Manaʻo Wehe Na Ko
HTA Pelekikena A Luna Hoʻokele John De Fries
|
|
He hoʻokele waʻa no ka lā ʻino.
He ʻōlelo kēia no kekahi kanaka wiwoʻole ma loko nō o ka ʻōkaikai. No kākou like ke kuleana o ka mālama i ko kākou waʻa. ʻAʻole ka poʻe a pau he hoʻokele, akā ma ka hana pūalu ʻana e holo ai ka waʻa i mua.
E like me ka ʻōlelo a ka Pelekikena a Luna Hoʻokele John De Fries ma ka ʻaha Mālama Kuʻu Home ma ka lā 1 o ʻOkakopa, “He mea nui ko kākou hoʻokele ʻana i nā waʻa i kahi like a hōʻea aku i ka Hawaiʻi e mālama pono ʻia, ka Hawaiʻi ʻoʻoleʻa ʻaeʻoia o ka
makahiki 2030.”
|
|
Nā Kūkulu Moʻomeheu Hawaiʻi A Waiwai Kūlohelohe |
|
Ua hoʻolaha aku nei ʻo HTA i ka hoʻomau ʻia o nā papahana Kūkulu Ola a Aloha ʻĀina, me ka ʻimi pū i nā pāhana a ke kaiāulu. Ke mālama ʻia nei ʻelua noi pāhana e hoʻolako ʻia nā ʻahahui ʻauhau ʻole a papahana e hoʻōla ana i ka moʻomeheu Hawaiʻi a e mālama ana i nā waiwai kūlohelohe ma ka makahiki 2022.
He māhele kēia mau papahana Kūkulu Ola a Aloha ʻĀina o ko HTA hana Mālama Kuʻu Home a me nā kūkulu o ka Papahana Hoʻokele 2025. ʻAʻole i noi ʻia nā pāhana ma ka makahiki 2021 ma muli o ka maʻi ahulau COVID-19 a me ka lako ʻole o ke kālā.
“ʻO ke kumu o kēia mau papahana Kūkulu Ola a Aloha ʻĀina, ʻo ia ka hoʻihoʻi ʻana i nā kumuwaiwai e mālama ʻia nā kānaka a me ka ʻāina ma o ke kākoʻo i nā hana a nā ʻahahui kaiāulu a puni ka paeʻāina,” wahi a Kalani Kaʻanāʻanā, ko HTA Luna Alowelo. “Nui ka hoihoi i ka hoʻāla hou i kēia mau papahana e hoʻolako ʻia nā kaiāulu.”
Kākoʻo ka papahana Kūkulu Ola i nā ʻahahui e hoʻoikaika a hoʻōla ana i ka moʻomeheu Hawaiʻi ma o nā hana kūʻiʻo no nā kamaʻāina me nā malihini.
Hoʻolako ka papahana Aloha ʻĀina i nā ʻahahui kaiāulu e hoʻoikaika ana i ka pilina i waena o ka ʻāina me ke kanaka, a me ka ʻike mālama i nā waiwai kūlohelohe.
Ua koho ʻo HTA i ka Hawaiʻi Community Foundation e manakia i nā papahana Kūkulu Ola a Aloha ʻĀina no ka makahiki 2022.
|
|
Ua hoʻolaha aku nei ʻo HTA i ka hoʻomau ʻia o ka Papahana Hoʻoulu Kaiāulu, he papahana e kākoʻo ana i nā pāhana, hoʻolauleʻa a hanana waiwai no nā kamaʻāina me nā malihini, a me ka hoʻokahua pū ʻana i ka hoʻoulu waiwai o ke kaiāulu.
Ke hana alu like nei ʻo HTA me ka Hawaiʻi Visitors and Convention Bureau no ka manakia i kēia papahana no ka makahiki 2022. Ua noi ʻia nā pāhana a nā ʻahahui ʻauhau ʻole o ke kaiāulu.
He māhele ka Papahana Hoʻoulu Kaiāulu o kā HTA hana Mālama Kuʻu Home a me ke kūkulu Kaiāulu o ka Papahana Hoʻokele 2025. ʻAʻole i mālama ʻia ka papahana no ka makahiki 2021 ma muli o ka maʻi ahulau COVID-19 a me ka lako ʻole o ke kālā.
“Hōʻike ko HTA Papahana Hoʻoulu Kaiāulu i nā ʻano like ʻole e hoʻoholomua ai ka ʻoihana hoʻokipa malihini i ke ākea o ka hoʻokele waiwai ma o ke kākoʻo i nā pāhana kaiāulu i wili pū ʻia me nā ʻoihana ʻē aʻe,” wahi a Kalani Kaʻanāʻanā, ko HTA Luna Alowelo. “He kuleana ko nā ʻahahui Papahana Hoʻoulu Kaiāulu i ka hoʻoholomua ʻana i ka Papahana Mālama ʻĀina Hoʻokipa o kēlā me kēia mokupuni kekahi.”
