Manaʻo Wehe Na Ko
HTA Pelekikena A Luna Hoʻokele John De Fries
|
|
Hili hewa ka manaʻo ke ʻole ke kūkākūkā.
ʻŌlelo Noʻeau #993
He kuleana kēlā me kēia Papahana Mālama ʻĀina Hoʻokipa e ʻauamo like ʻia e mākou ma HTA a me nā kupa o ka ʻāina, ke keʻena hoʻokipa o kēlā me kēia mokupuni, nā keʻena kalana, mokuʻāina a pekelala, nā ʻahahui manawaleʻa, a me ka ʻoihana hoʻokipa ākea. Komo haʻahaʻa mākou i kēia hana me ka mahalo piha i ke kuana ʻike a me nā manaʻo kūpaʻa e ʻike ʻia nei ma kēia mau kūkākūkā koʻikoʻi, he alu like hoʻi ia e hoʻoikaika i nā kumuwaiwai kūlohelohe, moʻomeheu, a kaiāulu o ko kākou Hawaiʻi.
|
|
KE KŪKULU MOʻOMEHEU HAWAIʻI |
|
He ʻāina kupaianaha ʻo Hawaiʻi, me ka moʻomeheu a mōʻaukala e pūlama ana i nā hana a me ka ʻike kū hoʻokahi a puni ke ao.
He mea nui i nā kamaʻāina ke kū ʻelele ʻoiaʻiʻo no Hawaiʻi. No ia kumu e koʻikoʻi ai ka mālama pono ʻana o ka ʻoihana hoʻokipa i ia kuleana.
Ma ke alu like ʻana o ka poʻe nona kēia kuleana i kupu mai ai ʻo Maʻemaʻe Toolkit, he ala ia e hoʻoikaika i ke ʻano e hōʻike ʻia ʻo Hawaiʻi a puni ka honua. He kumuwaiwai ia me ka ʻike koʻikoʻi i hōʻoia pono ʻia no ka paeʻāina ʻo Hawaiʻi. Me ka ʻike no ka ʻāina a me ka moʻomeheu a me nā loina o Hawaiʻi, he kōkua nui kēia kumuwaiwai no ka hoʻoikaika i ka ʻike laulā no ka ʻāina.
Ua kapa ʻia ka inoa ʻo Maʻemaʻe, ʻo ia ka pahuhopu o ke kaʻana ʻana aku i kēia kumuwaiwai – ʻo ia hoʻi, ka maʻemaʻe o ke ʻano e wehewehe a hōʻike ʻia ʻo Hawaiʻi, ʻaʻohe puʻu, ʻaʻohe keʻe.
Paipai ʻo HTA i ka poʻe a pau e hoihoi ana i ka hoʻonui ʻike no ka lāhui, nā mele, ka ʻōlelo, nā mokupuni, a i ʻole ka mōʻaukala e hoʻohana iā Maʻemaʻe Toolkit. He kumuwaiwai manuahi ia e laha ana i ka poʻe a pau.
|
|
KE KŪKULU WAIWAI KŪLOHELOHE |
|
No ka hoʻokō i kēia pāhana hoʻonaʻauao no nā kānaka kipa i ka ʻāina kehakeha ʻo Pololū, ua hana alu like ʻo HTA, Kupu, ka māhele Nā Ala Hele o ka ʻOihana Kumuwaiwai ʻĀina, nā kupa o Pololū, Makanikahio, me nā ahupuaʻa e pili pū ana. Ke kū nei nā kiaʻi kamaʻāina ma ke awāwa i mea e hoʻonaʻauao ʻia nā hoa kipa no ka mōʻaukala o ia ʻāina, me ka hoʻomaopopo pū i ka poʻe kipa no ka lawena kūpono a palekana no ia wahi pana.
No ka hōʻea nui o nā malihini i ia ʻāina, ke hoʻolako kālā nei ʻo HTA i kēia papahana no ka mālama i ia wahi i keʻekeʻehi nui ʻia, keu aku ka hoʻopakele i nā kumuwaiwai kūlohelohe a moʻomeheu o ke awāwa.
“Ke hiki iā mākou ke hoʻolako i nā hana kaiāulu, ʻo ia nō ke ala e hele ai,” wahi a Kalani Kaʻanāʻanā, ko HTA Luna Alowelo. “No ke kaiāulu ka ʻike i ka pono no ko lākou ʻāina. Paʻa ka ʻōiwi o ka ʻāina. Ua komo mua i nā nīnūnē. Ua paʻa ka mōʻaukala. No ia kumu e pono ai ko ke kaiāulu kahu a kiaʻi i kēia ʻano wahi.”
