ու առիթ հանդիսացած՝ սքանչելի գործերու ստեղծումին։ Պատիժի ու մահուան երբեմնի միջոցը դարձած է փրկութեան ու յաղթանակի խորհրդանիշ ։

Խաչի Գիւտին նուիրուած շարականին երկրորդ տունը կ՚ըսէ .
« Անճառելի երեւումն երեւեալ դշխոյին , յատենի յերուսաղէմ խնդրէր զպատուական փայտ խաչին , յոր զմեսիայն բեւեռեցին։ Մեծասաստ հրամանաւն ժողովեալ հրէից , ցուցանելով նմա զպատուական փայտ խաչին , յոր ելեալ բարձրացաւ արարիչն արարածոց։ Ընդ յայտնիլ սրբոյ խաչին ի տեղւոջն սրբութեան բուրմամբ անուշահոտ խնկոց , եւ լցան տիեզերք մեծապէս պարգեւօք »

( Անճառելի տեսիլ մը երեւնալով թագուհիին , Երուսաղէմի մէջ ատեան կազմած կը փնտռէր խաչափայտը որուն վրայ Մեսիան գամեցին։ Մեծասաստ հրամանով հրեաները հաւաքուեցան , ցոյց տուին անոր պատուական խաչափայտը , որուն վրայ բարձրացուցին արարածները ստեղծողը։ Երբ սուրբ խաչը յայտնուեցաւ՝ սրբատեղիին մէջ անուշահոտ խունկեր բուրեցին , եւ տիեզերքը առատ շնորհքներով լեցուեցաւ ) ։


Այս շաբաթ նաեւ կը յիշուին.
Հինգշաբթի, 25 Հոկտեմբեր. Սուրբ Խարիթեանները՝ Արտեմ, Քրիստափոր, Կալինիկէ եւ Ակիւլինէ։ 
Երկուշաբթի, 29 Հոկտեմբեր. Ս. Անաստաս քահանայ, Վարոս, Թէոդիտէ եւ իր երեք զաւակները։
Երեքշաբթի, 30 Հոկտեմբեր. Ս. Սեւերիանոս Սեբաստացի եւ Ս. Հիպերիքեանները։ 
Անտոն Քոչինեան 
(ծնունդ՝ 25 Հոկտեմբեր, 1913)
Անտոն Քոչինեանը կարեւոր, սակայն անտեսուած դէմք մըն է յետ-ստալինեան Հայաստանի պատմութեան մէջ, հակառակ մօտ երկու տասնամեակի իր գործունէութեան՝ պետական-կուսակցական ամենաբարձր ոլորտին մէջ։

Ծնած էր Շահալի (այժմ՝ Վահագնի) գիւղը, Լոռիի մէջ, 25 Հոկտեմբեր 1913ին, երկրագործի մը ընտանիքին մէջ։ Գիւղական դպրոցը ուսանելէ ետք, 1928ին մուտք գործած է Համայնավար Կուսակցութեան երիտարդական միութեան (Կոմերիտմիութիւն) մէջ եւ անոր դպրոցը յաճախած՝ մինչեւ 1931։ Այնուհետեւ, մէկ տարի Թիֆլիսի հայկական մանկավարժական ուսումնարանը անցնելէ ետք (1932-1933), ղրկուած է Երեւանի Կոմերիտմիութեան երկրագործական դպրոցը (1933-1935)։

Քոչինեան երկու տարի աշխատած է Տաւուշի եւ Վայոց ձորի շրջանային թերթերու խմբագրութիւններուն մէջ (1935-1937), որմէ ետք արագօրէն բարձրացած է կուսակցական շարքերուն մէջ։ Նախ՝ Ազիզբեկովի (Սիւնիք) շրջանային կոմիտէի քարոտւղար եղած է (1937-1939), իսկ ապա՝ անձնակազմի քարտուղար եւ համայնավար երիտասարդական միութեան Կեդր. Կոմիտէի առաջին քարտուղար։ 1940ին Հայաստանի Համայնավար կուսակցութեան Կեդր. Կոմիտէի անդամ ընտրուած է, իսկ 1941-1943ին Երեւանի եւ Կոտայքի շրջանային կոմիտէներ գլխաւորեց։

1944-1946ին Մոսկուայի կուսակցական կազմակերպիչներու դպրոցը իբրեւ ունկնդիր յաճախելէ ետք, 1946ին Քոչինեան Հայաստանի Համայնավար կուսակցութեան երրորդ քարտուղար ընտրուած է, իսկ տարի մը ետք՝ անձնակազմի քարտուղար։

