KA NŪHOU ʻAUKAKE 2021
Manaʻo Wehe Na Ko
HTA Pelekikena A Luna Hoʻokele John De Fries
E nihi ka helena i uka o Puna; mai pūlale i ka ʻike a ka maka. (‘Ōlelo Noʻeau 360)
He hoʻomanaʻo kēia i ke kuleana o ka malihini e makaʻala, ʻaʻole hoʻi e komo i ka hihia ma muli o ka mahaʻoi ma kahi kūpono ʻole.

KE KŪKULU MOʻOMEHEU HAWAIʻI
Ma ka lā 5 o ʻAukake i mālama ai ʻo Kiaʻāina David Ige i ʻaha liʻiliʻi kūikawā e kūkala a hoʻohanohano iā Carissa Moore, ko Hawaiʻi ʻālapa kau i ka hano ma ka pāʻani ʻOlumepika. Mai HTA, ua komo ka Pelekikena a Luna Hoʻokele John De Fries, ka Luna Alowelo Kalani Kaʻanāʻanā, a me ka lālā o ka Papa Aʻoaʻo Heʻe Nalu Billy Pratt.

Ua kaʻana ʻo John i moʻolelo no Kahu Abraham Akaka, me kāna haʻiʻōlelo no nā kaula o ka ʻukulele. Kū nā kaula no nā lāhui ʻokoʻa o ka honua. Ma ka wā maluhia, he nahenahe nō ke kani. Ma ka wā hihia o ke ao, ʻeha ka pepeiao. Ma ko John hoʻomanaʻo ʻana, ʻo ia ka moʻolelo hoʻokahi o ka ʻOlumepika – ka hui ʻana o nā ʻāina o ka honua. ʻO ka haʻawina nui o ia moʻolelo, ʻo ia hoʻi kēia: na ke aloha e mālama i ka nahenahe o ka ʻukulele.

He kumu hoʻohālike maoli nō ʻo Carissa i ke aloha, a nui ka haʻaheo a hoʻomaikaʻi o HTA me ka ʻoihana hoʻokipa malihini iā ia!
Paʻa Ka Papa Kuhikuhi ʻOihana ʻŌiwi A NaHHA, Nā Hui ʻOihana

Ma ke alu like ʻana o nā hui ʻoihana ʻōiwi o Hawaiʻi a me ka ʻAhahui Hoʻokipa ʻŌiwi Hawaiʻi i puka mai ai ʻo Kuhikuhi.com, he pāhana e hoʻokele i nā mea kūʻai i nā pāʻoihana ʻōiwi Hawaiʻi. Ma luna o ke kahua o ka ʻiʻini e hoʻoulu i nā pāʻoihana kamaʻāina, he pāhana ʻo Kuhikuhi.com na nā hui ʻoihana ʻōiwi o Hawaiʻi Mokupuni, Maui, Oʻahu me Kauaʻi, a me ka ʻAhahui Hoʻokipa ʻŌiwi Hawaiʻi. Kākoʻo ʻia ka hana e HTA, Kamehameha Schools, ke Keʻena Kuleana Hawaiʻi, me Movers & Shakas. Manuahi ke kāinoa ʻana – e hoʻokomo i kāu ʻoihana ʻōiwi!
KE KŪKULU WAIWAI KŪLOHELOHE
Nui ka mahalo ʻia o nā hōʻailona hoʻonaʻauao ma kahakai ma Maui, kūkulu ʻia ma ka makahiki 2020 e Maui Nui Marine Resource Council me ke kākoʻo o HTA. He kumuwaiwai hoʻonaʻauao nā hōʻailona no nā malihini a me nā kamaʻāina pū kekahi no ka hana kūpono e mālama ʻia ke koʻa a me nā holoholona o kai ʻoiai e nanea ana i ka ʻae kai. Ma luna aʻe o nā hōʻailona he 39 e kū nei, ua noi ʻia nā hōʻailona hou e Marriott’s Maui Ocean Club ma Kāʻanapali e kūkulu ma ia ʻae kai.

Paipai mākou i nā lālā o ka ʻoihana e noʻonoʻo i ka hana alu like me nā ʻahahui e like me Maui Nui Marine Resource Council no ka hoʻonaʻauao i nā malihini.

