ᔪᓚᐃ 2026


ᐃᓚᒋᔭᐅᒋᑦ ᐋᖅᑭᒃᓱᖅᑕᐅᕙᓪᓕᐊᑎᓪᓗᒍ ᐊᑦᑕᕐᓇᖅᑐᖃᙱᑎᑦᑎᓂᖅ ᐅᑭᐅᖅᑕᖅᑐᒥᒃ!

ᖃᐅᔨᒪᕖᑦ ᑖᒃᑯᐊ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᑲᒪᒋᔭᐅᓲᖑᔪᑦ ᐊᐅᓚᑦᑎᓂᕐᒧᑦ ᑲᑎᒪᔨᓂᑦ ᐃᖅᑲᓇᐃᔭᖅᑎᓄᑦ, ᐃᖅᑲᓇᐃᔭᕐᕕᖕᓄᑦ, ᐃᓄᓕᒫᓂᒃ ᐱᔪᒥᒍᓱᒃᑐᓂᒃ ᑭᒡᒐᖅᑐᖅᑕᐅᓂᕐᒧᑦ? ᑕᑎᖃᖃᑦᑕᕐᒥᔪᒍᑦ ᓂᒋᖏᓐᓂᒃ ᐃᓱᒪᒋᔭᖏᓐᓂᓪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᑲᑎᒪᔨᕋᓛᑦ ᐅᖃᐅᓯᒃᓴᖃᓲᑦ ᒪᓕᒐᒃᓴᓂᒃ ᐊᓯᔾᔨᖅᑐᓂᒃ ᐊᑐᐃᕙᒃᑐᓂᒃ ᐅᑭᐅᖅᑕᖅᑐᒥ ᓇᖕᒥᓂᕆᐅᔪᓄᑦ ᐃᖅᑲᓇᐃᔭᖅᑎᓄᓪᓗ.


ᒫᓐᓇ ᐅᒃᑯᐃᖓᔪᖅᑕᓕᒃ ᐃᓂᒥ ᐊᐅᓚᑦᑎᓂᕐᒧᑦ ᑲᑎᒪᔨᒧᑦ, ᐊᑦᑕᕐᓇᖅᑕᐃᓕᒪᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᓐᓄᑦ, ᐊᒻᒪ ᐅᔭᕋᖕᓂᐊᕐᕕᖕᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐅᖃᐅᔾᔨᒋᐊᖅᑎᓄᑦ ᑲᑎᒪᔨᕋᓛᓄᑦ. ᐃᖅᑲᓇᐃᔭᕐᕖᑦ, ᐃᓚᐅᕙᒃᑐᑦ ᐃᖅᑲᓇᐃᔭᖅᑏᑦ, ᐃᓚᒋᔭᐅᔪᓪᓘᓐᓃᑦ ᐃᓄᑐᐃᓐᓇᕐᓂᑦ ᐱᓕᕆᔪᒪᓪᓚᕆᒃᑐᑦ ᐅᑭᐅᖅᑕᖅᑐᒥ ᐃᖅᑲᓇᐃᔭᕐᕖᑦ ᐊᑦᑕᕐᓇᙱᓐᓂᖅᓴᐅᖁᓪᓗᒋᑦ ᐊᔭᐅᖅᑐᖅᑕᐅᔪᑦ ᐆᒃᑐᖁᔭᐅᓪᓗᑎᒃ. ᐊᑐᓂ ᐃᓂ ᑲᑎᒪᓲᑦ ᑕᖅᑮᑦ ᐱᖓᓱᑦ ᐊᓂᒍᕌᖓᑕ, ᓇᓕᐊᒃᑯᑐᐃᓐᓇᖅ ᖃᕆᓴᐅᔭᒃᑯᑦ ᓇᔫᑎᓗᑎᒡᓘᓐᓃᑦ. ᑕᑯᒋᐊᒃᑭᑦ ᑎᑎᕋᖅᓯᒪᔪᑦ ᐱᕕᒃᓴᐃᑦ ᑐᑭᓯᒋᐊᒃᑲᓐᓂᕈᒪᒍᕕᑦ ᐱᕕᖃᕆᐊᖃᕐᓂᕐᒧᑦ, ᐊᑭᓕᖅᓱᖅᑕᐅᓂᕐᒧᑦ, ᐊᒻᒪ ᖃᓄᖅᑑᒃᑐᕈᓐᓇᕐᒪᖔᑦ.* ᐃᓚᐅᓕᕆᑦ ᐅᓪᓗᒥ!


