Hoʻolaha Pūnaewele o ʻApelila 2022 |
|
ʻO ka huaʻōlelo ʻo mālama, ua ʻāwili ʻia i loko o kā ke Keʻena Kuleana Hoʻokipa O Hawaiʻi mau moʻolelo hou i pili iā Hawaiʻi a me ke kaʻanalike ʻana i ka manaʻo o mālama i kuʻu home. ʻO mālama, he hopena ia o ke komo ʻana o ka mālama ʻia i loko ou. Ma o nā kenekulia, ua mālama ʻo Hawaiʻi i nā kamaʻāina ma o nā waiwai kūlohelohe i hoʻolako ʻia, nā hana a ka wā kahiko i kū no ko Hawaiʻi ʻano lua ʻole a he lālā i nā poʻe me nā wahi ʻē aʻe ma ʻō aku o ko kākou mau one, a me ka mālama aku a mālama mai e hoʻopaʻa ai iā Hawaiʻi me ke kuanaʻike Hawaiʻi no nā kau a kau. Like nō ʻo mālama me ka hana kūpono ʻana e kākoʻo i ka mea ʻiʻini piha ʻia. No laila, ua like nō me ke kuleana – he ʻauamo a he makana pū ka hiki ke hana i ka mea kūpono. ʻO ia hoʻi kā mākou hana mau ma ke Keʻena Kuleana Hoʻokipa o Hawaiʻi a laehano mākou i ka hiki ke mālama i ko Hawaiʻi – ko kākou ʻāina, moʻomeheu ʻōiwi, ke kaiāulu, a me nā malihini.
|
|
Hoʻi Mai Ka ʻAha Mele Manaka
Ua hoʻi mai ka ʻaha Mele Manaka i ke kahua pāʻani ʻo Edith Kanakaʻole i nā lā 20-23 o ʻApelila me ke anaina hōʻea kino, ʻo ka makamua ia i loko o ʻelua makahiki o ka ʻākoakoa ʻana ka poʻe mai a puni ka honua no ke kaʻana like ʻana i ka moʻomeheu ʻōiwi o Hawaiʻi, ka ʻōlelo Hawaiʻi, nā hana noʻeau a me nā moʻolelo i ʻike ʻia ma Hilo wale nō. ʻO ka hoʻoilina a ka mōʻī Kalākaua – ke kumu no ka inoa o ka ʻaha Mele Manaka hoʻi – ua kākoʻo haʻaheo ʻia e ke Keʻena Kuleana Hoʻokipa o Hawaiʻi ma o kā mākou kākoʻo ʻana aku i ke kaiāulu i kā mākou Papahana Hoʻoulu Kaiāulu, i kōkua aku i ka hoʻolaha ʻana ma ke kīwī ma o nā pō ʻekolu o ka ʻaha. I mea e hōʻoia i ke ola mau o nā moʻolelo ma ke kahua o ka ʻaha Mele Manaka i kēlā me kēia makahiki, e kākoʻo pū ana ke Keʻena Kuleana Hoʻokipa o Hawaiʻi i ka hoʻokikohoʻe ʻana i nā ʻaha o nā makahiki i hala.
|
|
Ka Hoʻohanohano ʻAna I Nā Lei A Me Ka Noʻeau O Nā Haku Lei
I loko nō o ke ola mau o ka hana noʻeau o ka haku lei ma o ka makahiki holoʻokoʻa, ma ka lā mua o Mei, hoʻomanaʻo kākou i ka Lā Lei me nā hoʻolauleʻa e hoʻohanohano i nā hana noʻeau a ko Hawaiʻi mau haku lei ʻoi kelakela.
“He manawa kūpono ka Lā Lei e hoʻolauleʻa i ko kākou pikoʻu ma ka hoʻohanohano ʻana i kahi a kākou e noho ana”, wahi a Kalani Kaʻanāʻanā, ka Luna Alowelo no ke Keʻena Kuleana Hoʻokipa o Hawaiʻi. “Hoʻākoakoa ʻia ko kākou kaiāulu, ko kākou mau waiwai kūlohelohe a me ko kākou moʻomeheu ʻōiwi e hoʻomanaʻo iā kākou i kahi kūikawā o ko kākou home, e like hoʻi me ka haku ʻana i ka lei a me ka manaʻo o ia lei ke pau i ka haku ʻia.”
ʻO nā hoʻolauleʻa no ka Lā Mei i kēia makahiki i kākoʻo ʻia e kā ke Keʻena Kuleana Hoʻokipa Papahana Hoʻoulu Kaiāulu, ua hoʻohui pū ʻia e kā Hui Mokulele ʻo Hawaiian Lā Mei 2022, hōʻike ʻia e Nā Mokupuni O Hawaiʻi, he ʻaha mele kūikawā me Robert Cazimero, ka hui hīmeni Hōkū Hanohano pā-17 ʻo Keauhou, a me kekahi mau kānaka kūikawā hou aku. E hoʻolaha ʻia ana ia ʻaha ma o KFVE me Puke Alo, kākoʻo ʻia e Kāhuli Leo Leʻa a me nā pakanā hou aku. Ma Hawaiʻi Mokupuni, e hoʻohanohano ana ka Hale Hana Noʻeau O Ka Lua Pele i ka haku ʻana me ka hoʻolei ʻana i nā lei ma o ka hōʻoia ʻana i ka mahina ʻo Mei he mahina e hāʻawi aku i nā mele me nā lei, a me ka hoʻokipa ʻana i mau hanana no nā kamaʻāīna me nā malihini.