He lanakila no kākou a pau kēia ʻano alu like ʻana o ka ʻoihana hoʻokipa me nā hoa Aloha ʻĀina o HTA. He kōkua nui kēia ʻano hōʻailona i ka hoʻokaʻaʻike mau ʻana i nā mākia o ka Mālama Hawaiʻi a me ke Kuleana, no nā malihini a me nā kamaʻāina kekahi.

KE KŪKULU KAIĀULU
Puka Nā Palapala Loiloi Kauwela 2021 No Nā Papahana Mālama ʻĀina Hoʻokipa

Ua mālama ʻo HTA i mau hālāwai me nā kōmike hoʻokele Papahana Mālama ʻĀina Hoʻokipa ma nā mokupuni o Hawaiʻi, Maui, Molokaʻi, Lānaʻi, me Kauaʻi ma nā pule mua ʻekolu o ʻAukake no ka hōʻike i ka holomua a me ka hoʻokō ʻia o nā kuleana ma ia papahana. Hiki ke ʻike ʻia ka holomua ma kēlā me kēia mokupuni ma ko mākou kahua paʻa, hawaiitourismauthority.org/what-we-do/hta-programs/community-based-tourism/. E kaomi ma ka mokupuni e hoihoi ai ʻoe, a laila e kaomi ma “Follow Our Progress.”
KE KŪKULU HOKONA ALOWELO
Hawai‘i Tourism USA
ʻIke ʻIa ʻO Mālama Hawaiʻi Ma Ka Nūhou

ʻIke ʻia ka maikaʻi o ka papahana Mālama Hawaiʻi ma ka nūhou, ma nā pukana pāpaho ʻo Forbes, NBC.com, SFGate me Houston Chronicle, pau pū me nā pukana pāpaho ʻoihana e like me Skift, Travel Weekly, me Prevue Meetings and Incentives.
Hoihoi Ka Malihini I Ka Hoʻokipa ʻOluʻolu ʻIa Ma Kahi Kipa

Ma ka hōʻike a Destination Analysts, ʻaʻohe hoihoi o ka 70.2% o nā malihini i ke kipa i kekahi ʻāina kahi ʻoluʻolu ʻole i ko lākou kipa ʻana. Ua piʻi ka heluna o nā malihini ʻAmelika i manaʻo i kekahi ʻāina ma ʻAmelika kahi ʻoluʻolu ʻole i ko lākou kipa ʻana, ua piʻi he 7% i ka 20.3%. Kumu: Destination Analysts Wave 72
Holo Ka Māhele ʻOihana Hoʻokipa I Florida No Ka ʻAha Global Travel Marketplace

Ua holo ko Hawaiʻi Tourism USA me nā Hui Mokupuni a hui me 118 ʻākena huakaʻi – he $1 miliona a ʻoi ka nui o ke kūʻai ʻana aku i kēlā me kēia makahiki – ma Global Travel Marketplace, mālama ʻia ma nā lā 8-10 o Iulai ma Fort Lauderdale, Florida.
Hawai‘i Tourism Japan
Hōʻike ʻIa Nā Mokupuni O Hawaiʻi, Mālama Hawaiʻi Ma Ka Pāpaho Iāpana

Mau nō ka hōʻike ʻia ʻo Hawaiʻi ma ka pāpaho ma Iulai. Ua ʻike ʻia ʻo Hawaiʻi he 119 manawa ma nā pukana pāpaho e pā ai ka hapanui o nā kupa o Iāpana. Nui ke kālele o ia mau moʻolelo ma ke ʻano hou e hoʻokele ʻia nei ka ʻoihana hoʻokipa ma Hawaiʻi. Ua kaʻana ʻo Hawaiʻi Tourism Japan i ka ʻikepili no ka papahana Mālama Hawaiʻi e pili pū ana me nā nīnauele me ko HTA Pelekikena a Luna Hoʻokele John De Fries ma ke kīwī a me ka lēkiō.
Hoʻolele ʻO Hawaiʻi Tourism Japan I Kahua Paʻa Pūnaewele No Hōkūleʻa