*ᖃᐅᔨᒪᓂᐊᖅᐳᑎᑦ: ᑖᒃᑯᐊ ᐅᓪᓗᓕᒫᒧᑦ ᐃᖅᑲᓇᐃᔮᖑᙱᑦᑐᑦ.

 
 

ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᑦ: “ᑲᓴᒃᑕᐅᓂᖅ” ᐋᓐᓂᕐᓂᐅᔪᑦ

“ᑲᓴᒃᑕᐅᓂᖅ” ᖃᓄᐃᓪᓕᓃᑦ ᐊᑐᖅᑕᐅᓲᑦ ᐃᖅᑲᓇᐃᔭᖅᑎ ᐋᓐᓂᕌᖓᑦ ᓲᖃᐃᒻᒪ ᑲᓴᐅᑎᒐᒥᒃ ᐊᐅᓚᔪᒧᑦ ᑭᓱᑐᐃᓐᓇᒧᑦ ᐅᕝᕙᓘᓐᓃᑦ ᑐᓗᖅᑕᐅᒍᑎᒃ ᐱᖁᑎᒧᑦ. ᓲᕐᓗ, ᐃᖅᑲᓇᐃᔭᖅᑎ ᑲᓴᒃᑕᐅᔪᖅ ᓴᓇᕐᕈᑎᒧᑦ ᑲᑕᒃᑎᓪᓗᒍ ᐃᒡᓘᑉ ᖄᖓᓂᑦ, ᖃᖓᑕᔪᖅ ᐱᖁᑎ ᓱᕋᒃᑯᓂ ᐊᑐᖅᑕᐅᑎᓪᓗᒍ, ᐅᕝᕙᓘᓐᓃᑦ ᐃᖏᕐᕋᔪᒧᑦ ᐃᖏᕐᕋᔾᔪᑎᒧᑦ.


2025−ᒥ, ᐃᖅᑲᓇᐃᔮᑦ ᓄᓇᕗᒻᒥ ᓄᓇᑦᓯᐊᒥᓗ ᐊᒥᓲᓛᓂᒃ ᐅᖃᐅᔾᔭᐅᓚᐅᖅᑐᑦ ᑲᓴᒃᑕᐅᓂᕐᒧᑦ ᖃᓄᐃᓪᓕᓂᐅᔪᓂᒃ ᐃᒪᐃᑦᑑᓪᓗᑎᒃ:

  • ᕿᔪᓕᕆᔩᑦ
  • ᐅᖁᒪᐃᑦᑐᓂᒃ ᓄᓇᓯᐅᑎᓂᒃ ᐊᖁᑏᑦ
  • ᓴᓗᒻᒪᖅᓴᐃᔩᑦ
  • ᐅᔭᕋᖕᓂᐊᕐᕕᖕᒥ ᐃᖅᑲᓇᐃᔭᖅᑏᑦ


ᐊᑕᖐᓯᒪᔪᒥᒃ ᖃᓄᖅ ᐊᑲᐅᓛᒃᑯᑦ ᑲᓴᒃᑕᐅᑦᑕᐃᓕᓂᕐᒧᑦ ᐋᓐᓂᖁᓇᒃ ᐃᖅᑲᓇᐃᔭᕐᕕᖕᓂ, ᑕᑯᒋᐊᕐᓗᒍ ᑲᓴᒃᑕᐅᑦᑕᐃᓕᒪᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᑐᕌᖓᓪᓚᑦᑖᖅᑐᑦ ᑎᑎᕋᖅᓯᕕᖕᒥ.

