ʻO ka ʻōlelo Hawaiʻi nō ke kaʻā o ka nohona o Hawaiʻi. Ma kona ʻano he kahua ma ke Keʻena Kuleana Hoʻokipa o Hawaiʻi – ma ka HRS §201B-7, a pēlā pū kā mākou Papa Hana Hoʻolālā Hikiāloa 2020-2025, he palapala aupuni i paʻa ma ka ʻōlelo Hawaiʻi, a ʻo kona mau manaʻo hoʻokele ka mea e alakaʻi mai ana i kā mākou hana, a keu aku ma ka paʻa ʻana o ka pilina i ka hana no ke kaiaulu. ʻO ia mea he mālama iā Hawaiʻi ka mālama ʻana i kēia wahi ma kekahi ʻano i kūikawā iā Hawaiʻi, a he mea nui ka ʻōlelo.

Ma ke Keʻena Kuleana Hoʻokipa o Hawaiʻi, haʻaheo nō mākou i ke kūlana aku no ke ola o ka ʻōlelo Hawaiʻi ka hoʻoponopono ʻia o kā mākou mau kulekele e hāpai ana i ka pela ʻōlelo Hawaiʻi kūpono ma kā mākou mau hana, ʻo ia hoʻi nā kahua uila. E heluhelu hou aku e ʻike hou ai a no ke ala e hiki ai ke luʻu i ka hana.

Ke hoʻolālā nei ke Keʻena Kuleana Hoʻokipa o Hawaiʻi i kona Hālāwai ʻOihana Hoʻokipa Kupulau 2023, e mālama ʻia ma ke Kikowaena Hālāwai o Hawaiʻi. E kūkala ʻia ka nūhou mākeke mai ke Kime Hokona Poepoe Honua, ka hoʻokō ʻia o nā Papahana Mālama ʻĀina Hoʻokipa, a me nā pānela me nā alakaʻi no nā kumuhana no ko Hawaiʻi a no ka ʻoihana hoʻokipa. E makaʻala ʻia ka lā, ke kāinoa, a me ka ʻikepili hou aku ma nā pule e hiki mai ana.

Ua komo ko ke Keʻena Kuleana Hoʻokipa o Hawaiʻi Luna Hoʻokele Noiʻi ʻOihana Hoʻokipa Jennifer Chun a me ka hoa noiʻi ʻo Chris Kam, ka Pelekikena a Luna Hoʻokō o Omnitrak, i ka Marketing Outlook Forum o ka Travel and Research Association mai nā lā 6-8 o Pepeluali ma Houston, Kekeka, e aʻo ai no ka ʻoihana hoʻokele waiwai o ka wā e hiki mai ana, nā lauana ma nā māhele like ʻole o nā ʻoihana hoʻokipa like ʻole, a me ke ʻano o ka ʻoihana hoʻokipa i ka wā e hiki mai ana. Ma kēia hanana he ʻekolu lā ka lōʻihi i ʻākoakoa ai nā limahana o ka hoʻokele wahi huakaʻi, hokona, a noiʻi mai nā ʻoihana like ʻole e hōʻike ai i ka ʻike, launa, a pili pū me nā alakaʻi ma luna o ka ʻike. Ua lilo ka hālāwai he wā i hiki ai i ke Keʻena Kuleana Hoʻokipa o Hawaiʻi ke pili aku a aʻo no nā hana kūpono a kaʻakālai hou e hiki ke lawelawe ʻia ma nā hana hoʻokele wahi huakaʻi ma ka hoʻoholomua ʻana he ʻoihana hoʻokipa mauō no Hawaiʻi.

Ua ʻākoakoa nā mahi ʻai mai ʻō a ʻō o ka mokuʻāina ma ke Kapikala Mokuʻāina ʻo Hawaiʻi ma ka lā 9 o Pepeluali no ka Lā Makakau Mahi ʻAi kū makahiki. Ma ka hōʻoia hou ʻana i ke kūpaʻa i ka hoʻoikaika i ka ʻoihana mahi ʻai mai ʻō a ʻō o ka mokuʻāina, ua mālama ʻia na ko HTA he kaunoʻo hoʻonaʻauao ma ka hanana e hōʻike ana i ka ʻi ke no ke kūpaʻa i ke kākoʻo i ka mahi ʻai kūloko a me nā hana kākoʻo ma ka ʻoihana mahi ʻai o ka mokuʻāina. He koʻikoʻi ka hana kākoʻo ʻoihana mahi ʻai, no ka mea, he mea ia e holomua ai ka ʻokoʻa o nā ʻoihana waiwai a me ka hoʻopaʻa he kino ʻoihana hoʻokipa mauō.

