ʻO ka manaʻo o ka huaʻōlelo ʻo kūʻonoʻono, he lawe a hohonu, e kālele ana i ke ʻano e hoʻohana ʻia ai ka ʻike a walea ma nā pōʻaiapili a pau. Ma luna o ke kahua o ka manaʻo hoʻokele ʻoihana hoʻokipa hoʻoulu hou e hoʻoholomua ʻia kā mākou Papa Hana Hoʻolālā Hikiāloa 2020-2025 no ka hoʻokele wahi huakaʻi a hoʻonaʻauao mea kipa ma ka hana pū ʻana me nā kaiaulu ma kēlā me kēia mokupuni. E mau ka lawe i ka maʻalea a kūʻonoʻono i ola ehuehu mau nā pilina me ka poʻe, ka wahi, a me ke kuleana.

Ma ka lā 10 o Malaki, ua mālama ʻia ka Lā ʻOihana Hoʻokipa ʻeono ma ke Kapikala na ke Keʻena Kuleana Hoʻokipa o Hawaiʻi, Hawaiʻi Lodging and Tourism Association, Council for Native Hawaiian Advancement, Hawaiʻi Visitors and Convention Bureau, a me ka Native Hawaiian Hospitality Association. Ua pani ʻia ka hanana na ke Keʻena Kuleana Hoʻokipa o Hawaiʻi e haʻaheo ana i nā hana o ka ʻoihana i hōʻike ʻia ma ia lā, i kālele i ka hōʻike i ka pā o ka ʻoihana hoʻokipa o Hawaiʻi me nā hui kū i ka ʻauhau ʻole o ke kaiaulu e hana ana me nā lāhulu komo hailapu, ka hoʻomau moʻomeheu, nā pāʻoihana nui, mahi ʻai, mea hana lei, puʻukani, ʻōlapa hula, a me nā alakaʻi o ka ʻoihana pū kekahi.

Ua komo piha nā ʻelele o nā hui he lehulehu wale i komo i ka hanana Lā ʻOihana Hoʻokipa ma ka hoʻonaʻauao i nā kiʻi maka nui o ke aupuni a lunamakaʻāinana no ka hana e hana ʻia ana e pā ai ka hoʻokele wahi huakaʻi, ka ʻoihana hoʻokele waiwai kūloko, a me ka wā e hiki mai ana no Hawaiʻi. Mahalo i nā limahana a mea hana manawaleʻa i kākoʻo i ka Lā ʻOihana Hoʻokipa ma ke Kapikala i puka pono ai kona hua.

 

Mau nō ke aʻa ʻo HTA i ka hana alu like me ka ʻAhaʻōlelo Mokuʻāina o Hawaiʻi no ka hoʻoholomua i ka Papa Hana Hoʻolālā Hikiāloa 2020-2025, nā Papa Hana Hoʻokō Hoʻokele Wahi Huakaʻi o kēlā me kēia mokupuni, a me ka hana nui o ka hoʻokaualewa i ka pono o ke kaiāulu me nā pōmaikaʻi o ka ʻoihana hoʻokipa malihini.

 

Ke makaʻala nei mākou i nā pila pili iā HTA, ka hoʻokipa malihini hoʻoulu hou, ka hoʻopakele i nā waiwai kūlohelohe, ka ʻoihana mahiʻai, a me ka hoʻomalu i nā wahi e noho ai ka malihini. He paipai kēia i ka ʻoihana a me ke kaiāulu e komo pū i ka hana a ka ʻahaʻōlelo ma o ka hōʻike i kou manaʻo.

 

Hoʻāhu ʻia nā manaʻo hōʻike a HTA i ka ʻahaʻōlelo ma ke kahua paʻa pūnaewele: www.hawaiitourismauthority.org/what-we-do/tourism-policy/2023-hta-testimony-state-legislature/.