Քոչինեանի կեանքի ամենէն կարեւոր շրջանը սկսած է Նոյեմբեր 1952ին՝ Նախարարաց Խորհուրդի նախագահի պաշտօնը ստանձնելէ ետք։ Վարչապետի այս պաշտօնը ան վարած է գրեթէ տասնչորս տարի՝ Գրիգոր Յարութիւնեանի (1937-1953), Սուրէն Թովմասեանի (1953-1960) եւ Եակով Զարոբեանի (1960-1966) շրջաններուն իբրեւ կուսակցութեան առաջին քարտուղար։ Փետրուար 1966ին, Մոսկուայի ղեկավարութիւնը Քոչինեանը ընտրեց Զարոբեանը փոխարինելու համար՝ Մեծ Եղեռնի 50ամեակի զանգուածային ու աննախընթաց ցոյցերէն ետք։

Իր աւելի քան երկու տասնամեակներուն իբրեւ վարչապետ եւ առաջին քարտուղար, Քոչինեան արձանագրած է իրագործումներու կարեւոր շարք մը։ Առաջին քարտուղարի իր պաշտօնավարութեան ընթացքին, Խորհրդային Հայաստանը ստացած է համախորհրդային իր հինգ շքանշաններէն երեքը՝ տնտեսական գործունէութեան բարձր ցուցանիշեր արձանագրելու համար (1968, 1970 եւ 1972)։ Նոյնինքն Քոչինեանը երկու անգամ Լենինի շքանշանով պարգեւատրուած է։ 

Հայաստանի տնտեսական բարգաւաճումը հիմնուած էր ճարտարարուեստական զարգացման ծրագրի մը վրայ։ Ասիկա ներառած է քիմիական գործարաններու շինութիւնը Ալավերդիի եւ Կիրովականի (ներկայիս՝ Վանաձոր) մէջ, Հրազդանի եւ Չարենցաւանի ճարտարուեստական համալիրներուն ստեղծումը, Սեւանի եւ Դիլիջանի գործարաններու շինութիւնը, ինչպէս եւ հում նիւթերու եւ արտադրութեան փոխադրութիւնը ապահովող երկաթուղին։ Երեւանի «Երազ» բեռնակառքերու գործարանը (1964) եւ Աբովեանի ելեկտրոնային գործարանները այս շրջանի յաւելումներ եղած են։ Ելեկտրականութիւնը արտադրութիւնը բազմացած է Երեւանի, Կիրովականի, Հրազդանի ու Տաթեւի կայաններու շինութեամբ։ Արփա-Սեւան կենսական փապուղիի շինարարութիւնը սկսած է 1963ին։ Քոչինեանի գործօն մասնակցութիւն ունեցած է Մեծամօրի հիւլէական կայանի շինարարութեան որոշման մէջ (1969), որ Հայաստանը պիտի տանէր դէպի ուժանիւթի ինքնաբաւութիւն։ Այգիներու հազարաւոր հեկտարներ ցանուած են, որոնց եկած են աւելնալու Ապարանի ջրանցքը եւ Գառնիի ջրամբարը։ Այս ժամականակաշրջանին հետ կապուած է Երեւան-Սեւան մայրուղիին եւ Կապան-Գորիս ճանապարհին շինութիւնը։

Առողջարաններու, պիոներական ճամբաներու եւ հանգստեան գօտիներու ցանցի մը կողքին, 1960ականներուն շինուած է Ծաղկաձորի մարզական համալիրը, ուր խորհրդային ձմեռնային մարզաձեւերու հաւաքականները պիտի մարզուէին։ 1970ականներուն Երեւանի կարգ մը հանրային գործեր սկսած են, ինչպէս «Զուարթնոց» օդակայանի ընդարձակումը (1973), «Հրազդան» մարզադաշտի (1971) եւ «Ռոսիա» շարժապատկերի սրահի շինութիւնը (1970)։ 1972ին սկսած է գետնուղիի (մեթրոյի) շինութիւնը։

Քոչինեան նոյնպէս կարեւոր դեր խաղացած է Ծիծեռնակաբերդի յուշարձանի (1967), Սարդարապատի հերոսամարտի յուշակոթողի (1968), եւ Էրեբունիի թանգարանի (1968) շինութեան գործին մէջ։ Վերջինը զուգադիպած է Երեւանի հիմնադրութեան 2750ամեակին։ Խորհրդահայ գործիչը 1966ին բարձրացուցած է Արցախի հարցը Մոսկուայի իշխանութիւններուն առջեւ։

