Manaʻo Wehe Na Ko
HTA Pelekikena A Luna Hoʻokele John De Fries
|
|
Mōhala i ka wai ka maka o ka pua.
ʻŌlelo Noʻeau #2178
E like me nā pua, mōhala mai nā kānaka ma kahi e kūpono ai ka nohona. Ahuwale pū ka mōhala mai o kānaka ke alu like ma kekahi kumuhana nui o kona waiwai.
ʻO nā Waiwai Kūlohelohe kekahi o nā kūkulu ʻehā o ko HTA Papahana Hoʻokele. ʻO kā mākou hana alakaʻi ma ka ʻoihana hoʻokipa a me ke kākoʻo pū i nā alakaʻi o ke kaiāulu, ʻo ia ko mākou ʻimi i ka hoʻōla hou i nā kumu e ola ai kākou.
|
|
KE KŪKULU MOʻOMEHEU HAWAIʻI |
|
Ke Kākoʻo I Ka Hana Hoʻokikohoʻe Nūpepa Hawaiʻi A Ka Hale Hōʻikeʻike ʻO Pīhopa
Ke mau nei ka hana hoʻokikohoʻe nūpepa Hawaiʻi kahiko a ko mākou mau hoa ma ka Hale Hōʻikeʻike ʻO Pīhopa, a ua hoʻokipa iho nei lākou i ka Lunamakaʻāinana Ed Case no ka hōʻike i kā lākou hana. Ua kaʻana ʻo Lunamakaʻāinana Case i kona kuana ʻike no ka mea nui o ka hoʻokikohoʻe ʻana i nā nūpepa Hawaiʻi kahiko.
Ua ili iho nei kahi momi makamae ma kekahi pukana o ka nūpepa Ka Elele Poakolu. Ma laila i ʻike ʻia kahi mele i haku ʻia paha e Kalākaua (ma lalo o ka inoa T. Affy) no ka nui hana e pono ai ka hoʻopuka nūpepa.
Eia kekahi momi i waena o nā pukana nūpepa he nui e hoʻokikohoʻe ʻia nei: ʻo Ke Au Hou, he kia i ka wā e hiki mai ana, e like me kona inoa. Ma ka ʻaoʻao mua i hoʻohanohano ʻia ka Hale Hōʻikeʻike ʻO Pīhopa iho nō, ʻo ia kekahi o nā hale pōhaku mua o ia wā, wahi a ka moʻolelo. Ma kēia pāhana e hoʻōla hou ʻia nei ke ʻano ʻimi ʻoi kelakela o kahiko, ma ka hoʻopakele ʻana i ka ʻike kuʻuna me ka ʻenehana hou.
|
|
Kūkākūkā ʻO HTA I Ko Mākou Kuleana Ma Ko KHON2 “Aloha Authentic”
Ua kūkākūkā ko HTA Luna Alowelo ʻo Kalani Kaʻanāʻanā me Kamaka Pili ma ko KHON2 “Aloha Authentic” no ka ʻoihana hoʻokipa a me ko mākou kuleana ma ia ʻoihana no ka ʻāina aloha me ke kaiāulu.
No Kalani, ua ili ke kuleana ma luna ona ma kona one hānau ʻo Kailua, me ka hānai ʻia ma ia ʻāina e pā mau nei i ka ʻoihana hoʻokipa a hiki i kēia lā. Ua kupu aʻe ka ʻiʻini i loko ona e komo i ka ʻimi hāʻina, a ua pōmaikaʻi ʻo ia i ka hiki ke alakaʻi i ia ʻimi hāʻina ʻana.
|
|
KE KŪKULU WAIWAI KŪLOHELOHE |
|
Ka Mālama I Ka Wai O Oʻahu
ʻO ka wai maʻemaʻe kekahi o nā pōmaikaʻi nui loa o ke ao, a he momi makamae o Hawaiʻi – ʻāina o ka wai ola.
