Manaʻo Wehe Na Ko
HTA Pelekikena A Luna Hoʻokele John De Fries
|
|
Hoʻopaʻa Lā — ʻAha ʻOihana Hoʻokipa o Hawaiʻi 2022
Ma ka hoʻomau ʻana i kona manaʻo e Mālama Kuʻu Home, e hōʻike ko ka ʻOihana Hoʻokipa o Hawaiʻi i kona ʻAha ʻOihana Hoʻokipa o Hawaiʻi 2022 ma ke Kikowaena Hālāwai o Hawaiʻi i kēia hoʻoilo. E mālama ʻia ua hanana ʻelua lā nei ma ka Poʻahā, lā 8 o Kekemapa a me ka Poʻalima, lā 9 o Kekemapa. E makaʻala mai nō i ka ʻike hou aku i nā māhina e hiki mai auaneʻi.
|
|
E Hāpai ʻIa Aʻe Ana i ko Lāua Mau Makahiki o ka Lawelawe ʻana
Hoʻomaikaʻi i ʻelua lālā o ka ʻohana ʻOihana Hoʻokipa o Hawaiʻi (HTA) i ka hōʻea ʻana i kekahi pahu hope o ka lawelawe ʻana me ka Mokuʻāina ʻo Hawaiʻi. Ua piha he 10 makahiki iā Marc Togashi, ko HTA luna hoʻokō a hope pelekikena hoʻokele kālā. Ua piha he 20 makahiki iā Minh-Chau Chun, he manakia noiʻi ma ka Māhele Pāʻoihana, Hoʻomohala Hoʻokele Waiwai a Hoʻokipa (DBEDT). Ua hoʻohanohano ʻia ʻo Mark lāua ʻo Minh me ko lāua mau hoa hana ma ka ʻAha Hoʻohanohano Lawelawe o DBEDT ma ka lā 19 o Iulai. He hōʻike kā lāua hana a mau makahiki o ka hana ʻana i ka hana nui a ka poʻe o Hawaiʻi. E hāpai pū aʻe nō iā Marc lāua ʻo Minh ma ka leo hoʻohanohano!
|
|
Ka Papa Hana Aloha ʻĀina: Hōʻike ʻia ke Kiʻi Paia Mea Ola ʻAne Halapohe o ʻEleʻele ma Kauaʻi
Ma Iulai, ua paʻa pono kā ko Kauaʻi mea pena kiʻi paia ʻo Seth Womble pena ʻana i kāna kiʻi paia mea ola ʻane halapohe he 1,300 kapuaʻi kūea ma kahi o ke Alanui ʻo Kaumualiʻi ma ʻEleʻele. ʻO kona moemoeā no ua kiʻi paia nei ka hoʻonaʻauao ʻana aku i ke ākea no ko Hawaiʻi mau manu ʻane halapohe e laʻa ka ʻaʻo, ke aeʻo, a me ke koloa Maoli, a pēlā pū ka hōʻike ʻana i ke koʻikoʻi o ka lilo ʻana he kahu maikaʻi i ka ʻāina a me ona mau mea ola. Ua hōʻike ʻia aku nei kā Seth hana ma ko Kauaʻi nūpepa The Garden Island. Haʻaheo nō ʻo HTA i ke kākoʻo i kēia pāhana ma o ke Garden Island Arts Council a me kona papa hana Aloha ʻĀina i mea e hoʻihoʻi hou ʻia ai ke kālā i ke kaiaulu. |
|
Ka Papa Hana Aloha ʻĀina: The Nature Conservancy of Hawaiʻi
Kālele ko The Nature Conservancy of Hawaiʻi papa hana Aloha ʻĀina, Mauka to Makai ma nā wahi kai o Mānele a me Hulopoʻe ma Lānaʻi a me ko Maui hono ʻo Honolua, a pēlā pū ka ʻāina hoʻomalu ʻo Waikamoi, ka piko o ka wao kele nui loa o ka mokuʻāina a he puʻuhonua hoʻi no nā meakanu a mea ola Hawaiʻi ma nā haneli. He ʻohiʻohi ʻikepili e naʻauao ai ke kulekele a hoʻokipa hoʻomauō, nā papa hana hoʻonaʻauao no ka nahele ʻōiwi a kaiaola kai, a pēlā pū ka hana manawaleʻa a lawelawe kaiaulu e laʻa ka hoʻonui ʻike hoʻomākaʻikaʻi, ka huakaʻi, ka hekehi kūmāhina, a me nā hōʻikeʻike. E ʻike hou aku ma ʻaneʻi. |
|
Ma kinohi o ʻAukake, ua kipa nā limahana o HTA a me ka Hawaiʻi Community Foundation (HCF) iā Maui e hana pū ai me Hawaiʻi Land Trust (HILT), he hui nona ka makana Aloha ʻĀina, ma ka hana koʻikoʻi e hoʻomau ʻia nei. Ua kipa ua hui nei i ka ʻāina hoʻomalu ʻo Waiheʻe, i noho mua ʻia nō e ka ʻelua kaiaulu kai i ola ehuehu, he loko iʻa kalo, a me kekahi mau heiau. Ke hoʻomau nei ko HILT i ka hana hoʻōla i ko Waiheʻe, a me ka ʻimi ʻana i nā ala no nā kānaka, nā kamaʻāina, a me nā malihini e ʻike ai i kēia wahi kupuna.