Pono e komo nā pāhana i loko o kekahi o kēia mau waeʻano o ka ʻoihana hoʻokipa malihini:
-
Hoʻokipa Mahiʻai: Pili i ka ʻike kino a mahalo i nā hua a nohona mahiʻai.
-
Hoʻokipa Moʻomeheu: Pili i ka hoʻoulu i ka ʻike a me ka mahalo o nā kamaʻāina a malihini no nā moʻomeheu, mōʻaukala, pāheona, a nohona like ʻole o Hawaiʻi.
-
Hoʻokipa Meaʻai: Pili i ka ʻike i ka ʻai a me ka inu kūikawā o Hawaiʻi.
-
Hoʻokipa Ao Kūlohelohe: Pili i ka ʻike kino i nā honua, meakanu, a holoholona kūikawā o Hawaiʻi ma ke ʻano e mālama a aloha pono ʻia ka ʻāina me nā mea ola.
-
Hoʻokipa Hoʻonaʻauao: Pili i ka hoʻonaʻauao kūmau a pōnolu hui pū ʻia me ka moʻomeheu a ao kūlohelohe kūikawā o Hawaiʻi.
-
Hoʻokipa Hoʻōla: Pili i ka hoʻōla pono i ka naʻau, ka manaʻo, ke kino, a me ka ʻuhane o ke kanaka, ka ʻohana, a me ka hui.
-
Hoʻokipa Haʻuki: Pili i ka hoʻolale i nā ʻālapa a i ʻole ke anaina o nā hanana haʻuki kaiāulu, e like me ka heihei holo, ʻau kai, holo paikikala, heʻenalu, hoe kū, a hoe waʻa.
-
Hoʻokipa Hoʻihoʻi: Pili i ka hoʻihoʻi o ka mea kipa i ka ʻāina hoʻokipa ma o ka hana manawaleʻa no kekahi ʻahahui a kaiāulu paha.
“Nui ka haʻaheo o HVCB a me nā mokuna mokupuni e kākoʻo a manakia i ko HTA Papahana Hoʻoulu Kaiāulu no Kauaʻi, Oʻahu, Maui Nui, me Hawaiʻi Mokupuni,” wahi a John Monahan, ko HVCB Pelekikena a Luna Hoʻokele. “Launa maikaʻi ia hana me ko mākou kūpaʻa ma ka mālama ʻāina hoʻokipa ma ka hoʻoulu ʻana i nā hanana kūikawā na ke kaiāulu, no ke kaiāulu.”
ʻO ka lā 5 o Nowemapa 2021, 4:30 p.m. ma Hawaiʻi ka palena pau e hoʻokomo ʻia nā noi ma nā mokuna mokupuni. E nānā ʻia ke noi pāhana ma www.hvcb.org/cep.
|
|
Launa, Hoʻonaʻauao ʻIa He 700 A ʻOi ʻĀkena Huakaʻi Ma Nā Hanana
Ma Kepakemapa, ua kia ka māhele ʻoihana mākaʻikaʻi o Hawaiʻi Tourism USA i ka hoʻonaʻauao i nā ʻākena huakaʻi, ka hele kino i nā ʻaha e like me Global Travel Marketplace West, Affluent Traveler Symposium, me ka Travel Agent Forum. Ua mālama ia māhele i nā hālāwai kikohoʻe me ʻelua pakanā nui, ʻo Virtuoso me Signature Travel Network. Ma ia mau hanana, ua hiki iā HTUSA ke launa a hoʻonaʻauao i 700 a ʻoi ʻākena huakaʻi ma ka noho alo a he alo, a me nā hālāwai a hōʻikeʻike nui. Ua hoʻolako ke kime i ka ʻike koʻikoʻi no nā papahana Safe Travels a Mālama Hawaiʻi, i paipai pono nā ʻākena huakaʻi i ka holo palekana a hoʻihoʻi iā Hawaiʻi.
|
|
Mau Nō Ka Hoʻi O Ka Hoihoi O Nā Kupa ʻAmelika I Ka Huakaʻi Ma Hope O Ka Iho ʻAna Ma Ka Wā Maʻi Ahulau
Ua ʻike ʻia ma kekahi anamanaʻo o nā kupa ʻAmelika a Destination Analysts ma ka hoʻomaka ʻana o ʻOkakopa, nui ka ʻaloʻahia pili i ke kālā, a me ke kānalua pū i ka pale pono a ka lāʻau koʻokoʻo. Ma loko nō o kēia, mau nō ka hoihoi o nā kupa ʻAmelika i ka hokona ʻia. Ma ia anamanaʻo hoʻokahi, ua ʻike ʻia ke kākoʻo o 63.4% o nā mea huakaʻi i ka papa helu o nā ʻōhua i pāpā ʻia mai ka mokulele aku ma muli o ka hana ʻino. Inā nō e hoʻokumu ʻia kēnā papa helu, e piʻi ka hoi o 44.9% o nā kupa ʻAmelika i ka huakaʻi.