 
 

ᐃᑯᐊᓚᕐᔪᐊᖅᑐᓂᑦ ᐳᔪᖏᑦ: ᐱᔭᕇᖅᓯᒪᕕᐅᒃ ᐅᓗᕆᐊᓇᕈᓐᓇᖅᑐᒥᒃ ᕿᒥᕐᕈᔾᔪᑏᑦ?

ᓄᓇᑦᓯᐊᒥ ᓄᓇᑐᐃᓐᓇᒥ ᐃᑯᐊᓛᖅᑐᖃᖃᑦᑕᓕᕐᒥᖕᒪᑦ ᐱᒋᐊᖅᖢᒍ ᒪᐃ 1−ᒥ ᐃᓱᓕᕝᕕᖃᕐᓗᓂ ᓯᑎᐱᕆ 30−ᒧᑦ. ᑕᒪᓐᓇ ᐊᑐᖅᑎᓪᓗᒍ, ᐱᑕᖃᕐᓂᖅᓴᐅᑐᐃᓐᓇᕆᐊᓕᒃ ᐊᓂᖅᓵᒐᑦᑎᐊᕙᐅᙱᑦᑐᒥᒃ. ᓄᓇᖃᖅᑐᓪᓘᓐᓃᑦ ᓄᓇᕗᒻᒥ ᐱᑕᖃᕐᕕᐅᓚᐅᖅᑐᑦ ᐳᔪᖓᓂᒃ ᐊᕐᕌᓂ ᐱᔾᔪᑕᐅᓪᓗᓂ ᐊᓄᕆ. ᐱᒻᒪᕆᐅᕗᖅ ᓇᐅᑎᖅᓱᖅᐸᒡᓗᑎᑦ ᐊᓂᓵᖅᐸᒃᑕᑦᑕ ᖃᓄᐃᓕᖓᓂᖓᓂ ᖃᐅᑕᒫᑦ. ᑕᐃᒪᐃᓕᐅᕈᓐᓇᖅᑐᑎᑦ ᐅᑯᐊ ᑭᖑᓕᕇᑦ ᒪᓕᒡᓗᒋᑦ: 


  1. ᖃᐅᔨᒋᐊᕐᓗᒍ ᐊᕙᑎᓕᕆᔨᒃᑯᑦ ᑲᓇᑕᒥ ᐊᓂᖅᓵᖅᑐᖅᐸᒃᑕᑦᑕ ᖃᓄᐃᑦᑑᓂᖓᓄᑦ ᐋᓐᓂᐊᖃᖅᑕᐃᓕᒪᓂᕐᒧᑦ ᓇᓗᓇᐃᖅᓯᔾᔪᑏᑦ.
    
  2. ᐃᖅᑲᓇᐃᔭᕐᕕᖕᓄᑦ ᓄᓇᑦᓯᐊᒥ, ᒪᓕᒡᓗᒍ NWT Fire ᑐᓴᒐᒃᓴᐅᒐᔪᒃᑐᓄᑦ ᓄᓇᖓᑕ ᖃᓄᐃᓕᖓᓂᖓᓄᑦ.
    
  3. ᐅᖃᖃᑎᒋᖃᑦᑕᕐᓗᒋᑦ ᐱᓕᕆᖃᑎᑎᑦ ᓇᓗᓇᐃᒃᑯᑕᐃᑦ ᐅᔾᔨᕐᓇᐅᑏᓪᓗ ᒥᒃᓵᓄᑦ ᐳᔪᖅ ᓇᔫᑎᑎᓪᓗᒍ, ᐊᒻᒪ ᐊᔭᐅᖅᑐᕐᓗᒋᑦ ᑐᓴᖅᑕᐅᑎᑦᑎᖃᑦᑕᖁᓗᒋᑦ ᐃᓱᒫᓘᑎᖏᓐᓂᒃ. ᐊᑐᕐᓗᒍ ᓄᓇᐃᓐᓇᕐᒥ ᐃᑯᐊᓛᖅᑐᓂᑦ ᐳᔫᖅᑐᓄᑦ ᓴᓇᕐᕈᑎᒃᑯᕕᖕᒥᑦ ᐅᖃᖃᑎᒌᓐᓂᕐᒧᑦ ᖃᐅᔨᒪᔾᔪᑎᒋᓗᒍ ᐅᖃᖃᑎᒌᖕᓂᔅᓯᓐᓂ.
    