Mai kinohi mai o kēia papahana ma ʻAukake, ua ʻike nā kiaʻi i nā hopena pōmaikaʻi i ke awāwa. Wahi a Keoni Lorenzo, kekahi o kēia mau kiaʻi, “He pōmaikaʻi nui ka pilina i ulu ma ke kaiāulu ma o ka hoʻokō ʻana i kēia papahana. No nā kamaʻāina a me nā malihini pū kekahi, nui ka mahalo no ka ʻike e kaʻana ʻia nei.”
|
|
Eo Iā HTUSA ʻElua Makana WAVE Na TravelAge West
Ua hoʻohanohano ʻia ʻo Hawaiʻi Tourism USA (HTUSA), ʻo ia ka helu ʻekahi ma ʻAmelika nō a puni no ka kākoʻo i nā ʻākena huakaʻi, a me ka pane ʻoi kelakela i ka maʻi ahulau, ma ka ʻaha TravelAge West 2021 WAVE (Western Agents’ Votes of Excellence) o ka lā 7 o ʻOkakopa. Ua eo pū iā HTUSA ka hoʻohanohano a ka luna hoʻoponopono no kā lākou papahana hoʻolauna me nā ʻākena huakaʻi. He mau hoʻohanohano kēia i waena o nā papa alakaʻi hoʻokipa mai ʻō a ʻō.
|
|
Hoʻi Ka Huakaʻi ʻAna A Nā Kupa ʻAmelika I Ka Maʻamau Ma Hope O Ka Laha O Ka Mana Delta
Mau nō ka hoihoi o nā kupa ʻAmelika i ka huakaʻi, me ka manaʻo ke palekana nei ʻo ʻAmelika no nā hana hoʻomaha. ʻOluʻolu ka nui i ka hiki ke huakaʻi palekana, a ke piʻi nei ka ʻoluʻolu i ka hoʻokipa malihini ma ko lākou mau kaiāulu. Ke maikaʻi aʻe nei ka wanana no ka ikaika o ka ʻoihana huakaʻi, me ka pane ʻana o ke 50 a ʻoi pākēneka o nā kānaka i nīnauele ʻia, ke hoʻolālā nei i huakaʻi i loko o nā mahina ʻekolu e hiki mai nei.
Kumu: Destination Analysts Wave 76 – 1 Nowemapa 2021
|
|
He Lanakila Nui Nā Wikiō Mālama Hawaiʻi A HTJ Ma YouTube
Me ka manaʻo e hāpai i ka mākia ʻo Mālama Hawaiʻi me ka mākeke Kepanī, ua kaʻakaʻahi ʻo HTJ i ʻehā hoʻolaha wikiō Mālama Hawaiʻi me ka lepe unuhi ʻōlelo Kepanī ma YouTube i waena o nā lā 18 a i ke 31 o ʻOkakopa. Ua noho a nānā ʻia he 647,210 manawa, ʻike ʻia he 7,555,837 manawa, a kaomi ʻia he 2,296,485 manawa. Ua hana alu like ʻo HTJ me nā pakanā ʻoihana kekahi no ka hāpai a hoʻokaʻaʻike i ka mākia Mālama Hawaiʻi kekahi. Ma ʻOkakopa, ua hoʻolaha ʻewalu ʻākena huakaʻi i nā hōʻailona me nā wikiō ma kā lākou mau pāpāpaho a ma nā keʻena. E hoʻomau ana nō ʻo HTJ i kēia ʻano papahana hoʻonaʻauao malihini.
|
|
Hui Nā Kime HTJ Me OVB No Ke Kūkākūkā I Ka Papahana Mālama ʻĀina Hoʻokipa Oʻahu
Ua hui aku nei ko HTJ me ko ka Oʻahu Visitors Bureau no ka nāʻana i ka Papahana Mālama ʻĀina Hoʻokipa no Oʻahu, a no ke kaʻana aku i ko HTJ hoʻoholomua i nā papahana Mālama Hawaiʻi. Ua kono ʻia ko OVB e hui pū mai i nā hālāwai kōmike a HTJ – ka hui Iāpana, ka hui o nā pakanā hoʻokaʻaʻike, a me nā pakanā kahua hoʻoleʻaleʻa – ma ka lā 13 o ʻOkakopa no ke kūkākūkā i ko Oʻahu papahana me ia mau pakanā.
