“E ʻoni wale nō ʻoukou i kuʻu pono a ʻaʻole e pau.”



ʻO ia ihola nā ʻōlelo hope i manaʻo ʻia na Kamehameha I ma mua o kona hoʻi ʻana i ke ala hoʻi ʻole mai. Ma ka ʻike ʻia ʻo ia ka naʻi aupuni a aliʻi mua loa i noho iā Hawaiʻi Aupuni, ʻo Kamehameha kai hoʻolōkahi aku i ka pae ʻāina ʻo Hawaiʻi ma hope o kona hala ʻana ma ke aupuni, ke kau kānāwai i palekana ai ka ʻelemakule, luahine, a me nā keiki, a pēlā pū hoʻi ke kūkulu pilina me ko ʻEulopa a me ʻAmelika Hui Pū ʻIa. Ma ke kiʻi ʻana i nā pono hana a kuanaʻike hou, ua mole a kūpaʻa kāna hana i kona moʻomeheu Hawaiʻi ma ka hoʻoholo i nā mea i pono ai kona aupuni. E ʻoni wale nō kākou i kāna hana i hana ai. Ma ke Keʻena Kuleana Hoʻokipa o Hawaiʻi, ʻike ʻia ka hana e holo nei a mau ke kūpaʻa i ke kahua ʻo ke kumuwaiwai ao kūlohelohe, moʻomeheu Hawaiʻi, a me ka hokona alowelo e alakaʻi ana i ka hana e paʻa ai he ʻoihana hoʻokipa ō mau.

Hawaiʻi on the Hill 2023, i hōʻike ʻia na ke Keʻena Kuleana Hoʻokipa o Hawaiʻi e hōʻike ana i ke Akamai o Hawaiʻi i nā Alakaʻi Aupuni

Ua hoʻi ke Keʻena Kuleana Hoʻokipa o Hawaiʻi i Wakinekona D.C. no ka Hawaiʻi on the Hill 7, he papa hana he ʻehā lā ka lōʻihi i alakaʻi ʻia na ka pelekikena a luna hoʻokō o ka Chamber of Commerce a lālā o ka papa alakaʻi o ke Keʻena Kuleana Hoʻokipa o Hawaiʻi ʻo Sherry Menor-McNamara ma ka hana pū ʻana me ke Kenekoa o ʻAmelika Hui Pū ʻIa Mazie K. Hirono i mea e pili ai me nā mea kau kānāwai no ke koʻikoʻi o ko Hawaiʻi nei mau pāʻoihana, he alo a he alo. ʻO ka makamua kēia ma hope o ka maʻi ahulau i mālama ʻia ai ʻo Hawaiʻi on the Hill he alo a he alo. 

ʻAneʻane he 200 kānaka mai ʻō a ʻō o Hawaiʻi e kū ʻelele ana ma D.C., he kohu loa ka hoʻohanohano ʻana i ka Naʻi Aupuni – ka mea i lōkahi ai ʻo Hawaiʻi – ʻo Kamehameha I nō hoʻi ma ka hoʻohanohano ʻana i ka Lā Kamehameha ma ka Hale Kapikala o ʻAmelika Hui Pū ʻIa. Aia ma laila no ka hoʻolei ʻana aku he ʻelele o ke Keʻena Pāʻoihana, Hoʻomohala ʻOihana Hoʻokele Waiwai, a ʻOihana Hoʻokipa (DBEDT) a Keʻena Kuleana Hoʻokipa o Hawaiʻi ko ia keʻena Luna Hoʻokele James Tokioka. Ua hoʻomau ʻia ka pule ma ka Fireside Chat me ke Kenekoa Hirono, kekahi papa hana Workforce Insights no nā pāʻoihana o Hawaiʻi, a me kekahi ʻAhaʻaina Wehena i hāpai ʻia ai nā manaʻo no ko Hawaiʻi mau ālaina kūikawā. I mea e ʻike ai no nā nīnūnē koʻikoʻi no nā pāʻoihana o Hawaiʻi, ua mālama ʻia he ʻAha Kulekele i komo ai nā kānaka kau kānāwai, nā kānaka ʻike kulekele, a me nā lālā ʻAhaʻōlelo Lāhui. Ua hiki pū i nā lālā hōʻea ke mākaʻikaʻi aku i nā pāʻoihana like ʻole o D.C.