Ke kumu o ka ʻike: Destination Analysts Wave 75 – 4 ʻOkakopa 2021
|
|
Laha Nā Wikiō Mālama Hawaiʻi Ma Ke Kīwī Me Ke
Kūlelepaho Iāpana
Ua hoʻouka ʻo Hawaiʻi Tourism Japan i nā wikiō Mālama Hawaiʻi ma nā waihona kūlelepaho a hoʻolele ʻia ma Kepakemapa. Ua ʻike ʻia he 254,000 manawa, a nānā piha ʻia he 65,000 a ʻoi manawa. Ma luna aʻe o kēlā, ua hoʻolaha ʻia nā wikiō ma Facebook me Instagram a nānā ʻia he 112,090 hou manawa. ʻO nā wikiō Mālama Hawaiʻi i nānā nui ʻia ma Facebook, ʻo ia ko Kiaʻi Collier wikiō e wehewehe ana i ka mālama kaianoho, a me ko Rick Barboza e hōʻike ana i ka mahiʻai mālama. Ma Instagram, ua nānā nui ʻia ko Noelani Lee wikiō no ka mahiiʻa a me ko Barboza wikiō mahiʻai.
Ua ʻike pū ʻia ma Kepakemapa ka hopena waiwai o ko HTJ hana pūalu me ka pāpaho ʻoihana mākaʻikaʻi o Iāpana. Ma ka polokalamu “Hawaii ni Koishite” i ʻike ʻia nā wikiō Mālama Hawaiʻi i unuhi Kepanī ʻia e 2.15 miliona kanaka. Ma kekahi hana alu like, ua kaʻakaʻahi ʻo Hawaiian Airlines i nā manaʻo Mālama Hawaiʻi a huakaʻi pono ma ka leka uila.
|
|
Eo Ka Lei Lanakila I Ko HTJ Wikiō “Our Island” Ma Awards Asia Pacific
Ua hoʻohanohano ʻia ko HTJ wikiō ʻo “Our Island” (https://www.youtube.com/watch?v=ab8zDntM2qA) me ka makana kūlana ʻekahi o ka māhele pāheona paʻi kiʻiʻoniʻoni ma ka ʻaha Awards Asia Pacific 2021, he ʻaha kūmakahiki e hoʻohanohano ana i nā paipai ʻoihana mākaʻikaʻi hakuhia a hoʻopā naʻau. ʻO ka lua kēia o ko HTJ hoʻohanohano ʻia – ua eo ia makana hoʻokahi iā lākou ma ka makahiki 2019 no ka wikiō “Moment of Island of Hawaiʻi” (https://www.youtube.com/watch?v=IPKnTkAHecs).
|
|
Komo ʻO HTJ I Ka Paipai Iā Kepakemapa ʻO Ia Ka Mahina Mōʻaukala Hawaiʻi
No ka paipai i ia mahina hoʻomanaʻo o Kepakemapa, ua kaʻakaʻahi ʻo HTJ i ka nūhou, ka paipai kūlelepaho, a me ka hālāwai kikohoʻe no ka lā hānau 183 o ka Mōʻīwahine Liliʻuokalani. Ua komo he 400 kanaka ma ka hālāwai, a ua ʻike ʻia ka paipai kūlelepaho e 125,028 kanaka. Ua hoʻolaha pū ʻia ka ʻaha mele kikohoʻe ʻo “Songs of Liliʻuokalani from ʻIolani Palace” i mea e hoʻonaʻauao i nā kupa o Iāpana no ka mōʻaukala Hawaiʻi.
|
|
Komo ʻO HTCAN I Ka Hanana #ACVDreamMakers A Air Canada Vacations No Nā ʻĀkena Huakaʻi
Ma ka lā 9 o Kepakemapa, ua komo ʻo Hawaiʻi Tourism Canada i ka hanana kikohoʻe ʻo #ACVDreamMakers a Air Canada Vacations i mālama ai no nā ʻākena huakaʻi, kahi i kaʻanalike ʻia ka pepelu paipai i nā ʻāina hoʻokipa kahi e pā ai ka lā no 2021/2022. Ua hiki i nā ʻākena ke kūkākūkā pololei me nā lālā HTCAN, nānā i nā wikiō, hoʻoili i nā palapala kuhikuhi huakaʻi i Hawaiʻi, a aʻo no ka papahana Safe Travels. Ua komo ma ʻō aku o ka 900 ʻākena huakaʻi i ia hanana.