  4. ᐳᔫᕈᓂ ᓯᓚᒥ, ᕿᒥᕐᕈᓗᒋᑦ ᐱᓕᕆᐊᒃᓴᑎᑦ ᐅᓪᓗᕐᒧᑦ ᐊᒻᒪ ᓇᓗᓇᐃᖅᓯᓗᑎᑦ ᐊᑦᑕᕐᓇᙱᒻᒪᖔᑦ ᐱᔭᕇᕆᐊᒃᓴᖅ. ᐱᓕᕆᐊᒃᓴᑎᑦ ᐃᒡᓘᑉ ᐃᓗᐊᓅᖔᕈᓐᓇᖅᐹᑦ? ᐊᔪᕐᓇᙱᑉᐹ ᐱᑎᑕᐅᓗᓂ ᐊᓂᖅᓵᖅᐸᒃᑕᑦᑎᓐᓄᑦ ᓴᓗᒻᒪᖅᓴᐃᔾᔪᑎᓂᒃ ᐃᖅᑲᓇᐃᔭᕐᕕᖕᓂ? ᐱᓕᕆᙱᓚᐅᑲᒍᓐᓇᖅᐲᑦ ᑎᒥᒥᒃ ᐊᑐᕆᐊᓕᖕᓂᒃ ᐱᓕᕆᐊᒃᓴᓂᒃ ᐅᓪᓗᒃᑲᓐᓂᕐᒧᑦ?


ᐃᖅᑲᐅᒪᒋᑦ, ᐳᔫᑉ ᖃᓄᐃᓕᖓᓂᖓ ᐊᓯᔾᔨᖅᐸᓪᓕᐊᕙᖕᒪᑦ ᐃᑲᕐᕋᑕᒫᑦ, ᖃᐅᑕᒫᑦ ᕿᒥᕐᕈᓇᑦᑕᕐᓂᖅ ᓈᒻᒪᙱᑐᐃᓐᓇᕆᐊᓕᒃ. ᓇᐅᑦᑎᖅᓱᕆᑦ ᐊᓯᔾᔨᖅᐸᓪᓕᐊᔪᓂᒃ ᖃᓄᐃᓕᖓᓂᐅᔪᓂᒃ ᐊᒻᒪ ᐊᔭᐅᖅᑐᕐᓗᒋᑦ ᐃᖅᑲᓇᐃᔭᖅᑎᑎᑦ ᐅᖃᓪᓚᖃᑦᑕᖁᓗᒋᑦ ᐊᑐᖅᓯᒪᒍᑎᒃ ᖃᓄᑐᐃᓐᓇᖅ ᓇᓗᓇᐃᕈᑎᓂᒃ ᐅᔪᕐᒥᒃ ᓇᔫᑎᓂᕐᒧᑦ. ᐊᑐᓂ ᐃᖅᑲᓇᐃᔭᕐᕖᑦ ᐱᓕᕆᐊᒃᓴᓖᑦ ᓇᓗᓇᐃᖅᓯᓂᕐᒧᑦ ᐊᑦᑕᕐᓇᙱᒻᒪᖔᑦ ᐃᖅᑲᓇᐃᔭᖅᑏᑦ ᐱᓕᕆᓗᑎᒃ ᐱᓕᕆᐊᒃᓴᖏᓐᓂᒃ.

 
 

ᐅᑎᓕᐅᖅᑕᐅᓂᖅ ᖃᕆᓴᐅᔭᒃᑯᑦ ᓇᓕᖅᑲᖅᑖᕐᓃᑦ

ᐊᖏᔪᒥ ᐅᕝᕙᓘᓐᓃᑦ ᒥᑭᑦᑐᒥ ᓇᖕᒥᓂᖅ ᐱᓕᕆᐊᖃᕈᕕᑦ ᐅᕝᕙᓘᓐᓃᑦ ᐃᕝᕕᑐᐊᖅ ᐱᓕᕆᐊᖃᕈᕕᑦ, ᐅᑯᐊ ᖃᕋᓴᐅᔭᒃᑯᑦ ᐊᑐᖅᐸᓪᓕᐊᔪᑦ ᑎᑎᕋᖅᑕᐅᕙᓪᓕᐊᓂᖏᑦ ᐃᑲᔪᕈᓐᓇᖅᑐᑦ ᐃᓕᓯᓐᓂ.