“Iaʻu, he laʻana maikaʻi hou aku kēia o ke akamai o ko kākou mau kūpuna—he ʻōnaehana wai o ke au hou i hoʻokumu ʻia he 1,500 makahiki aku nei,” i ʻōlelo ai ʻo Kehau Meyers, ko HCF Luna Hoʻokō Papa Hana e kōkua ana ma ka hoʻokele i ko HTA papa hana Kūkulu Ola a Aloha ʻĀina. “Ke hoʻolilo i ka hana ma ka mālama, hoʻōla, a noiʻi i ke kahua moʻomeheu a kaiaola o Hawaiʻi, e loaʻa mai ana nā ala hoʻoponopono i nā nīnūnē au hou, e laʻa nā hihia o ka loli aniau.”
Ua hōʻike ko HTA Luna Alowelo ʻo Maka Casson Fisher, he mea kōkua pū i ka hoʻokele ʻia o ka papa hana Kūkulu Ola a Aloha ʻĀina, i kona mau manaʻo no kāna i ʻike ai ma Waiheʻe he kamaʻāina o Hawaiʻi e malihini ana i ia ʻāina.
“ʻAʻole au no Maui, ma hope naʻe o ka hui ʻana me ka poʻe i hoʻokipa iā mākou, ua kamaʻāina hou aku au i ia ʻāina a kaiaulu e hoʻomaopopo mai ana i ka ʻōlelo noʻeau “Hoʻokahi lā o ka malihini a lilo i hoa kamaʻāina.”
Hōʻike ua ʻōlelo noʻeau nei no ka lilo ʻana o ka malihini he lālā kākoʻo o ke kaiaulu ma hope o kekahi lā o kona hoʻokipa ʻia, a ma ia ʻano, he kuleana pū kona e hāpai ai. No Maka, ʻo ua kuleana nei ka hana āna e ʻauamo nei ma HTA.
|
|
Ua komo pū nā hoa kākoʻo ʻē aʻe o ka papa hana Aloha ʻĀina e laʻa ka hui kū i ka ʻauhau ʻole ʻo Hui Aloha Kīholo o Hawaiʻi Mokupuni ma Iune. Kākoʻo ka papa hana Aloha ʻĀina i ko Hui Aloha Kīholo pāhana Mōhala i ka Wai: Empowering Our Community to Support a Thriving Kīholo to Increase the Ability to Connect with Visitors of the Kīholo State Park Reserve. Kūlia pū ua pāhana nei i ka hoʻokāʻoi i ke ola o nā kumuwaiwai o ia wahi. |
|
ʻO ko The Kohala Center (TKC) Aloha ʻĀina Kahaluʻu kekahi papa hana Aloha ʻĀina i kipa ʻia e ko HTA a me nā limahana HCF. Ma ke ʻano he kikowaena noiʻi, hoʻomauō, a hoʻonaʻauao ʻaeʻoia no loko mai o ke kaiaulu, ke hoʻonaʻauao nei ko TKC i ka lehulehu malihini e hiki ai ke kipa pono i ka hono ʻo Kahaluʻu a me ka ʻāina ma mua o ka hōʻea ʻana i laila. Ua hoʻohanohano ʻia aku nei ko TKC and ke kaiaulu o Kahaluʻu e ka hui kū i ka ʻauhau ʻole kauʻāina ʻo Mission Blue nāna i koho i ka hono ʻo Kahaluʻu he Hope Spot—he wahi i ʻike ʻia he koʻikoʻi i ke ola o ke kai—a me Cindi Punihaole, ka luna hoʻokele o ko TKC Kahaluʻu Bay Education Center he Hope Spot Champion. |
|
Ua hoʻokipa pū ko The Kohala Center i ko HTA a me nā limahana HCF i Niuliʻi, he ʻāina ʻākoakoa kaiaulu kuʻuna i ʻike ʻia no kona uluhala, nahele kapa kai, a kumuwaiwai kapa kai. Ua kaʻikaʻi ʻia ua hui nei a puni nā uluhala me ka lohe pū i nā moʻolelo no ka hana a ka lau hala, nā wā o kona ulu ʻana, a me ka pilina kūkaukaʻi me ka ʻāina, nā kahu ʻāina, a me nā haumāna o ia wahi pana. |
|
He mea ʻo Laʻiʻōpua nona ka makana Aloha ʻĀina e hāpai ana i nā hanana “Ola ka Lāhui.” Ma ʻaneʻi, ua komo ko HTA a me nā limahana HCF i nā papa hoʻonui ʻike moʻomeheu i noa i ka malihini a kamaʻāina e laʻa ka hilo a kui lei, ulana lau hala, kuʻi ʻai, a me ke kūkākūkā no ka waʻa Laʻiʻōpua. |
|
Destination Management Action Plan: Nā Hālāwai Kaiaulu Kauaʻi |
|
Ua mālama ko HTA a me ke Kauaʻi Visitors Bureau (KVB) i ʻelua hālāwai kaiaulu ma Kauaʻi e hōʻike ʻia ai nā hana e kālele ana ma ke kūkulu hou a hoʻokele ʻana i ka hoʻokipa malihini. He 130 a ʻoi mea noho i hōʻea aʻe i nā hālāwai i mālama ʻia ma Līhuʻe ma ka ʻākau o Kauaʻi ma ka lā 16 a 17 o ʻAukake. Ma ua mau hālāwai nei, hōʻike pū nā limahana KTA a KVB i ka ʻike hou no nā hana hoʻokō holomua i kāhea ʻia e ke kaiaulu ma kona Kauaʻi Destination Management Action Plan. No ka ʻike hou aku, e heluhelu i ka Spring 2022 Progress Report.
