Mawrth 2022
‌
System Imiwneiddio Cymru yn ennill gwobr effaith ddigidol genedlaethol
Mae’r system ddigidol y tu ôl i’r gwaith o gyflwyno brechiadau COVID-19 yng Nghymru, sef System Imiwneiddio Cymru (WIS), wedi derbyn Gwobr Dewis y Bobl mewn seremoni yn Llundain am ei heffaith yn ystod y pandemig.

Mae Digital Leaders Impact Awards yn dathlu’r arloesiadau technoleg ddigidol sy’n gwella bywydau pobl neu sy’n sicrhau effaith gymdeithasol gadarnhaol. Cyflwynir Gwobr Dewis y Bobl i’r mwyaf poblogaidd o bawb sydd wedi cyrraedd y rownd derfynol ym mhob categori, ac fe’i penderfynir drwy bleidlais y cyhoedd.

Mae System Imiwneiddio Cymru, a adeiladwyd mewn 16 wythnos yn unig gan dîm o ddatblygwyr meddalwedd yn Iechyd a Gofal Digidol Cymru, yn gweithio drwy integreiddio amserlennu gyda chofnodi brechiadau COVID-19 ledled Cymru, a hynny mewn un cymhwysiad. Agweddau allweddol ar lwyddiant y cynnyrch fu canoli apwyntiadau ar gyfer canolfannau brechu torfol, anfon llythyrau apwyntiadau, a negeseuon testun dwyffordd, gan sicrhau bod gan Gymru raglen frechu lwyddiannus.

Cystadlodd â 36 o gystadleuwyr cenedlaethol eraill yn y categori Gwobr Dewis y Bobl, gan gynnwys Pàs COVID y GIG, Swyddfa’r Cabinet, Riverford Organic Farmers a’r BT Green Tech Innovation Platform.

Am ragor o wybodaeth am System Imiwneiddio Cymru, ewch i’n gwefan.
Dathlu uwchraddio band eang mewn practis gwledig
Mae uwchraddio band eang Practisiau Meddygon Teulu yng Ngogledd Cymru, a reolir gan Iechyd a Gofal Digidol Cymru, wedi cael ei ddathlu gydag ymweliad â phractis anghysbell gan Simon Hart, Ysgrifennydd Gwladol Cymru.

Ymwelodd yr AS â Meddygfa Caerffynnon yn Nolgellau a gweld â'i lygaid ei hun sut mae cyflwyno band eang ffeibr llawn cyflym iawn wedi gwneud gwahaniaeth mor gadarnhaol i wasanaethau'r practis.

Dechreuodd Iechyd a Gofal Digidol Cymru (DHCW) ar y gwaith o uwchraddio practisiau o gyflymder lawrlwytho o 10MB i 80-150MB ym mis Ionawr 2020, a phan darodd y pandemig daeth y gwaith yn fwy brys byth.
Nyrsio yn mynd yn ddigidol yng Ngogledd Cymru
Mae Cofnod Gofal Nyrsio Cymru (WNCR) wedi lansio ym mwrdd iechyd mwyaf Cymru, sef Bwrdd Iechyd Prifysgol Betsi Cadwaladr (BIPBC). Mae’r system ddigidol yn trawsnewid y ffordd y mae nyrsys yn cofnodi, storio a chael mynediad at wybodaeth am gleifion.

Gall nyrsys ddefnyddio llechi wrth erchwyn gwely claf i gofnodi gwybodaeth a’i storio’n ddiogel yng Nghofnod Gofal Nyrsio Cymru. Mae’n golygu bod pob gweithiwr iechyd proffesiynol sydd yn gyfrifol am ofal claf yn gallu cael mynediad at yr un wybodaeth ddiweddaraf.

Cyn y lansiad, siaradon ni â Jane Brady, Prif Swyddog Gwybodeg Nyrsio BIPBC. Dywedodd ei fod yn gyfnod cyffrous i nyrsys yng Ngogledd Cymru:

“Mae’r nyrsys yn awyddus dros ben i gael gafael ar iPad, ac i ddechrau gwneud y gwaith papur yn ddigidol yn lle ceisio dod o hyd i bentyrrau o bapur, ac yna chwilota drwy’r nodiadau achos i ddod o hyd i’r wybodaeth y maent yn chwilio amdani.”

Mae fideo o Jane ar gael yma:  https://www.youtube.com/watch?v=EE85GyXplNg 
binary-beams-abstract.jpg
Sesiynau ymgysylltu Ap GIG Cymru yn gwahodd cydweithio ar draws sefydliadau

Mae Gwasanaethau Digidol i Gleifion a’r Cyhoedd (DSPP) yn cynnal sesiynau diweddaru misol i hysbysu ac ymgysylltu â rhanddeiliaid.

Gwahoddir staff GIG Cymru a’r sector cyhoeddus i sesiynau wedi eu cynnal o bell ar Microsoft Teams i ddilyn y daith wrth i DSPP wneud cynnydd wrth ddatblygu Ap GIG Cymru. Mae’r sesiynau hefyd yn llwyfan i randdeiliaid ofyn unrhyw gwestiynau sydd ganddynt am DSPP neu Ap GIG Cymru.


Cofrestrwch ar gyfer y rhestr bostio i gael gwahoddiad i sesiynau diweddaru Ap GIG Cymru a DSPP yn y dyfodol.