ᐊᐃᕐᕆᓕ 2020                                                               
ᐊᑦᑕᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓇᓱᐊᕈᓯᖅ ᒪᐃ 3-9, 2020  
ᐱᓕᕆᐊᖃᕐᓂᖅ ᑲᒪᒋᔭᖃᑦᑎᐊᕐᓂᒃᑯᑦ ᓄᕙᒡᔪᐊᕐᓇᖅ-19 ᐱᑕᖃᖅᑎᓪᓗᒍ

ᓄᓇᕐᔪᐊᖅ ᐃᓱᒪᒋᔭᐅᓯᒪᙱᑦᑐᒥ ᐊᓯᔾᔨᖅᑐᒻᒪᕆᖕᓂ ᑕᑯᓯᒪᓕᕐᒪᑦ ᑕᖅᑮᖕᓂᒃ ᒪᕐᕉᖕᓂᒃ. ᐃᖅᑲᓇᐃᔭᖅᑎᐅᔪᑦ ᓄᓇᕗᒥᑦ ᐊᒻᒪ ᓄᓇᑦᓯᐊᕐᒥ ᑐᐊᕕᖅᖢᑎᒃ ᐊᑐᕆᐊᖃᓕᓚᐅᕐᒪᑕ ᐊᓯᙳᕈᑎᐅᔪᓄᑦ ᑕᒪᒃᑯᐊ ᐃᖅᑲᓇᐃᔭᕐᕕᖏᑦ ᐅᓗᕆᐊᓇᖅᑐᒦᖁᓇᒋᑦ ᐊᒻᒪ ᐱᓕᕆᐊᖏᑦ ᐊᐅᓚᔪᓐᓇᕐᓗᑎᒃ ᑲᒪᒋᔭᖃᑦᑎᐊᕐᓂᒃᑯ ᒫᓐᓇ ᐱᓕᕆᕈᓘᔭᕐᓇᖅᑎᓪᓗᒍ.

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᓇᓗᓇᐃᕐᓯᓂᐊᕐᒪᑕ ᐊᑦᑕᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓇᓱᐊᕈᓯᕐᒥᑦ ᖃᕋᓴᐅᔭᒃᑯᑦ 2020-ᒥᑦ. ᐱᓇᓱᐊᕈᓯᓕᒫᖅ, ᓴᖅᑭᑎᑦᑎᓯᒪᓂᐊᖅᑐᒍᑦ ᐃᑲᔪᕈᑎᐅᔪᓐᓇᖅᑐᓂᒃ, ᑐᓴᒐᒃᓴᓂᒃ, ᐊᒻᒪ ᑐᑭᒧᐊᕈᑎᒃᓴᓂᒃ ᐅᑯᓇᙶᖅᑐᓂᒃ ᐋᓐᓂᐊᖃᕐᓇᒋᑦᑐᓕᕆᓂᕐᒧᑦ ᐱᓕᕆᔨᒻᒪᕆᖕᒥ ᐊᐱᖅᑯᑎᒋᔭᐅᕙᒃᑐᓂᒃ ᑭᐅᔾᔪᑎᓄᑦ. ᒪᑯᓇᙵᑦ ᐅᓗᕆᐊᓇᙱᑦᑐᒦᓐᓂᖅ ᐃᖅᑲᓇᐃᔭᖅᕕᒋᓕᖅᑕᕐᓂᒃ ᐅᕝᕙᓘᓐᓃᑦ ᐃᖅᑲᓇᐃᔭᕐᕕᒋᓚᐅᑲᒃᑕᕐᓂᒃ, ᒪᐅᖓ ᐱᔪᓐᓇᐅᑎᖏᓐᓄᑦ ᐊᒻᒪ ᐱᓕᕆᐊᒃᓴᖏᓐᓄᑦ ᑕᒪᐃᓐᓂ ᐃᖅᑲᓇᐃᔭᖅᑎᐅᔪᑦ ᐊᒻᒪᓗ ᐆᒥᖓ ᐱᒻᒪᕆᖕᒥ ᐃᓱᒪᒃᑯᑦ ᐋᓐᓂᐊᖃᕐᓂᕐᒥ ᐅᔾᔨᕈᓱᑦᑎᐊᖅᑎᑦᑎᓂᕐᒥᒃ, ᑕᐃᒪᓕ ᓴᖅᑭᑎᑦᑎᓂᐊᖅᑐᒍᑦ ᐃᓚᖏᓐᓂ ᐱᐅᓂᖅᐹᓂᒃ "ᐱᓕᕆᐊᖃᕐᓂᕐᒥᑦ ᓄᕙᒡᔪᐊᕐᓇᖅ-19 ᑕᕝᕙᐅᑎᓪᓗᒍ" ᐃᑲᔫᑎᒃᓴᓂᒃ ᐊᑐᐃᓐᓇᐅᔪᓂᒃ ᐅᑭᐅᕐᑕᖅᑐᕐᒥᑦ ᐃᖅᑲᓇᐃᔭᖅᑎᑦᑎᔨᓄᑦ ᐊᒻᒪ ᐃᖅᑲᓇᐃᔭᖅᑎᓄᑦ.