ʻO kekahi mea nui o ka hanana ka Taste of Hawaiʻi ma Capitol Hill, he hanana i mumulu ai ka 2,000 a ʻoi kānaka i hoʻonuʻu iho i nā hua a ke 30 a ʻoi pāʻoihana me ka hoʻonanea pū i ka leo nahenahe o Amy Hānaialiʻi he māhele o kāna huakaʻi hīmeni piha makahiki 25 o Pālehua. Ma ke ʻano he Hoa Kākoʻo, ua hiki i ke Keʻena Kuleana Hoʻokipa o Hawaiʻi ke kākoʻo ma ka halihali ʻia o ka 300 haneli a ʻoi pahu mai Hawaiʻi a Wakinekona D.C, e kōkua ana i nā pāʻoihana kūloko i hiki ʻole ke hōʻea kino mai. Ua makemake nui ʻia ke pākaukau a ko ke Keʻena Kuleana Hoʻokipa o Hawaiʻi Luna Hoʻokō Alowelo Kalani Kaʻanāʻanā a Manakia Alowelo ʻIwalani Kūaliʻi-Kahoʻohanohano, a me ko ke Keʻena Kuleana Hoʻokipa o Hawaiʻi lālā papa alakaʻi ʻo Mahina Paishon-Duarte ma ka loaʻa o nā hua Mauna Loa Macadamia, ka siriala Anahola a Kamuela Gourmet, a pēlā pū ke kipi Maebo’s One-Ton, me ka hiki ke kaʻana pū no ko ke Keʻena kūpaʻa i ka hāpai i nā pāʻoihana o Hawaiʻi a me ka holomua o nā Papa Hana Hoʻokō Hoʻokele Wahi Huakaʻi e paʻa ai kahi ʻoihana hoʻokipa ō mau. 

I kekahi ahiahi, ua mālama ʻia na ko ka DBEDT Luna Hoʻokele Jimmy Tokioka a Manakia Hoʻomohala Pāʻoihana Jamie Lum ʻo Kamaʻāina Career Connect, he papa hana hou e kālele ana i ka hoʻoulu limahana ma ka ʻenehana. Ma ke kōkua ʻo ka ʻenehana, hauʻoli mākou i ka hiki ke hoʻokuʻi me ka poʻe i hiki ʻole ke hōʻea mai ma o ka pāpaho i mālama ʻia na McKenna Maduli a me ka hoʻolele ʻīwā.

Hauʻoli mākou i ka hiki ke mālama iā Hawaiʻi on the Hill e kākoʻo ana i ka ulu o ko Hawaiʻi mau pāʻoihana e hōʻike ana i ke koʻikoʻi i ko ke aupuni mau alakaʻi. Kau ka manaʻo i kekahi hanana o kēia makahiki aʻe i ka wā e hiki ai ke hoʻohanohano i ke akamai o Hawaiʻi a me ke kahukahu i nā pilina waiwai.

Hoʻonaʻauao ko ke Keʻena Kuleana Hoʻokipa o Hawaiʻi i nā Hoa Kākoʻo a Pāpaho no ka Pae ʻĀina ʻo Hawaiʻi ma ka IPW 2023

Ua komo ko ke Keʻena Kuleana Hoʻokipa o Hawaiʻi ma ko ka U.S. Travel Association IPW 2023 ma San Antonio, Texas, mai nā lā 20-24 o Mei. Ma kona ʻano ʻo ia ka hanana kālepa nui loa o kona ʻano no nā wahi huakaʻi o ʻAmelika Hui Pū ʻIa e hui ai me nā hoa kākoʻo no ka huakaʻi kaumokuʻāina holo mai, ua piha ka ʻaha IPW 2023 i nā hana e komo ai ka poʻe me ka ʻike pū ʻia o ka heluna komo a ma kahi i kokoke i ka huinanui o ka wā ma mua o ka maʻi ahulau.

Ua komo ko ke Keʻena Luna Hoʻokaʻaʻike Kuleana Ākea Ilihia Gionson i ka ʻaha me ko ke Keʻena Kime Global Marketing, nā ʻelele Island Chapter, a me nā hoa kākoʻo he 18 o Hawaiʻi. Ua hui nā lālā kime me nā hoa kākoʻo ʻoihana hoʻokipa he 200 a ʻoi ma o nā hālāwai e hōʻike ana i ko ke Keʻena ʻoni ʻana e nānā i ka ʻoihana hoʻokipa ō mau, nā hana e paʻu ʻia nei ma ka mālama wahi huakaʻi, nā hana e kākoʻo ai nā malihini kipa, a me nā manaʻo hoʻokele Mālama Hawaiʻi.

