Ua mau ke ea o ka ʻāina i ka pono.
Ua hoʻōho mua ʻia kēia ʻōlelo ma ka lā 31 o Iulai, 1843 ma ka pāka ʻo Thomas Square ma Oʻahu e Keaweaweʻula Kīwalaʻō Kauikeaouli Kaleiopapa, ʻo ia hoʻi ʻo Kamehameha III, ma ka hoʻihoʻi ʻia o ke ea o ke aupuni mōʻī o Hawaiʻi e Pelekāne mā. Ma ko mākou kūlana he keʻena mokuʻāina, he kuleana ko mākou no ka hāpai ʻana i ia pono me ka hōʻihi i nā hanauna i hala a no nā hanauna e hiki mai ana. Ma ke alu like ʻana me nā kupa a pau o ka ʻāina e kō ai kēia kuleana. He huakaʻi loa ka ʻimi i ka ʻoihana hoʻokipa hoʻoulu hou, a he huakaʻi e pono ai ka hele pū me ke kaiāulu no ka hoʻoikaika i nā kūkulu o kā mākou hana – ʻo ka Moʻomeheu Hawaiʻi, ka Waiwai Kūlohelohe, me ka Hokona Alowelo. Me ia nō e mau ai ke ea o ka ʻāina i ka pono.
|
|
Ma ka moʻolelo “ Reshaping Tourism” ma ka nūpepa Ka Wai Ola, ua kūkākūkā ko HTA Pelekikena a Luna Hoʻokele ʻo John De Fries me ka Luna Alowelo ʻo Kalani Kaʻanāʻanā no nā ala e hana pūalu ai ka ʻoihana hoʻokipa me ke kaiāulu. Ma ia kūkākūkā ʻana, ua komo pū ka Luna Hoʻokele o ka ʻAhahui Hoʻokipa ʻŌiwi O Hawaiʻi, ʻo Mālia Sanders, me kekahi lālā hoʻokumu o ʻĀina Aloha Economic Futures, ʻo Noe Noe Wong-Wilson, no ka hōʻike i ka manaʻo nui o ka hoʻoponopono i ka ʻoihana hoʻokipa o Hawaiʻi no ka pono o Hawaiʻi. |
|
Nā Papahana Mālama ʻĀina Hoʻokipa
Me ka hana nui a me ke alakaʻi ʻana o nā kaiāulu, ke kō nei nā Papahana Mālama ʻĀina Hoʻokipa ma kēlā me kēia mokupuni o ka paeʻāina. ʻO kekahi kuleana o HTA, ʻo ia ka hana kuikahi ʻana me nā keʻena mokuʻāina a kalana, a me ka ʻoihana hoʻokipa. Me ka paʻa o nā Manakia ʻĀina Hoʻokipa ma nā keʻena mokupuni, nui ko mākou pīhoihoi i ke komo ʻana i ka makahiki ʻelua o ka hoʻokō.
“Nui ka hana i koe, a nui ka hana i kō,” wahi a Caroline Anderson, ka Luna Hoʻolālā o HTA. “E hoʻomau nō kākou i ka hana alu like no ka manakia pono a me ka hoʻomohala hou i ka ʻoihana hoʻokipa.”
|
|
KE KŪKULU MOʻOMEHEU HAWAIʻI |
|
Ka Papahana Kūkulu Ola
“Ma o ka papahana Kūkulu Ola e kākoʻo ai ke Keʻena Kuleana Hoʻokipa o Hawaiʻi i ka hana koʻikoʻi a kēia mau ʻahahui kaiāulu e hoʻoikaika nei i ka moʻomeheu a me ka pikoʻu Hawaiʻi ma nā ʻano pāhana, papahana, a hanana like ʻole,” wahi a Kalani Kaʻanāʻanā, ko HTA Luna Alowelo, no nā ʻahahui i lako i ka papahana. “He makakoho nui ka hoʻolako i nā kaiāulu no ka pono o Hawaiʻi no nā hanauna e hiki mai ana.”
Ua hoʻolaha aku nei ʻo HTA i ka hoʻolako ʻia ʻo 32 papahana a nā ʻahahui kaiāulu me ka $1,575,000 ma o ka papahana Kūkulu Ola ma ka makahiki 2022. Ua hoʻolako ʻia nā hui kaiāulu, nā loea, a me nā mea noʻeau e ʻimi ana i ka hoʻoikaika a hoʻolaha ʻana i ka moʻomeheu Hawaiʻi ma o nā hana ma ʻō a ʻō o ka paeʻāina.