Ua hoʻolele ʻo HTJ i māhele hou o ke kahua paʻa pūnaewehe no Hōkūleʻa (https://www.allhawaii.jp/hokulea) ma ka lā 22 o Iulai – ka Lā Moana ma Iāpana, he māhele ia o ko HTJ hana Mālama Hawaiʻi. He hōʻike ia māhele hou i nā lanakila o Hōkūleʻa, e like me ka huakaʻi Moananuiākea e holo ana ma ka Moana Pākīpika, a me nā kumuwaiwai hoʻonaʻauao e paipai ana i ko Iāpana e mālama i ia honua. Ua kōkua nā lālā Kepanī o ka Polynesian Voyaging Society ma ka hoʻomākaukau ʻana i kēia māhele kahua paʻa pūnaewele.
Komo ʻO HTJ Ma Nā Hana Kaiāulu Ma Iāpana

Ma Iulai, ua komo ʻo HTJ ma 17 hanana kaiāulu ma Iāpana. Ma hope o ke komo pū ʻana i ka pāhana hoʻomaʻemaʻe kahakai ma Shirahama, ua hālāwai ʻo HTJ me nā luna aupuni o Shirahama no ka ʻimi ala hoʻoikaika i ka pilina i waena o Honolulu me Shirahama. He hoa Friendship City nā kūlanakauhale ʻelua. Ua mālama pū ʻia ka hanana ma Sennan Long Park ma Osaka ma nā lā 22-25 o Iulai me ke kākoʻo o HTJ, me ka mālama pū i pākaukau hoʻonaʻauao no ka papahana Mālama Hawaiʻi.
Hawai‘i Tourism Canada
Hoʻāno Hou ʻIa Nā Kulekele Komo Iā Kanakā

Ma ka lā 9 o ʻAukake, ua ʻae ʻo Kanakā i ke komo o nā kanaka ʻAmelika, a hoʻopau i ke koina hoʻokaʻawale no nā mea kipa a pau. E noa ana ke komo no nā kānaka lāʻau koʻokoʻo ʻia mai nā ʻāina a pau ma ka lā 7 o Kepakemapa. E pau ana ke koina o ka hōʻike maʻi ma ka hōʻea a me ka lā ʻewalu, akā, e huki ʻia paha kou inoa no ka hōʻike maʻi ma kou hōʻea ʻana.

Ma ka lā 9 o ʻAukake, ua pau ke koina o ka hoʻokaʻawale 14 lā no nā keiki lāʻau koʻokoʻo ʻole a nā kanaka makua lāʻau koʻokoʻo piha ʻia. E pono ana naʻe e hoʻālo i ke kula a me nā hui nui o ia ʻano no nā pule ʻelua mua ma hope o ka hoʻi ʻana i Kanakā.

Ua hoʻomaka hou ka hōʻea ʻana o nā mokulele kauʻāina ma Halifax, Quebec City, Ottawa, Winninpeg me Edmonton ma ka lā 9 o ʻAukake.
Hōʻike ʻIa Nā Wikiō Mālama Hawaiʻi Me Nā ʻĀkena Kanakā

Ke kaʻakaʻahi nei ʻo HTCAN i nā wikiō Mālama Hawaiʻi i mea e hoʻokaʻaʻike i ke koʻikoʻi nui o ka mālama kuleana ma ka huakaʻi. E hōʻike ʻia ana kekahi o nā wikiō, pili i ka mālama home holoholona, ma nā mokulele a pau o WestJet ma Kepakemapa me ʻOkakopa.