Aia nō ke hoʻolālā ʻia nei ka IPW 2023 e mālama ʻia i Los Angeles mai nā lā 3-7 o Mei.

Hoʻolaha ʻia ka Papa Hana Noiʻi Hoʻokele Wahi Huakaʻi no Hāʻena

He laʻana kohu loa ka Pāka Mokuʻāina o Hāʻena ma Kauaʻi o ka papa hana alakaʻi a alu like na ke kaiaulu no ka hoʻokele wahi huakaʻi, a he mea hoʻi ia a ke Keʻena Kuleana Hoʻokipa o Hawaiʻi i kākoʻo ai no nā makahiki ʻehā i hala iho nei. Ma ka lā 8, ua komo pū ko ke Keʻena Luna Hoʻokaʻaʻike Kuleana Lehulehu Ākea Ilihia Gionson me ke Kiaʻāina Josh Green, ka Lunamakaʻāinana Nadine Nakamura, nā ʻelele mokuʻāina a kalana, Hui Makaʻāinana o Makana, The Hanalei Initiative, a me nā alakaʻi he nui wale o ka ʻaoʻao ʻākau e pūlima ai i ka pila a me ka hōʻike ʻia o ka papa hana noiʻi no Hāʻena, “The Transformation of Hā‘ena State Park: A Case Study on How to Manage a Visitor Hotspot.”

Ua ʻāpono ʻia ke Kānāwai 72 na ke Kiaʻāina Green e kia ana i ka hoʻokele i ka ʻoihana hoʻokipa ma ka ʻae kūikawā e hōʻalo nā limahana mālama wahi hoʻokū kaʻa a wahi kūʻai meaʻai i nā koina noi piki ma ka hana ma kekahi mau pāka mokuʻāina e like ala me Hāʻena.

Ua lawelawe ʻia kēia papa hana noiʻi na nā lālā kōmike i loaʻa kekahi komo ʻana ma ka Papa Hana Hoʻolālā Hikiāloa no ka Pāka Mokuʻāina o Hāʻena, ma ka hana pū ʻana me ke Keʻena Kuleana Hoʻokipa o Hawaiʻi a me ke Kauaʻi Visitors Bureau ma lalo o ke Kauaʻi Destination Management Action Plan. He kumuwaiwai ua papa hana noiʻi nei no ka poʻe e ʻimi ana i nā ala no loko o ke kaiaulu e hoʻokele ʻia ai ka mālama i ko kākou mau wahi, ʻo ia hoʻi nā kumuwaiwai ao kūlohelohe a moʻomeheu a me ka hoʻokāʻoi i ko lākou mau wahi e noho nei.

Hoʻohanohano Ko HTA I Ka Hoʻoilina Alakaʻi A Kamehameha I

He inoa no ka lani Kamehameha kapu aliʻi, he inoa, he inoa no Kamehameha.

No ke Keʻena Kuleana Hoʻokipa o Hawaiʻi ka hanohano ma ka hana pū ʻana me ke Keʻena Pāʻoihana, Hoʻomohala ʻOihana Hoʻokele Waiwai a ʻOihana Hoʻokipa ʻo ka hoʻolei aku i ka lei melia ma ka ʻAha Hoʻolei Lā Kamehameha i ka Poʻalima, lā 9 o Iune. Ma ka hahai ʻana i ke ala a Kamehameha i waele mua ai i mākaukau ʻo Hawaiʻi no ke ao ākea e loli mau ana, ʻimi ʻo DBEDT i ka hoʻokele waiwai kū i ka ʻimi ʻoi kelakela no ka pono o ko Hawaiʻi.

Na Ilihia Gionson i oli aku iā “ʻO ʻOe Ia E Kalaninuimehameha” i hoʻokupu, he oli e wehewehe ana i ke ʻano hoʻokipa o nā kupa iā Kaʻiwakīloumoku, ka mea hoʻi nāna i hoʻolōkahi i nā moku. Ma ke kahua o ke kuʻuna hoʻokipa Hawaiʻi ʻo HTA e hoʻokō ai i ka hana.

Ua kū ʻelele ʻo John De Fries, Kalani Kaʻanāʻanā, Daniel Nāhoʻopiʻi, Irina de la Torre, Micah ʻĀkau, Tyler Mejia, a me ka haku lei ʻo Robin Dolfo no The Pretty Plumeria ma kēia ʻaha hoʻohanohano.