Me ke kākoʻo o ko HTA papahana Kūkulu Ola, e hoʻi mai ana kā ke Kalana me ke Kūlanakauhale O Honolulu Hoʻolauleʻa Lā Mei ma Kapiʻolani Pāka no ka manawa mua mai 2019. ʻO “Lei Wao Nahele” ka poʻomanaʻo no ka hoʻolauleʻa o kēia makahiki. Ma ʻō aku o ka hōʻikeʻike hoʻohauʻoli Hawaiʻi e mālama ʻia ana kekahi he hoʻokūkū lei me nā lei ʻoi kelakela i ʻāwili ʻia me nā waihoʻoluʻu me nā kaila like ʻole. |
|
Kālele Ka Hālāwai A ʻAha Hana Noʻeau Me Moʻomeheu Pākīpika (CPAC) Ma Luna O Hawaiʻi
Ua mālama ʻia ka hālāwai 35 a ka ʻAha Hana Noʻeau Me Moʻomeheu Pākīpika (CPAC) ma o ka punaewele ma nā lā 13 me 14 o ʻApelila e ʻimi i mau ala i hiki i ka ʻaha ke kākoʻo i nā hana moʻomeheu ma nā papahana me nā makakoho hoʻomōhala wahi me lāhui. Ma ka hālāwai, ua kū no Hawaiʻi ʻo Aaron Salā, he Luna no ka Hoʻolauleʻa Hana Noʻeau Me Moʻomeheu Pākīpika (FestPAC) 2024, Monte McComber, he Luna Moʻomeheu no ka Waena ʻAno Lani Hawaiʻi, a me Kalani Kaʻanāʻanā, he Luna Alowelo no ke Keʻena Kuleana Hoʻokipa O Hawaiʻi. ʻO Kalani, he Luna Hoʻomalu pū ʻo ia no ka hālāwai o kēia makahiki a ua wehe ʻo ia me ke Oli Aloha e hoʻomanaʻo mai iā kākou i ka hana koʻikoʻi e mālama ʻia nei e ka ʻaha a e alakaʻi ana ke aloha i ka hana, keu hoʻi ʻoiai ke puka mai nei ke ao mai ka maʻi ahulau. No ka panina o ka hālāwai, ua mālama ʻia e Kalani he mele nāna i haku no kona kulāiwi ʻo Kailua me kākou nā kānaka maoli o Hawaiʻi, no kēia ʻāina aloha mai hoʻi. Eia hou kekahi no ka panina, ua haʻi ʻo Aaron i ka hōʻuluʻulu o ka Hoʻolauleʻa Hana Noʻeau Me Moʻomeheu Pākīpika hou e hoʻokipa ʻia ana e Hawaiʻi a ua hāpai ʻo Monte i ka ʻāwili ʻia ʻana o ka Papahana ʻŌpio i loko o nā hoʻolauleʻa me ka poʻomanaʻo.
Wahi a Aaron, “ʻO ka poʻomanaʻo no ka Hoʻolauleʻa Hana Noʻeau Me Moʻomeheu Pākīpika 13, ʻo ia hoʻi ʻo ʻHoʻoulu Lāhui: Nā Kai Hoʻoulu Hou.ʻ ʻO ka manaʻo o hoʻoulu lāhui, ʻoia ka hoʻoulu ʻana i ka lāhui. ʻO ia ka mākia a kā ka mōʻī ʻo David Laʻamia Kalākaua wā noho aliʻi o ka lāhui ʻo Hawaiʻi mai ka makahiki 1874 a hiki i 1891. I ka noʻonoʻo ʻana, ua lilo ʻo Kalākaua he mōʻī i ka wā me nā ālaina he nui ʻino. No laila, ʻo ka Hoʻoulu Lāhui, he kauoha a he paipai pū. Ua kūlia ka mōʻī e hōʻoia i ke ola mau ana o ka poʻe no kona lāhui a me nā hana moʻomeheu ʻōiwi o ka pikoʻu Hawaiʻi kekahi. Paipai ʻia kākou ma o ka Hoʻolulu Lāhui e hāhai i ke aloha me ke kamahaʻo o ko kākou mau kūpuna. ʻO ʻNā Kai Hoʻoulu Houʻ, noi ʻia kākou e noʻonoʻo i ka hiki i ka poʻe o kēia paeʻāina ke ulu pono a ulu nui i ke kenekulia 21 a ma ʻō aku o kēlā.”