ᖃᕋᓴᐅᔭᒃᑯᑦ ᐊᑐᖅᐸᓪᓕᐊᔪᓄᑦ ᑎᑎᕋᖅᑕᐅᕙᓪᓕᐊᔪᑦ ᐊᑐᐃᓐᓇᐅᔪᓐᓇᖅᑐᑦ ᖃᐅᔨᒋᐊᑐᐊᕈᒪᒍᔅᓯ ᖃᖓᑐᐃᓐᓇᖅ ᓇᓂᑐᐃᓐᓇᕐᓘᓐᓃᑦ. ᑭᓇᑐᐃᓐᓇᖅ ᐱᖃᖅᑐᖅ WSCC Connect “Payments and Statements” (ᐊᑭᓕᐅᑎᐅᕙᓪᓕᐊᔪᑦ ᐊᒻᒪ ᐊᑐᖅᑕᐅᕙᓪᓕᐊᔪᓄᑦ) ᐊᑐᖃᑦᑕᖅᑐᖅ ᖃᕋᓴᐅᔭᒃᑯᑦ ᑎᑎᕋᕐᕕᐅᖃᑦᑕᕋᔭᖅᑐᖅ ᐅᓂᒃᑲᐅᓯᐅᕙᓪᓕᐊᔪᑦ ᐊᑐᐃᓐᓇᐅᓕᕌᖓᑕ. ᐊᒻᒪ ᑕᑯᒋᐊᕈᓐᓇᖅᖢᓯᐅᒃ ᐅᓂᒃᑳᖑᕙᓪᓕᐊᔪᑦ ᐅᕝᕙᓘᓐᓃᑦ ᖃᕋᓴᐅᔭᕐᓄᑦ ᐋᕿᒃᑕᐅᑎᑦᑐᓐᓇᖅᖢᒋᑦ ᐊᕐᕌᒍᑦ ᐱᖓᓱᓄᑦ.


ᐊᑎᓕᐅᑐᐃᓐᓇᕆᐊᖃᓕᖅᐲᑦ? ᖃᐅᔨᒋᐊᕐᓗᒍ 3−ᐊᑐᖅᑕᐅᔪᓂᑦ ᐊᑐᐊᒐᐃᑦ ᐊᒻᒪ ᐊᑎᓕᐅᕐᓗᑎᑦ ᐅᓪᓗᒥ!


ᐊᐱᖅᑯᑏᑦ? ᐅᖃᓪᓚᖃᑎᖃᕈᒪᒍᕕᑦ ᐃᖅᑲᓇᐃᔮᖃᖅᑎᑦᑎᔨᓄᑦ ᐱᔨᑦᑎᖅᑎᒥᒃ, ᑎᑎᕋᕐᓗᑎᑦ ᐃᕐᖐᓈᖅᑕᐅᑎᒃᑯᑦ employer@wscc.nt.ca ᐅᖃᓗᒡᕕᒋᓗᒍᓘᓐᓃᑦ 1-800-661-0792 ᓄᓇᑦᓯᐊᕐᒧᑦ ᐅᕝᕙᓘᓐᓃᑦ, ᐃᕐᖐᓈᖅᑕᐅᑎᒃᑯᑦ employernu@wscc.nu.ca ᐅᖃᓗᒡᕕᒋᓗᒍᓘᓐᓃᑦ 1-877-404-4407 ᓄᓇᕗᒻᒧᑦ.

 
 
 
 

ᐊᑐᐊᒐᕐᓄᑦ ᑐᓴᒐᒃᓴᑦ 

ᑖᒃᑯᐊ ᐊᐅᓚᑦᑎᓂᕐᒧᑦ ᑲᑎᒪᔩᑦ ᐊᖏᖅᓯᓚᐅᖅᑐᑦ ᐅᑯᓂᖓ ᓄᑖᓂᒃ ᐊᑐᐊᒐᕐᓂᒃ ᔫᓂ 2026−ᒥ ᑲᑎᒪᑎᓪᓗᒋᑦ.


