Gorffennaf 2022
‌
Cyfarwyddwr Cyllid Iechyd a Gofal Digidol Cymru yn ennill Arweinydd Cyllid y Flwyddyn mewn gwobrau cenedlaethol
Enillodd Claire Osmundsen-Little, Cyfarwyddwr Cyllid a Dirprwy Brif Weithredwr Iechyd a Gofal Digidol Cymru deitl ‘Arweinydd Cyllid y Flwyddyn’ yng Ngwobrau Swyddogaeth Cyllid Digidol.
 
Mae Gwobrau Swyddogaeth Cyllid Digidol yn cydnabod gwaith caled timau arloesol a’u partneriaid technoleg. Aeth Claire i’r seremoni wobrwyo yn Llundain gydag aelodau o’i thîm, a dywedodd,

“Rwyf wrth fy modd fy mod wedi cael fy enwi’n Arweinydd Cyllid y Flwyddyn – prin fod angen dweud na allwn fod wedi gwneud hynny heb y tîm gwych yr wyf yn ei arwain ac rwy’n ddiolchgar iawn iddynt i gyd.”

Cynhaliwyd y digwyddiad gan Generation CFO, sef sefydliad sy’n dathlu’r unigolion a’r timau yn y diwydiant cyllid a chyfrifyddu sy’n defnyddio technoleg ddigidol i helpu i wella eu busnes a’u gyrfaoedd eu hunain.
Iechyd a Gofal Digidol Cymru yn llofnodi Cyfamod y Lluoedd Arfog gan addo cefnogi Cymuned y Lluoedd Arfog

Mae Iechyd a Gofal Digidol Cymru (DHCW) wedi llofnodi Cyfamod y Lluoedd Arfog, sy'n dangos ei ymrwymiad i gefnogi cymuned y Lluoedd Arfog. 

Llofnododd Helen Thomas, Prif Swyddog Gweithredol DHCW, gyfamod a sefydlwyd gan lywodraeth y DU yn gynharach eleni i ddatblygu perthynas DHCW â'r gymuned filwrol a helpu i adeiladu mwy o lwybrau gyrfa i bersonél y lluoedd arfog sy'n ail-ymuno â bywyd sifil. 
Dywedodd Sarah Brooks, Arweinydd Datblygu Sefydliadol, Diwylliant ac Ymgysylltu: 
"Rydym yn cydnabod y gwerth y gall personél sy'n gwasanaethu, cyn-filwyr a theuluoedd milwrol ei gynnig i'n gweithlu. Wrth symud ymlaen, byddwn yn adolygu ein harferion recriwtio, gan ddatblygu ein perthynas â chymuned y Lluoedd Arfog i hyrwyddo DHCW fel Sefydliad milwrol-gyfeillgar." 

I nodi Wythnos y Lluoedd Arfog, siaradodd David Rees, Cyn-filwr a bellach yn hwylusydd Dysgu a Datblygu yn DHCW am ei gyfnod yn y Fyddin Brydeinig a sut mae'r sgiliau a ddysgodd wedi trosglwyddo i'w rôl bresennol, "Yn 2007 ar ôl gadael y Fyddin roeddwn i'n cael trafferth addasu i fywyd sifil, doedd gen i ddim syniad beth roeddwn i wir eisiau ei wneud gyda fy mywyd. Yn amlwg, mae moeseg gwaith sifil yn wahanol, ac roeddwn i’n cael trafferth dod o hyd i unrhyw beth yr oeddwn yn ei fwynhau'n fawr. Felly, gan fy mod yn hyfforddwr yn y lluoedd arfog, penderfynais gofrestru ar gwrs prifysgol i ennill fy nghymwysterau addysgu. Credaf y gall y gwaith caled a wnaethoch, p’un a yw yn y Lluoedd Arfog neu mewn bywyd sifil, fod yn werth chweil ac mae wedi fy ngalluogi heddiw i ddod yn aelod allweddol o fewn DHCW yn Hwylusydd Dysgu a Datblygu." 
Gwasanaethau canser y colon a'r rhefr i elwa o ddangosfwrdd newydd
 
Mae dangosfwrdd cenedlaethol newydd wedi'i lansio a fydd yn nodi tueddiadau mewn canser y colon a'r rhefr ac yn caniatáu i glinigwyr yng Nghymru addasu gwasanaethau ar gyfer gwell gofal i gleifion.
 
Mae'r Dangosfwrdd Canser y Colon a’r Rhefr Cenedlaethol yn defnyddio data o sawl ffynhonnell, gan gynnwys yr Archwiliad Cenedlaethol Canser y Coluddyn. Mae’n galluogi clinigwyr ym myrddau iechyd Cymru i adnabod meysydd sy'n gofyn am newidiadau y mae angen eu gwneud er mwyn lleihau amseroedd aros neu i leddfu rhwystrau gwasanaethau yn hawdd. 
 
