ភ្នំពេញ, ថ្ងៃទី៣ កញ្ញា ២០១៨
– នៅខែមករា តន្ត្រីករប្រពៃណី និងអ្នកចម្រៀងវ័យក្មេងទាំងនៅកម្ពុជា តំបន់មេគង្គ និងជុំវិញពិភពលោក នឹងងមកជួបជុំគ្នានៅមជ្ឈមណ្ឌលបេតិកភណ្ឌ របស់អង្គការសិល្បៈខ្មែរអមតៈ ក្នុងខេត្តសៀមរាប ដើម្បីប្រារព្ធកម្មវិធីសិក្ខាសាលាតន្ត្រីអេសណូ
កម្ពុជា
លើកទីមួយនៅកម្ពុជាដែលមានរយៈពេលមួយសប្ដាហ៍។ នេះជាគម្រោងផ្ដួចផ្ដើមឡើងដោយអង្គការសិល្បៈខ្មែរអមតៈ និងជាផ្នែកមួយនៃកម្មវិធីអេសណូ (Ethno)។ សិល្បករទាំង ៣០រូប ជំនាញ និងមានវប្បធម៌ខុសៗគ្នា នឹងចំណាយពេលមួយសប្ដាហ៍ស្នាក់នៅរួមគ្នា ស្វែងយល់ពីគ្នាទៅវិញទៅមក ចែករំលែកចំណេះដឹង និងបង្កើតស្នាដៃតន្ត្រីជាមួយគ្នា ហើយនឹងត្រូវសម្ដែងជូនសាធារណជនទស្សនាចំនួន ២លើក នៅថ្ងៃទី១២ និង ១៣ ខែមករា នៅខេត្តសៀមរាប។
កម្មវិធី អេសណូ បានរៀបចំធ្វើឡើងអស់រយៈពេល ៣០ឆ្នាំមកហើយ នៅតាមបណ្ដាប្រទេសចំនួន ២០។ អ្នកចូលរួមជាតន្ត្រីករវ័យក្មេងដែលមានបេសកកម្មររក្សាមរតកវប្បធម៌ពីគ្រប់ទិសទីជុំវិញពិភពលោកឲ្យនៅឋិតថេរជាមួយមនុស្សជំនាន់ថ្មី។ សិល្បករផ្ទេរចំណេះដឹងតន្ត្រី និងវប្បធម៌ពីម្នាក់ទៅម្នាក់តាមរបៀបបុរាណ។ អ្នកចូលរួម គឺជាសិស្ស ក៏ជាគ្រូដែរក្នុងពេលជាមួយគ្នា។ តាមរយៈកម្មវិធីលម្អិតរួមមាន ការហាត់រៀនជាមួយគ្នា និងការសម្ដែង សិល្បករកម្មវិធីអេសណូកម្ពុជានឹងអាចផ្សព្វផ្សាយតន្ត្រីរបស់ពួកគេ។ តាមរយៈការប្រគំ និងសម្ដែងមរតកវប្បធម៌អរូបីជាតិសាសន៍នីមួយៗ សិក្ខាសាលាតន្ត្រីអេសណូកម្ពុជា នឹងជាឱកាសមួយសម្រាប់សិល្បករបង្កើនការគោរព និងអធ្យាស្រ័យគ្នា ព្រមទាំងការចេះផ្ដល់តម្លៃលើវប្បធម៌គ្នាទៅវិញទៅមកតាមរយៈតន្ត្រី។