  • ᐊᑐᐊᒐᖅ 04.17, ᐊᑭᖓ ᐃᓅᓇᓱᐊᕐᓂᕐᒧᑦ ᐋᖅᑭᒋᐊᕈᑎ


ᑕᑯᒋᐊᕐᓗᒍ ᑖᓐᓇ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑐᐊᒐᕐᓄᑦ ᐅᖃᓕᒫᒐᖅ ᕿᒥᕐᕈᐊᓂᕐᒧᑦ ᑕᒪᐃᓐᓂ ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᑐᐊᒐᖁᑎᖏᓐᓂᒃ ᐊᒻᒪᓗ ᑖᓐᓇ ᐊᐅᓚᑦᑎᓂᕐᒧᑦ ᑲᑎᒪᔨᑦ ᑐᑭᒧᐊᕈᑎᖏᑦ ᕿᒥᕐᕈᐊᓂᕐᒧᑦ ᑕᒪᐃᓐᓂᒃ ᐊᐅᓚᑦᑎᓂᕐᒧᑦ ᑐᑭᒧᐊᕈᑎᓂ.

 

ᐊᒡᓚᒡᕕᑦ ᒪᑐᓯᒪᓂᖏᑦ

ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐃᖃᓗᖕᓂ ᐊᒡᓚᒡᕕᖓ ᒪᑐᓯᒪᓛᖅᑐᑦ ᓄᓇᕗᑦ ᐅᓪᓗᖓᓂ ᓯᑕᒻᒥᖅ, ᔪᓚᐃ 9 ᐊᒻᒪ ᒪᑐᐃᒃᑲᓐᓂᕐᓗᓂ ᑕᓪᓕᒻᒥᖅ, ᔪᓚᐃ 10, 8:30 ᐅᓪᓛᒃᑯᑦ.


ᐃᖅᑲᓇᐃᔭᖅᑎᓄᑦ ᐊᑦᑕᓇᖅᑐᓂᒃ ᐊᒻᒪ ᓇᓪᓕᐅᒃᑯᒫᓂᒃ ᖃᐅᔨᓴᖅᑏᑦ ᐊᒡᓚᒡᕕᖏᑦ ᒪᑐᓯᒪᓛᖅᑐᑦ ᓯᕕᒃ ᕿᑲᕐᓇᒥ ᓇᒡᒐᔾᔭᐅᒥ, ᐋᒡᒌᓯ 3 ᐊᒻᒪᓗ ᒪᑐᐃᒃᑲᓐᓂᕐᓗᓂ ᐊᐃᑉᐱᖅ, ᐋᒡᒌᓯ 4, ᐅᓪᓛᒃᑯᑦ 8:30.


ᐅᖃᓗᒋᑦ 1-800-661-0792-ᒧᑦ ᐅᓂᒃᑳᕆᓂᕐᒧᑦ ᐱᒻᒪᕆᐅᔪᒥ ᐃᖅᑲᓇᐃᔭᕐᕕᖕᒥ ᐋᓐᓂᖅᑐᒧᑦ ᐅᕝᕙᓘᓐᓃᑦ ᖃᓄᐃᓐᓂᐅᔪᓂᑦ.


ᖃᐅᔨᒃᑲᐃᒍᒪᒍᕕᑦ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ, ᐊᑐᕐᓗᒍ ᐅᓇ ᖃᕋᓴᐅᔭᑎᒍᑦ ᖃᐅᔨᒃᑲᐃᓂᖅ ᐊᑦᑕᓇᖅᑐᒥ ᐃᖅᑲᓇᐃᔭᕐᓂᕐᒥᒃ ᐱᔨᑦᑎᕈᑎᓂ ᑕᐃᑲᓂ WSCC Connect.

 
 
 

wscc.nt.ca 1.800.661.0792 | wscc.nu.ca 1.877.404.4407