|
|
Hua Ke Aloha No Ka Hale Hōʻikeʻike O Pīhopa Ma Ka Papahana Support Hawaiʻi
Me ka pane hauʻoli i ke kāhea a ko HTJ papahana Support Hawaiʻi ma Ianuali 2021, he huakaʻi kikohoʻe o ka Hale Hōʻikeʻike O Pīhopa, ua makana manawaleʻa aku nā kanaka i komo i $4,000 no ke kākoʻo i ka hale hōʻikeʻike. Ua makana aku ʻo HTJ i ka makana i ka hale hōʻikeʻike ma ʻOkakopa.
|
|
Mālama ʻO HTCAN I Ka ʻAha ʻOihana Kikohoʻe ʻO Aloha Canada 2021
He lanakila nui ko HTCAN mālama ʻana i ka ʻaha ʻoihana kikohoʻe ʻo Aloha Canada 2021 ma nā lā 27 a 28 o ʻOkakopa. Ma ka lā mua o ka ʻaha, ua nīnauele ʻia nā keʻena hoʻokipa o kēlā me kēia mokupuni e nā pāpāpaho nui o ka ʻoihana ma Kanakā. Ma ka lā ʻelua o ka ʻaha i hui ai he 450 ʻākena huakaʻi mai ʻō a ʻō o Kanakā me nā mea hōʻikeʻike he 19. Ua kūkākūkā nā ʻākena me nā ʻelele o nā hōkele a hanana ma Hawaiʻi, nā keʻena hoʻokipa mokupuni, a me ka ʻAhahui Hoʻokipa ʻŌiwi Hawaiʻi (NaHHA). Ua lohe nā lālā ʻoihana i ka nūhou o kēlā me kēia mokupuni, a ua ʻike ʻia nā papa hoʻonaʻauao a NaHHA no ka poi, ka hula, a me ke akuawahine ʻo Hina. Ua hōʻike pū ʻia nā wikiō Mālama Hawaiʻi me nā lepe unuhi ʻōlelo Palani no ka ʻāina ʻo Québec. Ua hui pū nā keʻena hoʻokipa mokupuni me nā alakaʻi hoʻolālā hālāwai no ke kūkākūkā no ka māhele MCI.
|
|
Kākoʻo A Komo ʻO HTCAN I Nā Lā Hoʻonaʻauao A SITE Canada
Ma ka lā. 27 o ʻOkakopa, ua komo ʻo HTCAN i ka Lā Hoʻonaʻauao SITE Canada ma Toronto, he hanana hoʻonui ʻike. Ua kākoʻo kālā ʻo HTCAN i ka hanana, launa me nā hoa hoʻonui ʻike, a hōʻike ʻia ma nā palapala. Ua haʻiʻōlelo nā wahaʻōlelo no ka holomua a ulu o ka ʻoihana huakaʻi i kēia au kūlanalana a loli mau. ʻO ka hoʻokahua i ke au hou ka mākia nui o ka lā, me ka manaʻo e kōkua i nā hoa hoʻonui ʻike ma nā kumuhana like ʻole, e like me ka hoʻoikaika makau, ka loli ʻana o nā lawelawe kūmau, ke koi a nā hoa kipa o kēia mau lā, a me ka hoʻomakakoho i nā kaʻinahana hoʻopakele olakino.
|
|
E Hoʻomaka Hou Kākou I Nā Mokulele Nūhōlani-Hawaiʻi
Ma hope o ka paʻa o nā palena ʻāina no nā mahina he 20, ke hoihoi nei ʻo HTO i ka hoʻi o ka huakaʻi ʻana i waena o Nūhōlani me Hawaiʻi ma Kēkēmapa.
Ua hoʻonoa ke aupuni Nūhōlani i nā kapu huakaʻi no nā kupa i lāʻau koʻokoʻo ʻia, ma hope o ka papahana e paipai ana i ka lāʻau koʻokoʻo a piha he 80% o nā kupa. No kēlā me kēia mokuʻāina ma Nūhōlani ka mana hoʻokō kānāwai, ua noa ka holo ʻana ma nā mokuʻāina nui ʻelua ʻo New South Wales me Victoria.
Me kēia holomua a ke aupuni Nūhōlani, ua paʻa nā mokulele mua i waena o Sydney me Honolulu ma ka lā 15 o Kēkēmapa no Hawaiian Airlines, a me ka lā 20 o Kēkēmapa no Qantas.