ᑕᒪᕐᒥ ᐃᖅᑲᓇᐃᔭᕐᕕᐅᔪᑦ ᐊᔾᔨᒌᙱᑦᑑᑎᐅᖕᒪᑕ ᐊᒻᒪᓗ ᐊᔾᔨᒌᙱᑦᑐᓂᒃ ᑲᒪᒋᔭᕆᐊᖃᖅᖢᑎᒃ. ᐊᒥᓱᑦ ᐃᖅᑲᓇᐃᔭᖅᑎᐅᔪᑦ ᐊᔾᔨᒋᙱᑕᖓᓂ ᐱᓕᕆᐊᖓᑕ ᐱᓕᕆᐊᖃᓕᕐᖢᑎᒃ ᐊᒻᒪᓗ ᐱᓕᕆᐊᕆᕙᙱᑕᖏᓐᓂᒃ ᐱᓕᕆᐊᖃᓕᕐᖢᑎᒃ ᐅᕝᕙᓘᓐᓃᑦ ᐱᓕᕆᐊᕆᙱᑯᑖᒃᑕᖓᓂ ᐱᓕᕆᐊᖃᓕᕐᖢᑎᒃ. ᐃᓚᖏ ᐃᖅᑲᓇᐃᔭᕐᕕᐅᔪᑦ ᐃᖅᑲᓇᐃᔭᖅᑎᖏᓐᓂᒃ ᐊᖏᕐᕋᖏᓐᓂᒃ ᐃᖅᑲᓇᐃᔭᖅᑎᑦᑎᓯᒪᓕᕐᑐᑦ. ᐊᒥᓱᑦ ᐃᖅᑲᓇᐃᔭᕐᕕᐅᔪᑦ ᒪᑐᔭᐅᔭᕆᐊᖃᓚᐅᕐᑐᑦ ᐊᒻᒪᓗ ᖃᓄᖅ ᐅᓗᕆᐊᓇᙱᓪᓗᑎᒃ ᒪᑐᐃᒃᑲᓐᓂᕈᓐᓇᓛᕐᒪᖔᑦ. ᐊᓯᖏᑦᑕᐅ ᐃᖅᑲᓇᐃᔭᐃᓐᓇᖅᑐᑦ ᖁᐊᕐᓵᕐᓇᖅᑐᖃᔭᑦᑐᓂᒃ ᐱᓕᕆᕝᕕᖏᓐᓂᒃ ᐅᕝᕙᓘᓐᓃᑦ ᑕᒪᑐᒪᓂ ᐅᐱᕐᖔᖑᓕᕐᓂᖓᓄᑦ ᐊᑐᖅᑕᐅᔭᕆᐊᖃᒻᒪᕆᒃᑐᓂᒃ.