Նոյեմբեր 1974ին, Անտոն Քոչինեան փոխարինուած է Կարէն Դեմիրճեանի կողմէ՝ «ղեկավարման լուրջ թերութիւնների» պատրուակով, եւ փաստօրէն մնացած է անգործ մինչեւ իր կեանքին վերջը։ Մահացած է Դեկտեմբեր 1, 1990ին։ Ծննդեան հարիւրամեակին, երկու կիսանդրիներ բացուած են Երեւանի եւ Քոչինեանի ծննդավայր Վահագնիի մէջ։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org
Հաւկիթներու փնտռտուք

Ինչպէս գիտենք, գաղափարներ կան, որոնք գրական հայերէնի երկու լեզուաճիւղերով՝ արեւմտահայերէն ու արեւելահայերէն, տարբեր ձեւերով կ՚արտայայտուին։ Օրինակ՝ hotel, ink, եւ այլն։ Այս անգամ, պիտի անդրադառնանք egg («հաւկիթ») բառի պարագային։

5րդ դարու հեղինակները արդէն ձու բառը կը գործածէին։ Այս բառը մտաւ արեւելահայ բազմաթիւ բարբառներու մէջ՝ Կովկաս թէ Իրան, եւ մինչեւ օրս մնացած է գրական արեւելահայերէնի մէջ։ Այս բառով կերտուած են շարք մը բարդ բառեր, ինչպէս ձուածեղ, ձուաձեւ, ձուարան, եւ այլն։ Այս բառերը հաւասարապէս կը գործածուին արեւելահայերէնի եւ արեւմտահայերէնի մէջ (ուր երբեմն հաւկթաձեւ կը գործածուի ձուաձեւ ի տեղ)։ Օրինակ՝ ձուածեղ բառը Երեւանէն մինչեւ Պոլիս եւ այլուր գործածուած է բարբառներուն մէջ, հնչիւնական տարբերութիւններով հանդերձ։

Ձու ի պարագան նոյնը եղած չէ։ Արեւմտահայ բարբառները ընտրած են հաւկիթ բարդ բառի գործածութիւնը։ Հաւ ը թռչուններու ընդհանուր անուանումն էր գրաբարով, որ աշխարհաբարի մէջ աքլորի էգին յատկացուեցաւ, իսկ կիթ կը նշանակէ «կենդանիի արտադրութիւն» (1)։ Հետեւաբար, գրական արեւմտահայերէնի մէջ հաւկիթ դարձաւ հաւուն արտադրածը, որ հետագային կիրարկուեցաւ որեւէ կենդանիի արտադրած... հաւկիթներուն համար։

Կը մնայ պարզել ձու բառին ծագումը։ Հնդեւրոպական լեզուները հասարակաց բառ մը ունին eggի համար։ Հնդեւրոպական նախալեզուին բառը *o(u)i-om (հնչել՝ o(v)iom ) էր, որ յետոյ ունեցաւ իր տարբերակները՝ *oyom/ovom արեւմտեան լեզուներուն մէջ, եւ *aya արեւելեաններու պարագային։ Հայերէնի պարագային, դժուար է պարզել ձ հնչիւնին ծագումը։ Որոշ լեզուաբաններ եզրակացուցած են, որ սկզբնական *oiom բառը դարձած է *ioiom, իսկ *i հնչիւնը դարձաւ tz ( ձ )։ Անոնք կը յիշեն ձաւար բառին պարագան, որ կը ծագի նախահնդեւորպական *ieuo «արմտիք» բառէն)։ Եթէ յիշենք, որ egg բառը * oyom -էն կու գայ, ուրեմն ի վերջոյ, անգլերէն egg ու հայերէն ձու բառերը հեռաւոր զարմիկներ կը դառնան։       
------
(1) Կթել բայը կը նշանակէ «անասունէ մը արդիւնք քաղել»։ Հետեւաբար, կով կթել կը նշանակէ «կովէն (կաթ) քաղել», ինչ որ չ՚ենթադրեր, որ կթել եւ կաթ իրարու հետ կապուած են։

Այս սիւնակին նախորդ գրութիւնները կրնաք գտնել Առաջնորդարանիս կայքէջին մէջ ( www.armenianprelacy.org
ՍՈՒՐԻԱՀԱՅ ՀԱՄԱՅՆՔԸ ՍԿՍԱԾ Է ՎԵՐԱՇԻՆՈՒԹԵԱՆ