Ke makaʻala nei ʻo HTA i ka pilikia ma Oʻahu ma Kapūkakī (ka inoa kupuna o Red Hill), ke kūkākūkā mau nei me nā alakaʻi mokuʻāina a kalana, a e mālama ana i ke kaʻaʻike i waena o ka ʻoihana hoʻokipa me nā mea e alakaʻi nei i ka pane.
He koi ka mālama iā kākou pākahi e hoʻopakele i ka wai no ko kākou ola pono, a no ke ola pono o nā hanauna e hiki mai ana.
Ma loko nō o ka holo pono o ka ʻōnaehana wai a ke kalana i kēia manawa, ke paipai nei ka ʻOihana Wai O Honolulu i ka makaʻala i ka hoʻohana i ka wai. ʻO mākou pū kekahi ma ia paipai ʻana i ka ʻoihana hoʻokipa e hoʻēmi i ka hoʻohana ʻana i ka wai. Ke paipai nei mākou i nā malihini kekahi e koho pono no ka mālama i ka wai.
E mālama i ka wai.
|
|
IMEX ʻAmelika 2021
Ua hoʻolauleʻa ka ʻoihana hālāwai me ka hui Meet Hawaiʻi i ka hoʻi ʻana o ka ʻaha IMEX ʻAmelika 2021, ka ʻaha nui loa no ka ʻoihana hālāwai. I waena o nā lā 9 me ka 11 o Nowemapa ma Las Vegas, ua hoʻākoakoa ʻia he 4,200 mea kūʻai mai 155 ʻāina e kū ʻelele ana no nā māhele like ʻole o ka ʻoihana hālāwai.
Ma nā lā ʻekolu o ia ʻaha, ua piha ko Meet Hawaiʻi pā hōʻikeʻike i ka paipai ʻana iā Hawaiʻi ʻo ia kahi maikaʻi no nā hālāwai. Ua hui nā lālā Meet Hawaiʻi he 10 me nā pakanā ʻoihana he 32 me nā mea kūʻai ma nā hālāwai he 687. No ka nui o ia mau mea kūʻai, ua hoihoi i ka hoʻopaʻa i nā hālāwai kikoʻī – he 100 hālāwai ka nui i paʻa iā Meet Hawaiʻi.
I mea e kaʻana aku i ka ʻono o ka ʻāina nei me ka hāpai pū i nā hua ʻoihana kamaʻāina, ua hānai ʻia nā hoakipa e Meet Hawaiʻi me nā mea ʻono like ʻole a Hawaiian Pie Company. Ma ka lā ʻelua, ua mālama ʻia he pāʻina pau hana e Marriott Hawaiʻi, pau pū me ka hoʻolei ʻia o nā hoakipa.
I mea e pakele ai nā hoakipa ma kēia wā maʻi ahulau, ua koi ʻia ka lāʻau koʻokoʻo no nā kānaka a pau i komo iā IMEX ʻAmelika 2021.
|
|
Ka Launa Kikohoʻe Hāʻulelau Me Nā Pāpāpaho
Ua mālama ko HTUSA māhele ʻoilaulaha i mau hālāwai kikohoʻe me nā pāpāpaho pae kiʻekiʻe he 20 ma Nowemapa. Ua kūkākūkā ʻia ka huakaʻi makaʻala, ka papahana Mālama Hawaiʻi, a me nā Papahana Mālama ʻĀina Hoʻokipa. Ma ke kū i ka manaʻo mālama, ua kākoʻo ʻo HTUSA i ke kanu ʻia o nā kumu ʻulu i mea e mahalo i nā pāpāpaho no ke komo i ia mau hālāwai.
|
|
Piʻi Ka Hoi Huakaʻi A Nā Kupa ʻAmelika
Ke piʻi nei ka hoi i ka huakaʻi hele ma ʻAmelika ma 2022 me ka nui aʻe o nā huakaʻi i nā ʻāina like ʻole. He piʻi koke nō paha ko kēia hoi, me ka makaʻala naʻe i ka holo o ka maʻi ahulau a me ka nele i ke kālā ʻole. Ma ke anamanaʻo, ua hāpai ʻia ʻo Florida, New York, Las Vegas, California, Hawaiʻi me Texas ʻo ia nā makakoho o nā kupa ʻAmelika e huakaʻi ana. No ka 23.6 pākēneka o nā kupa ʻAmelika e huakaʻi ana, ke manaʻo nei e holo i ka huakaʻi ʻāina ʻē kekahi ma 2022.