I kēia mahina, ke hāpai nei mākou i ka hui ʻo Kuaʻāina Ulu ʻAuamo (KUA) a me kā lākou pāhana Makahiki Limu 2022, he hana e hoʻolaha ana i ka mea nui o ka limu ma ke ao kūlohelohe, ma ka honua kai, a me ka moʻomeheu Hawaiʻi.
|
|
KE KŪKULU WAIWAI KŪLOHELOHE |
|
Ka Papahana Aloha ʻĀina
Ke kākoʻo pū ʻia nei he 31 papahana a nā ʻahahui kaiāulu ma o ka papahana Aloha ʻĀina. Wahi a ko HTA Luna Alowelo ʻo Kalani Kaʻanāʻanā, “he ala ia papahana e kākoʻo ai ke Keʻena Kuleana Hoʻokipa o Hawaiʻi i nā hui e mālama nei i ke ao kūlohelohe ma o ka hoʻonaʻauao a me ka hoʻohuli ʻana i nā lima i lalo.”
E kākoʻo ana ke kālā he $1,575,000 i ia mau hui e hoʻopakele a mālama nei i ke ao kūlohelohe, me ke kākoʻo pū i ka ʻoihana hoʻokipa hoʻoulu hou no Hawaiʻi.
“Nui ko mākou mahalo i ka hana nui a kēia mau ʻahahui a me nā kaiāulu e pūlama nei i kā lākou mau hana mālama i kēia kulāiwi.”
ʻO kekahi o nā ʻahahui a HTA e kākoʻo nei ma o kēia papahana Aloha ʻĀina, ʻo ia ʻo Hawaiʻi Land Trust me ka pāhana hoʻōla hou i nā puʻeone a ālia o Waiheʻe ma Maui. ʻO ka ʻāina kai kahi e ʻauamo ʻia nei ke kuleana, mai Kalaekahoʻomano ma ka ʻaoʻao komohana a i ke kahawai ʻo Waiheʻe ma ka hikina. Ma mua, ua hoʻohana ʻia ka ʻāina no ka mahi pipi a no ka hoʻomaʻamaʻa pūʻali koa, he mau hana i hōʻeha i nā meakanu ʻōiwi a me nā waiwai moʻomeheu o ia ʻāina. Ua ʻauamo ʻo Hawaiʻi Land Trust i ke kuleana o ia ahupuaʻa i mea e mālama i ia ʻāina kupuna.
|
|
ʻImi I Ka ʻOiaʻiʻo
Mahalo mākou iā Honolulu Civil Beat no ka hāpai ʻana i ka papahana Mālama Hawaiʻi ma kekahi moʻolelo i puka aku nei, a he ʻike hou ko mākou e kaʻana aku ai i piha ka manaʻo.
ʻO ka makamua kēia o kā mākou hana e hoʻonaʻauao i nā malihini no ka waiwai o ka mālama. Ua puka ka papahana Mālama Hawaiʻi i kēlā makahiki aku nei i mea e kōkua i ke kaiāulu a me nā pāʻoihana o Hawaiʻi, ma loko nō o ke kākaʻikahi o ke kālā e hoʻolaha nui ʻia kēia papahana. Hoʻomanaʻo pū mākou i ke ʻano o ke anamanaʻo uluwale – he uluwale ia, ʻaʻole nō i ana i ka manaʻo o ka hapanui o ka poʻe.
Paʻa mau ʻo HTA i ka hoʻoulu a hoʻolaha i ke kumumanaʻo Mālama Kuʻu Home i waena o nā malihini a me nā kamaʻāina pū kekahi.