He mau hana kā ke Keʻena Kuleana Hoʻokipa o Hawaiʻi i lawelawe aku ai ma ka holo o nā makahiki i hala iho nei e hōʻike ana i kā mākou hana ma kēia ʻano mea. He lālā kākoʻo mākou o ka Mālama Mandate o Hawaiʻi Green Growth, e kūpaʻa ai kā mākou hana i ka hoʻoholomua ʻana i ke Aloha+ Challenge o Hawaiʻi a me nā Pahuhopu Hoʻomauō o ka ʻAha Aupuni Hui Pū ʻIa, a pēlā pū ka ʻĀina Aloha Economic Futures Declaration, e hāpai ʻia aʻe ai he moemoeā ʻoihana hoʻokele waiwai mauō e lilo ai ka meaʻai a mahi ʻai he ʻīkoi.

Ma nā papa hana like ʻole o ke Keʻena Kuleana Hoʻokipa o Hawaiʻi, ua kākoʻo ʻia nō ko Ke Kulanui o Hawaiʻi mākaʻikaʻi ʻāina mahi ʻai GoFarm Hawaiʻi, ka polokolamu kelepona Hawaiʻi Trails, a me nā papa hana kālele ʻāina na nā hui e like me ʻĀina Momona, Kākoʻo ʻŌiwi, a me Kaʻala Farm. Ua hoʻomohala pū ʻia na ke Keʻena Kuleana Hoʻokipa o Hawaiʻi he puke alakaʻi me GoFarm Hawaiʻi, ke Oʻahu Resource Conservation and Development Council, a me ka Hawaiʻi Agritourism Association. Ke hana pū nei mākou ma ka hoʻokō i nā makakoho kaiaulu i hōʻike ʻia ma nā Papa Hana Hoʻokō Hoʻokele Wahi Huakaʻi, nāna e kuhikuhi ana i ke kākoʻo i ka meaʻai kūloko a me nā mea e pili pū ana.

Ma lalo o nā hana hoʻoikaika hoʻokele wahi huakaʻi, ke hana pū nei ke Keʻena Kuleana Hoʻokipa o Hawaiʻi me ko ke Keʻena Pāka a Hana Hoʻonanea o ke Kūlanakauhale a Kalana o Honolulu Luna Hoʻokele ʻo Laura Thielen ma ka hoʻolawa ʻana i nā manaʻo o nā mea noho a pāʻoihana o Oʻahu no nā hana kālā ma nā pāka kahakai o ke kūlanakauhale. ʻEkolu hālāwai i mālama ʻia ma waena o ka lā 30 Ianuali a me ka 1 Pepeluali me nā hoʻolaukaʻi ʻaha male a pāʻoihana kaʻa ʻōhua hoʻomākaʻikaʻi e lawelawe ana i nā mākeke ʻōlelo Pelekānia ma ka ʻohiʻohi ʻikepili e hoʻohana ʻia ma ka haku pila ʻana no ka hoʻokele ʻia o nā hana kālā a hana hoʻonanea ma ka mokupuni ma nā pāka kahakai o ke kūlanakauhale. ʻO ia mau hālāwai ka mua na ke Keʻena Pāka a Hana Hoʻonanea me kēia mau hui, a ua hua maikaʻi ke kūkā ma nā ala e maikaʻi ai ka hana no nā mea hele pāka me ka hāpai pū ʻana nō naʻe i nā hana kōkua a ʻāʻumeʻume pū kekahi. E hoʻomau ʻia aku nā kūkā ma ke kaiaulu no kēia mau kumuhana.