Kumu: Destination Analysts Wave 79, 24-26 Nowemapa 2021
|
|
JATA Online Travel Mart (ʻOihana Huakaʻi)
No ka makahiki ʻelua, ua komo ʻo HTJ i ka papahana Online Travel Mart a ka Japan Association of Travel Agents. Ma ka lā 9 o Nowemapa i hōʻikeʻike ai ʻo HTJ i ka nūhou no Hawaiʻi, ke kiʻina hoʻokipa hoʻoulu hou, a me ka papahana hoʻihoʻi hoʻokipa. Ua maliu he 900 lālā ʻoihana i ka hōʻikeʻike.
Ma luna aʻe o kēlā, ua noho pākahi ʻo HTJ me 30 ʻākena i hoʻolauna ʻia me 30 pakanā ma Hawaiʻi, e like me nā hōkele, hanana, a kikowaena kūʻai.
|
|
Ka ʻAha Made In Hawaiʻi
I mea e paipai i nā hua o nā pāʻoihana o Hawaiʻi, ua hana alu like ʻo HTJ me ka ʻaha Made In Hawaiʻi i mālama ʻia mai ka lā 10 a i ka 13 o Nowemapa ma ke kikowaena kūʻai ʻo Ala Moana. Ma hope o ka hoʻolaha i 700 pāpāpaho ma Iāpana, ua hoʻolaha ʻia e 60 a ʻike ʻia nā moʻolelo e 5.1 miliona kanaka. Ua nānā ʻīwā ʻia ka ʻaha e 4,500 kanaka.
Ua paʻi wikiō pū ʻia ka ʻaha me ka nīnauele pū i nā kālepa he 15 no ka hōʻike i ka ʻaha a me ka paipai i nā hua hana o nā pāʻoihana kamaʻāina. He hoʻokuʻu mai koe o ka wikiō.
|
|
Hōʻikeʻike Hoʻokipa Hoʻoulu Hou
Ma Nowemapa i mālama ai ʻo HTJ i mau haʻiʻōlelo a hōʻikeʻike pili i ka hoʻokipa hoʻoulu hou ma o ka hāpai ʻana i nā hanana Mālama Hawaiʻi. Ma ʻō aku o ko JATA Online Travel Mart, ua hoʻākoakoa ʻo HTJ i ʻewalu hui ʻana me nā hui hokona, nā hui huakaʻi hoʻonaʻauao, nā pāʻoihana, a me ka hui ʻōpio POOLO, he 600 ka nui kānaka e aʻo ana no ke aukahi Mālama Hawaiʻi.
|
|
Nā Kulekele Huakaʻi Kanakā
I mea e hoʻēmi i ka holo ʻana o ka mana Omicron, ma ka lā 8 o Kēkēmapa i hoʻi ai ʻo Kanakā i ka hōʻoia i ka polapola o ka mea huakaʻi ma kona hōʻea i Kanakā, ma waho aku o nā mea hōʻea mai ʻAmelika mai. Pono e hōʻoia i ka ʻole o ka maʻi ma ka hōʻea ʻana, a hoʻokaʻawale a i ka hoʻi ʻana mai o ka hopena.
He koina kēia ma luna o ka hōʻike polapola PCR he 72 hola ma mua o ke kau ʻana i ka mokulele i Kanakā.