Ke mau nei ko ke Keʻena Kuleana Hoʻokipa o Hawaiʻi kākoʻo a ʻāwili ʻana i nā Manaʻo Hoʻokele ʻĀina Aloha Economic Futures ma nā hana o kēlā lā kēia lā e paʻa ai he nohona mauō i ka wā e hiki mai ana. He koʻikoʻi ka ʻāwili ʻana i ka ʻĀAEF ma kā mākou hana i ka ʻoihana hoʻokipa mauō e kūlia ʻia ana a no ke kū i ka Papa Hana Hoʻolālā Hikiāloa 2020-2025 a me nā Papa Hana Hoʻokō Hoʻokele Wahi Huakaʻi. Mai ka wā i kākoʻo kūhelu ʻia ai ka ʻĀAEF e ka Papa Alakaʻi o ke Keʻena Kuleana Hoʻokipa o Hawaiʻi ma Iune 2020, ua ʻāwili ʻia kona iwi ma ka ʻōnaehana hoʻopaʻa kālā ma ka ʻāwili ʻana i nā manaʻo hoʻokele i ke ʻano e loiloi ʻia ai nā lawelawe e ʻimi ʻia ana ma lalo o ke Keʻena Kuleana Hoʻokipa o Hawaiʻi. Ma ka hana ʻana pēlā, hōʻoia ʻia ke kū o nā kānaka e hai ʻia ana a me ka hana e pili pū ana. Eia hou, ke hoʻomohala ʻia nei he Kūkohu Loiloi Papa Hana i mea e ʻike ʻia ai nā hopena hikiāpoko a hikiāloa ʻĀAEF a me nā ana puka a me ka mālama pū ʻana he anamanaʻo e hoʻokolo ʻia ai ka hoihoi no nā papa hana o ka wā e hiki mai ana. Paipai mākou i ka ʻoihana hoʻokipa a me nā hui ʻē aʻe e aʻo hou no ka ʻĀAEF a me ka hoʻohana i kona mea hoʻokolo loiloi ma www.ainaalohafutures.com.

I kēlā me kēia lā 26 o Malaki, hoʻohanohano ʻia e ko Hawaiʻi ka lā hānau a hoʻoilina a ke Kamāliʻi Kāne Jonah Kūhiō Kalanianaʻole. ʻO kona inoa ʻo Kalanianaʻole, he lani ana ʻole, ua ʻauamo nō ke Kamāliʻi Kāne Kūhiō i kona kuleana he alakaʻi lawelawe i kona aliʻi a me kona poʻe. No ia kumu ʻo ia i kapa ʻia ai ʻo ia ke Aliʻi Makaʻāinana. Ma hope o ka hoʻokahuli hewa ʻia o ke aupuni Hawaiʻi, ʻo ia ka mea i komo ai ʻo ia i ka politika — ua noho ʻelele ʻo ia ma Wakinekona D.C., he ʻelele kelikoli no Hawaiʻi ma ka Hale o nā ʻElele ma ka ʻAhaʻōlelo Nui no ka 10 puni o ka ʻelua makahiki, mai ka MH 1903 a i kona hala ʻana i ka lā 7 o Ianuali, MH 1922. Ua hoʻokumu hou ke Kamāliʻi Kāne Kūhiō i ka Papa Aliʻi o Kamehameha I i ka MH 1903, ka Hui Kīwila Hawaiʻi i ka MH 1918, a me ka hōʻoia pū ʻana i ka pūlima ʻia o ke Kānāwai ʻĀina Hoʻopulapula Hawaiʻi i ka MH 1921. Ma mua o ka puka ʻana o ka HHCA, ua kākau ke Kamāliʻi Kāne Kūhiō i nā Kenekoa o ʻAmelika Hui Pū ʻIa, “After extensive investigation and survey on the part of various organizations organized to rehabilitate the Hawaiian race, it was found that the only method in which to rehabilitate the race was to place them back upon the soil.” Pēlā nō hoʻi kāna hana. ʻO ko ke Kamāliʻi Kāne Kūhio kūpaʻa ʻana i ka pono no ko Hawaiʻi, a keu aku ma ka wā loli o ka politika, ka mea e hōʻoia ana i ke kuleana o ke Keʻena Kuleana Hoʻokipa o Hawaiʻi ma ka hoʻokele wahi huakaʻi. ʻO ke kaiaulu ka mole o Hawaiʻi, a ʻo ia nō hoʻi ka ʻoihana hoʻokipa. ʻIke nō hoʻi ke Keʻena Kuleana Hoʻokipa o Hawaiʻi i ia koʻikoʻi.