|
|
Ka Paipai I Nā Alakaʻi O Ka Hānauna Hou
E kūkulu ana i ka poʻe limahana holu i ka ʻoihana hoʻokipa a me ka hōʻikehu ʻana aku i nā ʻōpio o Hawaiʻi e pili ana nā ʻoihana ma ka home nei, he māhele koʻikoʻi o kā ke Keʻena Kuleana Hoʻokipa o Hawaiʻi Kūkulu Kaiāulu. Ma ka lā ʻelima o ʻApelila, ua alu like ke Keʻena Kuleana Hookipa o Hawaiʻi me ClimbHI ma ke Kikowaena Hālāwai O Hawaiʻi e hoʻolauleʻa ai i ka Papahana Hoʻoulu Poʻe Limahana Paipai, Makahiʻo a me Alakaʻi (LEI hoʻi) me ka mākia o ka paipai ʻana aku i nā haumāna kula waena, kula kiʻekiʻe a me kula nui e noʻonoʻo i nā ʻoihana ma loko o ka ʻoihana hoʻokipa. Ua komo nā alakaʻi o ka ʻoihana i ke kūkākūkā me nā haumāna, e like me ko HTA Pelekikena a Luna Hoʻokele ʻo John De Fries.
Wahi a Māhealani Daclison, he haumāma ma ke Kulanui o Hawaiʻi ma Oʻahu Komohana a he huʻeaʻo no ke Keʻena Kuleana Hoʻokipa o Hawaiʻi, ua hōʻoia nō ia hanana i kona ala ʻoihana ma ka ʻoihana hoʻokipa.
“Ma muli o koʻu luʻu ʻana i ka Papahana ʻo LEI, ua launa wau me kekahi o nā hui ma o ke Keʻena Kuleana Hoʻokipa o Hawaiʻi a no laila ua hōʻoia nō wau i nā ala he nui ma ka ʻoihana hoʻokipa a no nā ʻoihana pākahi ma ia ʻoihana, ua pā nō i kekahi. Ua ʻike pū wau i nā haumāna ʻē aʻe e luʻu ana i nā waiwai ma laila, a me kā mākou pākaukau no ke Keʻena Kuleana Hoʻokipa o Hawaiʻi pū.”
Ma o ka mahina ʻo ʻApelila, ua komo nā haumāna he hoʻokahi kaukani a ʻoi me ka poʻe ʻoihana hoʻokipa he hoʻokahi haneli a ʻoi e ʻike ʻoiaʻiʻo i nā ʻoihana like ʻole ma ka ʻoihana hoʻokipa ma Kauaʻi, Oʻahu, Maui a me ka mokupuni ʻo Hawaiʻi. Mau nō kā ke Keʻena Kuleana Hoʻokipa o Hawaiʻi kākoʻo ʻana i ka hana a ClimbHI a me nā hopena maikaʻi e hoʻoili ana ma luna o kā kākou mau ʻōpio.
|
|
Kākoʻo Mau Nā Meia Kalana I Nā Papahana Mālama ʻĀina Hoʻokipa
E hoʻomau ana ka hoʻohana ʻana i kā ke Keʻena Kuleana Hoʻokipa o Hawaiʻi Papahana Mālama ʻĀina Hoʻokipa ma o ʻekolu mau makahiki me nā pakanā o nā kalana ʻehā o Hawaiʻi, Nā Mokuna Mokupuni, nā keʻena mokuʻāina ʻē aʻe, nā pakanā kaiāulu a me nā pakanā ma ka ʻoihana ma nā mokupuni pākahi. Me ke kālele ʻana ma luna o kā lākou mākia e hoʻoholomua i nā Papahana Mālama ʻĀina Hoʻokipa, ua pūlima ʻo Derek Kawakami, he meia no ke kalana o Kauaʻi, ʻo Rick Blangiardi, he meia no ke kūlanakauhale a kalana o Honolulu, ʻo Mike Victorino, he meia no ke kalana o Maui, a me Mitch Roth, he meia no ke kalana o Hawaiʻi, i ka palapala hoʻomanaʻo i ka maopopo e hōʻoia nei i ka pilina ma waena o ke Keʻena Kuleana Hoʻokipa o Hawaiʻi a me kā lākou mau kalana pākahi i ka hoʻohana ʻana i nā Papahana Mālama ʻĀina Hoʻokipa.
|
|
Ka Hoʻohana I Ka ʻEnehana Me Ka ʻIkepili No Ka Hoʻokele I Nā Hopena O Ka ʻOihana Hoʻokipa
Ua kūkā kamaʻilio ʻo Kalani Kaʻanāʻanā, ka Luna Alowelo o ke Keʻena Kuleana Hoʻokipa o Hawaiʻi, me Christine Sakuda, ka Luna Hoʻokele no Hoʻololi Ko Hawaiʻi Aupuni (THG hoʻi), e pili ana i ka waiwai o ka ʻenehana e hoʻokele i nā hopena o ka ʻoihana hoʻokipa a e hoʻokumu i nā loli kūpono ma o nā hana hoʻoulu hou. E kaomi i ka loulou Kūkā Kamaʻilio ma o ka Punaewele ma lalo iho nei e nānā i kā Kalani hāpapi ʻana i ke alakaʻi ʻana o ka ʻikepili i kā ke Keʻena Kuleana Hoʻokipa o Hawaiʻi mākia e Mālama I Kuʻu Home ma Hawaiʻi a e mālama pū i ka waiwai hoʻoulu hou e pā maikaʻi ana i ko kākou mau waiwai kūlohelohe me ke kaiāulu.
