DHCW yn ennill 'Y Lle Gorau i Weithio ym maes TG'
Mae Iechyd a Gofal Digidol Cymru wedi ennill y 'Y Lle Gorau i Weithio ym maes TG' eleni.
Caiff y wobr Diwydiant TG y DU gan Gymdeithas Cyfrifiadura Prydain (BCS) ei dyfarnu i sefydliadau sy'n darparu'r cyfleoedd cyflogaeth a gyrfa gorau ar gyfer gweithwyr TG proffesiynol.
Tynnodd y beirniaid sylw at werth ein sefydliad i TG, ei ymrwymiad i amrywiaeth a chynhwysiant yn ogystal â datblygu sgiliau a gyrfaoedd staff.
"Rydym yn falch iawn o dderbyn y wobr hon," meddai Helen Thomas, ein Prif Swyddog Gweithredol. “Mae’n llwyddiant gwych i bob un ohonom a hoffwn ddiolch i holl staff DHCW sy’n ei wneud yn lle gwych i weithio. Rydym yn falch iawn o’r gwaith rydym yn ei wneud i helpu GIG Cymru i ddefnyddio digidol i ddarparu gofal gwell.
Roedd Tracy Norris, Arweinydd Desg Wasanaeth DHCW, hefyd wedi cyrraedd rownd derfynol y categori Gweithiwr Proffesiynol Gwasanaethau a Chymorth TG y Flwyddyn gan gydnabod ei hymrwymiad i ddarparu gwasanaeth TG o ansawdd uchel, cymorth neu hyfforddiant i ddefnyddwyr systemau TG, a chwrdd ag amcanion allweddol ar gyfer bodloni cwsmeriaid a darpariaeth y lefelau gwasanaeth y cytunwyd arnynt.
|
|
Rhyddhau Ap GIG Cymru yng nghyfnod cynnar Beta
O'r mis hwn ymlaen, mae Gwasanaethau Digidol i Gleifion a'r Cyhoedd (DSPP) yn sicrhau bod tua 1000 o grwpiau o ddefnyddwyr a ddewiswyd ymlaen llaw mewn 10 practis meddyg teulu ledled Cymru ar gael i brofi Ap GIG Cymru. Bydd y garreg filltir gyffrous hon a elwir yn gam Beta Preifat yn galluogi defnyddwyr i roi Ap GIG Cymru ar brawf yn ddiogel a rhoi gwybod am unrhyw broblemau neu fygiau yn y cyfnod prawf.
Bydd y defnyddwyr a ddewiswyd yn profi ystod o swyddogaethau a nodweddion a fydd yn cael eu cynnwys yn lansiad cyhoeddus cyntaf Ap GIG Cymru.
Bydd modd dilysu a gwirio cyfrif gyda manylion mewngofnodi GIG. Unwaith y gwneir hyn, bydd defnyddwyr yn gallu manteisio ar dechnoleg eu dyfais gan ddefnyddio olion bysedd a’r dull adnabod wynebau i gael mynediad i'w Ap. Ar gyfer defnyddwyr nad oes ganddynt fynediad i’r dyfeisiau hyn, mae fersiwn gwefan ar gael sy'n caniatáu mynediad drwy broses debyg, wedi'i diogelu gan gyfrinair.
Mae Ap GIG Cymru wedi’i dylunio a’i frandio yn unol â phecyn cymorth brand GIG Cymru. Mae'r Ap yn bodloni safonau hygyrchedd llym a bydd yn hygyrch i gynulleidfaoedd â nam ar eu golwg.
|
|
Cam mawr ar gyfer rhagnodi a rheoli meddyginiaethau yn electronig yn ysbytai Cymru
Cytunwyd ar gontract fframwaith ar gyfer e-ragnodi a gweinyddu meddyginiaethau newydd a gwell mewn ysbytai. Bydd dyfarnu'r contract yn galluogi ysbytai yng Nghymru i osod y dechnoleg ddigidol ddiweddaraf ar gyfer rhagnodi a rheoli'r broses o weinyddu meddyginiaethau.