Ke makaʻala nei ʻo Kanakā i ʻumi ʻāina no ka laha o ka mana Omicron i laila: ʻo Egypt, Malawi me Nigeria nā ʻāina hou loa i hui pū me South Africa, Lesotho, Botswana, Zimbabwe, Mozambique, Namibia me Eswatini.
|
|
Hoʻomaka Ka Lele ʻAna I Waena O Montréal Me Honolulu
Ma ke ahiahi o ka lā 8 o Kēkēmapa i hoʻolaha ai ʻo HTC i ka hoʻomaka ʻana o ko Air Canada lele i waena o Montréal me Honolulu ma ka lā 11 o Kēkēmapa.
Me ke kākoʻo o ka hui mokulele i hoʻākoakoa ai ʻo HTC i nā lālā o ka ʻoihana huakaʻi me ka pāpaho no ka pāʻina Hawaiʻi e laha ai ka nūhou, me ka hōʻikeʻike pū no nā mokupuni o Hawaiʻi a me ka ʻike no ke ala mokulele hou. He hoʻopili kēia ala mokulele iā Hawaiʻi me ka ʻaoʻao hikina o Kanakā ma o ka hoʻokuʻi ʻana iā Québec a me nā mokuʻāina o ia ʻaoʻao.
|
|
No Hawaiʻi Ka Hoʻokipa Ma Ka ʻAha ʻOihana Nūhōlani
Ua hana alu like ʻo HTO me Hawaiian Airlines me Norwegian Cruise Lines ma Sydney ma ka lā 30 o Nowemapa no ka mālama i ka ʻaha “Still Standing Celebration” a Travel Daily, ka makakina huakaʻi nui loa o laila.
Piha ka hanana i ka 400 lālā o ka ʻoihana huakaʻi, he hanana e hāpai ana i ke ō mau o ka ʻoihana i loko nō o ka wā kūlanalana e holo nei. Me ke kāmau o ke kīʻaha i mahalo ʻia ke kāmau o ke ʻano huakaʻi a nā kupa o Nūhōlani.
Ua hoʻokipa ʻia nā lālā me ka lei ma mua o ka hoʻolana ʻia o ka naʻau me nā haʻiʻōlelo, a ua eo i kekahi lālā pōmaikaʻi ka makana nui – he huakaʻi i Hawaiʻi na Hawaiian Airlines, NCL, a me ka Waikīkī Beachcomber by Outrigger. Ua makana pū ʻo HTO i huakaʻi Mālama ʻĀina he ʻelua hola ma Kualoa Ranch, he pakanā o ko Outrigger papahana Mālama Hawaiʻi.
|
|
ʻIke Kino Nā ʻĀkena I Ka Papahana Mālama Hawaiʻi
Me ka hoʻi ʻana o Korean Air i ka lele i Hawaiʻi ma Nowemapa, ua huakaʻi ʻo HTK i Hawaiʻi Mokupuni me Oʻahu mai ka lā 14 a i ka 19 o Nowemapa me nā ʻākena nui ʻeiwa a me ka ʻelele no Korean Air no ka paipai i ka huakaʻi ʻana i Hawaiʻi. Ua hoʻolālā ʻo HTK me nā keʻena mokupuni i nā hana Mālama Hawaiʻi e like me ka mālama ululāʻau ma Waikoloa, ke kanu kumulāʻau ma Gunstock Ranch, a me ka ʻohi ʻōpala ma Waikīkī.
|
|
Komo ʻO HTK Me Hawaiian Airlines I Ka Paipai Ma 11th Street
Ma Kēkēmapa, ke hana alu like nei ʻo HTK me Hawaiian Airlines ma ka paipai huakaʻi i Hawaiʻi ma 11th Street, ʻo ia ka halekūʻai kikohoʻe nui ma Kōlea, he lālā o Amazon.com. Ma ia paipai ʻana e kaʻalike ʻia ka ʻike no Mālama Hawaiʻi a me nā mokupuni a pau kahi e lele ai ʻo Hawaiian Airlines. Ke kūʻai ʻia ke kikiki Hawaiian Airlines, e makana ʻia ke likiki KRW50,000 a me ka likiki hoʻēmi 11% no nā hōkele ma Hawaiʻi.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