|
|
Hoʻonaʻauao ʻIa Nā Haumāna Ma Lānaʻi I Ka Mālama Mahi Mea Ola ʻAna Ma O Ka Papahana ʻĀina
Ma o kā ke Keʻena Kuleana Hoʻokipa o Hawaiʻi Papahana Aloha ʻĀina, haʻaheo mākou e kākoʻo hou i nā hui ma ke kaiāulu a e kōkua aku i ka hoʻoholomua ʻana iā Hawaiʻi i ka hoʻokō ʻana i nā pahuhopu Koi Aloha+ ma ka hoʻokele me mālama ʻana i nā waiwai kūlohelohe. I kēia mahina, e hoʻokiʻekiʻe ana mākou i ka Hale Moʻomeheu o Lānaʻi, na lākou i lanakila i ke kūlana Aloha ʻĀina no ka Papahana Hiʻohiʻona Mahi Mea Ola o Lānaʻi me ka mākia e kōkua aku i nā haumāna me ke kaiāulu o ka mokupuni e aʻo i nā hiʻohiʻona mahi mea ola o ko lākou home ma o nā hālāwai hoʻonaʻauao e puka ana ma ka hanana kūikawā. Aʻo ka poʻe luʻu i ia papahana e pili ana i ka mōʻaukala o ko Lānaʻi hiʻohiʻona, ka hana e mālama mau a pehea e luʻu i ka hana. No ka ʻikepili hou aku, e kipa aku iā www.lanaichc.org. |
|
Komo Pū I Ka #HuakaʻiIMua No Hawaiʻi
No ka hoʻolauleʻa o kā ka ʻAhahui Holoholo ʻAmelika Pule Holoholo a Hoʻokipa e mālama ʻia ana ma nā lā ʻekahi a i ka ʻehiku o Mei, paipai ke Keʻena Kuleana Hoʻokipa o Hawaiʻi i ka ʻoihana hoʻokipa me nā pakanā ma ke kaiāulu e komo pū i ka #HuakaʻiIMua ma o ka luʻu ʻana i nā kūkākamaʻilio ʻana ma ka punaewele i kēia pule a me ke kaʻanalike ʻana i ka loulou no nā waiwai kūlelepaho aia ma lalo iho nei.
He kūpono ke kaʻakālai hoʻoulu hou me okoʻa i ka ʻoihana hoʻokipa e hāpai ana i nā leo a ke kaiāulu i luna, e kākoʻo ana i Mālama Kuʻu Home, e mau ana i ko kākou moʻomeheu ʻōiwi, e hoʻihoʻi ana i nā waiwai kūlohelohe a e hoʻolako pū ana i nā waiwai koʻikoʻi. ʻO ia mau mea a pau kā mākou pahu hopu. Kono ʻia ʻoe e komo pū me mākou!
|
|
Hoʻopuka Ke Keʻena Kuleana Hoʻokipa O Hawaiʻi I Palapala Noi No Ka Hoʻokele Alowelo ʻAna No Ka Mākeke ʻAmelika, Lawelawe Kākoʻo Ma Nā Wahi A Pau
Ua hoʻopuka ke Keʻena Kuleana Hoʻokipa o Hawaiʻi i palapala noi (RFP) no ka lawelawe hoʻokele alowelo ʻana no ka mākeke ʻAmelika a me ka lawelawe kākoʻo i kaʻana ʻia e ko Hawaiʻi mau kime hoʻokele alowelo a puni ka honua. E holo ana ka palapala ʻaelike hou mai ka lā 30 o Iune, 2022 a i ka lā 31 o Kekemapa, 2024 me ke koho e hoʻomau he ʻelua makahiki hou aku.
Ma o kēia papahana noi, e koho ana ke Keʻena Kuleana Hoʻokipa o Hawaiʻi i pakanā mākaukau e mālama i ke kākoʻo ʻana i ka hoʻonaʻauao no ke alowelo me nā malihini ma ka mākeke ʻAmelika – ke kumu nui loa o nā malihini i Hawaiʻi. Ke ʻimi pū nei kēia lawena i ka lawelawe kākoʻo no kā Hawaiʻi kahua paʻa holoholo kūhelu, polokalamu pāpaho, nā kahua kūlelepaho a me ka maʻiʻo hou e hoʻohana ʻia ana a puni ka honua no ka hoʻokele alowelo ʻana me ka hoʻonaʻauao malihini.
E alakaʻi ʻia ana ka hana a ke kanaka haku palapala ʻaelike e ko HTA Papahana Hoʻokele no ka makahiki 2025, nā Papahana Mālama ʻĀina Hoʻokipa i hoʻomōhala ʻia e nā kaiāulu o nā kalana pākahi, ko mākou ala nuʻukia ʻo Mālama Kuʻu Home a me nā loina o ka ʻoihana hoʻokipa hoʻolulu hou – he kumu alakaʻi e hoʻokaulike i nā waiwai o ka ʻoihana me ka ʻoluʻolu, ke ola kino a me ka holu o ko Hawaiʻi mau kaiāulu, moʻomeheu ʻōiwi me nā waiwai kūlohelohe.