Mae'n golygu y bydd cleifion a gweithwyr gofal iechyd proffesiynol, dros amser, yn sylwi ar welliannau yn y modd y rheolir gwybodaeth am feddyginiaethau a meddyginiaethau cleifion. Mae gan y fframwaith opsiwn o dri chyflenwr i fyrddau iechyd ddewis ohonynt, ac mae ar gael o fis Tachwedd 2022.
|
|
Partneriaeth newydd i ddarparu'r datrysiadau presgripsiynu digidol gorau ar gyfer GIG Cymru
Cyhoeddir partneriaeth arloesol rhwng y Ganolfan Gwasanaethau Cyhoeddus Digidol ac Iechyd a Gofal Digidol Cymru i ganolbwyntio ar ddarparu presgripsiynu electronig newydd sy’n fwy diogel, yn fwy effeithiol ac effeithlon, i gleifion a gweithiwr gofal iechyd proffesiynol ledled Cymru.
Bydd y bartneriaeth yn dod ag arbenigedd o’r ddau sefydliad ynghyd i ddeall yr hyn sy’n bwysig i gleifion a gweithwyr gofal iechyd proffesiynol fel bod dyluniad a darpariaeth gwasanaethau digidol yn cwrdd â’u hanghenion.
Yng ngham cyntaf y gwaith partneriaeth, cynhelir ymchwil i ddilyn 'taith y defnyddiwr' wrth i staff a chleifion ddefnyddio'r gwasanaethau presgripsiwn a meddyginiaeth papur sydd eisoes yn bodoli.
Bydd yn digwydd rhwng nawr a diwedd y flwyddyn a bydd yn archwilio’r camau yn nheithiau defnyddwyr presennol i nodi cyfleoedd ar gyfer gwelliannau i ddatrysiadau digidol newydd, yn seiliedig ar adborth a phrofiad defnyddwyr. Bydd hyn yn sicrhau bod gwasanaethau newydd yn darparu'r canlyniadau gorau ac yn gwneud y broses gyfan yn haws, yn fwy diogel ac yn fwy effeithlon i bawb.
|
|
Dwy raglen ddigidol genedlaethol yn trosglwyddo i Iechyd a Gofal Digidol Cymru
Mae Grŵp Gweithredol Cydweithrediaeth Iechyd GIG Cymru wedi cytuno y bydd Rhaglenni Digidol Rhwydwaith Gwybodaeth Labordai Cymru (LINC) a Chaffael y System Gwybodeg Radioleg (RISP) yn trosglwyddo i Iechyd a Gofal Digidol Cymru (DHCW).
DHCW yw’r awdurdod contractio ar gyfer y prif gytundeb gwasanaethau ar hyn o bryd ar gyfer y System Rheoli Gwybodaeth Labordy newydd a hwn fydd yr awdurdod contractio ar gyfer y System Gwybodeg Radioleg sy’n cael ei chaffael ar hyn o bryd. Bydd y trefniadau newydd yn galluogi DHCW i reoli gweithrediad a risgiau cysylltiedig y rhaglenni hyn.
Bydd yn golygu y bydd aelodau staff sy’n gweithio ar hyn o bryd ar y rhaglenni LINC a RISP ar gyfer y Gydweithrediaeth (a letyir gan Iechyd Cyhoeddus Cymru), yn dod yn gyflogeion i DHCW.
|
|
Iechyd a Gofal Digidol Cymru i arwain a galluogi Ymchwil ac Arloesi
Mae Iechyd a Gofal Digidol Cymru yn rhoi ffocws o’r newydd ym maes ymchwil ac arloesi, gan ddatblygu’r gwaith y mae eisoes yn ei wneud gyda sefydliadau partner ledled Cymru ym meysydd gwella, arloesi ac ymchwil yn iechyd a gofal cymdeithasol.
Gall ymchwil ac arloesi gynyddu effeithiolrwydd ac effeithlonrwydd gofal iechyd a gall gefnogi sefydliadau a gwasanaethau gofal iechyd i ddarparu gwell gofal i bobl.