Ua hōʻike ʻia ʻelua wikiō Mālama Hawaiʻi – no ka mālama home holoholona a me ka mahi iʻa – ma kekahi hālāwai nui ma Newmarket, Ontario ma ka lā 29 o Iulai. Ua mālama ʻia ka hālāwai ma kahi pā kiʻiʻoniʻoni, he ʻaha hoʻonaʻauao me 10 ʻāina hoʻokipa e aʻoaʻo ana i 150 ʻākena no Toronto. Ua hōʻike ʻo HTCAN i ia mau wikiō no ka paipai nui i nā ʻākena e hoʻokaʻaʻike i ka mea nui o ka mālama kuleana, a he paipai i ia mau ʻākena e ʻimi i ka ʻāpono ʻia he Hawaiʻi Destination Specialist.
Hawai‘i Tourism Oceania
Komo ʻO Hawaiʻi Tourism Oceania Ma Ka Hanana Visit USA Ma Aotearoa

Ua hoʻi hou nā hui Visit USA o Nūhōlani me Aotearoa i ka hana ma Iulai. Ua mālama ʻia he ʻaha ʻāwili ʻia no ka ʻoihana hoʻokipa ma Tāmaki Makaurau, Aotearoa kahi i hōʻike ko HTO i ke kūlana o ko Hawaiʻi ʻoihana hoʻokipa a me ka papahana Mālama Hawaiʻi. Noho ʻo HTO ma ka papa alakaʻi o ia mau hui Visit USA ʻelua.
Hawai‘i Tourism Korea
Kaʻakaʻahi ʻO Hawaiʻi Tourism Korea I Ka ʻIkepili Hou No Nā Kanaka E Manaʻo
Nei E Kipa

Ua hoʻouna aku nei ʻo HTK i ka nūleka uila i nā kānaka he 35,000 a ʻoi me ka ʻike hou loa no nā koina kipa iā Hawaiʻi a me ka papahana Mālama Hawaiʻi. Ma luna aʻe o kēia, ua hōʻike ka nūleka uila i ka papahana Holoholo, ke kikowaena hōʻike maʻi ma Waikīkī, a me ka ʻike mai nā hōkele ma Hawaiʻi. Ua hōʻike pū ʻia ka ʻaelike hou me ke kikowaena hōʻike maʻi ma ke Kahua Mokulele O Incheon i paʻa ma ka lā 15 o Iulai.

Hoʻomaka Hou Ka Pūkaʻina Wikiō “Aloha Report” na HTK

Ma Iulai, ua hoʻomaka hou ka pūkaʻina wikiō Aloha Report a HTK, he papahana e haʻi moʻolelo ai kekahi wahaʻōlelo noho ma Hawaiʻi no nā papahana like ʻole a hōʻike ʻia ma ko HTK Instagram, he māhele ia o ko HTK papahana pāpaho #StoriesOfAloha. Kia ka papahana ma ke kaʻana ʻana i nā moʻolelo no Hawaiʻi no ka hoʻoulu i ke anaina a me ke komo o ke anaina i ka moʻolelo. Komo ka wahaʻōlelo ʻo Jinny Lee i nā hana moʻomeheu Hawaiʻi, ke kaʻana aloha, a me nā papahana Mālama Hawaiʻi.

Noho ʻo Lee ma Honolulu, a hoʻolaha ʻo ia i ka pāpaho i kāna anaina iho nō ma Instagram ma oneweekinhawaii, he 6,600 ka nui o ke anaina i laila. He luna hoʻoponopono ʻo ia no Vogue Korea ma mua, he mea kākau i kahi puke alakaʻi no nā malihini Kōlea ma Hawaiʻi, a he wahaʻōlelo no KBFD-TV.

He hana alu like ʻo Aloha Report i waena o Lee me HTK i hoʻomaka ma ka makahiki 2018.
Paipai ʻO HTK I Ka Papahana Mālama Hawaiʻi Me Nā ʻĀkena Huakaʻi

Ua komo aku nei ʻo HTK i ka hana alu like me nā hui ʻākena huakaʻi nui e paipai ana i ka papahana Mālama Hawaiʻi.

Ke komo nei he ʻeiwa hui ʻākena huakaʻi ma kēia papahana, ma o ka hoʻoulu a hoʻouka i kekahi māhele Mālama Hawaiʻi ma ko lākou kahua paʻa pūnaewele iho nō. Ma ia mau māhele e hōʻike ʻia ka mea nui o ka mālama iā Hawaiʻi, nā wikiō, a me nā kiʻi mai ka papahana mai. Ke paipai nei nā hui ʻākena i ʻike ʻia e ko lākou mau anaina.
Keep in touch with HTA via social media:
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.