|
|
Mālama Hawaiʻi: Ka Huakaʻi I Ka Huakaʻi Hoʻoulu Hou |
|
Hoʻomau ʻo HTUSA i ke kūkulu ʻana ma luna o ka paipai ʻo Mālama Hawaiʻi ma o ka hāpai ʻana e nā malihini papaha i ka manaʻo o ke koʻikoʻi o ka lawena kūpono i nā kaiāulu kūloko ke kipa mai lākou a me ka pilina ma waena o mākou nā kupa i ko kākou home. I ka hoʻonaʻauao ʻana i kā kākou mau malihini i nā manaʻo o mālama a me ka pilina ma waena o kānaka me ʻāina, e kia ana kā mākou pūkaʻina wikiō hou i ke kau ʻana i mau palena kūpono a me ka hōʻomoʻomo ʻana i nā lawena a nā malihini a pili me nā loina kūloko. Kono ʻia pū nā malihini ma o nā wikiō e hoʻihoʻi i nā hana kūpono i ka moʻomeheu ʻōiwi iā Hawaiʻi.
ʻOiai ʻo ka hoʻonaʻauao ʻana i nā malihini he keʻehi mua o ka huakaʻi, ʻo ke keʻehi aʻe, ʻo ia ka hoʻokaʻaʻike ʻana me nā kamaʻāina o Hawaiʻi i kēia mau hana i ʻike kākou a pau i ka noi i nā malihini ma mua o kā lākou hōʻea ʻana i ka mokupuni a ʻoiai lākou ma aneʻi ma ke ʻano he malihini i ko kākou home. Ma ke alu like ʻana me ke Keʻena Kuleana Hoʻokipa o Hawaiʻi, ua hoʻokumu ʻo HTUSA i paipai kūloko ma ka mahina o Malaki e kaʻanalike ana me nā kamaʻāina i nā mea a pau e hoʻokō ʻia ana e hōʻea mau i nā malihini me nā manaʻo a Mālama Hawaiʻi a me ka manaʻolana i ka ʻoi aku i kā lākou makaʻala kūpono a noʻonoʻo. ʻO ka paipai e kaʻanalike i kēia mau wikiō me nā kamaʻāina, ua hoʻokumu pū ʻia nā kūlelepaho me nā pāpaho ʻenehana i loaʻa a e kū ana no ka makamua o ke ala hoʻololi i mua no ka ʻoihana hoʻokipa i Hawaiʻi.
|
|
ʻOi Aku Ka Hoihoi A Nā Malihini E Kipa Iā Hawaiʻi Ma Mua O Nā Makahiki I Hala Aku Nei
I loko nō o ka emi iki ke hoʻohālikelike ʻia me ka manawa like a ka makahiki aku nei, mau no i ʻoi aku kā nā malihini hoihoi e kipa iā Hawaiʻi mai nā makahiki ma mua o 2021. ʻOiai e mae mau ana nā pāpā mai ka maʻi Kolona, he koʻikoʻi ka makaʻala i ka piʻi ʻana o nā kumu kūʻai ʻoiai he ālaina ʻē kēlā e kipa iā Hawaiʻi a he pilikia ia i hiki ke ulu mau.
Kumu: MMGY Global “2022 Portrait of American Travelers, Spring Edition”
|
|
Hoʻokipa ʻO HTJ I Ka Hōʻike Huakaʻi Hawaiʻi Paʻeʻe
Mai ka lā 15 a i ka lā 17 o Malaki, ua mālama ʻo HTJ i ka ʻaha kālepa huakaʻi o Hawaiʻi, a ʻo nā mea i kāinoa he 40 mau pakanā me 102 mau waiwai a me 84 mau ʻelele kālepa huakaʻi. ʻO ka hopena, he 575 ka heluna o nā hālāwai ʻoihana – 20 mau minuke pākahi – i hoʻonohonoho ʻia a ua maikaʻi nā manaʻo pane i loaʻa mai nā pakanā me na ʻelele kālepa huakaʻi. Eia nā poʻomanaʻo o ia mau hālāwai:
- Kaʻanalike ʻana i ka ʻikepili hou loa (57.6%)
- Nā ana hoʻopaipai kūʻai (21.7%)
- Hoʻomōhala i huakaʻi hou (20.7%)
He manawa kūpono ka ʻaha kālepa no HTJ e hoʻoikaika i ka pilina ma waena o nā pakanā me nā ʻākena huakaʻi. E mālama ana ʻo HTJ i ka ʻAha Kūkā o Iāpana ma Oʻahu i Iune a e hoʻolālā ana i mau hālāwai he alo a he alo, pāʻina ʻoihana a me nā huakaʻi hoʻokamaʻāina.