Ua hoʻolaha iho nei ke Keʻena Kuleana Hoʻokipa o Hawaiʻi i ke kahuapaʻa Holomua, he kahuapaʻa e kaʻana ʻia ai ka nūhou a holomua no nā Papa Hana Hoʻokō Hoʻokele Wahi Huakaʻi o nā kaiaulu. ʻO ka holo ʻana i mua ka manaʻo o holomua. Kūpaʻa ke Keʻena Kuleana Hoʻokipa o Hawaiʻi i ke ola o ia manaʻo ma ka hoʻoholomua ʻana i ka hana pū ʻana me ka ʻoihana, ke kaiauu, a me nā pae like ʻole o ke aupuni, me ke kahukahu pū ʻana he ʻoihana hoʻokipa mauō e hoʻomakakoho ana i ke ola pono o ko Hawaiʻi mau kaiaulu.

He kumuwaiwai maikaʻi ke kahuapaʻa Holomua no ka lehulehu e aʻo ai no nā papa hana a hana a ke Keʻena Kuleana Hoʻokipa o Hawaiʻi e ʻauamo nei a me nā mea e mālama ʻia ana ma ka hana pū ʻana me nā hui mokuʻāina, nā kalana o nā mokupuni ʻehā, nā hui hoʻokipa, nā hui kaiaulu, a me nā hoa kākoʻo ʻē aʻe e hoʻokele kūpono ʻia ai ka ʻoihana hoʻokipa. Ke paneʻe aku nei ko ke Keʻena Kuleana Hoʻokipa o Hawaiʻi i ka mahalo i nā manakia wahi huakaʻi ma kēlā me kēia kalana mokupuni i koʻikoʻi i ka holo o ka holomua hoʻokele wahi huakaʻi. Nui ka mahalo i ka hana nui ma ke kaʻana kūmau ʻana aku i ia hana me ke kaiaulu ma o ke kahuapaʻa Holomua.

E aʻo hou no ka holomua ma ka hoʻokele wahi huakaʻi ma ke kipa i ke kahuapaʻa Holomua ma holomua.hawaiitourismauthority.org.

Ua komo pū ko ke Keʻena Kuleana Hoʻokipa o Hawaiʻi Manakia Alowelo ʻo Maka Casson-Fisher a Manakia Hoʻokele Wahi Huakaʻi no Maui Nui ʻo Meagan DeGaia me nā mea noho o Molokaʻi no ka Fea Kumuwaiwai no ke Kaiaulu o Molokaʻi, i mālama ʻia ma ke Kikowaena Kaiaulu Lanikeha ma Hoʻolehua ma Malaki 18. Ua hōʻike ke kime i nā kumuwaiwai i noa iā lākou, ka Papa Hana Hoʻolālā Hikiāloa 2020-2025, nā papa hana kaiaulu, a me nā DMAP. Ua hōʻike pū ke kime i ka nūhou no ka Molokaʻi Taskforce a me nā hālāwai e hiki mai ana. Ua hōʻea pū ko Hawai‘i Hope Kiaʻāina ʻo Sylvia Luke, ka ʻelele ʻAhaʻōlelo Nui ʻo Jill Tokuda, ko ke Kalana o Maui Meia Richard Bissen, a me ke Kenekoa Mokuʻāina ʻo Hawaiʻi, Luna Hoʻomalu o ke Kōmike Ikehu, Hoʻomohala Hoʻokele Waiwai, a ʻOihana Hoʻokipa a mea noho o Hoʻolehua ʻo Lynn DeCoite.