ᐋᓐᓂᐊᖃᕐᑕᐃᓕᑎᑦᑎᓂᖅ ᐊᒻᒪ ᐅᓗᕆᐊᓇᖅᑐᒦᑎᑦᑎᑦᑕᐃᓕᓂᖅ ᐱᒻᒪᕆᐅᖕᒪᑦ, ᖃᓄᐃᑦᑐᑐᐃᓐᓇᐅᒐᓗᐊᖅᐸᑦ ᐃᖅᑲᓇᐃᔭᕐᕕᒋᔭᖓ. ᑕᐃᒪᓕ ᐃᓕᔅᓯᓐᓂ ᕿᒥᕐᕈᐊᖁᔨᕗᒍᑦ ᑕᒪᑐᒪᓂ ᐱᓇᓱᐊᕈᓯᕐᒥ ᐃᑲᔫᑎᐅᔪᓐᓇᖅᑐᓂᒃ, ᖃᐅᔨᓴᕐᓗᒍ ᐃᖅᑲᓇᐃᔭᕐᕕᖕᓂ ᐊᑐᖅᑕᐅᔭᕆᐊᖃᓕᕐᑐᑦ, ᐊᒻᒪᓗ ᓴᖅᑭᑎᓯᒪᓗᒋᑦ ᐃᖅᑲᓇᐃᔭᖅᑎᓕᒫᓐ ᐱᔪᓐᓇᐅᑎᖏᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐅᓗᕆᐊᓇᙱᑦᑐᒥ ᐃᖅᑲᓇᐃᔭᕐᕕᖃᕐᓂᕐᒥᓐ.

ᐅᕙᑦᑎᓐᓂ ᑕᑯᓇᓱᖃᑦᑕᕆᑦᑎ ᑐᓴᐅᒪᔾᔪᑎᓕᕆᓂᒃᑯᑦ ᒪᑯᓇᓂ ᕙᐃᔅᐳᒃᑯᑦ ᐊᒻᒪ ᑐᕕᑐ ᒪᑯᓄᖓ ᐃᑲᔫᑎᒃᓴᑦᑎᐊᕚᓗᖕᓄᑦ. ᐊᐱᖅᑯᑎᒃᓴᖃᕈᔅᓯ, ᐃᓱᒫᓘᑎᖃᕈᔅᓯ, ᐅᕝᕙᓘᓐᓃᑦ ᐅᖃᓪᓚᖃᑎᖃᕆᐊᖃᕈᕕᑦ ᐅᓗᕆᐊᓇᙱᑦᑐᓕᕆᓂᕐᒧᑦ ᖃᐅᔨᓴᖅᑎᒥᑦ ᐅᕙᑦᑎᓐᓂ ᖃᐅᔨᑎᑦᑎᓗᓯ ᐅᓪᓗᒥ. 


ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᔨᑦᑎᕋᐅᑎᖏᓐᓄᑦ ᓄᑖᖑᓛᑦ  

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᐱᓕᕆᖕᒪᑕ ᐃᑲᔪᖅᖢᑎᒃ ᐊᖓᔪᖅᑳᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᒪᓕᖁᔭᖏᓐᓂᒃ ᓄᓇᕗᒥ ᐊᒻᒪ ᓄᓇᑦᓯᐊᕐᒥ ᐊᒻᒪᓗ ᐃᑲᔪᖅᖢᑎᒃ ᐃᖅᑲᓇᐃᔭᖅᑎᑦᑎᔨᓂᒃ ᐊᒻᒪ ᐃᖅᑲᓇᐃᔭᖅᑎᓂᒃ ᐅᔾᔨᕈᓱᑦᑎᐊᕋᓱᖕᓂᕐᒥᑦ ᖁᐊᕐᓵᕐᓇᖅᑎᑦᑕᐃᓕᓪᓗᒍ ᓄᕙᒡᔪᐊᕐᓇᖅ-19 ᐱᑕᖃᓕᖅᑎᑦᑕᐃᓕᓂᕐᒥ ᐊᒻᒪᓗ ᓯᕗᓂᒃᓴᒧᑦ. ᑕᑯᒋᐊᕐᓗᒋ ᐊᑖᓃᑦᑐᑦ ᑭᖑᓪᓕᕐᐹᓂ ᐊᓯᖑᖅᑕᐅᔪᓂ ᐊᒻᒪ ᓄᑖᙳᕆᐊᖅᑕᐅᓯᒪᔪᓂᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐱᔨᑦᑎᕋᐅᑎᖏ. ᓇᓂᓯᔪᓐᓇᖅᑐᑎᑦ ᐱᒻᒪᕆᐊᓗᖕᓂ ᓄᑖᙳᕆᐊᕈᑎᓂ ᐊᑐᖅᐸᓪᓕᐊᓂᖏᑦᑎᒍᑦ ᐅᕙᓂ   ᓄᕙᒡᔪᐊᕐᓇᖅ-19 ᒪᒃᐱᒐᕐᒥ ᖃᕋᓴᐅᔭᒃᑯ ᓴᖅᑭᔮᒐᑦᑎᓐᓂ.