|
|
Kipa Nā ʻElele JATA Iā Hawaiʻi A Hui Me Nā Alakaʻi Mokuʻāina
Ua kipa he hui ʻelele mai ka ʻAha ʻĀkena Huakaʻi o Iāpana (JATA) iā Hawaiʻi, ma ka lā ʻekolu a i ka ʻelima o ʻApelila. Ua hui lākou me ke kiaʻāina ʻo David Ige, nā meia kalana a me nā alakaʻi kau kānāwai mokuʻāina o Hawaiʻi e kūkā i ka papahaha no ka hoʻomaka hou i nā huakaʻi ma waena o Iāpana me Hawaiʻi i ka wā e hiki mai ana, e hoʻoikaika ana i ka pilina ma waena o Hawaiʻi me Iāpana, a e hoʻomaʻamaʻa ʻana i ka hoʻokipa hoʻoulu hou. Ma ka hālāwai, wahi a Hiroyuki Takahashi, he luna hoʻomalu, e hoʻokiʻekiʻe ana ʻo ia iā Hawaiʻi i nā malihini Kepanī a e kōkua ana i ka hoʻōla hou ʻana i kā Hawaiʻi waiwai. Ua hāpai pū ʻo ia i kona pahuhopu, me ka palena pau o Iune, e hana i mau pūʻolo mākaʻikaʻi o Hawaiʻi e hoʻouna ʻana i nā malihini i ka paeʻāina, ma hope o kā ka ʻOihana Pule o nā hana mai ka ʻāina ʻē o Iāpana i hōʻemi i ka pae hoʻāʻo maʻi lele o nā huakaʻi i ʻAmelika i ka pae ʻelua (e nānā i ka moʻolelo aʻe).
Ua kālele ko Hawaiʻi mau alakaʻi i kā lākou pīhoihoi e hoʻokipa i nā malihini Kepanī a pau me ka mahalo i ko Hawaiʻi ʻano aloha me ka maopopo i ka manaʻo o mālama Hawaiʻi.
|
|
Mae Nā Ana Palena O Iāpana A Hoʻomaka Hou Nā Kūʻai Pūʻolo I Nā Malihini
Ma ka lā mua o ʻApelila, ua mae ke aupuni o Iāpana i ka ʻōlelo aʻo huakaʻi me ke aʻo e makaʻala i nā maʻi lele mai ka pae ʻekolu ʻo “ʻAlo i nā huakaʻi a pau” a i ka pae ʻelua ʻo “ʻAlo i nā huakaʻi pono ʻole” no 106 mau ʻāina, me ʻAmelika pū, a he manawa mua mai ka makahiki 2020. He maikaʻi ka hoʻololi ʻana i nā pae no nā keʻena huakaʻi Kepanī i hiki ke hoʻomaka hou i ke kūʻai aku ʻana i nā huakaʻi pūʻolo.
Ma ka lā 10 o ʻApelila, ua hoʻonui ʻo Iāpana i ka heluna ʻae komo hou no nā lā pākahi i 10 kaukani. No laila, ua hoʻolaha kūhelu nā keʻena huakaʻi nui o Iāpana – JTB, HIS, ANA X a me JALPAK – i ka hoʻomaka hou o ke kūʻai aku ʻana ma ka lā 14 o ʻApelila.
|
|
Mae ʻO Kanakā I Nā Ana Palena Maʻi Kolona
Ua hōʻalu ʻo Kanakā i nā ana palena maʻi ahulau ma ka lā mua o ʻApelila, pau ke pono e hōʻike i ka hopena o ka maʻi ole o nā kama hele i lāʻau koʻokoʻo ʻia i hiki ke komo i ka ʻāina. ʻAʻole pono nā keiki, ma lalo o ka pae makahiki he 12 i lāʻau koʻokoʻo ʻole ʻia, e hoʻokaʻawale pākahi ke hōʻea i Kanakā.
ʻO ka hapanui o nā mokuʻāina o Kanakā, ua kāpae ʻia ke kēnā e komo i ka māpoho a me ka hapanui o nā lula mai ka maʻi Kolona kekahi, e ʻae ana i nā pāʻoihana e hoʻomaka hou i ka lawelawe kānaka kūʻai me ka nui i hiki. E mau ana kekahi mau lula no ka halihali lehuehu ʻana, nā wahi mālama ola kino a me nā wahi hoʻāʻo nui ʻē aʻe kekahi.
|
|
Hoʻolaha ʻIa ʻO Hawaiʻi Me Mālama Hawaiʻi Ma Ka Makakina ʻO Offshore
Ua hoʻolaha ʻia ʻo Hawaiʻi ma ka ʻatikala he ʻelua ʻaoʻao i ka makakina ʻo Offshore e hōʻike ana i nā waiwai pīpiʻi, nā meaʻai i ʻike ʻia, a me ke kipa ʻana i ka paeʻāina ʻo Hawaiʻi. Ua paipai ʻia nā mea heluhelu e mālama iā Hawaiʻi a e komo i nā papahana hoʻina i nā mokupuni.
Kākaʻahi ʻia nā makakina ʻo Offshore i nā kānaka kauoho he 20 kaukani a ʻoi o ka nūpepa The Globe and Mail a me nā kaiahome pīpiʻi o Kolonoko. Ua kākaʻahi ʻia he 25 kaukani a ʻoi mau kope ma o ka punaewele i nā ʻākena huakaʻi me nā keʻena huakaʻi a puni o Kanakā. ʻIke nui ʻia ka makakina ma ke kūlelepaho pū.
|
|
Hoʻonaʻauao Ke Kime HTO I Nā Pakanā Kālepa Huakaʻi Ma Mālama Hawaiʻi
Ua hāpai ke kime HTO i kā lākou mau hana Mālama Hawaiʻi me nā pakanā kālepa nui a me nā kākoʻo huakaʻi ma Malaki. Ua hoʻōia ke kime me Kipa ʻAmelika ma Kikinē, a ua hele i nā hālāwai mokuʻāina ʻo ManakiaHuakaʻi ma Melepona, Pikipane a me Kikinē. Ua hui pū lākou me nā ʻākena Huakaʻi MTA ma ʻĀina Mōʻī Wahine a ua pane me ʻelua hālāwai he alo a he alo ma Melepona me Kikinē. Ma o nā huakaʻi, ua hoʻohui hou ke kime me 250 mau ʻākena huakaʻi a kākoʻo huakaʻi, a ua hāpai i ka ʻikepili o ka hana Mālama Hawaiʻi.