Hoʻolauleʻa ʻia ka māhina ʻōlelo Hawaiʻi i kēlā me kēia Pepeluali i mea e hāpai a e hoʻomau ʻia ai ka ʻōlelo o ko kākou ʻāina. He mea koʻikoʻi ka hoʻoikaika i ka hoʻohana ʻia a me ke kū kūpono o ka ʻōlelo Hawaiʻi ma ko kākou kaiaulu a ʻoihana i ka mākia o ke Keʻena Kuleana Hoʻokipa o Hawaiʻi, a kūpaʻa mākou i ke kākoʻo i kona ola i kēia lā a no nā hanauna e hiki mai ana. Ma lalo o kēia kūpaʻa ʻana, ke hāpai ʻia nei kā mākou Papa Hana Kaʻakālai 2020-2025, nā papa kumumanaʻo hālāwai kōmike a papa alakaʻi, a me kēia nūleka kū māhina ma ka ʻōlelo Hawaiʻi.

ʻOliʻoli nō mākou i ka hoʻolaha aku i kā mākou Maʻemaʻe Hawaiʻi Style and Resource Toolkit, i hoʻomohala ʻia ma ka hana pū ʻana me ka Native Hawaiian Hospitality Association, a ua noa ʻānō ma ke kahuapaʻa o ke Keʻena Kuleana Hoʻokipa o Hawaiʻi. Aia ma loko nā aʻoaʻo he nui no ka ʻoihana hoʻokipa no ka hoʻohana ʻia me ka hōʻike kūpono ʻana iā Hawaiʻi ma kona ʻoiaʻiʻo me ka hāpai pū ʻana i ka ʻōlelo Hawaiʻi. Mai ka puka ʻana o ka mana mua i ka MH 2010, ua ulu kēia palapala he pahu kumuwaiwai a he kumuwaiwai pāpaho no ka nui poʻe. Mahalo i ka poʻe a hui nona ka ʻike kupuna a ʻōiwi o Hawaiʻi e hoʻomau ana i ke kākoʻo a ʻāwili i ka ʻike i kēia kuleana ʻo ka maʻemaʻe a maiau ma kēia ʻoihana. Paipai mākou i ka ʻoihana hoʻokipa a kaiaulu e hoʻohana ākea me ke kaʻana pū ʻana aku i ka Maʻemaʻe Toolkit hou, e hiki ke hoʻoili ma ʻaneʻi.

Ma Mei 2022, ua hoʻoholo mākou ma ke Keʻena Kuleana Hoʻokipa o Hawaiʻi e hōʻano hou i kā mākou kulekele ʻōlelo Hawaiʻi e loaʻa ai ka pela Hawaiʻi ma kā mākou mau kahuapaʻa, kahua kūlelepaho, a me nā mea uila ʻē aʻe pū kekahi. He holomua nui kēia ma ka hōʻike pono i kā mākou hana, he koʻikoʻi i ka hāpai ʻana i ko Hawaiʻi ʻōlelo ʻōiwi a kūhelu. Ua kiʻekiʻe nō hoʻi ka puʻu e piʻi ʻia. Mahalo nui mākou i ke kōkua o nā hoa kākoʻo o ka Hawaiʻi Visitors and Convention Bureau, nā Island Chapter, a pēlā pū ʻo Miles Partnership a me Anthology, A FINN Partners Company. ʻAneʻane a he 600 ʻaoʻao i nānā makaliʻi ʻia no ke komo o ka ʻokina a kahakō, a pēlā pū ka unuhi ma kahi i pono ai. He 100 a ʻoi huaʻōlelo i hoʻohana ʻia ma nā pōʻaiapili like ʻole, a no laila kona unuhi ʻia ma nā kahua. I ka holomua ʻana o kēia hana, e hoʻomau mākou i ka hoʻoponopono a me ka hōʻike i ka nūhou, keu hoʻi ma ke aʻo no ke ʻano e hoʻoikaika hou ai. E kele aku i hawaiitourismauthority.org a i gohawaii.com.