|
|
Ka Papa Hana Hoʻolakolako Kaiāulu: Heihei Waʻa ʻo ka Mōʻīwahine Liliʻuokalani
E hoʻi nō ka Heihei Waʻa ʻo ka Mōʻīwahine Liliʻuokalani (Queenʻs Canoe Club Kai ʻŌpua) (QLCR) i Kalaoa, Hawaiʻi, mai ka lā 1-5 o Kepakemapa, ma hope o ka hoʻomaha ʻana no ka 3 makahiki ma muli o ka maʻi ahulau COVID-19. Ma kona mālama kūmakahiki ʻia mai ka makahiki 1971, ʻo ke QLCR ko Hawaiʻi heihei waʻa holo loa nui loa a ua puka pū ʻo ia ko ka poepoe honua heihei waʻa nui loa. Hahai kona huakaʻi he 18 mile no nā kāne a wahine i ke ala i koʻikoʻi ma ka moʻomeheu a mōʻaukala e holo ana mai ke kahakai o Kamakahonu ma ka hono o Kailua-Kona a ka Pāka Aupuni Kauʻāina ʻo Puʻuhonua o Hōnaunau. He hoʻokūkū hoe pālua, hoʻokūkū hoe papa kū, he mākaʻikaʻi ʻana i ke Kūlanakauhale o Kailua, he Pō Mea Hoe Waʻa Kauʻāina, he mau wā kūkā, a he Paikau Lamakū. E ʻike hou aku ma www.qlcanoerace.com/. |
|
Ke Kū ʻElele no Hawaiʻi ma Esto 2022
Mai ka lā 19-22 o ʻAukake, ua komo pū nā limahana HTA me ka U.S. Travel Association ma kona Educational Seminar for Tourism Organizations (ESTO) 2022 ma Grand Rapids, Michigan. Ua ʻākoakoa nā limahana hoʻokele ʻāina hoʻokipa ma nā haneli ma nā pae mokuʻāina, kauʻāina, a kūloko e ʻike ai no nā lako, manaʻo kōkua, a ʻike hou aku e kōkua ʻia ai ke kūkulu alowelo me ka hoʻokele ʻana i ka hoʻokipa malihini ma ko lākou mau wahi.
Ua kū ʻelele ko HTA Luna Hoʻokō Alowelo ʻo Kalani Kaʻanāʻanā no Hawaiʻi ma ke kahua i komo pū ma ka pānela “The KPIs of Community, Evolving Organizational Metrics” a me ka Luna Hoʻokele Hoʻokipa Malihini o DBEDT ʻo Jennifer Chun i hōʻike no “Mapping the Research Funnel for Marketers.”
ʻO ka mea kupanaha iaʻu ke hoihoi laulā i ka ʻike kikoʻī no nā KPI a ma ʻō aku o ka hoʻokele waiwai a e komo ana hoʻi ma ke ʻano e pā ai ko kākou mau kaiaulu,” i ʻōlelo ai ʻo Kalani.
Ua hōʻea pū ko HTA mau Luna Alowelo ʻo Jadie Goo a me ʻIwalani Kūaliʻi-Kahoʻohanohano, a me ka Luna Hoʻokele Hoʻolālā ʻo Caroline Anderson.