ᐃᖅᑲᐅᒪᒋ: ᓄᑖᙳᕆᐊᕐᓗᒋᑦ ᐊᑭᓕᕐᓱᐃᓂᕐᒨᕋᔭᖅᑐᓄᑦ ᐃᓱᒪᒋᔭᑎᑦ

ᐊᑭᓕᖅᓱᖅᑕᐅᒍᑎᒃᓴᐅᓇᔭᖅᑐᑦ ᓇᓚᐅᑦᑖᕆᔭᐅᓂᑯᑦ ᑐᓂᔭᐅᔪᓐᓇᖅᑐᖅ ᐊᓯᔾᔨᖅᑕᐅᓗᑎᒡᓘᓐᓃᑦ ᖃᕋᓴᐅᔭᑎᒍᑦ ᐅᑯᑎᒎᓇᖅ WSCC Connect.  ᖃᕋᓴᐅᔭᒃᑯᑦ ᑐᑭᒧᐊᕈᑎᓂᒃ ᑕᑯᔪᓐᓇᖅᑐᓯ ᐅᕘᓇ  WSCC Connect ᐃᑲᔪᕐᕕᒃᑯᑦ . ᐃᑲᔪᖅᑕᐅᒃᑲᓐᓂᕈᒪᒍᕕᑦ, ᑎᑎᕋᕐᕕᒋᓗᒋᑦ ᖃᕋᓴᐅᔭᒃᑯᑦ  ᐃᖅᑲᓇᐃᔭᖅᑎᓄᑦ ᐱᔨᑦᑎᕋᐅᑎᓕᕆᔨᓄᑦ .

ᐃᖅᑲᓇᐃᔭᖅᑎᐅᑉ ᐊᑭᓕᖅᓱᕆᐊᖃᖅᑕᖏᓐᓄᑦ ᑐᓴᒐᒃᓴᖅ

ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19, ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᐋᖅᑭᒃᓯᓚᐅᕐᒪᑕ   ᑮᓇᐅᔭᑎᒍᑦ ᐃᑲᔫᑎᒃᓴᑦ ᐃᖅᑲᓇᐃᔭᖅᑎᑦᑎᔨᓄ ᐅᓇ ᐅᖓᕙᕆᐊᖅᑕᐅᓪᓗᓂ ᐊᑭᓖᓂᕐᒧᑦ ᐃᓱᓕᕝᕕᒃᓴᖓ ᐋᒡᒌᓯ 1, 2020-ᒧᐊᖅᑕᐅᓪᓗᓂ ᐊᒻᒪᓗ ᑭᖑᕙᕐᓂᕐᒧᑦ ᕿᑐᕐᖏᐅᕈᑎ ᐲᖅᑕᐅᓪᓗᑎᒃ. ᐃᖅᑲᓇᐃᔭᖅᑎᑦᑎᔨᐅᔪᑦ ᑐᓂᔭᐅᓂᐊᕐᑐᑦ ᐋᖅᑭᒋᐊᕐᓯᒪᔪᓂᒃ ᐊᑭᓕᐅᑎᒃᓴᒧᑦ ᓇᓗᓇᐃᒃᑯᑎᓂᒃ ᑭᖑᓪᓕᕐᒥ ᐊᑭᓕᒃᓴᖃᐅᑎᑖᕈᑎᒃ.

ᑕᐃᒪᓕ ᐃᖅᑲᓇᐃᔭᖅᑎᑦᑎᔪᓕᒫᑦ ᐅᖓᕙᕆᐊᖅᑎᑕᐅᔭᕆᐊᖃᙱᑦᑐᑦ ᐊᑭᓖᓂᕐᒧᑦ ᑲᔪᓯᔭᕆᐊᖃᖅᑐᑦ ᐋᖅᑭᒃᓯᒪᔪᓂᒃ ᐊᑭᓖᒍᑎᒃᓴᓂᒃ ᐅᑯᓄᖓ ᐅᖄᓚᓗᑎᒃ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ ᐃᖅᑲᓇᐃᔭᖅᑎᑦᑎᔨᐅᑉ ᐊᑭᓕᐅᑎᒃᓴᖏᓐᓄᑦ ᐊᑭᖃᙱᖢᓂ ᐅᕗᖓ 844 238-5008.