Bydd tîm a swyddogaeth bach, penodedig yn cydlynu ac yn cefnogi gwaith ymchwil ac arloesi ar draws Iechyd a Gofal Digidol Cymru a byddant yn ychwanegu at y gwaith sydd eisoes yn digwydd. Dywedodd Rachael Powell, Cyfarwyddwr Cyswllt Gwybodaeth, Deallusrwydd ac Ymchwil.
|
|
Cafodd Marilyn Bryan-Jones aelod Bwrdd Annibynnol Iechyd a Gofal Digidol Cymru ei chanmol am ei chyfraniadau at gydraddoldeb hiliol a chynhwysiant
Mae Marilyn Bryan-Jones, a benodwyd yn Aelod Bwrdd Annibynnol Iechyd a Gofal Digidol Cymru yn ddiweddar, wedi ennill gwobr yng Ngwobrau Cymunedol Cenedlaethol Hanes Pobl Dduon 2022 am ei chyfraniadau at gydraddoldeb hiliol a chynhwysiant.
Mae Hanes Pobl Dduon Cymru yn ymgysylltu, yn addysgu ac yn grymuso unigolion, grwpiau cymunedol a chymunedau ledled Cymru i gydnabod a gwerthfawrogi’r cyfraniad a wnaed gan bobl Dduon yn hanes datblygiad economaidd a diwylliannol Cymru. Ei nod gwreiddiol oedd dathlu pobl o dras Caribïaidd ac Affricanaidd, ond bellach mae hyn wedi’i ymestyn i gynnwys pob cymuned Ddu, Asiaidd a Lleiafrifoedd Ethnig. Mae hefyd yn caniatáu i’r gymuned ehangach i gymryd rhan, dysgu a dathlu gyda’i gilydd i hyrwyddo dealltwriaeth a rhannu ein hanes byd-eang.
|
|
Mae Gwasanaeth Profi a Thrin Dolur Gwddf (STTT) Dewis Fferyllfa yn hybu stiwardiaeth sgrinio heintiau
Mae fferyllwyr cymunedol yng Nghymru yn defnyddio gwasanaeth canfod bacteria i annog cleifion i sgrinio rhag heintiau.
Mae gwasanaeth Profi a Thrin Dolur Gwddf (STTT) Dewis Fferyllfa yn hyrwyddo stiwardiaeth gwrthficrobaidd trwy ddefnyddio dull cam wrth gam ar gyfer archwiliad clinigol gan fferyllydd. Mae hyn hefyd yn annog cleifion sy’n bodloni’r meini prawf i ddefnyddio’r gwasanaeth swab dolur gwddf yn y fan a’r lle i sgrinio rhag heintiau bacterol. Os na chanfyddir bacteria, mae’n debyg mai firws sy’n achosi’r dolur gwddf - sy’n golygu na fyddai gwrthfiotigau yn helpu. Bydd canlyniadau swab gwddf ar gael mewn munudau ac os oes haint bacterol yn bresennol a bod gwrthfiotigau’n gallu helpu’r claf, gall y fferyllydd eu darparu.
Dim ond ar ôl i'r fferyllydd drafod y manteision a'r niwed posibl y caiff gwrthfiotigau eu rhoi, gan gynnwys ymwrthedd i wrthfiotigau. Anfonir canlyniadau yn ddigidol at feddyg teulu'r claf trwy Dewis Fferyllfa, y seilwaith digidol a ddatblygodd Iechyd a Gofal Digidol Cymru i gefnogi darparu gwasanaethau mewn fferyllfeydd cymunedol yng Nghymru.
Mewn cyfarfod Ymchwil Heintiau yn Sweden yn ddiweddar, siaradodd Dr Efi Mantzourani, Rheolwr Ymchwil a Gwerthuso Clinigol Iechyd a Gofal Digidol Cymru a Darllenydd yn yr Ysgol Fferylliaeth a Gwyddorau Fferyllol ym Mhrifysgol Caerdydd, ag aelodau o GRIN (y Rhwydwaith Ymchwil Heintiau ar gyfer Practis Cyffredinol) - Rhwydwaith Ewropeaidd o ymchwilwyr sy'n astudio heintiau'r llwybr anadlol a heintiau eraill ym maes gofal sylfaenol am fanteision y gwasanaeth.