“He pōʻaiapili maikaʻi ia e aʻo ai a e hōʻike ai me nā keʻena huakaʻi mokuʻāina hou aku a me nā hui hoʻokele ʻāina hoʻokipa no kā hana e hana ʻia nei no ka hoʻokele i ka hoʻokipa malihini,” i ʻōlelo ai ʻo Caroline. “He mau wahi hou aku pū kekahi e ʻike nei i nā ʻāʻumeʻume hoʻokahi. ʻAʻole ʻo kākou wale nō, a ke hana nei i ka mea e hiki ma ka ʻimi i ke ala e kākoʻo ʻia ai ko kākou mau kaiaulu a mea kipa.”
|
|
Nā Kūkā no ka Laulima a me ka Mālama ma ko ke Kauʻāina Kapikala
Ua hana pū aku nei ke kime Meet Hawaiʻi o Wakinekona D.C. me Hilton Hawaiian Village Waikīkī Beach Resort a me Hilton Waikōloa Village e hoʻohui ai he 14 ʻōhua e hoʻolālā nei e huakaʻi, a i ʻole paha, e noʻonoʻo ana e mālama hālāwai ma Hawaiʻi ma waena o ka makahiki 2023 a 2028.
Ma ka hala ʻana o ka ʻelua lā ma Iulai, ua hui ua kime nei me ko American Society of Plant Biologists (ASPB) nāna e lawe mai ana a ma ʻō aku o ka 1,000 mea hele ʻaha i Oʻahu i ka makahiki 2024 no kona hālāwai Kālaimeaola Meakanu kūmakahiki. Ua loaʻa iho nei he haʻawina he 2 miliona kona nui a he kālā ʻelima makahiki ka lōʻihi e hoʻoholomua ʻia ai ka pono kaulike ma nā akeakamai ʻepekema. E kālele ko ASPB pāhana ROOT & SHOOT ma ka hoʻolako kumuwaiwai, papa hoʻonui ʻike, a me nā pōʻaiapili e ʻōmaka ai ka loli moʻomeheu a paʻa pono mai he hopena kaulike ma ke kālaimeaola meakanu. Ke hana pū nei ʻo Meet Hawaiʻi me ko ASPB ma ka hoʻohui ʻana i kona poʻe me nā lālā o Hawaiʻi ma o ka ‘Elele Program.
Ua nui pū ke ohohia o nā ʻōhua o D.C. i ke aʻo no ko ke Kikowaena Hālāwai o Hawaiʻi papa hana Carbon Offset. Ua hōʻike ko Meet Hawaiʻi no ke ala e pā ai ko Hawaiʻi Pae ʻĀina i nā hālāwai ʻākoakoa ma ka hoʻihoʻi ʻana ma o ua papa hana nei ma ka hana pū ʻana me ka Hawaiian Legacy Reforestation Initiative.
|
|
Mālama ʻia na ka Māhele Waena Komohana o ka PCMA ka Hoʻokūkū Kolepa Mua
Ua lilo ko Kikako kime Meet Hawaiʻi he hoa kākoʻo koʻikoʻi ma ka hoʻokumu ʻia o ka Greater Midwest Chapter (GMC) PCMA Golf Classic, i mālama ʻia ma ka lā 25 o Iulai. Ua kākoʻo ʻia kekahi puka kolepa na ka Hilton Hawaiian Village Waikīkī Beach Resort a me ka Hilton Waikōloa Village me ke aloha pū i nā ʻōhia mai ka Waena Komohana o ʻAmelika Hui Pū ʻIa e ʻike ai no ia mea he aloha. He 64 mea kolepa i hōʻea aʻe i ua hanana makamua nei.
ʻO ka GMC kekahi o nā māhele PCMA nui loa o ʻAmelika Hui Pū ʻIa me ka loaʻa o ka 1,200 a ʻoi lālā ma ka ʻehiku mokuʻāina.
|
|
Puka ke Kime Meet Hawaiʻi he Alakaʻi ma ka Loaʻa o ke Kālā
Ua launa a hoʻonaʻauao aku ko Meet Hawaiʻi Luna Hoʻokele Kauʻāina Moʻokāki ʻo Meredith Perkins i nā ʻōhua no ka pae ʻāina ʻo Hawaiʻi ma ka Hanana Launa Kauwela a ko Nūioka PCMA ma ka lā 26 o Iulai. Ua launa ʻo Perkins me ke 30 a ʻoi ʻōhua ma ua hanana nei i mālama ʻia ma ka hōkele Renaissance New York Chelsea i hua mai ai he noi piki (RFP) no ka makahiki 2026 no ka 600 pō lumi no Hawaiʻi.