|
|
Nui ka makaʻala o nā kamaʻāina o Hawaiʻi i ka huaʻōlelo “hokona” pili i ka ʻoihana hoʻokipa. Ma ke Anamanaʻo Kamaʻāina Kupulau 2021, ua hāpai he 88% o nā kamaʻāina i anamanaʻo ʻia i ka mea nui o ka hoʻonaʻauao i nā malihini a me nā kamaʻāina no ka pono e mālama kekahi i kekahi, a me ka mālama iā Hawaiʻi. ʻO ia ke kia nui o nā hana hokona alowelo a HTA e holo nei. He hoʻonaʻauao ka nui o ka hana a ko HTA Hui Alowelo, e paipai ana i ka nui koʻikoʻi o ka Mālama Hawaiʻi i waena o nā mākeke a puni ka honua. He kuleana ia no kākou, ʻaʻole na HTA hoʻokahi, no laila ke kaʻana ʻia nei kēia manaʻo me nā pakanā ʻoihana a puni ke ao. |
|
Ma Kēkēmapa, ua mālama ʻo HTUSA me nā keʻena mokupuni i kekahi hanana ʻo The Hawaiian Islands: Mālama Ambassadors. Ma ia hanana i wehewehe ʻia ka papahana Mālama Hawaiʻi me ka hoʻolele pū i nā wikiō a nīnauele i nā ʻelele Mālama he ʻehā. Ua kaʻana ʻia ka mea nui o ka mālama i nā kamaʻāina, ke kūlana o ka papahana Safe Travels, a me nā ala like ʻole e mahalo ai nā malihini iā Hawaiʻi ma o ke kōkua a hoʻihoʻi. Ua komo he 500 ʻākena huakaʻi me 30 pakanā ʻoihana ma kēia hanana ʻīwā, a ua nānā he 108 hou ʻākena ma hope. Hiki ke nānā hou ʻia ka hanana ma travelagentcentral.com a i Iune. |
|
Ua kāpili pū ʻo HTJ i nā lepe unuhi ʻōlelo Kepanī ma ka wikiō Ahupuaʻa, i ʻike ʻia maʻō aku o ka hapa miliona manawa ma nā kau Hāʻulelau a Hoʻoilo.
Ke kōkua pū nei ʻo HTJ i ka paipai i ke kākoʻo i nā pāʻoihana kamaʻāina ma o ka hoʻolaha nui i ka ʻaha Made In Hawaiʻi Festival no kēia makahiki hou. |
|
|
Ua hana alu like ʻo HTC me ka hui mokulele Kanakā ʻo WestJet no ka hoʻolele i kekahi papahana hoʻonaʻauao alowelo ma nā kau Hāʻulelau a Hoʻoilo, e hāpai ana iā Hawaiʻi ma nā leka uila a ma nā kahua paʻa.
Ma ia papahana, ua hoʻolele ʻia nā wikiō Mālama Hawaiʻi ma ka lumi hoʻoluana a WestJet ma ke kahua mokulele o Calgary (YYC) a ma ko WestJet mau mokulele e lele ana i Hawaiʻi.
|
|
Ua mālama ʻo HTO i kūkākūkā ma Tāmaki Makaurau ma Kēkēmapa no nā ʻelele o ka ʻoihana huakaʻi a me nā ʻelele aupuni, i mea e hoʻomākaukau ai no ka makahiki 2022. He wā ia e launa hou ai nā ʻelele no ka nānā i mua, ʻoiai ʻo Aotearoa e manaʻo ana e wehe i ka ʻīpuka no ka huakaʻi kauʻāina ma ka hapahā mua o kēia makahiki. ʻO ke Kanikela ʻAmelika Sarah Nelson, nā ʻelele no Hawaiian Airlines me Air New Zealand, a me nā pakanā ʻoihana halekūʻai kekahi o nā ʻelele i komo i ia kūkākūkā. |
|
|
Ua hoʻokō aku nei ʻo HTK i papahana moʻolelo Mālama Hawaiʻi no ka hoʻonaʻauao i nā kupa Kōlea no ka waiwai o ka mālama. Ua komo nā moʻolelo i nā makakina paikini a nohona ʻo Vogue, Elle me Cosmopolitan; ka makakina huakaʻi ʻo National Geographic Traveler; a me ʻeono pāpāpaho ʻoihana huakaʻi kamaʻāina. No ka hoʻonaʻauao i ke anaina heluhelu no ka manaʻo nui o Mālama Hawaiʻi, ua nānā ʻia ka mahiiʻa, ka hoʻoikaika ululāʻau, ka mālama kaiaola, a me ka mahiʻai ō mau. He $200,000 ka waiwai o ia mau hoʻolaha.
Ua komo pū ʻo HTK i ka hana pūalu me Privia lāua ʻo Tidesquare no ka hoʻolele ʻana i kahi kuisa ma o ke kūlelepaho, i mea e hoʻonui i ka ʻike o ka lehulehu no ka mea nui o ka hōʻihi i ka moʻomeheu Hawaiʻi, ka mālama i ke kaiāulu, a me ka hoʻopakele i nā waiwai kūlohelohe.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