Kākoʻo ke Keʻena Kuleana Hoʻokipa o Hawaiʻi he $3.78 Miliona i nā Papa Hana Kaiaulu, Hoʻolauleʻa, a Hanana mai ʻō a ʻō o ka Pae ʻĀina

Ma ke kūpaʻa i ke kākoʻo i ko Hawaiʻi mau kaiaulu, ua kākoʻo ke Keʻena he $3.78 miliona kālā e kākoʻo ana he 76 papa hana kaiaulu, hoʻolauleʻa, a hanana mai ʻō a ʻō o ka mokuʻāina ma lalo o kona papa hana Signature Events a Community Enrichment o ka MH 2023. Kia ua mau papa hana ʻelua nei ma ka hoʻoulu i ka mākaukau alakaʻi o ko Hawaiʻi nei poʻe kamaʻāina ma nā kaiaulu.

Ke hana pū nei ke Keʻena me ka Hawaiʻi Visitors and Convention Bureau a me nā Island Chapters e mālama ai i nā papa hana Signature Events a Community Enrichment. Ma ke kākoʻo ʻia na ke Keʻena, ua hoʻokohu ʻia he ʻelima hoʻolaukaʻi papa hana i ka mālama i nā ʻaelike – Christy Calabrese no Signature Events a me nā papa hana Community Enrichment o ka mokuʻāina, Michelle Pope ma Hawai‘i Mokupuni, Sumithra Balraj ma Maui, Taryn Pascua ma O‘ahu, a me Lani Kaui ma Kaua‘i.

Mai ka MH 2017 mai, ua kākoʻo ke Keʻena he $11 miliona a ʻoi ma ka 400 a ʻoi papa hana kaiaulu. No ka ʻike hou aku a me ka ʻike i nā hui i loaʻa ke kālā, e kōmi i ʻaneʻi.

Mālama ʻia na ko HTJ ka Hawaiʻi Expo 2023 i Tokyo

Ma ka mālama ʻia na Hawaiʻi Tourism Japan (HTJ), ua mālama ʻia ka Hawaiʻi Expo 2023 mai nā lā 27-28 o Mei i Tokyo. Ua mālama ʻia he hanana pāpaho hoʻolauna ma ka lā 26 o Mei e kono ana i nā hui pāpaho a kūlelepaho e komo i ka papa hana a hoʻolaulaha pū aku. Aia pū ma nā hanana o ka Hawaiʻi Expo 2023 nā papa hana Lā Mei—he mele a hula mai nā hoa kipa ʻo Robert Cazimero, Nina Keali‘iwahamana, Keauhou, a me ka Mike Aloha Hula 2023 ʻo Agnes Renee Leihiwahiwaikapolionāmakua Thronas Brown. Ua hoʻolele ʻīwā ʻia nā hōʻikeʻike ma mele.com.

Eia kekahi mau manaʻo nui o ka Hawaiʻi Expo 2023:

• Nui Kānaka Komo: 12,146
• Nui Hoa Komo: 53, a he 10 hui mokulele/hui hoʻolālā huakaʻi, 12 hōkele, 9 pāʻoihana kālepa huahana, 8 mea hōʻikeʻike, 4 pāʻoihana pili ʻaha male, a me ka ʻelua pāʻoihana meaʻai a meainu
• Ua hoʻolaha ʻia ka hanana ma ke kikohoʻe ma kahi kokoke i kahi Hoʻolulu o Shibuya a me Train Channel, nā papa kaumaka kaʻa hai, nā hoʻolaulaha kikohoʻe (ma SNS a me ka YouTube), kekahi papa hana Aloha Tokyo, a me ka hōʻailona kikohoʻe ma ke Kahua Meiji Jingu, a me ka Hoʻolauleʻa HawaiʻiTokyu Plaza, i loaʻa ai ka 37,419,926 pā ʻana.
• E hāʻawi manawaleʻa ʻia ka loaʻa mai ka pāʻani gacha — he 1,101,000 miliona yen — i kekahi hui kū i ka ʻauhau ʻole o Hawaiʻi.
• He 3,276,425 pā ʻana i loaʻa mai i ka hoʻolaha ʻana o nā mea kipa ma ka SNS #HawaiiExpo a me #FeelHawaiiInShibuya.
• He ʻumi papa hoʻonui ʻike moʻomeheu a papa hana haʻi ʻōlelo i mālama ʻia ma ka Expo i hōʻea ai ka 442 mea komo.

