កម្មវិធីទាំងនេះ នឹងប្រព្រឹត្តិទៅនៅតាមទីតាំងនានាក្នុងរាជធានីភ្នំពេញ ដូចជានៅឆាកសម្ដែងសិល្បៈខ្មែរអមតៈ បរិវេណសារមន្ទីរជាតិ សាកលវិទ្យាល័យនានា មជ្ឈមណ្ឌលធនធានសោតទស្សន៍បុប្ផាណា វិទ្យាស្ថានបារាំងប្រចាំកម្ពុជាជាដើម។ ចំពោះការសម្ដែងនៅសារមន្ទីរជាតិ សំបុត្រចូលទស្សនាតម្លៃ ២០០០០រៀល និងអាចរកសំបុត្របានតាមរយៈលេខ
0968839884 / 098512255 ឬការិយាល័យសិល្បៈខ្មែរអមតៈ
។ ឥតគិតថ្លៃសម្រាប់កម្មវិធីបញ្ចាំងភាពយន្ត ពិព័រណ៍ និងកិច្ចពិភាក្សានានា។ ចំពោះសិក្ខាសាលា យើងតម្រូវឲ្យមានការចុះឈ្មោះជាមុន
នៅទីនេះ ឬអ៊ីម៉ែលទៅកាន់
[email protected]
សម្រាប់និស្សិតតាមសាកលវិទ្យល័យដែលយើងរៀបចំកម្មវិធី នឹងទទួលបានសំបុត្រពិសេស។
កញ្ញា យ៉ុន សុខខន ប្រធានកម្មវិធីអភិវឌ្ឍន៍សិល្បៈ និងជាអ្នកពិនិត្យស្នាដៃសម្រាប់ រដូវវប្បធម៌ បានថ្លែងចំណាប់អារម្មណ៍ថា
- “យើងខ្ញុំសង្ឃឹមថា នឹងមានអ្នកចូលរួមកម្មវិធីរយៈពេលបីខែនេះ ដើម្បីស្វែងយល់អំពី អត្តសញ្ញាណ កាន់តែស៊ីជម្រៅ។ យើងបានសម្រិតសម្រាំងកម្មវិធីដែលមានស្នាដៃសម្ដែងចម្រុះគ្នា ព្រមទាំងមានការចូលរួមពីប្រជាជនកម្ពុជាគ្រប់តំបន់ ដែលនេះបានបង្ហាញពីភាពចម្រុះនៃវប្បធម៌របស់ប្រទេសយើង។ ស្នាដៃមួយចំនួនចំនួនកើតចេញពីលទ្ធផលការងារតាមកម្មវិធីនីមួយៗរបស់សិល្បៈខ្មែរអមតៈ ដូចជាសិក្ខាសាលា មូលនិធិ និងការផ្ដល់កញ្ចប់រៀបចំដំឡើងស្នាដៃ។ ហើយមួយចំនួនទៀត ជាស្នាដៃរបស់ក្រុមសិល្បករ និងអង្គការជាដៃគូរបស់យើង។ នេះជាលើកទីមួយហើយដែលយើងបានរៀបចំ រដូវវប្បធម៌ដ៏មានសារៈសំខាន់នេះ ហើយយើងជឿជាក់ថា កម្មវិធីនេះនឹងក្លាយជាអនុស្សាវរីយ៍ដ៏ល្អ និងមិនអាចបំភ្លេចបានសម្រាប់ទស្សនិកជន និងសិល្បករ។”
អ្នកស្រី សូ ភីណា ប្រធានកម្មវិធីចំណេះដឹង បណ្ដាញ និងគោលនយោបាយវប្បធម៌ និងជាអ្នកពិនិត្យកម្មវិធីមនុស្សជាតិ នៃរដូវវប្បធម៌នេះ បានថ្លែងចំណាប់អារម្មណ៍ថា៖
- "ខ្ញុំពិតជាសប្បាយរីករាយណាស់ដែលកម្មវិធីរដូវវប្បធម៌នេះ ត្រូវបានសម្រិតសម្រាំងយ៉ាងពិសេស ហើយរាល់ស្នាដៃសម្ដែង និងឱកាសនានា គឺសម្រាប់ទស្សនិកជន និងសិល្បករ ស្វែងយល់ ធ្វើការឆ្លុះបញ្ចាំង និងពិភាក្សា ទាំងក្នុង និងក្រោយការសម្ដែង។ ក្រៅពីចូលរួមទស្សនាហើយ អ្នកចូលរួមអាចជជែកពិភាក្សាជាមួយសិល្បករ ថាតើហេតុអ្វីបង្កើតស្នាដៃនេះឡើង តើបង្កើតឡើងដោយរបៀបណា និងថាតើស្នាដៃទាំងនេះ មានអត្ថន័យយ៉ាងណាដល់ពួកគេ។”
លោក អ៊ូ ប៊ុនថេង មកពីអង្គការអេពិកអាត ដែលនឹងសម្ដែងស្នាដៃ «ក្មេងឃ្វាលក្របី» និងដឹកនាំសិក្ខាសាលារាំច្នៃប្រឌិត បានថ្លែងចំណាប់អារម្មណ៍ថា
- "ខ្ញុំគិតថារដូវវប្បធម៌ «ការស្វែងរកអត្តសញ្ញាណ» នឹងជួយឲ្យយុវជនយុវតីស្គាល់អំពីតម្លៃ និងអត្តសញ្ញាណរបស់ខ្លួនកាន់តែច្បាស់ និងទទួលយក ព្រមទាំងឲ្យតម្លៃទៅលើអត្តសញ្ញាណរបស់ជនដ៍ទៃទៀតដោយមិនប្រកាន់នូវ ពណ៌សម្បុរ សាសនា ជំនឿ ពិការភាព យេនឌ័រ....។ អេពិកអាត មានកិត្តិយស និង រីករាយដែលមានចំណែកចូលរួមក្នុងសកម្មភាពនេះ និងបានបង្ហាញនូវការងារដែលយើងកំពុងធ្វើលើវិស័យពិការភាព ក៍ដូចជាបានបង្ហាញនូវសមត្ថភាព និងជំនាញរបស់សិល្បករជាជនពិការរបស់យើង សំដៅដល់ការបង្ហញនូវអត្តសញ្ញាណនេះឯង។"