Cyflwynodd ganlyniadau gan gynnwys gwerthusiad hirdymor o’r gwasanaeth, ac roedd 94% o'r cleifion a dderbyniodd ymgynghoriad gwasanaeth Profi a Thrin Dolur Gwddf (STTT) yn nodi y byddent wedi gwneud apwyntiad gyda meddyg teulu neu’r gwasanaethau brys pe na bai’r gwasanaeth ar gael. Arweiniodd un o bob pump ymgynghoriad at gyflenwi gwrthfiotigau – gan bwysleisio’r rhan ganolog y gall fferyllwyr cymunedol ei chwarae mewn stiwardiaeth gwrthficrobaidd. Clywodd cynrychiolwyr hefyd am sut mae Iechyd a Gofal Digidol Cymru yn gweithio gyda chronfa ddata SAIL i edrych ar ragor o ddata a fydd yn helpu i werthuso'r gwasanaeth a phrofiad y claf.
“Roedd hyrwyddo gwerth Dewis Fferyllfa mewn cyfarfod rhyngwladol yn ysbrydoliaeth, heb hynny ni fyddem wedi gallu cael data cenedlaethol ar ymgynghoriadau gwasanaeth Profi a Thrin Dolur Gwddf (STTT),” meddai Dr Efi Mantzourani. “Mae’n fraint i ni yng Nghymru gael yr adnodd hwn, ac rwy’n gobeithio cynrychioli Iechyd a Gofal Digidol Cymru mewn cyfarfodydd yn y dyfodol i gyflwyno holl ddatblygiadau’r system.”
|
|
Cyhoeddi Cyfarwyddwr Gweithredol Gweithrediadau newydd
Mae’n bleser gan Iechyd a Gofal Digidol Cymru gyhoeddi penodiad Sam Lloyd i swydd Cyfarwyddwr Gweithredol Gweithrediadau.
Bydd y rôl yn gyfrifol am weithredu a darparu strategaeth ddigidol uchelgeisiol a thrawsnewidiol ar gyfer Iechyd a Gofal Digidol Cymru.
Mae Sam yn ymuno â’r tîm yn dilyn 19 mlynedd o brofiad mewn rolau arwain technoleg ar draws y sector iechyd, gan gynnwys fel Pennaeth Technoleg ar gyfer Iechyd Cyhoeddus Lloegr a fwyaf diweddar fel Pennaeth Gweithle, Lletya a Rheoli Gwasanaeth adeg ffurfio y Asiantaeth Diogelwch Iechyd y DU (UKHSA). Mae UKHSA yn gyfrifol am ddiogelu pob aelod o bob cymuned rhag effaith clefydau heintus, digwyddiadau cemegol, biolegol, radiolegol a niwclear a bygythiadau iechyd eraill.
Yn ystod ei gyfnod yn UKHSA a rolau blaenorol yn Iechyd Cyhoeddus Lloegr a’r Asiantaeth Diogelu Iechyd, mae Sam wedi bod yn gyfrifol am sefydlu galluedd technoleg o’r radd flaenaf a defnyddio digidol, technoleg a data i wella canlyniadau iechyd y cyhoedd.
Pan ofynnwyd iddo am ei rôl newydd, dywedodd Sam ““Mae DHCW yn sefydliad cyffrous ac mae ganddo genhadaeth hollbwysig. Mae'r pandemig wedi tynnu sylw arbennig at y rôl hanfodol y mae’r byd digidol a thechnoleg yn ei chwarae wrth helpu sefydliadau i arloesi, cyflymu cynnydd a chyrraedd cwsmeriaid mewn ffyrdd newydd. Rwy’n credu bod DHCW yn ymateb i'r her hon. Rwy'n edrych ymlaen yn fawr at ymuno â’r sefydliad a chwarae fy rhan wrth inni barhau i drawsnewid darpariaeth Iechyd a Gofal yng Nghymru.”
Rydym i gyd yn edrych ymlaen at groesawu Sam i deulu Iechyd a Gofal Digidol Cymru ym mis Ionawr.
|
|
|
|
|
|
|