Ko HTJ Aloha Program

Ua hāʻawi manawaleʻa ke Aloha Progeam (he papa hana hoʻonui ʻike) he $3,000 pākahi i ka Hale Aliʻi ʻo ʻIolani, ka Hale Hōʻikeʻike ʻo Pīhopa, ka Polynesian Voyaging Society, Hawaiʻi Land Trust, Coral Reef Alliance, a me ʻImiloa Astronomy Center ma lalo o nā kāki lōpū a holomua. Ua hoʻokaʻaʻike ko ka HTJ i kēia mau hui kū i ka ʻauhau ʻole Aloha Program no ka haʻawina kālā manawaleʻa me ka manaʻo e mau pū aku ke kākoʻo.

Komo nā ʻĀhaʻilono no Kanakā i nā Hana Mālama ma Maui a ma Hawaiʻi Mokupuni

Ua mālama ʻia na ko Hawaiʻi Tourism Canada he huakaʻi pāpaho hoʻokamaʻāina i Maui a i ka mokupuni ʻo Hawaiʻi, mai ka lā 28 o Mei a i ka lā 4 o Iune, no ka ʻehā ʻāhaʻilono e kū ʻelele ana no Toronto a me Kanakā Komohana. E ʻike ʻia kā lākou mau moʻolelo no Hawaiʻi ma ke Calgary Herald, Range Magazine, Daily Hive, a me ka Montecristo Magazine. 

Ua kālele ka huakaʻi hoʻokamaʻāina i ka moʻomeheu Hawaiʻi a me ka papa hana Mālama Hawaiʻi. Ua hele nā ʻāhaʻilono i ka papa hana hana manawaleʻa Stewardship at the Summit o ka Pāka Aupuni Luapele Hawaiʻi, e waele ana hoʻi i ka ʻawapuhi komo hailapu i ke kakahiaka me ke aʻo pū i nā ala like ʻole e mālama ʻāina ai ka malihini kipa. Ua komo pū ua hui nei i ko ka Lahaina Restoration Foundation Hands-on History: A Mālama Hawaiʻi Program e hoʻonaʻauao ana no ka moʻolelo waiwai o Maui ma ka nānā i nā hua o ka wā i hala o ko Lāhainā moʻolelo.

Ua kālele kekahi huakaʻi hoʻolaukaʻi kālepa huahana huakaʻi i ka hōʻike i ka ʻoihana mahi ʻai o Hawaiʻi a me ke koʻikoʻi o ke kūʻai kūloko. Ua komo ka hui ma kekahi papa hana hoʻomoʻa kope ma Kona Joe Coffee me ke kipa pū iā Maui Kuʻia Estate e mākaʻikaʻi ai me ka ʻai kokoleka pū. ʻO kekahi mau mea ʻoi loa ke kilo hōkū ma ka Pāka Aupuni o Haleakalā me ke kipa pū i nā mākeke kaupokulani o Hilo a me Kona.

Mālama hou ʻia ka Month of Lei Destination Training no ka Manawa Mua Loa mai ka MH 2019

Mālama ʻia na Hawaiʻi Tourism Oceaniai (HTO), nā Island Chapters, a me Hawaiian Airlines ka Month of Lei — The Hawaiian Islands Destination Training ma Sydney ma ka lā 27 o ʻApelila.

Ua hiki i nā aʻoaʻo huakaʻi ke aʻo no ka pae ʻāina ʻo Hawaiʻi, Mālama Hawaiʻi, a me ka holomua o ko ke Keʻena Kuleana Hoʻokipa o Hawaiʻi mau Papa Hana Hoʻokō Hoʻokele Wahi Huakaʻi mai ka waha mai o nā hoʻolaukaʻi hoʻokele wahi huakaʻi ma ua hanana ʻaina awakea a aʻo pū. Ua hoʻomohala ʻia ua papa hoʻonui ʻike nei — ka Month of Lei mua loa a ko HTO e mālama ana mai ka MH 2019 mai — no ka hōʻike i ke aloha a ʻike me ka hoʻoikaika pū aku i ko Hawaiʻi kūpaʻa i ka mākeke Moananuiākea.

Ua hoʻomau ʻia ka papa hoʻonui ʻike Month of Lei ma Melbourne, Gold East, Brisbane, a me Auckland ma nā lā 1, 2, a 4 o Mei. Ua komo nui ʻia ua mau hanana nei i komo ai ke 35-50 aʻoaʻo huakaʻi ma kēlā me kēia. 