ᖃᐅᔨᒃᑲᓐᓂᕈᓐᓇᖅᑐᓯ ᐊᑭᓖᒍᑎᐅᔪᓐᓇᖅᑐᓂᒃ ᐅᓇ ᑕᑯᒋᐊᕐᓗᒍ WSCC Connect.
 
ᐃᑲᔪᕈᑎᒃᓴᐃᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏ ᐃᓚᓯᓯᒪᔪᑦ ᓄᕙᒡᔪᐊᕐᓇᖅ-19 ᐃᑲᔫᑎᒃᓴᓄᑦ ᒪᒃᐱᒐᖅᒥ ᑐᓴᐅᒪᑎᑦᑎᒍᑎᓂᒃ ᑕᒪᐃᓐᓂ ᐃᖅᑲᓇᐃᔭᖅᑎᑦᑎᔨᐅᔪᑦ ᐊᑐᕆᐊᖃᖅᑕᖏᓐᓂᒃ, ᐱᖃᑎᖃᕐᓗᑎᒃ ᐃᖅᑲᓇᐃᔭᖅᑎᖏᓐᓂᒃ, ᖃᐅᔨᓴᕐᓂᕐᒥᒃ ᖁᐊᕐᓵᓇᕋᔭᖅᑐᓂᒃ ᐊᒻᒪ ᒪᓕᒃᑕᐅᔭᕆᐊᓕᖕᓂ ᐋᖅᑭᒃᓱᐃᓗᑎᒃ ᐃᖅᑲᓇᐃᔭᕐᕕᖏᓐᓂᒃ. ᐅᑯᐊ ᐃᑲᔪᕈᑎᒃᓴ ᓄᑖᙳᕆᐊᖅᑕᐅᖃᑦᑕᐃᓐᓇᕐᓂᐊᕐᑐᑦ ᐊᑐᐃᓐᓇᖅᑕᖃᓕᕌᖓᑦ. 

ᐃᖅᑲᓇᐃᔭᖅᑎᐅᔪᑦ ᐊᒻᒪ ᐃᖅᑲᓇᐃᔭᖅᑎᑦᑎᔨᖏ ᐊᐱᖅᑯᑎᖃᖅᑐᑦ ᐃᓱᒫᓘᑎᖃᖅᑐᓪᓘᓐᓃᑦ ᐃᖅᑲᓇᐃᔭᕐᕕᖕᒥ ᐋᓐᓂᐊᖃᖅᑕᐃᓕᓂᕐᒧ ᐊᒻᒪ ᐅᓗᕆᐊᓇᙱᑦᑐᒦᓐᓂᕐᒧᑦ ᓄᕙᒡᔪᐊᕐᓇᖅ-19 ᐱᑕᖃᕐᓂᖓᓂᒃ ᑎᑎᕋᕈᓐᓇᖅᑐᑦ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑎᓄᑦ ᖃᕋᓴᐅᔭᒃᑯᑦ ᐅᕙᓂ Covid-19@wscc.nu.ca ᐅᕝᕙᓘᓐᓃᑦ ᐅᖄᓚᓗᓯ 1-800-661-0792-ᒧᑦ. 

ᐅᖃᓪᓚᖃᑎᖃᕋᔭᖅᑐᑎᑦ ᖃᓄᐃᑎᑦᑎᑦᑕᐃᓕᓂᕐᒧᑦ ᖃᐅᔨᓴᖅᑎᒥ ᐊᐱᖅᑯᑎᑎ ᑭᐅᔭᐅᓇᔭᕐᒪᑕ, ᐊᒻᒪᓗ ᐃᑲᔪᖅᑕᐅᒃᑲᓐᓂᕆᐊᖃᕈᕕᓐ, ᖃᓄᐃᑎᑦᑎᑦᑕᐃᓕᓂᕐᒧᑦ ᖃᐅᔨᓴᖅᑎᒥ ᐃᑲᔪᖅᑕᐅᓕᕋᔭᖅᑐᑎ ᖃᐅᔨᓴᕐᓂᕐᒥᑦ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐅᓗᕆᐊᓇᙱᑦᑐᒦᓐᓂᕐᒥ ᐃᖅᑲᓇᐃᔭᕐᕕᖕᓂ.  

ᑐᓂᓯᔪᓐᓇᕐᒥᔪᓯ ᐅᓂᒃᑳᓂᒃ ᐅᓗᕆᐊᓇᓗᐊᖅᑐᓄᑦ ᐃᖅᑲᓇᐃᔭᕐᕕᖕᓄᑦ ᖃᕋᓴᐅᔭᒃᑯᑦ ᐅᕘᓇ WSCC Connect.
 