Ua launa pū ke kime Meet Hawaiʻi me nā ʻōhua ma kēia mau hanana kekahi:
- Corporate Event Marketing Association (CEMA) Summit ma Nasawila, Kenekī (lā 31 o Iulai- lā 3 o ʻAukake)
- Hālāwai Kūmakahiki a ka American Society of Association Executive (ASAE) ma Nasawila, Kenekī (lā 20-23 o ʻAukake)
- Maritz Global Events NEXT&, he ʻaha ʻōhua a pāʻoihana ma Tampa, Pololika (lā 29 o ʻAukake- lā 1 o Kepakemapa)
|
|
Hoʻopuka ʻia na ka HTUSA nā Kumuwaiwai Aʻoaʻo Huakaʻi Kikohoʻe Hou no ka Pae ʻĀina ʻo Hawaiʻi no nā Mea Aʻoaʻo Huakaʻi
Ma ka hana pū ʻana me HTA a me nā Māhele Mokupuni, ua hoʻopuka ʻia na ke kime Travel Trade o ka HTUSA he ʻehā kumuwaiwai aʻoaʻo huakaʻi kikohoʻe hou he kumuwaiwai hoʻonaʻauao alowelo e kālele ana ma lunao nā aʻoaʻo huakaʻi. Kālele ua mau kumuwaiwai nei ma luna o nā ʻano huakaʻi ʻana a he ʻehā: Mālama Hawaiʻi/Mindful Travel, Hawaiian Culture, Culinary, a Outdoor Travel. Hiki i ke aʻoaʻo huakaʻi ke hoʻoili a kaʻana i ua mau kumuwaiwai nei me nā ʻōhua.
Ma kona ʻano makakū, hakuhia, a hoʻonui ʻike, kālele ua mau kumuwaiwai nei ma luna o nā hana kūikawā no nā malihini e ʻimi ana e ʻike i ko Hawaiʻi nani kūlohelohe, moʻomeheu ʻoiaʻiʻo, ʻai ʻono, a mau hana hoʻoulu ʻike o nā ʻano like ʻole. Eia hou, he mau kumuwaiwai kēia e hōʻike ʻia ai he manaʻo lōkahi e paipai ana i ka hoʻokipa me ka manaʻo pono a ma ka hoʻolako ʻana i nā mea e pono ai nā aʻoaʻo huakaʻi e hoʻonaʻauao ai i nā malihini ma mua o ka hōʻea ʻana i Hawaiʻi.
Hiki i nā aʻoaʻo huakaʻi ke kaʻana like i nā Kumuwaiwai Huakaʻi Kikohoʻe ma o ke kahua aʻoaʻo huakaʻi o ka HTUSA ma ka hoʻokumu he leka uila pilikino i nā ʻōhua ma luna o nā mea e hoihoi ʻia ana. Hoʻokolo ʻia i mea e ana ʻia ai ka nui e hana pū ai me ke aʻoaʻo huakaʻi.
|
|
Mālama ka HTA i ke Anamanaʻo Mālama Hawaiʻi
Ua hoʻolaha iho nei ka HTUSA he anamanaʻo e kālele ana ma ka ʻohiʻohi i ka ʻikepili waiwai mai nā mea huakaʻi pono ma ka hoʻokolo i ke komo ʻana a me ka ʻole i ka papa hana Mālama Hawaiʻi, ko HTA papa hana mokuʻāina e paipai ana i nā malihini e hoʻihoʻi aku i ke aloha ma ka hana manawaleʻa. Nīnau ʻia kahi i hana manawaleʻa ai, pehea i lohe ai no ka papa hana, a inā e makemake ana e kaʻana like no kāna hana ma ka leka uila. Ke hoʻokolohua ʻia nei ua anamanaʻo nei e kekahi mau hui kākoʻo o Mālama Hawaiʻi ma ka hoʻokomo pū ʻana ma ka palapala kāinoa a hōʻalo kuleana. E hoʻolaha piha ʻia i nā hoa kākoʻo ma nā pule e hiki mai ana.
|
|
Hoʻomau ka HTJ i ka Hoʻonaʻauao Malihini Mālama Hawaiʻi ma Iāpana
Ma ka hana pū ʻana me ko Iāpana mau hui huakaʻi nui, hui mokulele, a me kekahi pāʻoihana ʻea kāki nui, ua paʻi ʻia na Hawaiʻi Tourism Japan (HTJ) he lau ʻelua ʻaoʻao ka nui ma ka pukana o ka lā 17 o Iulai o ko ke kauʻāina nūpepa nui loa, Yomiuri Shimbun, e hoʻonaʻauao ana i nā malihini no ko HTA papa hana Mālama Hawaiʻi. Ua komo pū ko All Nippon Airways (ANA), ANA X, Japan Airlines, JCB Credit Cards, JTB Travel, H.I.S. Travel, a me ka Japan Association of Travel Agents.
Ma ka hoʻomoeā ʻia he ala hou e ʻike ai i ko Hawaiʻi Pae ʻĀina no ka poʻe o Iāpana, ua hōʻike pū ʻia ua lau Mālama Hawaiʻi nei ma ka papa hele o lalo o ke kahua Shinjuku, he wahi hele nui loa ʻia ma ke ʻano he kahua holo nui o Tokyo. Ua paʻa ka hōʻike ʻia ma ka lā 18 o Iulai a ka lā 14 o ʻAukake e pā ai paha he 94 miliona mau kānaka. Ua hoʻopuka pū ʻia ma ka Twitter mai ka lā 18 o Iulai a i ka lā 31 o ʻAukake i loaʻa ka 6 miliona pā ʻana.