Կռիւն ու ռումբերը վերջ գտած են։ Հիմա վերաշինութեան դժուարին գործընթացը սկսած է։ Շարունակեցէք սուրիահայութիւնը ներկայ պահել
ձեր աղօթքներուն ու քսակներուն մէջ


Սուրիահայութեան Օգնութեան Ֆոնտին նուիրատուութիւնները կարելի է առցանց կատարել։

Անմիջապէս նուէր մը կատարելու համար,
սեղմեցէ՛ք այստեղ եւ ընտրեցէ՛ք
SYRIAN ARMENIAN RELIEF։

Այլապէս, ձեր նուիրատուութիւնը ղրկեցէք հետեւեալ հասցէին՝

Armenian Prelacy
138 E. 39 th Street
New York, NY 10016
Չէքերը գրեցէք Armenian Apostolic Church of America անունին
(Memo: Syrian Armenian Relief)

Շնորհակալութիւն ձեր օժանդակութեան համար։

«ՄԵԹՐՈՓՈԼԻԹԸՆ»Ի ՀԱՅԿԱԿԱՆ ԱՐՈՒԵՍՏԻ ՑՈՒՑԱՀԱՆԴԷՍԸ
"Armenia!" Ցուցահանդէսը Նիւ Եորքի «Մեթրոփոլիթըն» թանգարանին մէջ իրապէս հոյակապ է։ Եթէ անգամ մը գացած էք, կ՚արժէ, որ նորէն երթաք, որովհետեւ իւրաքանչիւր այցելութիւն տարբեր յայտնութիւններու դուռը կը բանայ։ Ցուցահանդէսին զուգահեռ, շարք մը ձեռնարկներ տեղի կ՚ունենան։ Օրինակ՝ 18 Հոկտեմբերին, ցուցահանդէսի պատասխանատու դոկտ. Հելէն Էվընզ դասախօսութիւն մը տուաւ հայ արուեստի ու մշակոյթի ծաւալումին մասին դէպի Միջերկրական ծով։ 

Յաջորդ ձեռնարկները
Ուրբաթ, 26 Հոկտեմբեր, կէսօրէ ետք 5:30 եւ 6:30։ Գէորգ Տապաղեան աւանդական երգեր եւ շարականներ պիտի նուագէ դուդուկով։ Տեղի կ՚ունենայ ցուցադրութեան սրահներուն մէջ։

Ուրբաթ, 2 Նոյեմբեր, երեկոյեան ժամը 7:00, Grace Rainey Rogers լսարան։ Սուրիահայ արուեստագէտ Գէորգ Մուրատ հայոց պատմութիւնը կը ներկայացնէ multimedia գործով, ուր ներկայացուած են իր սեփական գծագրութիւնները եւ երգահան Վաչէ Շարաֆեանի նոր յօրինում մը։

Շաբաթ, 3 Նոյեմբեր, առաւօտեան ժամը 10:30-կէսօրէ ետք ժամը 5:00, Grace Rainey Rogers լասան։ Տեղի պիտի ունենայ գիտաժողով մը՝ Գոլումպիա համալսարանի հայկական կեդրոնին համագործակցութեամբ, արուեստաբաններ եւ հայագէտներու մասնակցութեամբ։  

Ուրբաթ, 7 Դեկտեմբեր եւ Շաբաթ, 8 Դեկտեմբեր, երեկոյեան ժամը 5:00էն 8:00։ Արա Տինքճեան (ուդ), Իսմայիլ Լումանովսկի (նրբասրինգ) եւ Թամէր Փինարպաշը (քանոն) հայ եւ համաշխարհային սենեկային երաժշտութիւն պիտի ներկաացնեն Great Hallի Balcony Barին մէջ։

Ուրբաթ, 11 Յունուար, երեկոյեան ժամը 6:30, Grace Rainey Rogers լսարան։ Պիտի ցուցադրուի Սերգէյ Փարաճանովի «Նռան գոյնը» (1969) ժապաւէնը, որուն կ՚ընկերանայ երգահան Մէրի Գույումճեանի նոր յօրինումին մեկնաբանութիւնը։ Շարժանկարէն ետք, քննարկում մը տեղի պիտի ունենայ։

Ցուցահանդէսի շրջապտոյտներ՝ ուղեցոյցով։  Տեղի կ՚ունենան հետեւեալ օրերուն՝ առաւօտեան ժամը 10:30էն սկսեալ. Ուրբաթ, 2 Նոյեմբեր, Չորեքշաբթի, 14 Նոյեմբեր, Ուրբաթ, 7 Դեկտեմբեր, Չորեքշաբթի, 19 Դեկտեմբեր, Չորեքշաբթի, 9 Յունուար։