ᐅᔭᕋᒃᓯᐅᕐᕕᖕᒥᑦ ᑐᐊᕕᕐᓇᖅᑐᓕᕆᓂᖅ ᐊᒻᒪ ᐅᔭᕋᒃᓯᐅᕐᑏᑦ ᓯᓚᒥ ᓂᕆᓂᖏᑦ

ᐅᓇ 2020 ᐅᔭᕋᒃᓯᐅᕐᕕᖕᒥᑦ ᑐᐊᕕᕐᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᖅ ᐊᒻᒪ ᐅᔭᕋᒃᓯᐅᕐᑏᑦ ᓯᓚᒥ ᓂᕆᓂᒃᓴᖓ ᓄᖅᑲᖅᑎᑕᐅᔪᖅ ᐱᔾᔪᑎᒋᓪᓗᒐ ᒫᓐᓇ ᓄᕙᒡᔪᐊᕐᓇᖅ-19 ᐋᓐᓂᐊᕕᒡᔪᐊᕐᓇᖅ.

ᐅᔭᕋᒃᓯᐅᕐᕕᖕᒥᑦ ᑐᐊᕕᕐᓇᖅᑐᓕᕆᓂᕐᒧᑦ ᐱᒡᒍᓴᐅᑎᕙᖕᓂᖅ ᐊᔪᕈᓐᓃᕐᓴᐅᑎᐅᕗᖅ ᐱᓪᓚᕆᖕᒥ ᐃᓅᓯᕐᒥ ᓴᐳᑎᓯᒪᔪᓐᓇᕐᓂᕐᒧᑦ. ᐅᓇ ᐃᓕᓐᓂᐊᕈᑎᐅᕙᒃᑐᖅ ᐊᓯᖏᓐᓂᒃ ᐱᒡᒍᓴᐅᑎᖃᑕᐅᔪᓂᒃ, ᐊᒻᒪ ᖃᐅᔨᖃᑦᑕᐅᑎᒍᓐᓇᖅᖢᑎᒃ ᐱᐅᓂᖅᐹᓂᒃ ᐊᑐᒐᒃᓴᐅᔪᓐᓇᖅᑐᓂᒃ ᐊᒻᒪᓗ ᓄᑖᓂᒃ ᐱᖁᑎᐅᕙᓪᓕᐊᔪᓂᒃ, ᐊᒻᒪ ᐅᓇ ᐱᒻᒪᕆᐅᓛᖑᓪᓗᓂ, ᐃᑲᔪᕈᑎᐅᓪᓗᓂ ᐃᖅᑲᓇᐃᔭᖅᕕᒋᕙᒃᑕᕗᑦ ᐅᓗᕆᐊᓇᙱᓐᓂᕐᓴᐅᑎᑦᑎᓂᕐᒥᓐ.

ᒫᓐᓇᓕ ᓂᕆᐅᒻᒪᕆᖕᓂᐊᖅᑐᒍᑦ ᐱᓕᕆᖃᑎᒌᓂᒃ, ᑲᑐᔾᔨᖃᑎᒌᓂᒃ, ᐃᑲᔪᖅᑎᓂᒃ, ᑮᓇᐅᔭᑎᒍᑦ ᐃᑲᔪᖅᑐᐃᔪᓂᒃ, ᐱᓕᕆᐊᒧᑦ ᐱᓕᕆᖃᑎᒃᓴᓂᒃ ᐊᒻᒪ ᑕᐅᑐᒃᑐᒃᓴᓂᒃ ᐅᑎᕐᓂᐊᕐᑎᓪᓗᒋᑦ ᔭᓗᓇᐃᒧᑦ 2021-ᒥ 63-ᒋᓕᖅᑕᖓᓂ ᐊᕐᕌᒍᑕᒫᓐ ᐅᔭᕋᒃᓯᐅᕐᕕᖕᒥ ᑐᐊᕕᕐᓇᖅᑐᓕᕆᓂᕐᒧᑦ ᐱᒡᒍᓴᐅᑎᓂᕐᒥᓐ. 



wscc.nt.ca   /  1.800.661.0792   *   wscc.nu.ca  /  1.877.404.4407