Ma loko nō o ka holomua nui o Aotearoa ma ka lāʻau koʻokoʻo, ʻaʻole paha e hoʻi nā mokulele i Hawaiʻi a i ka hapahā mua o ka makahiki 2022.
|
|
Hoʻolauna ʻO HTO I Ke Kime Hou
Me ka hoʻi ʻana o nā huakaʻi i waena o ka Pākīpika me Hawaiʻi, hauʻoli ʻo HTO i ka hokona piha iā Hawaiʻi a me ke kūkulu hou i ke kime ma lalo o ka manakia kamaʻāina i ia hana, ʻo Darragh Walshe.
He mau maka kamaʻāina a he mau maka hou ko ke kime HTO ma Sydney.
He maka hou ʻo Jennifer Gaskin, ka Account Director ma Sydney. He 15 ona makahiki hana ma ka ʻoihana huakaʻi, a he lālā ʻo ia no ko Darragh Walshe The Walshe Group no ʻelima makahiki, e mālama ana i ke kuleana huakaʻi a Abu Dhabi ma Nūhōlani.
He ʻāhaʻilono ʻo Jennifer ma mua, a he laekahi hakuhia a akamai ʻo ia ma ka hoʻokaʻaʻike a hokona.
ʻO ka hokona ʻāina hoʻokipa kāna hana punahele, keu aku ka paipai i ka huakaʻi mālama e hoʻoulu maikaʻi ana i nā kaiāulu i kipa ʻia.
Ma hope o kona haʻalele ʻana iā HTO i loko o ka wā maʻi ahulau, nui ko mākou hauʻoli i ka hoʻi ʻana mai ʻo Kris Phadungkiatipong i ke kime no ka manakia i nā hana alu like.
Nui ko Kris ʻike no Hawaiʻi me ke aloha, me ka hiki ke hoʻolana i ka naʻau o nā mea huakaʻi a me nā pakanā ʻoihana.
Welina iā ʻolua, e Jennifer lāua ʻo Kris!
|
|
Komo ʻO HTK I Ka Hana Pūalu Me Korean Air Me Nā ʻĀkena Huakaʻi Kikohoʻe
Ua hana hoʻolaha pūalu ʻo HTK me Korean Air me 18 ʻākena huakaʻi kikohoʻe ma ʻOkakopa no ka hoʻolale i nā malihini kūʻokoʻa ʻoiai ka hui mokulele e hoʻi ana i ka lele i waena o Incheon me Honolulu. Ua kaʻana ʻo HTK i nā wikiō a me ka ʻikepili ma o nā ʻākena no ka hoʻonaʻauao i nā malihini no ka mākia Mālama Hawaiʻi. I loko o ʻelua pule, ua paʻa he 400 malihini kūʻokoʻa i ka huakaʻi i Hawaiʻi.
|
|
Mālama Ana ʻO HTK I Huakaʻi Hoʻokamaʻāina Ma Oʻahu Me Maui No Nā Makakina Nohona Ma Kēkēmapa
Ma ka piʻi ʻana o ka hoi i ka huakaʻi loa, ke hoʻomākaukau nei ʻo HTK i huakaʻi hoʻokamaʻāina no nā luna hoʻoponopono o nā makakina nohona kaulana ʻo Elle, Vogue, me Cosmopolitan e kapa ʻia nei ʻo “Ua Hiki Hou Mai Ka Wā No Hawaiʻi!” E noho ana ka hui ma Maui no ʻelua pō a ma Oʻahu no ʻekolu pō, mai ka lā 5 a i ka 10 o Kēkēmapa. Ke hoʻomākaukau nei ʻo HTK me nā keʻena hoʻokipa mokupuni o Oʻahu me Maui i ka papahana o kēia huakaʻi hoʻokamaʻāina, pau pū me nā hana manawaleʻa ma lalo o ka mākia Mālama Hawaiʻi. E ʻike ʻia ana ka huakaʻi hoʻokamaʻāina ma nā kūlelepaho kūhelu a ia mau pāpāpaho ma Kēkēmapa, a ma nā makakina ma Ianuali 2022.
|
|
Keep in touch with HTA via social media: |
|
HTA recognizes the use of the 'okina ['] or glottal stop, one of the eight consonants of the (modern) Hawaiian language; and the kahakō [ō] or macron (e.g., in place names of Hawai'i such as Lāna'i). However, HTA respects the individual use of these markings for names of organizations and businesses. Due to technological limitations, this current communication
may not include all Hawaiian diacritical markings.
|
|
|
|
|
|
|