Ua kūkulu pū ʻo HTO i mau papa paʻeʻe me nā ʻākena ma o ka mahina, e hoʻākoakoa ana he 150 mau ʻākena mai Alowelo ʻAmelika, he 50 mai Huakaʻi MTA (he pakanā me ka Pulo Hoʻokipa Malihini o Oʻahu), he 20 mai Manakia Huakaʻi a he 40 mai Virtuoso.
|
|
Hoʻokipa ʻO HTO I Ka Huakaʻi Hoʻokamaʻāina Ma Oʻahu Me Kauaʻi
Ma Malaki, ua hoʻokipa ʻo HTO i ka huakaʻi hoʻokamaʻāina kālepa mua mai ka hoʻomaka o ka maʻi ahulau, e hoʻokipa ana i ʻelima mau manakia hua mai Flight Centre, HelloWorld, Fusion Holidays, Travel Associates and My Hawai‘i. Ua kipa aku ha hui i Oʻahu me Kauaʻi, e komo ana i nā papahana he nui, ʻo ke kalaiwa ʻana ma ke ala ʻole i kahi hānai holoholona ʻo Kipu, e holo ana ma nā kiupe mauka, me ka holoholo moku ʻana ma kapakai o Nāpali, ke kanu ʻana i mau kumu lāʻau ʻōiwi ma kahi hānai holoholona ʻo Gunstock a he nui hou aku. Ua hoʻokipa ʻia ka hui ma Kōloa Landing Resort ma Poʻipū ma Kauaʻi a me Waikīkī Beach Marriott Resort and Spa ma Oʻahu.
|
|
Ua Kō Kā Mālama Hawaiʻi Hōʻike Ma Ke Kula Nui ʻO Tsinghua Ma Beijing
Ma ka lā 24 o Malaki, ua mālama ke pā hula o Beijing i ka hōʻike ma ke kula nui ʻo Tsinghua i Beijing me ka poʻomanaʻo ʻo “Hula Hawaiʻi Me Lele – Mālama Hawaiʻi”. Aia ʻo Tsinghua ma ka pae kiʻekiʻe loa o nā kula nui ʻoi kelakela ma ka honua a ʻo ia ka helu ʻekahi ma ʻĀsia wahi a nā Nūhou ʻAmelika me Haʻilono Honua. Ua hōʻea he 200 a ʻoi mau haumāna me limahana i ka hōʻike, a ua hōʻike pū ʻia kā ke Keʻena Kuleana Hoʻokipa o Hawaiʻi mau wikiō Mālama Hawaiʻi. Ua kākoʻo ʻo HTC i nā hokona kūlelepaho ʻana i nā hanana ma kāna mau kahua huakaʻi iho.
|
|
Hoʻokipa ʻO HTC I ʻAina Awakea Hoʻokamaʻāina No Nā Pakanā Kālepa Huakaʻi
Ua mālama ʻo HTC i ʻaina awakea hoʻokamaʻāina kālepa huakaʻi ma Beijing ma ka lā mua o ʻApelila i hele ʻia e 20 mau luna hoʻokō mokulele mai nā hui mokulele ʻo Delta, United, Japan, Korean, Asiana, me Air China. Ua hele pū nā keʻena huakaʻi paʻeʻe nui, kā ʻAmelika Nohona Kuhina o Beijing mau limahana a me kūlelepaho huakaʻi. Ma ka ʻaina awakea, ua hōʻike ʻo HTC i mau wikiō Mālama Hawaiʻi me ka ʻoihana hoʻokipa hoʻoulu hou. Ua kaʻanalike pū ʻia ka ʻikepili hou no kā ka mokuʻāina ʻo Hawaiʻi mau lula maʻi Kolona no nā huakaʻi a ua hāʻawi i mau makana i hana ʻia nō ma Hawaiʻi ma o nā makana me pūʻolo makana. ʻO ia mau mea a pau, ua hāpai ʻia nā manaʻo pane maikaʻi loa no Hawaiʻi mai nā pakanā ʻoihana.