Fe'i datblygwyd ar y cyd rhwng arbenigwyr gwybodaeth Canolfan Gwerth mewn Iechyd Cymru a Iechyd a Gofal Digidol Cymru, Cydweithrediad Iechyd GIG Cymru a chlinigwyr o Fenter Canser y Coluddyn.
 
Ar hyn o bryd, mae clinigwyr yn defnyddio'r dangosfwrdd i roi adborth cynnar ar ei allu. Bydd yr adborth hwn yn llywio datblygiad sydd eisoes ar y gweill ymhellach. Y cam nesaf, a fydd yn cael ei gwblhau yn ddiweddarach eleni, fydd ychwanegu metrigau ansawdd llawfeddygol ac oncolegol a data goroesi.
 
Mae data byw ar Berfformiad y Llwybr Canser Sengl wedi'i gynllunio i’w rhyddhau yn y dyfodol.
Dangosfwrdd myeloma cenedlaethol yn cael ei gydnabod yn seremoni Moondance
Rhoddwyd sylw i ddangosfwrdd canser cenedlaethol yn ystod y seremoni enwebu yng Ngwobrau Canser Moondance eleni, gan dynnu sylw at dimau a phobl ar draws GIG Cymru a'i bartneriaid sy'n arloesi gwasanaethau canser ledled Cymru. 
 
Mae Dangosfwrdd Myeloma Cenedlaethol Cymru yn cefnogi ehangu'r gwasanaethau myeloma presennol yng Nghymru drwy gofnodi gweithgarwch timau clinigol o ran nifer y cleifion sy'n cael diagnosis o myeloma y flwyddyn, dadansoddiad o'r trefnau cemotherapi a gânt ac effaith y triniaethau hyn o ran goroesi ac ansawdd bywyd. Gellir defnyddio'r dangosfwrdd hefyd i
ddadansoddi sut mae cleifion yn cael diagnosis o myeloma a nodi unrhyw fylchau yn y llwybr a allai gyfrannu at golli neu ohirio diagnosis.
 
Mae'r dangosfwrdd yn defnyddio data o'r Warws Data Cenedlaethol a Thaflen Barhad Cleifion Allanol Haembase Cymru, a ddatblygwyd mewn partneriaeth rhwng Canolfan Gwerth mewn Iechyd Cymru, Timau Adnoddau Data Cenedlaethol a Gwasanaethau Gwybodaeth Iechyd a Gofal Digidol Cymru. Cyhoeddir y dangosfwrdd ym meddalwedd PowerBI Microsoft a gall unrhyw un yn GIG Cymru sydd â chyfrif NADEX a Office 365 ei weld.
 
Myeloma lluosog yw'r canser gwaed sy’n lladd y mwyaf o bobl yn y DU ac mae'n achosi mwy na 100 o farwolaethau yng Nghymru bob blwyddyn.
Cael dweud eich dweud yn ein ymgyngoriad Cynllun Iaith Gymraeg

Mae Iechyd a Gofal Digidol Cymru yn sefydliad cenedlaethol sydd wedi ymrwymo i ddefnyddio ac i hyrwyddo'r Gymraeg. Mae ein Cynllun Cymraeg yn adeiladu ar y gwaith blaenorol a wnaed fel sefydliad a letywyd gan Ymddiriedolaeth GIG Prifysgol Felindre. Mae'r Cynllun Cymraeg yn ein galluogi i ddangos ein hymrwymiad i ddefnyddio a hyrwyddo'r Gymraeg ar draws ein sefydliad ac i ddatblygu gwasanaethau dwyieithog cryfach wrth i'r gofynion ar draws y GIG newid ac ehangu.
 
Mae'r Cynllun Cymraeg hwn yn berthnasol i’r sefydliad cyfan, ac mae gan bob un ohonom gyfrifoldeb i fod yn gyfarwydd â'r gofynion a amlinellir ynddo. Byddwn yn chwilio'n barhaus am ffyrdd o wella ein defnydd ac o hyrwyddo'r Gymraeg yn fewnol a chyda rhanddeiliaid allanol.
 
Mae ein Cynllun Cymraeg newydd yn agored i ymgynghoriad tan 30 Medi 2022. 
 
Rydym am glywed eich barn am y cynllun: ebostiwch ni i rannu eich barn.
 
I gael rhagor o wybodaeth, edrychwch ar Cynlluniau iaith Gymraeg (comisiynyddygymraeg.cymru).
Cyfarfod Cyffredinol Blynyddol - 28 Gorffennaf 2022
Bydd Iechyd a Gofal Digidol Cymru yn cynnal ei Gyfarfod Cyffredinol Blynyddol rhithwir cyntaf ddydd Iau, 28 Gorffennaf, a gwahoddir y cyhoedd a rhanddeiliaid i fod yn bresennol.
Bydd y ddigwyddiad eleni yn cael ei gynnal trwy Zoom a’i ffrydio’n fyw am 14:00.

Cyhoeddir rhagor o fanylion ar ein gwefan.