Mai ka lā 9 o Mei a i ka lā 30 o Iune, ua paipai ʻia na ka HTJ ka wikiō Mālama Hawaiʻi i nā anaina o Iāpana ma ka YouTube, a ma nā kahua kūlelepaho, ka polokolamu kīwī Tver, he kahua kīwī pūnaewele ʻo Abema TV e pāpā ana i ka hōʻalo hoʻolaulaha. He 11.3 miliona pā ʻana o kēia paipai ʻana a ma ʻō aku o ka 9 miliona nānā ʻia ʻana. Ma nā kahua pāpaho like ʻole, ʻo ke kāki hoʻopuka o ka wikiō ke emi loa o ko ka HTJ mau hoʻolaulaha kikohoʻe e loaʻa ai nā hopena kohu loa.
|
|
Hōʻikeʻike ʻia ke Kiʻiʻoniʻoni Hōkūleʻa no ka World Oceans Day
A pau ka hōʻikeʻike ʻia o ke kiʻiʻoniʻoni Hōkūleʻa “Moananuiākea” i paʻa ka lepe unuhi ʻōlelo Kepanī ma Tokyo a me Nagoya i Mei, a me Yokohama a me Chigasaki ma Iune, ua mālama ʻia na ka HTJ he mau hōʻikeʻike hou ʻana i Osaka ma ka wā hoʻokahi o ka World Oceans Day. ʻO ka pahuhopu o nā hōʻikeʻike ʻana a ʻelua o ke kiʻiʻoniʻoni o Osaka ma ka lā 18 o Iulai—he wā kūkā me nā lālā o ka Hōkūleʻa—ka hoʻopaipai ʻana i ka makakau no ka moana a me nā nīnūnē ao kūlohelohe o ka poepoe honua.
He 400 a ʻoi mea nānā i nā hōʻikeʻike ʻana o Iulai, ʻo ia hoʻi he hōʻikeʻike ʻana o ke pānānā i hoʻohana ʻia ma ko Hōkūleʻa holo ʻana. Ua nīnau nā mea komo i nā lālā o Hōkūleʻa no ke kino o Hōkūleʻa, ka nohona, a me nā mea nanea loa o ka huakaʻi. Aia pū nā hōʻikeʻike ʻana o ka lā 18 o Iulai ma ka lā hope o ka Hawaiʻi Fair—kekahi o ko Osaka mau hanana kūmakahiki nui loa—ma ko ka Hankyu Department Store wahi Umeda nui.
|
|
Hoʻopuka ʻia na ka HTCAN he Papa Hana Hoʻopaipai Hoʻonui ʻIke no nā Aʻoaʻo Huakaʻi 2022
Ua hoʻomaka ʻia ko Hawaiʻi Tourism Canada (HTCAN) Papa Hana Hoʻonui ʻIke no nā aʻoaʻo huakaʻi ma ka mālama ʻia o ka hālāwai ma ka lā 21 o Iulai. Ua mālama ʻia ua hālāwai nei na ko HTCAN Luna Hoʻokele Moʻokāki ʻo Lorenzo Campos a Hope Pelekikena Loaʻa a Hōkona o Spoiled Agent Hawaiʻi ʻo Sabrina Filatow. ʻAneʻane a he kanalima aʻoaʻo i komo i ua hālāwai nei, me kekahi e komo ana ma ka hālāwai ʻīwā ma o ka Facebook. Ua hōʻike ʻia ka ʻikepili huakaʻi i nā aʻoaʻo huakaʻi no ka papa hana Mālama Hawaiʻi a me ona manaʻo ʻo ke kuleana. Ua noa ka hālāwai i paʻi wikiō ʻia i nā aʻoaʻo huakaʻi e nānā ai i ka māhina ʻo Kekemapa ma ka paena Spoiled Agent Hawaiʻi.
|
|
Hoʻomau ʻia ka Nānā ʻia o Hawaiʻi ma ka Hoʻopaipai ʻana o Travel Courier
Ua kālele ʻia ma ka makasina Travel Courier nā mokupuni pākahi o Hawaiʻi me ka nīnauele pū ʻia o kona Māhele Mokupuni no ka ʻehā māhina moekahi ma kona mau mana paʻi a uila e hoʻonaʻauao ana i ko Kanakā mau limahana huakaʻi paʻa mau no ke kūikawā o kēlā me kēia mokupuni. Kālele ʻia ʻo Hawaiʻi Mokupuni ma ka pukana ʻAukake o ua makasina nei.