Ua mālama ʻia ka hālāwai he 36 a ka ʻAha Noʻeau a Moʻomeheu Pākīpika (CPAC) mai nā lā 14-17 o Malaki ma ko ka East-West Center Kikowaena ʻAha Kauʻāina Imin, i hui ai nā ʻelele mai nā ʻāina he 32 mai ʻō a ʻō o ke kaiaulu Pākīpika no ka hoʻoholo i nā hana hoʻomākaukau no ka Hoʻolauleʻa Noʻeau a Moʻomeheu Pākīpika 13, e mālama ʻia ma Hawaiʻi i kēia makahiki aʻe. Ua komo ko ke Keʻena Kuleana Hoʻokipa o Hawaiʻi Luna Alowelo ʻo Kalani Kaʻanāʻanā ma kona ʻaoʻao ʻo ia ka luna hoʻomalu o ko ka hoʻolauleʻa komikina a ma ke kākoʻo i ka Luna Hoʻomalu e kū nei o ka CPAC ʻo ke Kumu Hula Māpuana de Silva. Ua kūkā ʻia nā kumuhana ma ka holo ʻana o nā lā ʻekolu i hui ai, ua mālama ʻia he ʻahaʻaina i mālama ʻia na ke Kiaʻāina Josh Green ma Wakinekina Hale, a ua mālama pū ʻia he ʻeono kipa honua ʻana no ka Hoʻolauleʻa Noʻeau a Moʻomeheu Pākīpika 2023 — ʻo kekahi o ia mau wahi ke Kikowaena Hālāwai o Hawaiʻi. ʻO kekahi ʻīkoi nui o nā kūkā ʻana o ka CPAC ke ala e hiki ai i ka poʻe ʻōiwi ke hoʻomau i ka hoʻoikaika i ka leo Pākīpika ma ka honua. Lana ka manaʻo o ke Keʻena Kuleana Hoʻokipa o Hawaiʻi i ke kaʻana hou no ka Hoʻolauleʻa Noʻeau a Moʻomeheu Pākīpika o Hawaiʻi o kēia makahiki aʻe ma nā māhina e waiho nei i mua.

Ua kākoʻo piha ke Keʻena Kuleana Hoʻokipa o Hawaiʻi i ka Hoʻolauleʻa o Honolulu he 27 a me ona mau hoa kākoʻo ma ka pahuhopu ʻo ka hoʻokipa ʻana i nā kamaʻāina a mea kipa e ʻike kino i nā moʻomeheu like ʻole o Hawaiʻi a me ka Pākīpika. No ka mālama ʻia o ka hapa nui o nā hanana ma ke Kikowaena Hālāwai o Hawaiʻi, ua ʻike nā mea komo i nā hōʻikeʻike meaʻai o nā ʻano like ʻole, nā hōʻikeʻike hana noʻeau, a me nā hōʻikeʻike moʻomeheu mai nā mea hana noʻeau, puʻukani, a mea hula o ka Pākīpika ma ka holo ʻana o ka hanana he ʻekolu lā ka lōʻihi, mai nā lā 10-12 o Malaki. Hoʻohanohano ʻia ma ka Hoʻolauleʻa o Honolulu ka mōʻaukala a pilina ma waena o Hawaiʻi a me ka poʻe o Iāpana i holo no ka hoʻokahi a ʻoi kenekulia. Ua hōʻike ko ke Keʻena Kuleana Hoʻokipa o Hawaiʻi Pelekikena a Luna Hoʻokō ʻo John De Fries i ka manaʻo wikiō e aloha ana i nā mea komo i ka Hoʻolauleʻa o Honolulu no nā hanana he alo a he alo i ka MH 2023 a ma ka manaʻo nui o ka hanana “Connect with Aloha, Forward to the New Future.”

Ma ka lā 14 o Malaki, ua hoʻolaha ʻia na ke Keʻena Kuleana Hoʻokipa o Hawaiʻi he Hoʻokūkū Noi Kālā (23-02) no ka hoʻonaʻauao mea kipa a lawelawe alowelo no ka mākeke Kanakā. Kālele ua hoʻokūkū noi kālā nei ma ka hoʻonaʻauao i nā mea kipa ma ka huakaʻi pono me ka hōʻihi a me ke kākoʻo ʻana i ko Hawaiʻi mau kaiaulu.