Inā ua hala iā ʻoe kā mākou mau hua kūlelepaho ʻŌlelo o ka Lā ma ka māhina ʻōlelo Hawaiʻi, paipai mākou iā ʻoe e kipa i kā mākou Facebook, Instagram, a Twitter i mea e aʻo hou ai no ka huaʻōlelo Hawaiʻi a me nā mea e pā nei kā mākou hana Mālama i Kuʻu Home.

Ma ka 13 Pepeluali, ua hoʻopuka ʻia na ke Keʻena Kuleana Hoʻokipa o Hawaiʻi he Hoʻokūkū Noi Kālā (23-08) e ʻimi ana i nā lawelawe kākoʻo no ke Kākoʻo Wahi Huakaʻi e kōkua ana i nā hana lawelawe wahi huakaʻi. Penei nā lawelawe e ʻimi ʻia nei:

ʻO ka hola 2 ʻaui. HST ka palena pau no nā noi i ke Keʻena Kuleana Hoʻokipa o Hawaiʻi ma ka 28 Malaki, 2023. E nānā i ka hoʻokūkū noi kālā ma ʻaneʻi.

Ua hoʻomau ʻia ka Nūhou ʻOihana Hoʻokipa na ke Keʻena Kuleana Hoʻokipa o Hawaiʻi me ko ke Kalana o Kauaʻi Meia Derek Kawakami a me ko ke Kūlanakauhale a Kalana o Honolulu Meia Rick Blangiardi ma ka 9 Pepeluali a me ka 13 Pepeluali. Hōʻike nā hālāwai kelekaʻaʻike—i mālama ʻia ma ka Zoom a i mālama mua ʻia ma ka wā o ka maʻi ahulau COVID-19—i ke koʻikoʻi o ka hoʻokaʻaʻike a me ka hana pū ma waena o ke ākea a me nā māhele kūʻokoʻa o ka mokuʻāina. Ua kūkā ʻia ka hoʻokō Papa Hana Hoʻokō Hoʻokele Wahi Huakaʻi, hoʻonaʻauao mea kipa ma mua a ma hope o ka hōʻea ʻana, a me ka māhuahua ʻana o nā hale hoʻolimalima huakaʻi kū ʻole i ke kānāwai ma kēlā me kēia mokupuni me nā lālā komo o ka ʻoihana hoʻokipa.

Ma ka lā 13 Pepeluali, ua hoʻolaha ʻia na ke Keʻena Kuleana Hoʻokipa o Hawaiʻi he Hoʻokūkū Noi Kālā (23-03) e ʻimi ana i ka lawelawe alowelo a hokona ma ʻAmelika Hui Pū ʻIa, ko Hawaiʻi mākeke mea kipa nui loa. Ke ʻimi ʻia nei he papa hana hoʻokaʻaʻike ma mua o ka hōʻea ʻana mai i Hawaiʻi nāna e hoʻonaʻauao i nā mea kipa ma nā ʻike kikoʻī no ke kipa ma ka palekana, hōʻihi, a me ka pono, e hoʻolaukaʻi ʻia ana me nā papa hana o ke Keʻena Kuleana Hoʻokipa o Hawaiʻi o ka mokupuni e kaʻa ai ka manaʻo piha i ka mea kipa ma kāna huakaʻi.

ʻO kekahi kālele koʻikoʻi o ka lawelawe hokona ka nānā ʻana i nā mea kipa huakaʻi pono me ke kālele i ka lilo huakaʻi a me ka hoʻonui ʻana i ka lilo a ke kanaka o ka lā e launa ana me nā Hōʻailona Hua Koʻikoʻi i ʻike ʻia ma ka Papa Hana Kaʻakālai 2020-2025 o ke Keʻena Kuleana Hoʻokipa o Hawaiʻi. Helu ʻia ke kālele ʻana ma luna o nā lilo ma nā pāʻoihana o Hawaiʻi e kākoʻo ana he ʻoihana hoʻokele waiwai paʻa pono, ke kākoʻo ʻana i nā pāʻoihana kūloko, ke kūʻai ʻana i nā hua mahi ʻai o Hawaiʻi, a me ka hāpai ʻana i nā hua hana ʻia ma Hawaiʻi ma ka hana pū ʻana me ke Keʻena Kuleana Hoʻokipa o Hawaiʻi, ko ka Mokuʻāina ʻo Hawaiʻi Keʻena Pāʻoihana, Hoʻomohala ʻOihana Hoʻokele Waiwai, a ʻOihana Hoʻokipa, a me ka māhele kūʻokoʻa.