Hōʻike ʻia ma kēlā me kēia ʻatikala o ka pūkaʻina ʻatikala ke koʻikoʻi o nā mea huakaʻi no Kanakā i ko Hawaiʻi me ka hōʻike pū i ka ʻike no nā hana Mālama Hawaiʻi o kēlā me kēia mokupuni. Aʻo nā limahana Kanakā e heluhelu i ua mau ʻatikala nei no ke ʻano i kūikawā ai kēlā me kēia mokupuni a me ke kuleana a ka limahana Kanakā e ʻauamo ai ma ka hōʻike i ka ʻike pololei no Hawaiʻi i nā ʻōhua.
|
|
Hana pū ʻo HTO me ko Nūhōlani Luxury Escapes
Ua hana pū ʻo Hawaiʻi Tourism Oceania (HTO) me ko Nūhōlani “Luxury Escapes” e hōʻike ai i ka mokupuni ʻo Oʻahu a me kona mau koho e noho ai a he ʻelua: Turtle Bay Resort a me Outrigger Reef Waikīkī Beach Resort. Ua kipa iho nei ka mea hana keaka Nūhōlani a mea hoʻokipa kīwī “Luxury Escapes” ʻo Cameron Daddo — a pēlā pū nā mea lanakila o ka polokolamu kīwī “The Bachelor Australia” ʻo Jimmy Nicholson lāua ʻo Holly Kingston iā Oʻahu no ʻeono lā e kī wikiō ana i kā lākou hana ma Kualoa Ranch, ka hale ʻaina ʻo Miro Kaimukī, Royal Hawaiian Catamaran, a me ko Waikīkī mau kahakai a hōkele.
|
|
Mālama Hou ʻia ka Lelena mai Aotearoa i Hawaiʻi
Mālama hou ʻia ka lelena ma waena o Aotearoa a me Hawaiʻi ma Iulai ma hope o ke kū ʻana i ka maʻi ahulau COVID-19. I mea e hoʻolauleʻa ai, ua hoʻokipa ʻia na ka HTA a me Hawaiian Airlines he hui hoʻopaipai pāpaho i Oʻahu ma luna o ka lelena mua o ka lā 4 o Iulai.
Ua komo pū ua hui nei i nā hana hou like ʻole a piha ohohia e kūikawā ai ka huakaʻi ʻana, a keu aku no nā mea huakaʻi Aotearoa. Ua ʻāwili ʻia ia mea ʻo ka mālama ma ka papa hana pāpaho a ua kālele ʻia ua manaʻo nei ma nā mea i hoʻopuka ʻia.
|
|
Hōʻike ʻia na ka HTO ʻo Hawaiʻi Pae ʻĀina ma ʻEhā ʻAha ʻAha Male o Nūhōlani i ka Makahiki 2022
Ma ke kaʻakālai e kālele ʻia ai ka ʻaha male a hoʻolauleʻa paʻa ipo ʻaha male, ke hana pū nei ko HTO me Hawaiian Airlines e hōʻike ʻia ai ʻo Hawaiʻi Pae ʻĀina ma ʻehā ʻaha ʻaha male o Nūhōlani i kēia makahiki. Ua mālama ʻia ka mua o ua mau ʻaha nei ma ka lā 24 o Iulai ma ka Brisbane Convention and Exhibition Centre. Ua hoʻomohala ʻia na ke kime HTO ʻo “Romance Guide to Hawaiʻi” no ua hanana nei e hāpai aʻe ana i nā wahi e mālama ʻaha male ai, nā hōkele, a hana pū kekahi e hana ʻia.
|
|
Paipai ʻia na ka HTK ʻo Kuleana Travel Tips me Korean Air a me nā Hui Hoʻolālā Huakaʻi Like ʻOle
Ma luna o nā hana hoʻokaʻaʻike huakaʻi, ke hana pū nei ʻo Hawaiʻi Tourism Korea (HTK) me Korean Air a me ka 18 hui hoʻolālā huakaʻi e hāpai ʻia ai ka papa hana Kuleana Travel Tips i nā mea huakaʻi e kūʻai kikiki mokulele ana i Hawaiʻi ma o ka eDM, a i ʻole paha, ka polokolamu hoʻokaʻaʻike kelepona ʻo KakaoTalk. Ua noa nā wikiō manaʻo kōkua huakaʻi no Hawaiʻi — e kālele ʻia ai ka moʻomeheu, ka palekana ma ka moana, ka hoʻomalu mea ola kai, ka hoʻomaluō kai, a palekana ma ka ʻāina — no ka nānā ʻia ma ka paena o ua papa hana hoʻopaipai nei, pau pū me ona mau lepe unuhi. E holo ana ua papa hana nei, i hoʻomaka ma Iulai, a i Kepakemapa.
Ua hana pū ko HTK me Asiana Airlines ma kekahi papa hana, mai Iulai a Kepakemapa, kahi e ʻike ʻia ai he hoʻolaulaha e hoʻokuʻi ana i ka wikiō Kuleana Travel Tips ma ke kahua YouTube o HTOK no nā ʻōhua e kūʻai ana i kikiki mokulele i Hawaiʻi. Eia hou, ua mālama pū ʻia na HTK lāua me Asiana Airlines he hanana hāʻawi makana a hoʻopaipai ma Iulai no nā ʻōhua kūʻai kikiki no Hawaiʻi i kālele ʻia ai ka wikiō manaʻo kōkua huakaʻi no Hawaiʻi.