E kākoʻo ka hana a ka limahana i ka Papa Hana Hoʻolālā Hikiāloa 2020-2025 o ke Keʻena Kuleana Hoʻokipa o Hawaiʻi, nā Papa Hana Hoʻokō Hoʻokele Wahi Huakaʻi, a he ʻoihana hoʻokipa mauō no Hawaiʻi. E kākoʻo pū ʻia ko ke Keʻena Kuleana Hoʻokipa o Hawaiʻi kūpaʻa i ka hoʻoholomua i nā pahuhopu Aloha+ Challenge, United Nations’ Sustainable Development, a me ka ‘Āina Aloha Economic Futures Declaration.

Ma ke kū i nā hōʻailona puka o ke Keʻena Kuleana Hoʻokipa o Hawaiʻi, e kōkua ka limahana i ka hoʻonui ʻana aʻe i ka hoʻolilo kālā mea kipa o ka lā, a i hui pū ʻia. I ka MH 2022, he 928.2 miliona i lilo i nā mea kipa o Kanakā — he $188 o ke kanaka o ka lā ma ka ʻawelike. E kālele pū ʻia ka hoʻonui ʻana aʻe i ka hoʻolilo kālā ma nā pāʻoihana no Hawaiʻi he ala e kākoʻo ʻia ai ka ʻoihana hoʻokele waiwai ehuehu. Helu ʻia ke kākoʻo ʻana i nā pāʻoihana kūloko a me ka hāpai ʻana i nā hua i hana ʻia ma Hawaiʻi, nā hoʻolauleʻa a hanana Hawaiʻi, nā papa hana mahi ʻai a ʻoihana hoʻokipa, nā hana manawaleʻa mahi ʻai ma ka hana pū ʻana me ke Keʻena Kuleana Hoʻokipa o Hawaiʻi, nā hui mokuʻāina, nā hui kaiaulu, a me nā hui kaʻawale.

ʻO ka hola 2 ʻaui. HST ka palena pau no nā noi kālā i ke Keʻena Kuleana Hoʻokipa o Hawaiʻi, i ka lā 21 o ʻApelila, 2023. E nānā i ka Hoʻokūkū Noi Kālā ma ʻaneʻi.

Hawai‘i Tourism USA

Ma ke kākoʻo na ka Hawaiʻi Tourism USA (HTUSA), ua kālele ʻia ke koʻikoʻi o ka huakaʻi pono ʻana ma Hawaiʻi e ka ʻelua mea kākau o ka ʻelua moʻolelo i puka iho nei ma nā kahua huakaʻi nānā nui ʻia ʻo The Lonely Planet a me Matador Network.

Ua kipa ka mea kākau huakaʻi ʻo Sarah Sekula i ka mokupuni ʻo Hawaiʻi ma ka huakaʻi i kākoʻo ʻia na HTUSA a puka kāna moʻolelo, “5 of the Best Road Trips in Hawai‘i,” e paipai ana i ka hoʻomākaʻikaʻi ʻia na ke kanaka ma kahi o ka mākaʻikaʻi no ke kanaka iho. Ua hāpai pū ʻia nā manaʻo e kū ana i nā Papa Hana Hoʻokō Hoʻokele Wahi Huakaʻi o ke Keʻena Kuleana Hoʻokipa o Hawaiʻi ma ka moʻolelo a Sekula e kōkua ana i ka hoʻonā i nā hopohopo o ke kaiaulu, he moʻolelo e hāpai pū ana i nā hoʻomākaʻikaʻi ʻana ma ka mokupuni ʻo Hawaiʻi, Maui, Oʻahu, a me Kauaʻi.