|
|
E Alu Like Ana ʻO HTC Me Kā ʻAmelika Nohona Kuhina O Beijing No Ka Pāʻina Hoʻokipa Kālaikaiaola Lā Honua
E alu like ana ʻo HTC me kā ʻAmelika lawelawe kālepa o kā ʻAmelika Nohona Kuhina o Beijing ma ka lā 28 o ʻApelila no ka pā’ina hoʻokipa kālaikaiaola lā honua no Nicholas Burns, he ʻelele aupuni hou o ʻAmelika i Kina. Me nā wahi ʻAmelika me nā pāka aupuni ʻē aʻe, e kūkulu pū ana ʻo HTC he pākaukau no Hawaiʻi, e hōʻike ana i nā wikiō Mālama Hawaiʻi a e kaʻanalike ʻana i ka papahana KūkāKākou Iki me nā mea i hana ʻia ma Hawaiʻi. E hana pū ana ʻo HTC i polokalamu hokona kūlelepaho i hui pū ʻia me kā ʻAmelika Nohona Kuhina o Beijing e hoʻolauleʻa ana i ka hanana. ʻO nā kānaka kūlana kiʻekiʻe he ʻelima haneli a ʻoi – he mau ʻelele aupuni me nā kanikela mai nā ʻāina ʻē, a Kina me nā kānaka kūhelu o ka ʻOihana Pule Pākē o nā hana mai ka ʻāina ʻē – mahuʻi ʻia kā lākou hele ʻana.
|
|
Kipa Ke Paʻa Kānaka Paipai ʻO Kyungsik Lāua ʻO Bora I Hawaiʻi E ʻIke I Mālama Hawaiʻi
Ua kono ʻo HTK iā Kyungsik lāua ʻo Bora Kim, he mau kōkoʻolua paipai kaulana no kā lāua mau wikiō hou e hōʻike ʻana i ka nani o nā wahi hoʻokipa, e kipa i Hawaiʻi ma ka huakaʻi hoʻokamaʻāina. ʻO kekahi wikiō pōkole i hoʻolaha paʻeʻe ʻia e Kyungsik ma kāna kahua YouTube me ʻaoʻao Kiʻiwiki e hōʻike ana i nā mea āna i ʻike ai ma Oʻahu, ua ʻike ʻia he 60 kaukani a ʻoi mau manawa ma ka pule mua. E manaʻo pū ana ʻo ia e hoʻouka i kakaʻina wikiō paʻeʻe ʻo Huakaʻi Hawaiʻi e hōʻike ana i nā mea āna i ʻike ai ma kahi hānai holoholona ʻo Gunstock. Iā lāua ma Oʻahu, ua kipa pū ke kōkoʻolua i Kualoa, ke kapakai ʻākau, ke kahakai ʻo Waikīkī a me Paʻakai ma Kakaʻako. Ua kūkulu ʻia kā kēia kōkoʻolua huakaʻi hoʻokamaʻāina me ka pakanā ʻo Wiki360, he pahu paʻi kiʻi liʻiliʻi.
|
|
Kōkua ʻo HTK I Nā Keʻena Huakaʻi E Hoʻomākaukau I Nā Paipai Hoʻokuʻu Muli Hoʻomalu Maʻi
Ua kākoʻo ʻo HTK i Kyowon KRT lāua ʻo Interpark i ka hoʻomōhala ʻana i nā hua hoʻokipa hoʻoulu hou a e hōʻike ana i nā waiwai wikiō ʻo Mālama Hawaiʻi. ʻO nā keʻena huakaʻi, ʻo ia hoʻi nā hōkele me nā hana ʻaeʻoia e laʻa me holoʻohiʻōpala – he huina o ka holoholo ʻana ʻoiai ʻoe e ʻohi ʻōpala ana – o kanu ʻana i nā kumu lāʻau ma ke ʻano he koho papa manawa ma loko o kā lākou mau hua huakaʻi. Ua kaʻanalike pū nā keʻena huakaʻi i ka ʻikepili ma nā hōkele me nā hana ʻaeʻoia e kōkua aku i nā kānaka kūʻai i ke koho ʻana i mau hoʻoholo huakaʻi.
|
|
Hoʻolaha ʻO HTK I Nā Papahana E Hiki Koke Mai Nei E Hoʻokiʻekiʻe Ana I Ka Paipai Kuleana
Ma muli o ka Paipai Kuleana, ua hoʻouka aku nei ʻo HTK i ʻelima mau wikiō aʻo huakaʻi no ko Hawaiʻi moʻomeheu ʻōiwi, palekana ʻāina, palekana kai, nā mea ola kai a me maluō ma ke kahua YouTube kūhelu. Ua hoʻouka pū ʻia he ʻehā wikiō Mālama Hawaiʻi ma ka mahi iʻa, ka hoʻoulu lāʻau hou, ka mālama kaianoho a me ka mahi ʻai ʻaeʻoia me nā lepe unuhi ma ka ʻōlelo Kōlea no ia mau mea a pau ma ke kahua. E hoʻolauna ana ʻo HTK i ka Paipai Kuleana me he hanana pākaukau kūikawā no Hawaiʻi ma Hoʻolāʻauleʻa Kūlanakauhale a me ka hoʻolauleʻa ʻoluʻolu ma Keoula e mālama ana i nā papahana me nā hālāwai hoʻonaʻauao e kia ana ma ka mālama ʻana i ka noʻonoʻo, kino a me pili ʻuhane. Kia ʻo HTK e hoʻohui me nā poʻe hōʻea hanana a e kaʻanalike i ka manaʻo o Mālama Hawaiʻi a me nā ʻōlelo aʻo huakaʻi o Kuleana.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