Որոշ ձեռնարկներ վճարովի են։ Տոմսակներ գնելու համար, այցելեցէք metmuseum.org/tickets կայքէջը, հեռաձայնեցէք 212-570-3949 թիւին կամ այցելեցէք Great Hallի տոմսարկղը թանգարանին մէջ։


Յիշեցում
Armenia! կը շարունակուի մինչեւ յառաջիկայ Յունուար 13
ԺԱՄԱՆԱԿԱՑՈՅՑ
«ՍԻԱՄԱՆԹՕ» ԼՍԱՐԱՆ — Դասերը տեղի կ՚ունենան իւրաքանչիւր ամսուան երկրորդ Շաբաթ օրը «Յովնանեան» վարժարանին մէջ՝ 817 River Road, New Milford, New Jersey։ Տեղեկութիւններու համար՝ anec@armenianprelacy.org կամ 212-689-7810։

Մինչեւ 13 Յունուար, 2019 —Հայոց պատմութեան ու մշակոյթին նուիրուած “Armenia!” անունով մեծ ցուցահանդէսը կը շարունակուի Նիւ Եորքի «Մեթրոփոլիթըն» թանգարանին մէջ։ Ամբողջութեամբ Հայաստանի նուիրուած առաջին ցուցահանդէսն է այս նշանաւոր թանգարանին մէջ, պատրաստութեամբ՝ դոկտ. Հելըն Էվընզի։

25 Հոկտեմբեր-13 Դեկտեմբեր (Հինգշաբթի օրեր) —Յայտնութեան գիրքի սերտողութիւն, եօթը մասով։ Բանախօս՝ Շանթ սրկ. Գազանճեան, Ազգային Առաջնորդարանի Քրիստոնէական Դաստիարակութեան վարիչ։ Ս. Լուսաւորիչ Մայր Եկեղեցի, 221 East 27 th Street, New York City։ Տեղեկութիւններու համար, դիմեցէք եկեղեցւոյ գրասենեակին ելեկտրոնային նամակով ( office@stilluminators.org ) կամ հեռաձայնով՝ (212) 689-5880։

28 Հոկտեմբեր —Ռէյսինի (Ուիսքոնսըն) Ս. Յակոբ եկեղեցւոյ 80ամեակ։ Եպիսկոպոսական Ս. Պատարագ առաւօտեան ժամը 10ին՝ թեմիս առաջնորդ Գերշ. Տ. Անուշաւան եպս. Դանիէլեանի մատուցմամբ եւ Տ. Տարօն Ա. քհնյ. Ստեփանեանի մասնակցութեամբ։

28 Հոկտեմբեր —Ս. Սարգիս եկեղեցի (Տիրպորն, Միշիկըն)։ Ս. Պատարագի նուիրուած չորս դասախօսութիւններու շարք՝ քարոզի ժամանակ։ Երկրորդ դասախօսութիւն՝ խնկարկումի իմաստն ու աւանդութիւնը։

31 Հոկտեմբեր —Աւետիս Հաճեանի «Գաղտնի ազգ. Թուրքիոյ թաքուն հայերը» (“Secret Nation: The Hidden Armenians of Turkey”) գիրքի ներկայացում Ազգ. Առաջնորդարանին մէջ, 138 East 39 th Street, New York City։ Գիրքը պիտի ներկայացնէ հեղինակը։ Տեղեկութիւններու համար, գրեցէք email@armenianprelacy.org հասցէին կամ հեռաձայնեցէք 212-689-7810 թիւին։

2, 3 եւ 4 Նոյեմբեր —Տարեկան պազար եւ կերակուրներու փառատօն, Սրբոց Վարդանանց եկեղեցի, 461 Bergen Boulevard, Ridgefield, New Jersey։ 

2 եւ 3 Նոյեմբեր —Ս. Ստեփանոս եկեղեցին (Ուոթըրթաուն, Մէսէչուսեթս) կը ներկայացնէ իր տարեկան 62րդ պազարը Ուոթըրթաունի Հայ Մշակութային եւ Կրթական Կեդրոնին մէջ։

3 եւ 4 Նոյեմբեր —Տարեկան պազար եւ հայկական կերակուրներու փառատօն, Ս. Սարգիս եկեղեցի, Տիրպորն, Միշիկըն։