ʻO ka hola 2 ʻaui. HST ka palena pau no ka loaʻa o nā noi kālā i ke Keʻena Kuleana Hoʻokipa o Hawaiʻi ma ke 30 Malaki 2023. E nānā i ka hoʻokūkū noi kālā ma ʻaneʻi.

E heluhelu aku no ka nūhou alowelo mai nā mākeke kauʻāina.

E kipa pū i kā mākou paena Partnership Opportunities no ka ʻike hou aku no nā papa hana e mālama ʻia auaneʻi ma nā mākeke nui.

Ua hana pū ʻo Hawaiʻi Tourism Japan (HTJ) me ka hui paʻi o Iāpana ʻo Gakken ma ka hoʻopuka he puke kākuni a kiʻi, “Hawaiʻi’s Secret” (Inoa Kepanī: “Hawai‘i No Himitsu”). Hahai ʻia ma ka māhele kākuni o ia uke he ʻohana, he ʻehā ko lākou nui, e kipa ana iā Oʻahu a me ka mokupuni ʻo Hawaiʻi, me ke aʻo pū no ka ʻoihana hoʻokipa mauō ma ke komo ʻana i ka mākaʻikaʻi Mālama Hawaiʻi. Hōʻike ʻia ma ka māhele kiʻi o ka puke ka ʻike no ke ao kūlohelohe o Hawaiʻi, ka hulihonua, a me ka moʻomeheu. Ua kākaʻahi ʻia akula ʻo “Hawaiʻi’s Secret” i ka 20,000 kula haʻahaʻa a i ka 3,200 hale waihona puke o Iāpana. Ua hoʻopuka ʻia he puke uila o ia puke ma ke kahuapaʻa Gakken. I mea e hāpai ʻia ai ka puka ʻana o ka puke, ua mālama ʻo HTJ i nā papa hana uhaiāholo a kaʻana hua kūlelepaho ma ka Twitter i loaʻa ai he 1,741 hoʻolele hou ʻana, he 42,602 pā ʻana, a he 120 mea uhaiāholo hou.

Ua hoʻolālā ʻo Hawaiʻi Tourism Canada (HTCAN) he huakaʻi hoʻokamaʻāina no nā manakia hua e kū ʻelele ana no nā pāʻoihana hoʻomākaʻikaʻi Kanakā nui, e hoʻolauna ana i ka ʻike a hana hou mai ka wā mai o ka maʻi ahulau. Ua kū ʻelele nā mea komo he ʻelima i ka huakaʻi hoʻokamaʻāina no Groupe Voyages Québec, Air Miles, JM Vacations, Flight Centre, a me TravelBrands. Ua hui ka hui me nā mea hoʻolako, komo i nā hanana Mālama Hawaiʻi, a ʻike pū akula i nā nani o Hawaiʻi Mokupuni a me Oʻahu. Ua kono pū ko HTCAN i nā lālā komo o ka huakaʻi hoʻokamaʻāina i ka ʻAha ʻOihana Hoʻokipa 2022 o ke Keʻena Kuleana Hoʻokipa o Hawaiʻi, kahi i hui ai me nā ʻelele o nā hōkele a hui lawelawe me ke aʻo pū no nā hana o ke Keʻena Kuleana Hoʻokipa o Hawaiʻi ma nā mākeke huakaʻi ʻē aʻe a me kona mau manaʻo nui he aloha, mālama, a kuleana. Ke hōʻike a ke hoʻopuka nei nā manakia hua i komo i ka huakaʻi hoʻokamaʻāina i nā hua Hawaiʻi hou no kā lākou mau pāʻoihana hoʻomākaʻikaʻi i ulu aʻe ma luna o kā lākou huakaʻi ma Hawaiʻi.