Ua mālama pū ʻia na ko HTO he lā pāpaho me nā Island Chapters ma Sydney nona nā ʻelele e hālāwai ana no nā nīnauele me Karryon, Travel Weekly, a me ka ʻāhaʻilono/mea hoʻopuka hualono ʻo Helen Hayes. Ma Melbourne, ua hui nā Island Chapters me Justin Jamieson, ka mea hoʻopuka iā get lost Magazine.

Hoʻolauna ʻia na Hana Card ka Papa Hana Mālama Hawaiʻi

Ma ka hahai i kekahi lauana i ʻike ʻia ʻo ka hoʻolilo kālā ʻana o nā mea no Kōlea ma ka ʻea kāki i ka wā e huakaʻi kaumokuʻāina ana, ua hana pū ʻo Hawaiʻi Tourism Korea me Hana Card — he pāʻoihana ʻea kāki no Kōlea nona ka 5.8 a ʻoi lālā — e hoʻolaha ai i ka papa hana Mālama Hawaiʻi. ʻO kekahi mau pōmaikaʻi a Hana Card e hoʻolako nei i nā mea iā ia ka ʻea kāki nā manaʻo aʻoaʻo huakaʻi Mālama Hawaiʻi a me nā kūʻai emi mokulele, hōkele, hanana, hale ʻaina, kikowaena kūʻai, a nui hou aku ma Hawaiʻi. Aia nō ʻo Hana Card ke hokona nei ma ke kūlelepaho a pāpaho i uku ʻia, a pēlā nō nā hoʻolaulaha wikiō a paia kūwaho o Hana Financial Group.

Komo ko ka HTC i ka ʻAha Hōʻikeʻike U.S. Travel and Tourism ma Beijing

Ua komo ʻo Hawaiʻi Tourism China (HTC) i ka ʻAha Hōʻikeʻike U.S. Travel and Tourism i Beijing ma nā lā 11-12 o ʻApelila. Ua hōʻike ʻia ma kekahi pāʻina B2B Travel and Tourism he 16 pāʻoihana a hui huakaʻi a ʻoihana hoʻokipa — ʻo HTC pū kekahi — e hōʻike ana i ka ʻike huakaʻi koʻikoʻi i ke 50 a ʻoi limahana no nā hoa kākoʻo huakaʻi no Kina, ka hui IPW 2023, a me nā alakaʻi pū kekahi. 

Ma hope o ka pāʻina, ua hoʻolaha ʻia ma ka hua kūlelepaho a ke Keʻena Kuhina o ʻAmelika Hui Pū ʻIa nā manaʻo nui o ia hanana, he hua kūlelepaho e ana ana i ka manaʻo o nā kupa o Kina no nā wahi kohu loa a lākou e makemake ana e huakaʻi ma ʻAmelika Hui Pū ʻIa, a me kekahi hua kūlelepaho ma ka Twitter na ka ʻElele Aupuni o ʻAmelika Hui Pū ʻIa iā Kina Nicholas Burns nona ka manaʻo #ReconnectWithUS. Ua ʻike ʻia nā hua kūlelepaho he ʻaneʻane he 500,000 manawa, a he 3,700 pā ʻana mai ka Weibo, WeChat, a me ka Twitter. Ua loaʻa mai he 2.4 miliona pā ʻana i ka manaʻo #ReconnectWithUS.

Ua mālama ʻia ma ka lā ʻelua o ka hanana he seminā huakaʻi a ʻoihana hoʻokipa i ke kakahiaka i mālama ʻia na U.S. Commercial Service Beijing i hui pū ai he 30 ʻelele kālepa a huakaʻi no Kina mai ka 19 hui huakaʻi Kina e kālele ana i ka ʻoihana hoʻokipa o ʻAmelika Hui Pū ʻIa. He 15 puni hālāwai pākahi me HTC a me nā pāʻoihana huakaʻi a ʻoihana hoʻokipa. Ua mālama ʻia he hōʻikeʻike i ka ʻauinalā i ke 80 limahana no China CYTS Tours, kekahi o nā hui huakaʻi Kina alakaʻi e kālele ana i nā pāʻoihana ʻoihana hoʻokipa o ʻAmelika Hui Pū ʻIa. Ua hōʻike ʻo HTC i ka ʻike laulā i ko CYTS no ka Pae ʻĀina ʻo Hawaiʻi, ka ʻikepili mokulele, a me ka ʻīkoi o Mālama Hawaiʻi.

E heluhelu i nā moʻolelo hou no ka hoʻoholomua i ka hoʻokipa hoʻoulu hou ma holomua.hawaiitourismauthority.org.