4 Նոյեմբեր —Մարդաբանութեան/Հայկական թանգարանը՝ Շարժական Պատկերի թանգարանին (MOMI) հետ միասին, պիտի ներկայացնէ երկու շարժանկարներ՝ «Խոստումը» (“The Promise”) եւ «Կործանելու դիտաւորութիւն» (“Intent to Destroy”)։ Հարց ու պատասխանի բաժնին ելոյթ պիտի ունենայ վերջինիս բեմադրիչ Ճօ Պերլինկըրը։ Տոմսակներ ապսպրելու համար, հեռաձայնել 718-428-5650 թիւին։

4 Նոյեմբեր —Ս. Սարգիս եկեղեցի (Տիրպորն, Միշիկըն)։ Ս. Պատարագի նուիրուած չորս դասախօսութիւններու շարք՝ քարոզի ժամանակ։ Երրորդ դասախօսութիւն՝ Հաղորդութեան բաժին եւ արձակման բաժին։ 

10 Նոյեմբեր —«Հաւատամքի հետազօտութիւն», 3-ժամեայ սեմինար Ինտիըն Օրչըրտի (Մէսէչուսեթս) Ս. Գրիգոր եկեղեցւոյ մէջ։ Բանախօս՝ Շանթ սրկ. Գազանճեան, Ազգ. Առաջնորդարանի Քրիստոնէական Դաստիարակութեան վարիչ։ Տեղեկութիւններու համար, դիմեցէք եկեղեցւոյ գրասենեակին ելեկտրոնային նամակով ( stgregorymass@yahoo.com ) կամ հեռաձայանով՝ (413) 543-4763.

10 եւ 11 Նոյեմբեր —Armenian Fest 2018, Սրբոց Վարդանանց եկեղեցի, Փրովիտընս, Ռոտ Այլընտ։ Տարեկան կերակուրներու փառատօն՝ Rhodes-on-the-Pawtuxet, 60 Rhodes Place, Cranston, Rhode Island։ «Համազգային»ի «Արցախ» պարախումբը ելոյթ պիտի ունենայ երկու օրերուն։ Տեղեկութիւններու համար՝  www.armenianfestri/food.com կամ 401-831-6399։

11 Նոյեմբեր —Ս. Սարգիս եկեղեցի (Տիրպորն, Միշիկըն)։ Ս. Պատարագի նուիրուած չորս դասախօսութիւններու շարք՝ քարոզի ժամանակ։ Երրորդ դասախօսութիւն՝ Հաղորդութեան բաժին եւ արձակման բաժին։ 

18 Նոյեմբեր —Ս. Սարգիս եկեղեցւոյ (Տիրպորն, Միշիկըն) 56ամեակ։ Պատարագիչ՝ թեմիս առաջնորդ Գերշ. Տ. Անուշաւան Սրբազան։ Մանրամասնութիւնները յաջորդիւ։

2 Դեկտեմբեր —Արեւելեան թեմի նորընտիր առաջնորդ Գերշ. Տ. Անուշաւան եպս. Դանիէլեանի ի պատիւ ճաշկերոյթ։ Ընդունելութիւն՝ ժամը 2:30ին, ընթրիք եւ յայտագիր՝ ժամը 3:30ին։ Terrace on the Park, 52-11 111 th Street, Flushing Meadows Park, New York։

9 Դեկտեմբեր —“What’s in a Name? The Etymology of Armenian Surnames”։ Դասախօսութիւն՝ գրող եւ խմբագիր C. K. Garabed-ի կողմէ։ Կէսօրէ ետք ժամը 1, «Բաշալեան» սրահ, Ս. Լուսաւորիչ Մայր Եկեղեցի, 221 East 27 th Street, New York City, Համազգային Հայ Մշակութային Միութեան Շրջանային Վարչութեան եւ Ս. Լուսաւորիչ Մայր Տաճարի հովանաւորութեամբ։ 

5 Մայիս 2019 —Սրբոց Վարդանանց եկեղեցւոյ (Ռիճֆիլտ, Նիւ Ճըրզի) 60ամեակ։ ԹՈՒԱԿԱՆԸ ՆԿԱՏԻ ՈՒՆԵՆԱԼ։
Follow us on Social Media
The Armenian Prelacy 
Tel: 212-689-7810 ♦ Fax: 212-689-7168 ♦ Email: email@armenianprelacy.org

Visit the Catholicosate webpage at  http://www.armenianorthodoxchurch.org/en/