Ma Kekemapa, ua hana pū ʻo Hawaiʻi Tourism Oceania (HTO) me Hawaiian Airlines a me Travel Associates ma kahi huakaʻi hoʻokamaʻāina i Oʻahu. He papa hana ʻōhua ko Travel Associates, ka hui alowelo kūlana kiʻekiʻe o ka Flight Centre Travel Group, e kū ana i ko HTO manaʻo no ka mea huakaʻi pono a mea waiwai e ʻimi ʻia ana. Ua kono ʻia nā limahana hoʻolālā huakaʻi e komo i ka huakaʻi hoʻokamaʻāina ma muli o ke kūlana helu ʻekahi ma ke kūʻai ʻana aku i nā hua Hawaiʻi a no nā mea kipa makamua i Hawaiʻi. Ua hoʻolauna pono ʻia ʻo Oʻahu me nā limahana hoʻolālā huakaʻi, me ka hana pū ʻana o HTO me ke Oʻahu Visitors Bureau ma ka papa hana, ʻo ia hoʻi he mau hana Made in Hawaiʻi a Mālama Hawaiʻi.

Ua hoʻopuka iho nei ʻo Hawaiʻi Tourism Korea (HTK) he papa hana hoʻopaipai kolepa kiʻi maka nui YouTube, ma ke kono ʻana i ke kime paʻi wikiō o kekahi kānela YouTube kaulana “Kim Gura’s Cuckoo Golf TV” i mea e kālele ʻia ai ka huakaʻi kolepa i Hawaiʻi a me nā hana Mālama Hawaiʻi. ʻO ka hopena o ua papa hana nei ke kālele ʻia o nā kiʻi maka nui Kolea ʻo Kim Gura a me Nojoon Park e hoʻokūkū ana me ka ʻelua mea kolepa o Hawaiʻi. ʻOkoʻa kā Gura kānela i nā polokolamu kolepa maʻamau ma ka hōʻike i ka haʻuki ma kekahi ʻano hoʻomākeʻaka e kū ana i ko Gura ʻano he wahine hoʻomākeʻaka Kolea. Ma hope o ka hoʻokūkū, ua kipa nā kiʻi maka nui i ko Oʻahu ʻĀina Mahi ʻo Kualoa e komo ai i nā hana Mālama Hawaiʻi a kai. E hoʻouka ʻia ana he ʻelua māhele i paʻi wikiō ʻia ma Hawaiʻi ma kā Gura kānela ma hope mai o Pepeluali. ʻO “Kim Gura’s Cuckoo Golf TV” ko Kolea kānela kolepa YouTube nui nona ka 364,000 mea uhaiāholo.

Ua hoʻopuka pū ʻo Hawaiʻi Tourism China (HTC) a me Weibo he hua kūlelepaho no ka hanana lā hānau kūikawā ma Shanghai no ka puʻukani kaulana i hānau ʻia ma Hawaiʻi ʻo Mika Hashizume o ke kalapu hīmeni kāne Pākē ʻo INTO01. Ua hōʻike ʻia ma ka hua kūlelepaho ke kahakai ʻo Waikīkī, nā hanana hana manawaleʻa o ka ʻoihana hoʻokipa, a me nā manaʻo Mālama Hawaiʻi ma ka mālama ʻana i ko ka Pae ʻĀina ʻo Hawaiʻi mau kumuwaiwai ao kūlohelohe, ke aloha, a me ka lilo ʻana he mea huakaʻi pono. He 60 a ʻoi mea punihia i komo i kekahi hanana lā hānau no ka puʻukani ma kekahi wahi e kālele ana i ka makakau ao kūlohelohe a me nā manaʻo Mālama Hawaiʻi. Ua hōʻikeʻike ʻo HTC ma ua hanana nei, a he hula pū kekahi. Ua kau nā me komo i ka māpoho ʻōmaʻomaʻo i mea e palekana ai a e ʻike ʻia ai ka makakau i ke ao kūlohelohe. Ua hōʻike ʻia mai na kekahi mea punihia, “I want to travel to Mika's hometown, join the team of environmental protection volunteers, and gain a deeper understanding of Hawaiian culture." He 100,000 nānā ʻia ʻana o kēia hua kūlelepaho, a he 6,000 manaʻo i waiho ʻia.