Ua kōkua pū ke kime HTUSA i ka mea kākau ʻo Noelle Alejandra Salmi ma kāna moʻolelo, “PSA: Hawai‘i is Not a Theme Park,” e hoʻohui ana iā ia me nā limahana poulia a me nā mea ʻike hoʻomaluō kai e aʻo ai no ke koʻikoʻi o ka hōʻihi ʻana i ke ao kūlohelohe. Ua hāpai pū ʻia ma kā Salmi moʻolelo nā hopena o ka lawena mea kipa a me ka hāpai i nā ala kōkua i nā mea heluhelu a mea kipa pū paha e hoʻomalu ʻia ai nā kumuwaiwai ao kūlohelohe ma ka hahai i nā hōʻailona, ka noho ʻana ma kahi mamao kūpono mai nā mea ola, a me ke koho ʻana e hoʻohana i nā ʻōmole wai e hiki ke hoʻohana hou ʻia.

Ma Pepeluali, ua komo ko Meet Hawaiʻi Asia/Pacific i ka Asia Pacific Incentives Event (AIME) ma Melbourne, Nūhōlani. ʻO AIME ka hanana alakaʻi nui no nā hālāwai a hanana o ka ʻoihana ma ʻĀsia a me ka Pākīpika, e hiki ai ke hui pū me nā mea hoʻoholo a me nā mea hōʻikeʻike mai ʻō a ʻō o ka honua e kamaʻilio ai a e kūkulu pilina pāʻoihana ai.

Ma ka holo ʻana o ka hanana he ʻekolu lā ka lōʻihi i mālama ʻia mai nā lā 13-15 o Pepeluali, ua komo ko Meet Hawaiʻi a me ka ʻelima o kona mau hoa kākoʻo — ʻo Prince Waikīkī, The Kāhala Hotel and Resort, Waikīkī Beach Marriott Resort and Spa, Hilton Hawaiian Village Waikīkī Beach Resort, a me Alohilani Resort Waikīkī Beach — ma ka 190 hālāwai me nā mea hoʻolālā hanana, i hua ai he 100 pāhana. ʻOiai ma laila, ua kono pū ʻia na ko Meet Hawaiʻi nā mea kūʻai nui he 10 no Sydney, Nūhōlani, i ka ʻahaʻaina e hui ai me nā hoa kākoʻo o Hawaiʻi e kamaʻilio ai i nā hana pāʻoihana. Mahalo i nā hoa kākoʻo i ke komo me ko Meet Hawaiʻi ma ka hāpai ʻana i ka pae ʻāina ʻo Hawaiʻi he wahi huakaʻi nui MCI i nā mea kūʻai ma ʻĀsia/Pākīpika.

Ma ka hoʻomākaukau no ka ʻaha o ka MH 2027 ma Honolulu, ua hoʻouna ʻia e ko Rotary International ʻelua limahana a me kekahi manakia kālā no Maritz Global Events i Oʻahu i Pepeluali e kipa ai i ke 32 hōkele ma Waikīkī. Ma ka hālāwai i mālama ʻia ma ka Sheraton Waikīkī, ua hōʻike nā ʻelele Rotary International i ka ʻike no ka ʻaha o ka hui e hiki mai ana ma Honolulu, ʻo ia hoʻi ka ʻike no ka hana pū ʻana me kona kime Global Team.

Hui pū nā ʻano alakaʻi manawaleʻa o nā ʻano like ʻike ma nā ʻaha kūmakahiki o Rotary International e aʻo like ai mai nā mea ʻike, a e kaʻana ʻia ai nā manaʻo e lapaʻau ʻia ai paha nā ʻāʻumeʻume e hihia nei kānaka i ke ao. E hoʻolālā ʻia ana ka ʻaha Honolulu o Rotary International e hoʻolālā ʻia nei no Iune 2027 na ka hui poepoe honua ma ka hana pū ʻana me kekahi kōmike o Honolulu o nā lālā o ka Hawaiʻi Rotary Club.

Ma ke kiʻi: Adrienne Nudo, Meet Hawai‘i; Jasmina Bajgoric, Rotary International; Cory Fransway, Maritz Global Events; and Sophia Martin, Rotary International.