|
|
Hana Pū ko HTK me Magazine B no Kekahi Pukana no Hawaiʻi
Ke kōkua nei ʻo HTK iā Magazine B, he hui paʻi no Kolea mai, ma kekahi pukana kūikawā no Hawaiʻi e puka auaneʻi. Ua kipa nā limahana o ua makasina nei i ko Hawaiʻi ma ʻAukake e mālama ana hoʻi i nā nīnauele e kūkā ʻia ai ka papa hana Mālama Hawaiʻi, ko HTA mākia a mau papa hana, a me ke ʻano e ʻāwili ʻia ai kiʻina hoʻomauō ma nā hōkele.
|
|
Mālama ʻia na HTC he Hoʻonui ʻIke no nā Limahana Tuniu Travel
Ua mālama ʻīwā ʻia he hoʻonui ʻike na Hawaiʻi Tourism China (HTC) ma ka lā 13 o Iulai no ke 60 a ʻoi limahana kālele huakaʻi no Tuniu Travel, he pāʻoihana hoʻonanea uila alakaʻi o Kina. Nui hoʻi nā pūʻolo huakaʻi ʻaeʻoia o Tuniu Travel, a pēlā pū nā lawelawe pili huakaʻi no nā mea huakaʻi no ka hoʻonanea e nānā ʻia ai ka 420 mau kūlanakauhale o Kina a me nā wahi hele nui ʻia o ka poepoe honua. Ua hōʻike pū ʻia na HTC nā lula huakaʻi COVID-19 a ʻikepili no Hawaiʻi a me ko HTA mau papa hana Mālama Hawaiʻi a Community Enrichment ma ua hoʻonui ʻike nei. Ua nui ka makemake ʻia o ua hoʻonui ʻike nei i loaʻa ai he 4,030 pā ʻana ma ke kūlelepaho.
|
|
Komo ʻo HTC ma ma B2C+B2B Roadshow ma Beijing
Ma ke ʻano he hoa kākoʻo o ka 2022 U.S Commercial Global Travel and Tourism Team, ua komo ʻo HTC i ko ka ʻEmepake o ʻAmelika Hui Pū ʻIa ma Kina B2C+B2B Roadshow ma Beijing ma ka lā 16 o Iulai. He 120 haumāna huakaʻi Pākē a ʻohana i komo i ua hanana nei — i hoʻolālā ʻia hoʻi me EducationUSA, American Airlines, United Airlines, Delta Air Lines, a me kekahi mau wahi huakaʻi hou aku o ʻAmelika Hui Pū ʻIa. Ua hōʻike pū ʻo HTC i ka ʻike a ʻikepili hou aku no ka huakaʻi pono ʻana i Hawaiʻi, ka papa hana Mālama Hawaiʻi a me ona mau kumuwaiwai huakaʻi ma ua hanana nei, a pēlā pū ka hānai ʻana aku i ka hua makakema i hoʻoulu ʻia ma Hawaiʻi a me nā hōʻikeʻike hula pū kekahi.
|
|
LESS is More me HTC a me Ctrip
Ua komo iho nei ʻo HTC ma ko Ctrip LESS Sustainable Travel Plan poepoe honua, he hui hoʻolālā huakaʻi o Kina, me nā wahi huakaʻi ʻē aʻe o ka poepoe honua. (He ʻōlelo ʻo LESS no “Low carbon, Environment protection, Save energy, Sustainable development.”) Ke paipai ʻia nei ka huakaʻi emi o ke kalapona, ka mālama i ke ao kūlohelohe o ka poepoe honua, a pēlā pū ka mālama i ko kākou poepoe honua aloha nui ʻia ma ka mākia o ua papa hana nei, a ke launa maikaʻi nei nō me ko HTA papa hana Mālama Hawaiʻi. I kākoʻo, ua hoʻolele ʻia nā hua kūlelepaho no nā papa hana huakaʻi hoʻomauō o Hawaiʻi ma ko HTC a me HTC mau waihona kūlelepaho.
|
|
Ko HTC Kahukahu ʻana i nā Pilina Ō Mau ma waena o Hawaiʻi a me Kina
Ma ka hana pū ʻana me ka hui kū i ka ʻauhau ʻole ʻo Dr. Sun Yat-sen Hawaiʻi Foundation, ke hoʻomohala ʻia nei na HTC he moʻo hua kūlelepaho ma ka hapahā ʻekolu o ka makahiki 2022 e hoʻohanohano ana i ka Makua Kāne o Kina Hou ʻo Dr. Sun Yat-sen a me kāna hoʻoilina, a pēlā pū ka mōʻaukala lōʻihi ma waena o Hawaiʻi a me Kina. Lana ka manaʻo ma kēia hana pū ʻana e pā ka naʻau o nā mea huakaʻi no Kina i ka hoʻomanaʻo ʻana i ua mau pilina nei a pēlā pū i nā hana hoʻonaʻauao Mālama Hawaiʻi e hana ʻē ʻia nei.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