|
|
Paipai ʻO HTCAN Iā Mālama Hawaiʻi Ma Ka ʻAha Kikohoʻe A WestJet Me WestJet Vacations
Ua komo ʻo HTCAN i ka ʻaha kikohoʻe a WestJet me WestJet Vacations ma ka lā 28 o Kepakemapa, me ka pane pū i nā nīnau he nui a nā ʻākena huakaʻi no nā koina huakaʻi i Hawaiʻi. Ua komo pū he 1,000 a ʻoi ʻākena i ia hanana, kahi i paipai ai ko HTCAN iā lākou e hoʻoulu ʻike no ka papahana Mālama Hawaiʻi ma o ke kele aku i ke kahua paʻa pūnaewele ʻo www.agents.gohawaii.com a me ka hoʻokō i ka papahana hoʻonaʻauao.
|
|
Alu Like ʻO HTO Me Sea Cleaners No Ka ʻOhi A Hoʻopau I Ka ʻŌpala Ea Ma Ke Kai
Ma ka lā 19 o Kepakemapa i mālama ʻia ʻo International Coastal Cleanup Day, he 24 hola piha e luʻu ai ka poʻe a me nā ʻahahui a puni ka honua i loko o ka hoʻomaʻemaʻe i nā kahakai, nā kahawai, a me nā ʻāina pili kai. Hana alu like ʻo HTO me ka ʻahahui ʻo Sea Cleaners no ka ʻohi a hoʻopau i ka ʻōpala ea ma ke kai. Kia ke kuʻikahi ma ke komo o ka ʻoihana mākaʻikaʻi i ke kōkua i ka pilikia. Ma ka makahiki 2018, ua hoʻomaka ʻo HTO me Sea Cleaners i ka ʻimi ʻana i nā ʻōpio alakaʻi a lawe mai i Hawaiʻi no ke kaʻana manaʻo a kaʻakālai no ka mālama i ke kumuwaiwai koʻikoʻi o nā mokupuni a pau o ka Pākīpika. Ma ia kuʻikahi i ʻāwili pū ʻia ka hana mālama kai me ka ʻike moʻomeheu a me ka ʻike kaiāulu.
|
|
Hana Alu Like ʻO HTK Me Korean Air No Ka Hoʻomanaʻo I Nā ʻĀkena Huakaʻi
No Hawaiʻi
ʻOiai ʻo Korean Air e hoʻi ana i ka lele i Hawaiʻi ma ka lā 1 o Nowemapa, ke hana alu like nei ʻo Hawaiʻi Tourism Korea me nā pakanā ʻoihana mākaʻikaʻi no ka hoʻoulu i ka hoi o nā kupa Kōlea e kipa iā Hawaiʻi. No ka mālama i ka hoihoi no Hawaiʻi, ke mālama nei ʻo Korean Air i huakaʻi hoʻokamaʻāina no nā ʻākena huakaʻi ma Nowemapa. E huakaʻi ana ʻumikūmākahi ʻākena me kekahi ʻelele no Korean Air i Hawaiʻi Mokupuni no ʻelua pō me Oʻahu no ʻekolu pō, lā 14-19 o Nowemapa. Ke hana alu like nei ʻo HTK me nā mokuna mokupuni no ka hoʻolālā i ka huakaʻi hoʻokamaʻāina, pau pū me ka hana manawaleʻa Mālama Hawaiʻi.
|
|
Komo ʻO HTK I Ke Kuʻikahi Me Korean Airlines No Ka
Paipai Huakaʻi
Ma ka hana kuʻikahi ʻana me Korean Air ma Kepakemapa, ua mālama ʻo HTK i paipai ma ka pūnaewele ma mua o ka hoʻi ʻo Korean Air i ka lele ʻana i waena o Incheon me Honolulu ma Nowemapa. Ua kūkulu ʻo Korean Air i paena pūnaewele no ia paipai ʻana me ka wikiō Mālama Hawaiʻi, ka lōkō, a me ka moʻolelo e hōʻike ana i ka mea nui o ka mālama. Ua komo 2,251 kanaka ma ke kūkākūkā ma ka pūnaewele, a ua hoʻolako ʻo HTK i ke kope i nā mea lanakila.
Ua ʻike ʻia ka paipai he 40,000 ma nā waihona kūlelepaho, a ua ʻike ʻia ma 11,000 a ʻoi pahu leka uila.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
